1. Aha do na ihatahon si Daud pasal toruh ni uhur ni Jahowa?

NAIBATA na toruh maruhur do Jahowa ai? Eak! Si Daud mangkatahon, “Ibere Ham do bangku gantar ni haluahon-Mu, anjaha halayakon-Mu [“toruh ni uhur-Mu,” Terjemahan Dunia Baru] do patimbulhon ahu.” (2 Sam. 22:36; Ps. 18:36) Sanggah si Daud manuratkon ai, ra do na idingat ia parroh ni si Samuel laho maminaki ia gabe raja Israel na laho roh. Poso ope ia ijia, janah anak sietekan do ia. Hassi pe sonai, ia do na ipilih Jahowa laho manggantihon Raja Saul.​—1 Sam. 16:1, 10-13.

2. Aha ma na laho iulas hita bani artikel on?

² Tontu setuju do si Daud bani panurat ni Psalmen na mangkatahon anggo Jahowa ai Naibata “na marparatas i babou, anjaha na manatap-natap dompak toruh, na pajongjong halak na madorun humbani orbuk, anjaha na pagijangkon halak na masombuh . . . laho pahundulhonsi rap pakon halak na sangap”. (Ps. 113:6-8) Bani artikel on, iulas hita ma holi sonaha Jahowa patuduhkon toruh ni uhur, anjaha parlajaran aha do na dapot hita hunjai. Dob ai, iulas hita homa parlajaran aha do pasal toruh ni uhur na dapot hita humbani Raja Saul, nabi Daniel, pakon Jesus.

3. Sonaha Jahowa marurusan pakon hita, janah aha ma na ibotoh hita hunjai?

³ Ipatuduh Jahowa do toruh ni uhur sanggah marurusan pakon jolma na lang gokan dear. Lang pitah tonggonta na ijalo Ia, tapi ihira do hita hasoman-Ni. (Pod. 3:32) Ase boi hita marhasoman pakon-Si, ibere Ia do Anak-Ni laho manobus dousanta. Hunjon tangkas ma ibotoh hita Naibata paridop ni uhur na banggal do Ia!

4. Aha do na ibere Jahowa hubanta, janah mase?

 ⁴ Dong ope cara na legan na ibahen Jahowa laho patuduhkon toruh ni uhur. Sanggah manompa hita, boi do namin itompa Ia hita ase mangihutkon harosuh-Ni tumang. Tapi lang sonai ibahen Ia. Ibere do habebason hubanta laho mamilih aha na iharosuhkon hita. Hassi pe hita jolma na galek, ipardiateihon Ia do haputusan na ibahen hita. Sihol do Ia ase hita mangidangi-Si halani holong uhurta hu Bani janah pos uhurta bahat do gunani anggo hita unduk hu Bani. (5 Mus. 10:12; Jes. 48:17, 18) Tontu martarima kasih do hita halani martoruh ni uhur Jahowa!

5. Sonaha Jahowa mangajari hita ase martoruh ni uhur? (Tonggor ma gambar sampul.)

⁵ Ibere Jahowa do sitiruon ase hita martoruh ni uhur songon-Si. Hassi pe Ia do na sipentaran, tapi iarahkon do na legan ase rap marhorja pakon-Si. Umpamani, iarahkon Ia do Anak-Ni laho manompa haganupan. (Pod. 8:27-30; Kol. 1:15, 16) Hassi pe Ia do Na Tang Sitimbulan, tapi ibere do tanggung jawab bani na legan. Umpamani, iminaki do Jesus gabe Raja bani Harajaon-Ni, anjaha ipilih Ia do homa 144.000 halak laho mamarentah rap pakon Jesus. (Luk. 12:32) Tontu ilatih Jahowa do Jesus ase boi gabe Raja ampa Sintua ni Malim. (Heb. 5:8, 9) Anjaha ilatih Ia do homa sidea na dihut mamarentah pakon Jesus ase boi sidea mandalankon tugasni. Hassi pe sonai, lang iatur-atur Ia aha na maningon bahenon ni sidea. Tapi pos do uhur-Ni boi do holi ihorjahon sidea ai domu bani harosuh-Ni.​—Pangk. 5:10.

6-7. Pasal mambere tanggung jawab bani na legan, aha ma na boi iparlajari hita humbani Jahowa?

⁶ Hassi pe boi ihorjahon Jahowa haganupan, tapi ra do Ia mambere tanggung  jawab hubani na legan. Tarlobih ma homa hita, maningon sonai ma bahenonta. Umpamani, anggo sahalak kopala kaluarga ham, atap pe sintua i kuria, ihutkon ma sitiruon na ibahen Jahowa. Bere ma tanggung jawab hubani na legan, janah ulang atur-atur sonaha sidea mangkorjahon ai. Songon Jahowa, latih ma sidea ase pos uhurni boi do ihorjahon sidea tugas ai. (Jes. 41:10) Aha ope na boi iparlajari hita humbani Jahowa?

