1. Aha do na ibahen Jahowa hubani ganup Saksi-Ni?

HALANI holong ni uhur-Ni, ibere Jahowa do bani ganup Saksi-Ni hasangapon. Ibahen do ase sidea boi gabe anggota i kuria-Ni. Hassi pe lang sarupa tugasni, tapi maharga do sidea ganupan i kuria. Anjaha maningon marsiurupan do homa sidea. Ai do homa na iajarhon apostel Paulus. Sonaha ia mangulas ai?

2. Domu bani Epesus 4:16, mase ganup hita maningon rup marhorja anjaha marsipasangapan?

² Domu bani ayat tema ni artikel on, tangkas do ipatugah si Paulus lang boi ihatahon hita, “Seng benahangku ho,” hubani sanina botounta. (1 Kor. 12:21) Ase adong hadameion ibagas kuria, maningon rup marhorja do hita ganupan anjaha marsipasangapan. (Basa Epesus 4:16.) Anggo marsada hita, gabe ipatoguh ma kuria anjaha ipauli-uli ibagas holong.

3. Aha ma na laho iulas hita bani artikel on?

³ Sonaha carani hita patuduhkon anggo hita marsipasangapan ibagas kuria? Bani artikel on iulas hita ma holi sonaha sintua samah sintua boi marsipasangapan. Dob ai, iulas hita homa sonaha hita mangkargai sanina atap botou na lape marhajabuan. Anjaha na parpudi iulas hita ma sonaha hita mangkargai sidea na lape lancar marsahap ibagas bahasanta.

4. Domu bani Rom 12:10, aha do na maningon ibahen sintua?

⁴ Ganup sintua i kuria ilantik marhitei tonduy na pansing. Tapi lang sarupa hapandeian ni sidea. (1 Kor. 12:17, 18) Ra, dong na baru ilantik janah lang bahat pangalamanni. Dong homa na lang boi bahat na ihorjahon halani domma matua ia. Hassi pe sonai, ulang ma dong sintua na mangkatahon bani sintua na legan, “Seng benahangku ho.” Tapi, maningon idalankon sidea ma podah ni si Paulus na isurat bani Rom 12:10.​—Basa.

5. Sonaha sintua samah sintua marsipasangapan, anjaha mase maningon ibahen sidea sonai?

⁵ Anggo ra sintua manangihon pandapot ni sintua na legan, on patuduhkon marsipasangapan do sidea. Ponting tumang do ibahen sidea sonai tarlobih sanggah sidea rapat laho mangulas sada parsoalan. Mase? Pardiateihon ma na ihatahon bani Menara pengawal 1 Oktober 1988, “Sintua mambotoh boi do itogu-togu Jesus sintua na ija pe marhitei tonduy na pansing, ase boi sidea mambere pandapot domu bani prinsip ni Bibel. (Lah. 15:6-15) Ganup do sintua i kuria itogu-togu tonduy na pansing, sedo pitah na mambere pandapot ai.”

6. Aha do na boi mangurupi sintua ase totap marsada, janah aha do gunani ai bani kuria?

⁶ Anggo sintua mangkargai sintua na legan, tontu lang lalab ia na marsahap sanggah rapat sidea. Anjaha lang iahap ia pandapotni dassa na sintong. Tapi sanggah mambere pandapot, bujur anjaha lamlam do ia patugahkon ai. Na sipontingan, maningon maronjolan humbani Bibel do pandapotni ai, ampa mangihutkon tugah-tugah humbani “juakjuak na bujur anjaha na maruhur”. (Mat. 24:45-47) Ra do homa ia manangar pandapot ni sintua na legan. Anggo sintua patuduhkon holong anjaha marsipasangapan, tontu itogu-togu tonduy na pansing do sidea laho mambahen haputusan na boi patoguhkon kuria.​—Jak. 3:17, 18.

