1. Hasangapon aha do na ibere hubanta?

HASANGAPON do boi gabe bagian humbani organisasi ni Jahowa. Tontu malas uhurta boi manombah Jahowa rap pakon sanina botou i kuria. Aha do na ihorjahon ham i kuria? Ai dong do tugasmu i kuria?

2. Limbaga aha do na igunahon si Paulus bani suratni?

² Bahat do na boi iparlajari hita humbani limbaga na dong bani surat ni apostel Paulus. Bani suratni ai, isarupahon si Paulus do kuria ai songon angkula ni jolma, anjaha tiap anggota kuria songon pagori ni angkula.​—Rom 12:4-8; 1 Kor. 12:12-27; Ep. 4:16.

3. Tolu parlajaran aha ma na laho iulas hita bani artikel on?

³ Ganup do hita boi patoguhkon sanina botou i kuria. Halani ai ma maharga do hita ganupan i lobei ni Jahowa. Lang soal bayak atap pe miskin hita, aha sukunta, sonaha hasomalan ampa sikolahta, marguna do ganupan hita ibagas kuria. Bani artikel on iulas hita ma holi tolu parlajaran na ponting na dapot hita humbani limbaga ni si Paulus. Na parlobei, iulas hita ma mase ganup hita maharga i lobei ni Jahowa. Na paduahon, iulas hita ma aha do na porlu bahenonta anggo pangahapta lang marguna hita i kuria. Anjaha na patoluhon, iulas hita ma holi mase maningon ringgas hita mandalankon tugas na ibere Jahowa.

4. Parlajaran aha do na dapot hita humbani Rom 12:4, 5?

⁴ Parlajaran na parlobei na dapot hita humbani limbaga ni si Paulus ai ma maharga do hita ganupan ibagas kuria. Sonon ma na ihatahon si Paulus sanggah laho manggunahon limbaga ai, ‘Songon sada badan, buei do pagorini, tapi seng sahorja pagori ai haganup. Sonai do homa hita na buei ai, sada badan ibagas Kristus, tapi pagori bei do hita samah hita.’ (Rom 12:4, 5) Aha do maksudni si Paulus ai? Hassi pe palegan-legan tugasta i kuria, tapi maharga do ganupan hita.

5. Aha ma “sibere-bere” na ibere Jahowa hubani kuria?

⁵ Ra do ninuhurmu pitah sidea na martanggung jawab i kuria dassa na maharga i lobei ni Jahowa. (1 Tes. 5:12; Heb. 13:17) Tongon, marhiteihon Kristus sidea do “sibere-bere” na ibere Jahowa hubani kuria. (Ep. 4:8) Tarmasuk ma ai Pangurus Pusat, asisten ni Pangurus Pusat, Panitia Cabang, sintua kaliling, sidea na mangajari i sikolah-sikolah na ibahen organisasi, sintua i kuria, ampa siparugas. Ganup sanina ai ipilih marhitei tonduy na pansing laho mansarihon biribiri ni Jahowa na maharga in ampa patoguhkon kuria.​—1 Ptr. 5:2, 3.

6. Domu bani 1 Tessalonika 2:6-8, aha do na ihorjahon sanina-sanina na martanggung jawab ibagas organisasi?

⁶ Tapi palegan-legan do tugas ni sanina-sanina ai ibagas organisasi ni Jahowa. Usih songon pagori ni badan, dong tangan, dong nahei ampa na leganni. Tapi marguna do ganupan ai bani angkulanta. Sonai ma homa sanina-sanina na ipilih nongkan ai. Hassi pe palegan-legan tugas ni sidea, tapi marguna do sidea ganupan ibagas kuria. Seng mangindahi hasangapon bani dirini sidea. Tapi marusaha do sidea laho patorsa-torsahon anjaha patoguhkon sanina botou. (Basa 1 Tessalonika 2:6-8.) Tontu martarima kasih do hita hubani Jahowa halani domma ibere hubanta sanina-sanina na lang mamontingkon diri ai.

