1. Aha do na mambahen Jahowa manompa haganupan?

MUNGKAHNI pitah Jahowa dassa na i surga. Tapi, lang ongga lungunan pangahap-Ni. Totap do Ia marmalas ni uhur hassi pe sahalak-Si. Hassi pe sonai, sihol do Ia ase lang pitah Ia na marmalas ni uhur. Halani holong ni uhur-Ni, itompa Ia ma na legan ase boi homa sidea marmalas ni uhur.​—Ps. 36:10; 1 Joh. 4:19.

2. Sonaha ma pangahap ni Jesus pakon ganup malekat mangidah tompaon ni Jahowa?

² Parlobei sahali, itompa Jahowa ma Anak-Ni, ai ma Jesus. Dob ai, marhitei Anak-Ni do “itompa haganup” tarmasuk ma marjuta malekat. (Kol. 1:16) Malas do uhur ni Jesus boi rap marhorja pakon Bapani. (Pod. 8:30) Malas do homa uhur ni ganup malekat sanggah mangidah Jahowa pakon Jesus manompa langit ampa tanoh on. Bibel mangkatahon “marolob-olob” do sidea sanggah itompa tanoh on. Sonai do homa bahenon ni sidea sanggah itompa Jahowa na leganni, tarmasuk ma sanggah itompa manisia. (Job 38:7; Pod. 8:31) Taridah do holong ampa hapentaran ni Jahowa humbani ganup tompaon-Ni.​—Ps. 104:24; Rom 1:20.

3. Domu bani 1 Korint 15:21, 22, aha do gunani tobusan ni Jesus bani ganup jolma?

³ Sanggah itompa Jahowa jolma, sihol do Ia ase sidea manggoluh sadokah ni dokahni i tanoh on. Tapi, halani lang itangihon si Adam pakon si Hawa titah ni Naibata,  gabe lang boi sidea manggoluh sadokah ni dokahni i tanoh on. Sonai homa ginompar ni sidea, gabe dihut mardousa janah matei. (Rom 5:12) Jadi, aha ma na ibahen Jahowa? Mintor ibahen Ia ma dalan laho paluahkon ganup jolma. (1 Mus. 3:15) Ipasirsir Ia ma tobusan ase ginompar ni si Adam pakon si Hawa boi maluah humbani dousa ampa hamatean. Halani ai, gabe boi ma sidea manggoluh sadokah ni dokahni anggo ra sidea mangidangi Jahowa.​—Joh. 3:16; Rom 6:23; basa 1 Korint 15:21, 22.

4. Sungkun-sungkun aha do na laho iulas hita bani artikel on?

⁴ Halani laho ipapuho Naibata halak na matei, ra do adong sungkun-sungkunta pasal ai. Umpamani, sonaha holi Naibata papuhohon halak na matei? Ai boi do mintor itanda hita sidea sanggah ipapuho? Sonaha parpuhoon ai boi mambahen hita gabe marmalas ni uhur? Anjaha humbani parpuhoon ai, aha ma na boi iparlajari hita pasal holong ni Jahowa, hapentaran-Ni, ampa hasabaron-Ni? Ulas hita ma balosni ai bani artikel on.

5. Mase halak na matei lang rap ipapuho ganupan?

⁵ Sanggah ipapuho Jahowa marjuta halak na matei marhitei Jesus, tontu lang rap ipapuho ganupan. Mase lang? Halani anggo sonai ibahen, mintor gok ma tanoh on janah ra do gabe geor ganupan. Hape taratur do ganup pambahenan ni Naibata. Anjaha ibotoh Ia maningon sonai do ase adong hadameion. (1 Kor. 14:33) Dingat ma, paima Jahowa pakon Jesus manompa jolma i tanoh on, ipasirsir sidea do lobei haporluan ni manisia. Hunjon taridah ma Naibata na pentar do Jahowa  janah sabar. Tontu sonai ma homa na ibahen Jesus bani Pamarentahan Saribu Tahun. Iatur ia ma holi ase ipasirsir halak na maluah humbani Harmagedon haporluan ni halak na laho ipapuho ai.