⁷ Marosuh do homa Jahowa manangar pandapot ni malekat-malekatni. (1 Raj. 22:19-22) Boi do homa itiru namatoras ai. Anggo sosok iahap ham, sungkun ma bani niombahmu sonaha sidea sihol mangkorjahon tugas na ibere nasiam. Anggo dear, paturut ma sidea mangkorjahon songon na ihatahonni ai.

8. Sonaha Jahowa patuduhkon hasabaron hubani si Abraham pakon si Sarah?

⁸ Taridah do toruh ni uhur ni Jahowa humbani hasabaron na ipatuduh Ia. Umpamani, sabar do Ia hubani juakjuak-Ni na manungkun pasal haputusan na dob ibahen Ia. Ibalosi Ia do sungkun-sungkun ni si Abraham pasal huta Sodom pakon Gumora na laho ripaskonon-Ni. (1 Mus. 18:22-33) Sonai do homa ibahen Ia sanggah marurusan pakon si Sarah, istri ni si Abraham. Sanggah ihatahon Ia laho tubuhan anak ma si Sarah, mintor tartawa ma ia halani ninuhurni domma matua ia. Hassi pe sonai lang manggila Jahowa atap pe borit uhur-Ni. (1 Mus. 18:10-14) Tapi totap do sabar Ia hubani si Sarah.

9. Aha do na boi iparlajari namatoras pakon sintua humbani Jahowa?

⁹ Aha do na boi iparlajari namatoras pakon sintua humbani Jahowa? Dingat ma aha do na ibahen nasiam porini adong niombahmu atap sanina botou i kuria na lang setuju bani haputusanmu. Ai mintor ihatahon nasiam sidea do na lepak? Atap marusaha do nasiam laho mangarusi mase sonai pandapot ni sidea? Anggo itiru ham Jahowa, bahat do gunani ai hubani kaluargamu ampa i kuria. Jadi, domma iulas hita sonaha Jahowa patuduhkon toruh ni uhur ampa parlajaran na dapot hita hunjai. Sonari ulas hita ma siusihan na legan na isurat ibagas Bibel.

10. Sonaha Jahowa manggunahon contoh humbani halak na legan laho mangajari hita?

¹⁰ “Guru” na sidearan do homa Jahowa. Ibere Ia do contoh-contoh laho mangajari hita. (Jes. 30:20, 21) Humbani Bibel, boi ma iparlajari hita pasal halak na patuduhkon paruhuran na madear, songon toruh ni uhur. Holi iparlajari hita homa sonaha do ujungni anggo lang ipatuduh sidea toruh ni uhur.​—Ps. 37:37; 1 Kor. 10:11.

11. Aha do na boi iparlajari hita humbani si Saul?

¹¹ Dingat ma aha na masa hubani Raja Saul. Sanggah poso ope, halak na toruh maruhur do ia. Ibotoh do hahuranganni, anjaha mabiar do ia mandapot lobih bahat tanggung jawab. (1 Sam. 9:21; 10:20-22) Tapi, lang piga dokah dobkonsi gabe raja ia, mintor gijang ma uhurni. Ongga do lang sabar ia paimahon roh nabi Samuel. Janah lang porsaya ia laho paluahon ni Jahowa do halak Israel. Halani ai, mintor igalangkon ia ma galangan situtungon hape lang dong hakni mangkorjahon ai. Ujungni, gabe lang iharosuhkon Jahowa be ia anjaha lang boi totap pamarentahanni. (1 Sam. 13:8-14) Gabe sipasingat do on hubanta! Ulang ma ihorjahon hita aha pe na lang dong hak-ta mangkorjahon ai.

12. Sonaha si Daniel patuduhkon siusihan na madear?

 ¹² Tapi anggo nabi Daniel, ipatuduh do siusihan na madear. Sadokah goluhni, totap do ia toruh maruhur, anjaha ipindo do panogu-noguan humbani Jahowa. Umpamani, sanggah igunahon Jahowa ia mangartihon nipi ni si Nebukadnesar, lang ihatahonni halani hapentaranni do boi ipatorang ia ai. Tapi, Jahowa do na ipuji anjaha ipasangap ia. (Dan. 2:26-28) Aha ma parlajaranni hubanta? Anggo marosuh sanina botou manangar ham sanggah marambilan, atap dong hasil na madear na dapot ham ibagas pangidangion, dingat ma halani ipargogohi Jahowa do ase boi ihorjahon ham ganupan ai. Jadi, Jahowa do na talup ipuji ijai. (Pil. 4:13) Anggo ibahen ham sonai, dos do ai domma itiru ham Jesus. Mase sonai?

13. Domu bani Johannes 5:19, 30, aha do na boi iparlajari hita humbani Jesus?

¹³ Hassi pe sempurna janah Anak ni Naibata do ia, totap do Jesus marpangunsandeian bani Jahowa. (Basa Johannes 5:19, 30.) Lang ongga ia sihol ase dos kuasani songon Bapani. Pilippi 2:6 mangkatahon, “Sedo songon nirampas [Jesus] ihira uhurni usihni ai bani Naibata.” Ibotoh Jesus daoh do banggalan kuasa ni Bapani marimbangkonsi.

