1. Pengorbanan aha do na ibahen juakjuak ni Naibata, janah mase?

SONARI ON, bahat do juakjuak ni Naibata na dob mambahen pengorbanan. Dong na mamilih lang marhajabuan. Dong homa pasangan na mamutuskon lang marniombah lobei. Dong kaluarga-kaluarga na mangkasonangkon aha na adong hassi pe otik. Ganupan sidea mambahen sonai halani sihol mambere gok panorang laho mangidangi Jahowa. Pos do uhur ni sidea ipasirsir Jahowa do ganup haporluanni. Ai soya-soya do pambahenan ni sidea ai? Lang! Hunja ibotoh hita ai? Bahat do contoh hinan na patuduhkon sai ipasirsir Jahowa do haporluan ni juakjuak-Ni. Umpamani, ipasu-pasu Jahowa do si Abraham, ‘bapa bani sagala na porsaya’ in.​—Rom 4:11.

2. (a) Domu bani Heber 11:8-10, 16, mase si Abraham ra manadingkon huta Ur? (b) Aha do na laho iulas hita bani artikel on?

² Sirsir do si Abraham manadingkon rumahni i huta Ur, hape domma sonang goluhni ijai. Mase? Halani sai ipaima-ima ia do “huta na maronjolan na totap”. (Basa Heber 11:8-10, 16.) “Huta” aha do na imaksud? Aha do tantangan ni si Abraham sanggah ia paima-imahon huta ai? Anjaha sonaha hita boi mangusihi si Abraham pakon sanina botou na domma mangusihisi?

3. Huta aha do na ipaima-ima si Abraham?

³ Harajaon ni Naibata do huta na ipaima-ima si Abraham ai. Jesus Kristus do rajani, janah dong 144.000 halak na dihut mamarentah rap pakonsi. Isarupahon apostel Paulus do Harajaon ai songon “huta ni Naibata na manggoluh in, ai ma Jerusalem na i nagori atas”. (Heb. 12:22; Pangk. 5: 8-10; 14:1) Iajarhon Jesus do susianni ase manonggohon roh Harajaon ai. Anggo roh Harajaon ai, saud ma harosuh ni Naibata i tanoh on songon i nagori atas.​—Mat. 6:10.

4. Domu bani 1 Musa 17:1, 2, 6, aha ma na ibotoh si Abraham pasal huta atap Harajaon na ijanjihon Naibata ai?

⁴ Ai ibotoh si Abraham do sonaha holi Harajaon ni Naibata ai iorganisasi? Lang. Gabe “rusia” do ai sadokah marribu tahun. (Ep. 1:8-10; Kol. 1:26, 27) Tapi ibotoh si Abraham dong do holi ginomparni na gabe raja, songon na dob ijanjihon Jahowa hu bani. (Basa 1 Musa 17:1, 2, 6.) Halani porsaya tumang ia bani janji ai, songon na dob ididah ia do Mesias, na laho gabe Raja bani Harajaon ni Naibata ai. Halani ai, sonon ma ihatahon Jesus bani halak Jahudi hinan, “Marolob-olob do si Abraham, bapa nasiam in, halani sihol idahonni ari-kin, jadi saud do ididah, gabe malas ma uhurni.” (Joh. 8:56) Tangkas ma, ibotoh si Abraham dong do holi ginomparni na gabe bagian humbani Harajaon na ipajongjong Jahowa. Janah sai ipaima-ima ia do saud janji ni Jahowa ai.

5. Hunja ibotoh hita anggo si Abraham paima-imahon huta na pinauli ni Naibata?

⁵ Sonaha si Abraham patuduhkon anggo ia paima-imahon huta, atap Harajaon ni Naibata ai? Na parlobei, lang ra si Abraham gabe warga i sada nagori. Sai marpindah-pindah do ia hun sada ianan hu ianan na legan. Janah, lang homa ra ia gabe bagian humbani sada harajaon i tanoh on. Leganni ai, lang marusaha ia pajongjongkon harajaonni sandiri. Tapi totap do ia unduk hubani Jahowa, janah sai ipaima-ima do saud janji-Ni ai. Hunjon taridah ma banggal tumang do haporsayaonni hubani Jahowa. Ulas hita ma piga-piga tantangan na roh hu bani, janah parlajaran aha do na boi dapot hita hunjai.