6. Domu bani Lahoan 24:15, ise do holi na ipapuho Jahowa?

⁶ Na sipontingan, maningon iajari sidea do holi ganup halak na ipapuho ai pasal Harajaon ni Naibata ampa harosuh-Ni. Mase? Halani bahatan do holi halak “pargeduk” na ipapuho ijai. (Basa Lahoan 24:15.) Tontu sibuk tumang ma mangajari sidea halani bahat do sidea na lape mananda Jahowa. Anjaha maningon mambahen hamubahon do sidea ase boi sidea mandapot hagoluhan na sadokah ni dokahni marhitei tobusan ni Jesus. Jadi, sonaha ma holi sidea iajari? Ai sada-sada do sidea holi iajari songon na ibahen hita sonari on? Atap ipatumpu do holi sidea hubagas kuria janah ijai ma sidea iajari laho manlatih halak na ipapuho dobkonsi sidea? Paima hita ma ai, halani lape ibotoh hita pasal ai. Tapi domma ibotoh hita bani ujung ni Pamarentahan Saribu Tahun ai, “habotohon pasal Jahowa do manggoki tanoh in”. (Jes. 11:9) Tontu bahat ma na laho sihorjahonon bani Pamarentahan Saribu Tahun ai!

7. Mase juakjuak ni Naibata maningon sabar sanggah mangurupi halak na ipapuho?

⁷ Sadokah saribu tahun ai, ganup juakjuak ni Naibata maningon torus mambahen hamubahon laho pamalaskon uhur ni Jahowa. Halani ai maningon sabar do homa sidea sanggah mangurupi halak na ipapuho mambahen hamubahon ase boi mandalankon harosuh ni Naibata. (1 Ptr. 3:8) Anggo ididah halak na ipapuho ai na toruh maruhur do juakjuak ni Naibata, gabe tarojur ma holi sidea laho mangidangi Jahowa—Pil. 2:12.

8. Mase pos uhurta itanda hita do holi na hinaholonganta na ipapuho ai?

⁸ Tontu boi do mintor itanda hita na hinaholonganta na dob ipapuho. Pardiateihon hita ma piga-piga alasanni. Umpamani, dingat ma sonaha do hinan Jahowa papuhohon halak na matei. Sonaha rupa ni sidea sanggah manggoluh, sonai do holi sidea sanggah ipapuho. Dingat ma homa isarupahon Jesus do na matei ai songon na modom, janah parpuhoon ai dos songon mamuhoi halak na modom. (Mat. 9:18, 24; Joh. 11:11-13) Sonaha halak sanggah modom, tontu sonai ma homa ia sanggah puho. Dingat ma homa contoh si Lasarus. Domma ompat ari ia matei anjaha domma marbau dagingni. Tapi, sanggah ipapuho Jesus ia, boi do mintor itanda botouni ia, janah itanda si Lasarus do homa sidea.​—Joh. 11:38-44; 12:1, 2.

9. Sanggah sasada halak ipapuho, mase lang mintor sempurna ia?

⁹ Pardiateihon ma alasan na legan. Jahowa marjanji bani pamarentahan-Ni holi lang dong halak na mangkatahon, ‘Boritan do ahu!’ (Jes. 33:24; Rom 6:7) Jadi, sanggah ipapuho sasahalak, tontu domma sehat angkulani. Hassi pe sonai, lang mintor gabe sempurna ia. Halani anggo sonai, ra do lang itanda hita holi sidea. Tapi dokah-dokah, gabe sempurna ma ganup jolma. Bani ujungni Pamarentahan Saribu Tahun ai, iondoskon Jesus ma Harajaon ai hubani Bapani. Sanggah ai, domma saud ganup harosuh ni Naibata anjaha domma sempurna ganup jolma.​—1 Kor. 15:24-28; Pangk. 20:1-3.

10. Sonaha ma holi pangahapmu sanggah ipapuho halak na matei?

¹⁰ Bayangkon ma sonaha pangahapmu sanggah jumpah pakon na hinaholonganmu na dob ipapuho. Ra, mintor tartawa do ham, atap gabe tariluh halani malas ni uhurmu. Ra do gabe mandoding ham laho mamuji Jahowa. Tontu gabe lambin holong ma hita bani Jahowa pakon Anak-Ni halani domma ipapuho sidea na matei.