7. Pasu-pasu aha do na idapot sanina botou na mangidangi sepenuh waktu?

⁷ Bani piga-piga kuria dong do sanina botou na ilantik gabe misionaris, perintis istimewa, atap perintis biasa. Sasintongni bahat do sanina botou i sab dunia on na mangidangi sepenuh waktu. Halani ibahen sidea sonai, gabe boi ma sidea mangurupi bahat halak ase boi gabe susian ni Jesus. Hassi pe bahatan sidea sedo halak na bayak, tapi buei do pasu-pasu na ijalo sidea humbani Jahowa. (Mrk. 10:29, 30) Tontu holong do uhurta bani sidea, anjaha martarima kasih do hita anggo dong sanina botou na sisonai ibagas kurianta.

8. Ai pitah sanina na mangidangi ibagas kuria dassa na maharga bani Jahowa?

⁸ Ai pitah sanina na martanggung jawab i kuria ampa sidea na mangidangi sepenuh waktu dassa na maharga bani Jahowa? Lang. Maharga do homa bani Naibata ganup parbarita na mangambilankon ambilan na madear. (Rom 10:15; 1 Kor. 3:6-9) Sasintongni mangurupi halak gabe susian ni Jesus do tugas na sipontingan hubanta ganupan. (Mat. 28:19, 20; 1 Tim. 2:4) Halani ai ma marusaha do ganup hita mangkorjahon ai, age pe domma ididi atap lape.​—Mat. 24:14.

9. Mase maningon ihaholongi hita ganup botou i kuria?

 ⁹ Maharga do homa bani Jahowa ganup botou ibagas kuria. Holong do uhur-Ni bani ganup inang, istri, na mabalu, ampa botou na lape marhajabuan na setia mangidangi-Si. Bani Bibel bahat do ipatugah pasal naboru-naboru na pamalaskon uhur ni Naibata. Ipuji do sidea halani toguh haporsayaonni, maruhur, ringgas mangidangi, barani, anjaha bujur marsibere-bere. (Luk. 8:2, 3; Lah. 16:14, 15; Rom 16:3, 6; Pil. 4:3; Heb. 11:11, 31, 35) Tontu dong do homa botou na sisonai ibagas kurianta. Halani ai, martarima kasih do hita bani Jahowa!

10. Mase maningon ihaholongi hita sanina botou na dob matua?

¹⁰ Malas do homa uhurta halani bahat sanina botou na dob matua ibagas kuria. Dong na domma dokah mangidangi Jahowa. Tapi dong homa na baru ope mangidangi-Si. Na leganni dong na borit-boritan halani domma matua sidea. Halani ai, lang boi be bahat na ibahen sidea ibagas partumpuan atap ibagas pangidangion. Hassi pe sonai, marusaha do sidea mambahen na sidearan sanggah marbarita atap sanggah mangojur na legan. Tontu bahat tumang do na boi iparlajari hita humbani pangalaman ni sidea ai. Anjaha maharga tumang do sidea bani Naibata, sonai homa hubanta.​—Pod. 16:31.

11-12. Sonaha na maposo i kuria boi mangojur hita?

¹¹ Dingat ma homa sidea na maposo. Halani ibagas kuasa ni hajahaton do dunia on, tontu lambin magodang sidea, lambin bahat tantanganni. (1 Joh. 5:19) Hassi pe sonai, tarojur do hita sanggah manangar komentar ni sidea i partumpuan, mangidah sidea marbarita, ampa sanggah mangidah sidea barani patugahkon haporsayaonni hubani na legan. Jadi, hanima na maposo, maharga do homa hanima i lobei ni Jahowa ampa sanina botou!​—Ps. 8:3.

 ¹² Tapi dong piga-piga sanina botou na mangahap lang marguna dirini ibagas kuria. Aha ma na boi mangurupi hita ase ulang sonai pangahapta? Eta, ulas hita ma pasal ai.

13-14. Mase dong na mangahap lang marguna sidea ibagas kuria?