6. Huta na sonaha do Ur ai?

⁶ Huta na maju do huta Ur, na itadingkon si Abraham ai. Bahat do halak na pentar ijai. Jago do sidea manulis pakon maretong. Janah bahat do homa halak na bayak ijai. Aman do homa huta ai halani dong tembok pakon sungai na mangalilingi huta ai. Humbani penemuan  arkeolog ibotoh hita bahat do ra halak na martiga-tiga ijai. Rumahni pe ipajongjong humbani batu bata na isemen ampa marcat sibontar. Piga-piga rumah dong 13 atap 14 kamarni, anjaha marlante tehel do alamanni.

7. Mase maningon pos uhurni si Abraham ilinggomi Jahowa do ia pakon kaluargani?

⁷ Maningon pos do uhur ni si Abraham anggo Jahowa manlinggomi ia pakon kaluargani. Mase? Songon na ipatugah nongkan ai, domma itadingkon sidea huta Ur. Sonari, tading ibagas tenda do sidea, dohor hun Kanaan. Lang adong be tembok pakon sungai na mangalilingi sidea. Gabe urah ma munsuh laho mandorab sidea.

8. Bani sada panorang, aha do na masa hubani si Abraham?

⁸ Ihorjahon si Abraham do harosuh ni Naibata. Tapi, bani sada panorang masa ma kelaparan i nagori na iiankon si Abraham. Gabe sunsah ma ia mansarihon kaluargani. Halani parah tumang kelaparan ai, iboan ia ma kaluargani pindah hu Masir. Hape ijai, roh ma Parao, raja ni nagori ai mambuat istrini. Tontu sunsah tumang uhur ni si Abraham halani ai. Tapi ibahen Jahowa ma ase ipaulak Parao si Sarah hu bani.​—1 Mus. 12:10-19.

9. Hasunsahan aha ope na dong bani kaluarga ni si Abraham?

⁹ Sunsah tumang do parrumahtanggaon ni si Abraham. Si Sarah, istri na hinaholonganni ai lang boi marniombah. Sadokah marpuluh tahun pusok ma uhur ni sidea halani ai. Ujungni, ibere si Sarah ma si Hagar, jabolonni ai hubani si Abraham, ase boi sidea dapotan anak hunjai. Tapi sanggah hamil si Hagar, gabe pis ma matani mangidah si Sarah. Gabe lambin parah do situasini halani iusir si Sarah do si Hagar.​—1 Mus. 16:1-6.

10. Aha do na masa hubani si Ismael pakon si Isak, na manguji haporsayaon ni si Abraham?

¹⁰ Ujungni, hamil ma si Sarah janah itubuhkon ma si Isak. Holong tumang do uhur ni si Abraham hubani si Ismael pakon si Isak, haduasi anakni ai. Tapi halani jahat si Ismael bani si Isak, tarpaksa ma iusir si Abraham si Ismael pakon si Hagar. (1 Mus. 21:9-14) Dob ai, ipindo Jahowa ma ase igalangkon si Abraham si Isak. (1 Mus. 22:1, 2; Heb. 11:17-19) Sanggah masa ganupan ai, maningon porsaya do si Abraham saud do holi janji ni Jahowa pasal ginomparni.