11. Domu bani Johannes 5:28, 29, aha do na laho masa bani halak na ra unduk bai Naibata?

¹¹ Tontu malas do homa uhur ni halak na ipapuho ai anggo itanggali sidea parlahouni na sambor, janah ihorjahon sidea parentah ni Naibata. Gabe boi ma sidea manggoluh sadokah ni dokahni i Paradeiso. Tapi ase totap dong hadameion i Paradeiso, tontu lang ipaturut Naibata halak na lang ra mambahen hamubahon totap manggoluh.​—Jes. 65:20; Basa Johannes 5:28, 29.

12. Pasu-pasu aha ma na laho ibere Jahowa bani ganup jolma?

¹² Bani Harajaon ni Naibata, iahapkon ganup halak ma aha na ihatahon bani Podah 10:22, “Pasu-pasu ni Jahowa do mambahen bayak, anjaha seng pala marhasoman halojaon.” Marhitei tonduy na pansing, iurupi Jahowa ma holi juakjuak-Ni ase boi maniru Jesus, anjaha ujungni gabe sempurna ma sidea. (Joh. 13:15-17; Ep. 4:23, 24) Bai ganup ari, iahapkon halak ma lambin margogoh do angkula ni sidea. Tontu malas tumang ma uhur halani ai! (Job 33:25) Tapi, sonaha pangarapan parpuhoon ai boi mangurupi hita sonari on?

13. Sonaha parpuhoon mambuktihon tongon do na ihatahon bani Psalmen 139:1-4?

¹³ Songon na dob iulas hita nongkan ai, sanggah ipapuho Jahowa sasada halak, sonaha rupani sanggah manggoluh ia, sonai do homa rupani dob ipapuho. Jadi, pingkirhon ma aha do artini ai! On patuduhkon holong tumang do Jahowa ai bamu halani tongtong do ipardiateihon janah idingat Ia aha na ipingkirhon ham, sonaha paruhuranmu, ampa aha na ibahen ham. Jadi, sanggah Ia laho papuhohon ham, tontu urah do Bani laho paulakkon ganupan ai bamu. Ihatahon Raja Daud do homa itanda Jahowa do hita sada-sada. (Basa Psalmen 139:1-4.) Gabe sonaha ma pangahapmu dobkonsi mambotoh ai?

14. Gabe sonaha ma pangahapta dob mambotoh itanda Jahowa do hape hita?

¹⁴ Anggo irimangi hita itanda Jahowa do hape hita, gabe lang mabiar pangahapta. Mase sonai? Gabe pos ma uhurta parduli do Jahowa ai hubanta. Harga do ganupan hita hu Bani. Tongtong do ipardiateihon Ia aha na ihorjahon hita. Tontu tarapoh ma uhurta dob mambotoh ai! Bai ganup ari, sai hasomanan-Ni do hita janah sihol do Ia mangurupi hita. Halani ai lang be lungunan pangahapta.​—2 Kron. 16:9.

15. Sonaha pangarapan pasal parpuhoon patuduhkon hapentaran ni Jahowa?

¹⁵ Somalni bahat do halak na mabiar sanggah iancam laho ibunuh. Jadi gati ma igunahon Sibolis halak i dunia on laho mangancam mamunuh hita, anggo lang ra hita manadingkon haporsayaon atap hasomanta. Tapi lang mabiar hita bani  ancaman ni sidea halani ibotoh hita porini matei hita, boi do ipagoluh Jahowa hita. (Pangk. 2:10) Pos do uhurta lang dong na boi mambahen hita sirang humbani holong ni Jahowa. (Rom 8:35-39) Hunjon ma taridah hapentaran ni Jahowa halani ibere Ia pangarapan pasal parpuhoon hubanta! Halani ai, lang mabiar hita iancam laho ibunuh. Tapi ipargogohi do hita ase totap setia bani Jahowa.

16. Ase ibotoh ham porsaya do ham bani Jahowa atap lang, sungkun-sungkun aha ma na porlu irimangi ham?

¹⁶ Anggo dong munsuh na mangancam laho mamunuh ham, ai porsaya do ham boi do ipapuho Jahowa ham? Ase ibotoh ham porsaya do ham Bani atap lang, rimangi ma sungkun-sungkun on, ‘Humbani ganup haputusanku, ai taridah do porsaya ahu bani Jahowa?’ (Luk. 16:10) Atap, ‘Anggo hupalobei Harajaon ni Naibata ibagas goluhku, ai porsaya do ahu ibere Jahowa do holi haporluanku bai ganup ari?’ (Mat. 6:31-33) Anggo eak do balosmu bani sungkun-sungkun ai, taridah ma martenger ni uhur do ham bani Jahowa. On ma na mangurupi ham ase totap setia lang soal aha na masa.​—Pod. 3:5, 6.