¹³ Pardiateihon ma parlajaran na paduahon na boi idapot hita humbani limbaga ni si Paulus. Songon bani abad na parlobei, bahat do homa sonari sanina botou na mangahap lang marguna sidea ibagas kuria. Bani suratni, ihatahon si Paulus do, “Porini ihatahon nahei, ‘Halani seng tangan ahu, seng masuk ahu bani badan,’ mintor lang masuk badan ma ai halani ai? Anjaha porini ihatahon pinggol, ‘Halani seng mata ahu, seng masuk ahu bani badan,’ mintor lang ma masuk badan ai halani ai?” (1 Kor. 12:15, 16) Jadi, aha do na sihol ipatorang si Paulus ijon?

¹⁴ Anggo ibandingkon ham dirimu pakon na legan, ra do iahap ham lang marguna ham ibagas kuria. Ra do ididah ham i kuria dong na pandei mangajari, dong na dear mangaturhon horja, atap dong na pentar mambere apoh-apoh atap ojur-ojur. Ra do iahap ham lang boi ibahen ham songon na ibahen sidea ai. Anggo sonai pangahapmu, on patuduhkon halak na martoruh ni uhur do ham. (Pil. 2:3) Tapi, anggo lalab ibandingkon ham dirimu pakon na legan, holi gabe maretek ni uhur ma ham, janah ujungni gabe iahap ham ma lang marguna ham ibagas kuria. Jadi aha ma na boi mangurupi ham ase ulang lalab sonai pangahapmu?

15. Domu bani 1 Korint 12:4-11, mase ganup hita maharga i lobei ni Jahowa?

¹⁵ Dingat ma bani abad na parlobei ibere Jahowa do sibere-bere marhitei tonduy na pansing hubani halak Kristen. (Basa 1 Korint 12:4-11.) Tapi lang sarupa sibere-bere na ijalo sidea. Hassi pe sonai, maharga do sidea ganupan bani  Jahowa. Sonari, lang be ijalo hita sibere-bere songon ondi ai. Tapi, dong do parlajaran na boi ibuat hita. Hassi pe palegan-legan na boi ihorjahon hita, maharga do ganup hita i lobei ni Jahowa.

16. Aha do podah ni si Paulus na sihol idalankon hita?

¹⁶ Jadi marimbangkon ibandingkon hita dirinta pakon sanina botou na legan, rahanan ma anggo idalankon hita podah ni si Paulus on, “Ganup ma mamareksa horjani bei; jadi halani dirini tumang ma ia mamuji-muji diri, sedo halani na legan.”​—Gal. 6:4.

17. Sonaha podah ni si Paulus boi marguna hubanta?

¹⁷ Jadi, anggo idalankon hita podah ai janah ipareksa hita horjanta, ra do boi ididah hita dong bei do halobihanta. Umpamani, dong sintua na lang pentar padaskon ambilan. Tapi pentar do ia sanggah mangurupi halak gabe susian ni Jesus. Ra do adong sintua na lang pandei mangaturhon horja. Tapi, rosuh do ia manjalo tamu. (Heb. 13:2, 16) Atap sahalak na bujur anjaha na parholong do ia. Halani ai, ra do rosuhan sanina botou mangindo podah hun Bibel bani sintua ai. Jadi anggo boi ididah hita aha do halobihanta, gabe ibotoh hita ma aha do na porlu ihorjahon hita i kuria. Anjaha lang simburu hita bani sanina botou na dong halobihanni.

18. Sonaha ase lambin dear hita ibagas pangidangion?

¹⁸ Lang soal aha pe tugasta, maningon marusaha do hita ase lambin dear mangkorjahon ai. Bahat do ipasirsir organisasi pelatihan laho mangurupi hita. Umpamani, bani partumpuan tengah pekan, iurupi do hita ase lambin dear mangidangi. Ai marusaha do nasiam mandalankon pelatihan ai?