11. Mase maningon sabar si Abraham paimahon Jahowa?

¹¹ Sadokah goluhni, gabe ibotoh si Abraham ma maningon sabar do ia paimahon Jahowa. Sanggah ia pakon kaluargani manadingkon huta Ur, ra do domma marumur 70 tahun lobih ia. (1 Mus. 11:31–12:4) Janah saratus tahun lobih ma ia marianan ibagas tenda-tenda i nagori Kanaan. Dobkonsi marumur 175 tahun, matei ma ia. (1 Mus. 25:7) Tapi lape ididah si Abraham ibere Jahowa nagori na ijanjihon ai hubani ginomparni. Anjaha sedo sanggah goluhni jongjong Harajaon ni Naibata. Hassi pe sonai, Bibel mangkatahon ‘matei sayurmatua’ do si Abraham. (1 Mus. 25:8) Hassi pe bahat tumang sitarononni, tapi lambin toguh do haporsayaonni. Anjaha malas do uhurni paimahon Jahowa. Mase boi sonai? Halani sadokah goluhni, sai ilinggomi Jahowa do ia, anjaha ibahen Jahowa do ia songon hasoman-Ni.​—1 Mus. 15:1; Jes. 41:8; Jak. 2:22, 23.

12. Aha do na ipaima-ima hita, janah aha do na laho iulas hita?

¹² Songon si Abraham, ipaima-ima hita do homa huta na maronjolan na totap in. Tapi lang ipaima-ima hita ai ipajongjong,  halani domma jongjong Harajaon ni Naibata humbani tahun 1914, janah domma mamarentah ai i surga. (Pangk. 12:7-10) Tapi ipaima-ima hita do ai mamarentah hu tanoh on. Sanggah paima-imahon ai, ra do bahat sitarononta songon si Abraham pakon si Sarah. Ai adong do juakjuak ni Naibata sonari on na mangusihi haporsayaon ni si Abraham? Bani pangalaman na dong i Menara Pengawal, bahat do sanina botou na toguh haporsayaonni janah sabar songon si Abraham pakon si Sarah. Ulas hita ma piga-piga contohni, janah rimangi ma parlajaran aha do na boi dapot hita hunjai.

13. Aha do na boi iparlajari nasiam humbani Sanina Walden?

¹³ Sirsir ma mambahen pengorbanan. Anggo sihol hita palobeihon huta ni Naibata atap Harajaon-Ni ibagas goluhta, maningon sirsir ma hita mambahen pengorbanan songon si Abraham, ase malas uhur ni Naibata. (Mat. 6:33; Mrk. 10:28-30) Pardiateihon ma siusihan humbani Sanina Bill Walden. * Bani tahun 1942, sanggah si Bill mulai marlajar pakon Saksi Jahowa, laho lulus sarjana teknik arsitektur mando ia. Dong sada dosenni na pasirsirhon horja hu bani dob lulus ia. Tapi itulak si Bill do ai. Ia patorangkon domma iputuskon ia anggo ia sihol mangidangi Jahowa marimbangkon manjalo horja na dear ai. Lang piga dokah hunjai, isuruh pamarentah ma ia gabe tentara. Tapi itulak si Bill do ai. Halani ai idenda ma ia 10.000 dolar AS, janah ipenjarahon ma ia sadokah lima tahun. Tapi dobkonsi tolu tahun ibebaskon ma ia. Dob ai, Sikolah Gilead ma si Bill janah gabe misionaris ma ia i Afrika. Dobkonsi ai, marhajabuan ma ia pakon si Eva, anjaha rap mangidangi i Afrika. Bahat tumang do pengorbanan na ibahen sidea ijai. Dob piga-piga tahun, mulak ma sidea hu Amerika Serikat laho mangurus inang ni si Bill. Si Bill mangkatahon, “Malas tumang do uhurhu  anggo hudingat boi ahu mangidangi Jahowa sadokah 70 tahun lobih. Gati do ahu mangkatahon tarima kasih halani iurupi Jahowa do ahu sadokah mangidangi-Si.” Ai ra do homa nasiam mambere gok panorang laho mangidangi Jahowa?

14-15. Aha ma na boi iparlajari hita humbani Sanina pakon Botou Apostolidis?