17. (a) Sonaha pangarapan pasal parpuhoon patuduhkon hasabaron ni Jahowa? (b) Sonaha hita patuduhkon anggo hita mangkargai hasabaron-Ni?

¹⁷ Domma itontuhon Naibata sadihari do panorang laho manripaskon dunia na jahat on. (Mat. 24:36) Tapi lang ihorjahon Ia ai anggo lape jumpah panorangni. Sasintongni domma sihol tumang uhur-Ni laho papuhohon na matei. (Job 14:14, 15) Hassi pe sonai, sabar do Ia paimahon ai. (Joh. 5:28) Tontu martarima kasih do hita bani Jahowa halani hasabaron-Ni. Mase? Halani sabar Jahowa, gabe adong ma panorang bani ganup halak mambahen “hamubahon ni uhur”, tarmasuk ma hita. (2 Ptr. 3:9) Marosuh do Jahowa ase bahat halak boi mandapot hagoluhan na sadokah ni dokahni. Jadi, patuduh ma anggo hita mangkargai hasabaron-Ni. Sonaha carani? Ringgas ma mangindahi halak na “marosuh manjalo hasintongan na parohkon hagoluhan sisadokah ni dokahni”. (Lah. 13:48, Terjemahan Dunia Baru) Anjaha urupi ma sidea ase mangkaholongi Jahowa janah mangidangi-Si. Hasilni, dapot sidea ma pasu-pasu, songon na idapot hita.

18. Mase maningon sabar hita bani halak na legan?

 ¹⁸ Bani ujungni Pamarentahan Saribu Tahun ai ma ganup jolma boi gabe sempurna. Tapi, tongtong do sabar Jahowa paimahon ai. Paima sempurna ganup jolma, sirsir do Ia manasap dousanta. Halani ai tiru hita ma Jahowa. Pindahi hita ma sifat-sifat na madear humbani halak na legan janah sabar ma hita hubani sidea. Pardiateihon hita ma sada contoh humbani sada botounta. Boritan do suami ni botou ai. Halani naboritni ai, boi do sompong-sompong holsohan suamini ai. Ujungni, lang be martumpu ia. Nini botou ai ma, “Pusok tumang do uhurhu halani ai. Aha na sihol ihorjahon hanami hinan, lang boi be ihorjahon hanami ai sonari. Gabe mubah do situasinami.” Hassi pe sonai, torus do sabar botou ai bani suamini. Tongtong do ia marpangunsandeian bani Jahowa. Songon Jahowa, ipindahi ia do sifat-sifat na dear humbani suamini. Nini use, “Sasintongni, bujur do suamiku. Marusaha do ia mubah otik-otik.” Hunjon ibotoh hita ma ponting tumang do ase hita sabar sanggah mangurupi kaluarga atap hasoman na marsitaronon!

19. Aha ma na sihol bahenonta?

¹⁹ Sanggah itompa tanoh on, marmalas ni uhur do Jesus ampa malekat-malekat. Tontu lambin banggal ma malas ni uhur ni sidea sanggah mangidah sempurna do holi ganup halak i tanoh on janah manombah Jahowa. Anjaha malas do homa uhur ni sidea na rap mamarentah pakon Jesus mangidah ai. (Pangk. 4:4, 9-11; 5:9, 10) Bayangkon ma pitah malas ni uhur dassa na dong ijai halani lang dong be pusok ni uhur, naborit, sitaronon, ampa hamatean. (Pangk. 21:4) Tapi paima masa ai, marusaha ma hita maniru Jahowa, Bapanta na parholong, pentar, janah sabar. Anggo ibahen hita sonai, gabe boi ma hita totap marmalas ni uhur lang soal aha pe na masa. (Jak. 1:2-4) Tontu martarima kasih tumang do hita halani domma marjanji Jahowa laho papuhohon na matei!​—Lah. 24:15.