14. Aha do na ibahen Jesus sanggah dong na mangindo ase ihorjahon ia aha na lang isuruh Bapani?

¹⁴ Pardiateihon ma na ibahen Jesus sanggah roh inang ni si Jakobus pakon si Johannes mangindo ase ipahundul Jesus anakni ai i siamun ampa i sambilouni, bani Harajaonni. Mintor ihatahon Jesus ma pitah Bapani do na boi manontuhon ai. (Mat. 20:20-23) Hunjon taridah ma toruh maruhur do Jesus. Ibotoh ia do lang ganup boi ibahen ia. Lang ongga ihorjahon ia aha pe na lang isuruh Bapani. (Joh. 12:49) Sonaha hita boi mangusihisi?

15-16. Sonaha hita boi mandalankon podah ni Bibel bani 1 Korint 4:6?

¹⁵ Tiru hita ma Jesus marhitei mandalankon podah ni Bibel na isurat bani 1 Korint 4:6. Ijai ihatahon, “Ulang ma nalobihi na tarsurat in.” Jadi, anggo adong sanina botou na mangindo podah hubanta, ulang ma ipaksa hita sidea mangihutkon harosuhta, atap mambere podah  mangihutkon pambotohta sandiri. Tapi, maningon ipindahi hita do lobei podah humbani Bibel atap pe publikasinta. Anggo sonai ibahen hita taridah ma iakui hita do lang ganup ibotoh hita. Anggo toruh maruhur hita, gabe ipasangap hita ma Jahowa, ‘Panguhum na pintor in’.​—Pangk. 15:3, 4.

¹⁶ Sobali pasangapkon Jahowa, dong ope alasan na legan mase hita maningon martoruh ni uhur. Anggo martoruh ni uhur hita, gabe malas ma uhurta janah boi ma hita marhasoman pakon na legan. Mase boi sonai? Ulas hita ma alasanni.

17. Mase halak na martoruh ni uhur boi marmalas ni uhur?

¹⁷ Anggo martoruh ni uhur hita janah iakui hita lang ganup tarhorjahon hita, tontu gabe malas ma uhurta. Mase sonai? Halani gabe ra ma hita manjalo pangurupion humbani na legan. Umpamani, dingat ma aha na masa sanggah ipamalum Jesus sapuluh halak na gadamon. Pitah sada dassa na roh manjumpahi Jesus laho martarima kasih halani domma ipamalum panahitni. Tontu martoruh ni uhur do dalahi ai halani mangakui anggo lang halani Jesus lang boi malum ia. Halani ai, martarima kasih ma ia bani Jesus anjaha ipuji ia ma Naibata.​—Luk. 17:11-19.

18. Mase gabe urah hita marsaor pakon na legan anggo martoruh ni uhur hita? (Rom 12:10)

¹⁸ Anggo martoruh ni uhur hita janah iakui hita dong do hahuranganta, gabe urah ma hita marsaor pakon na legan anjaha gabe bahat ma hasomanta. Mase? Halani ra hita mangakui dong do homa halobihan ni halak na legan, janah malas uhurta marhasoman pakon sidea. Dob ai, anggo adong hasoman na dear mangkorjahon  tugasni, malas do homa uhurta mangidah ai, anjaha mintor ipuji hita ma sidea.​—Basa Rom 12:10.

19. Mase lang dear anggo hita margijang ni uhur?

¹⁹ Tapi anggo halak na gijang maruhur rosuhan do ia ipuji marimbangkon mamuji halak. Rosuh do homa ia mambandingkon dirini pakon na legan, janah marusaha ase ia gabe sidearan. Gati do ninuhurni lang boi marhasil horja ai anggo lang ia na mangkorjahon. Anggo adong halak na marhasil mangkorjahon tugasni, gabe simburu ma ia. Anjaha sihol do ia gabe halak na sipontingan. (Gal. 5:26) Bahat do halak lang tahan marhasoman pakon halak sisonai. Anggo ibotoh hita dong gijang ni uhur ibagas uhurta, mintor martonggo ma bani Jahowa ase iurupi hita mambahen ‘hamubahon marhitei habayuon ni uhur’, ase lang sompat marurat biak sisonai ibagas dirinta.​—Rom 12:2.

20. Mase maningon martoruh ni uhur hita?

²⁰ Tontu martarima kasih do hita hubani Jahowa halani sitiruon na ibahen Ia. Martoruh ni uhur do Ia sanggah marurusan pakon juakjuak-Ni, janah sihol do hita mangusihi-Si. Leganni ai, sihol do homa hita mangusihi sidea na martoruh ni uhur mangidangi Jahowa. Sai tongtong ma ipuji anjaha ipasangap hita Jahowa halani Ia dassa na talup manjalo ai. (Pangk. 4:11) Anggo ibahen hita sonai, gabe boi ma hita marhasoman pakon Jahowa sadokah ni dokahni, halani holong uhur-Ni bani halak na martoruh ni uhur.