19. Sonaha ase boi ham mandihuti Sikolah bani Parbarita Harajaon?

¹⁹ Pelatihan na legan na ipasirsir organisasi ai ma Sikolah bani Parbarita Harajaon. Ganup sanina botou na mangidangi sepenuh waktu na marumur 23 ronsi 65 tahun boi mandaptar hu sikolah ai. Ra do nini uhurmu lang tarbahen ham dihut bani sikolah ai. Tapi, ulang ma sai ipingkiri ham aha do na manlanglangi ham boi mandihuti sikolah ai. Dearan do anggo ipingkiri ham mase ham sihol dihut bani sikolah ai. Dob ai, bahen ma rencana ase boi ham memenuhi persyaratan. Anggo torus do ham marusaha, pos ma uhurmu ipasaud Jahowa do holi ai.

20. Parlajaran aha do na boi dapot hita humbani Rom 12:6-8?

²⁰ Parlajaran na patoluhon na boi idapot hita humbani limbaga ni si Paulus dong bani Rom 12:6-8. (Basa.) Ijon pe ihatahon si Paulus do homa palegan-legan do sibere-bere na ijalo sanina botou i kuria. Tapi ipasingat ia do ase igunahon hita sibere-bere ai laho patoguhkon ampa mangojur sanina botou.

21-22. Parlajaran aha ma na idapot hita humbani pangalaman ni si Robert pakon si Felice?

²¹ Pardiateihon hita ma pangalaman ni sada hasomanta na margoran si Robert. Dob mangidangi ia i nagori na legan, itugaskon ma ia mangidangi i Betel i nagorini. Hassi pe domma ihatahon sanina botou sedo halani salahni ai, tapi nini do, “Sadokah marbulan-bulan lang boi malas uhurhu halani huahap domma lang dear huhorjahon tugasku. Sipata,  sihol do ahu maronti mangidangi i Betel.” Aha ma na boi mangurupi hasomanta on ase boi marmalas ni uhur use? Dong sada sintua na mangkatahon hubani si Robert anggo pelatihan na idapot ia sanggah mangidangi i nagori na legan boi mangurupisi laho mangkorjahon tugasni na baru. Halani ai, lang be ipadingat-dingat si Robert na salpu ai. Tapi, marusaha do ia mamingkirhon aha do na boi ihorjahon ia sonari.

²² Sonai do homa pangahap ni Sanina Felice Episcopo. Tahun 1956, lulus hun Sikolah Gilead ma ia pakon istrini, janah mangidangi gabe sintua kaliling i Bolivia. Tahun 1964, marniombah ma sidea. Si Felice mangkatahon, “Borat do iahap hanami manadingkon tugasnami. Dong ma satahun ahu lalab maretek ni uhur. Tapi iurupi Jahowa do ahu ase boi hupingkiri sonaha ahu boi mandalankon tanggung jawab na baru, ai ma gabe namatoras.” Ai songon si Robert pakon si Felice do homa pangahap ni nasiam? Ai maretek ni uhur do homa ham halani mubah tugasmu? Anggo sonai, ulang ma dingat-dingat ham na salpu. Tapi pingkiri ma aha do na boi ihorjahon ham sonari laho mangidangi Jahowa ampa sanina botou. Totap ma ringgas ham janah gunahon ma hapandeianmu laho mangurupi na legan. Holi gabe marmalas ni uhur do ham halani boi patoguhkon kuria.

23. Aha do na boi ipingkiri hita, janah aha ma na laho iulas hita bani artikel na mangihut?

²³ Marguna do ganup hita i lobei ni Jahowa. Sihol do Ia ase hita gabe kaluargani. Jadi anggo ipingkiri hita aha do na boi ibahen hita laho patoguhkon kuria, anjaha sonaha ase lambin ringgas hita mandalankon tugas na ibere hubanta, tontu gabe ibotoh hita ma marguna do hita ibagas kuria. Tapi, sonaha pangahapta mangidah sanina botou i kuria? Sonaha hita boi patuduhkon anggo hita mangkaholongi anjaha mangkargai sidea? Bani artikel na mangihut iulas hita ma pasal ai.