¹⁴ Ulang ma iahap hita lang adong be sitarononta. Humbani pangalaman ni si Abraham gabe ibotoh hita ma totap do adong sitaronon ni halak, hassi pe domma mangidangi Jahowa sadokah goluhni. (Jak. 1:2; 1 Ptr. 5:9) Ai do na masa hubani Sanina Aristotelis Apostolidis. * Ia ididi bani tahun 1946 i Junani. Bani tahun 1952, martunangan ma ia pakon sada botou na margoran si Eleni. Haduasi sidea sihol mangidangi Jahowa. Hape, boritan ma si Eleni janah dong tumor bani otakni. Hassi pe domma ioperasi tumor ai, tapi dob piga-piga tahun sidea marhajabuan, dong use tumor ai. Jadi, ioperasi ma use si Eleni. Dobkonsi ai, gabe matei sabolah ma badanni janah lang boi be ia marsahap songon na somal. Hassi pe borit-boritan ia, janah sanggah ai iparburu pamarentah do sidea, totap do si Eleni on ringgas mangidangi Naibata.

¹⁵ Sadokah 30 tahun ma si Aristotelis mangurus istrini. Sanggah ai, mangidangi gabe sintua do ia, dihut bani panitia kebaktian, janah pajongjongkon Balei Kebaktian. Dob ai bani 1987, kecelakaan ma si Eleni sanggah ia marbarita. Koma ma ia sadokah tolu tahun, janah ujungni matei. Bani pangalaman ni si Aristotelis mangkatahon, “Sadokah martahun-tahun bahat tumang do sitarononku. Dong na sompong masa janah lang husangka. Jadi, borat tumang do huahap ase boi totap martahan janah lang mandolei. Hassi pe sonai, sai ipargogohi Jahowa do ahu ibagas ganupan ai.” (Ps. 94:18, 19) Hunjon ibotoh hita ma holong tumang do uhur ni Jahowa mangidah juakjuak-Ni na totap martahan hassi pe bahat sitarononni.

16. Podah aha ma na ibere Sanina Knorr hubani istrini?

 ¹⁶ Dingat ma upah i ari simagira. Upah bani ari simagira na ijanjihon Jahowa do na sai idingat si Abraham. On ma na mangurupisi boi totap martahan ibagas sitarononni. Ai do homa na totap idingat Botou Audrey Hyde * sanggah matei si Nathan H. Knorr, suamini na parlobei halani kanker, janah sanggah hona naborit Alzheimer si Glenn Hyde, suamini na paduahon. Ia mangkatahon piga-piga minggu paima matei suamini na parlobei, dong podah na boi mangurupisi totap marmalas ni uhur. Ia mangkatahon, “Ipaingat si Nathan ma ahu, ‘Dobkonsi matei, lambin talar do pangarapanta janah lang ongga be hita marsitaronon.’ Dob ai, iojur ia ma ahu, ‘Kawahkon ma upah in.’ . . . Nini use, ‘Totap ma sibuk. Marusaha ma mangurupi na legan. On ma na mangurupi ham ase totap marmalas ni uhur.’” Dear tumang do podah ai! Maningon totap do hita sibuk mangkorjahon na madear hubani na legan janah totap “marmalas ni uhur ibagas pangarapan”!​—Rom 12:12.

17. (a) Mase lambin porsaya hita bani pangarapan i ari simagira? (b) Ase boi mandapot pasu-pasu i ari simagira, sonaha hita mandalankon podah bani Mika 7:7?

¹⁷ Sonari, lambin porsaya do hita bani pangarapan i ari simagira. Mase? Humbani na masa sonari on tangkas ma anggo hita manggoluh bani ujung ni panorang parpudi. Lang pala dokah be hita paimahon Harajaon ni Naibata mamarentah i sab tanoh on. Holi, bahat tumang do pasu-pasu na laho ijalo hita ijai. Umpamani, boi ma hita jumpah use pakon na hinaholonganta na ipapuho. Sanggah ai, ipasu-pasu Jahowa do homa si Abraham halani haporsayaon ampa hasabaronni. Ipapuho ma holi ia pakon kaluargani ase boi manggoluh i tanoh on. Ai ra do nasiam mangalo-alo sidea? Anggo ra do nasiam, tiru ma si Abraham. Sirsir ma mambahen pengorbanan bani Harajaon ni Naibata. Totap ma toguh haporsayaonmu hassi pe dong sitaronon. Anjaha totap ma sabar paimahon Jahowa.​—Basa Mika 7:7.