7. Sonaha pangahap ni Jesus bani halak na lape marhajabuan?

⁷ Bahat do sanina botou i kuria na marhajabuan anjaha marniombah. Tapi, dong do homa na lape marhajabuan. Sonaha ma pangahapta mangidah sidea? Tiru hita ma Jesus. Sanggah i tanoh on, Jesus pe lang marhajabuan ase pongkut ia mandalankon tugasni. Tapi lang ongga iparentahkon ia ase susianni marhajabuan atap pe lang marhajabuan. Ia mangkatahon dong do piga-piga halak Kristen na “mamilih lang mompo”. (Mat. 19:11, 12, Terjemahan Dunia Baru) Hassi pe sonai, arga do sidea ai bani Jesus. Lang ongga ihatahon ia maningon marhajabuan do sasahalak ase boi martuah goluhni.

8. Domu bani 1 Korint 7:7-9, aha do na iojur si Paulus hubani halak Kristen?

⁸ Songon Jesus, si Paulus pe lang marhajabuan ase boi pongkut mandalankon pangidangionni. Tapi lang ongga ihatahon ia lepak do halak Kristen na marhajabuan. Ia mambotoh hak ni sasahalak do mamutuskon ai. Tapi iojur ia do anggo boi namin, ulang ma sasahalak marhajabuan ase boi pongkut mangidangi Jahowa. (Basa 1 Korint 7:7-9.) Hunjon tangkas ma lang mapas uhurni mangidah halak na lang marhajabuan. Buktini, hassi pe si Timoteus lape marhajabuan tapi ibere do tanggung jawab na borat hu bani. * (Pil. 2:19-22) Jadi, tangkas ma hassi pe sada sanina domma marhajabuan atap lang, sedo ai na manontuhon ia boi mandapot tanggung jawab i kuria.​—1 Kor. 7:32-35, 38.

9. Sonaha ma namin pangahapta hubani sanina botou na marhajabuan atap na lape marhajabuan?

⁹ Jesus pakon si Paulus lang ongga mamarentahkon ase halak Kristen maningon marhajabuan atap lang boi marhajabuan. Anggo sonai, sonaha ma pangahapta hubani sidea na marhajabuan ampa na lang marhajabuan? Balosni ai dong bani Menara Pengawal 1 Oktober 2012. Ijai ipatorang, “Sasintongni sibere-bere humbani Naibata do sidea na marhajabuan ampa na lang marhajabuan. . . . Lang ongga iahap Naibata pailahon do halak na lang marhajabuan ai,  atap lang boi sidea martuah.” Halani ai, maharga do banta sanina botou na lape marhajabuan.

10. Anggo hita mangkargai sidea na lape marhajabuan, aha ma na ibahen hita?

¹⁰ Sonaha hita mangkargai sanina botou na lape marhajabuan? Maningon idingat hita ma dong do sanina botounta na lang marhajabuan halani haputusanni sandiri. Leganni ai, dong do namin na sihol marhajabuan, tapi lape jumpahsi halak na sosok bani. Anjaha dong homa na domma mabalu. Atap aha pe alasanni, bajan do anggo isungkun hita mase sidea lape marhajabuan, atap pe itonggori hita pasangan na sosok bani. Tongon adong do sanina botou na mangindo ase iurupi hita ia mangindahi pasangan na sosok. Tapi anggo lang ipindo ia, sonaha ma pangahapni anggo itonggori hita pasangan bani? (1 Tes. 4:11; 1 Tim. 5:13) Pardiateihon hita ma na ihatahon piga-piga sanina botounta na lape marhajabuan.

11-12. Aha do na mambahen sidea na lape marhajabuan gabe maretek ni uhur?

¹¹ Dong sada sintua kaliling na dear tumang mandalankon tugasni hassi pe lape marhajabuan ia. Tapi gabe maretek ni uhur do ia sanggah dong sanina botou na manungkun hu bani, “Ai mase lape mompo ham?” Sada sanina na mangidangi i kantor cabang mangkatahon, “Sipata huidah, gabe marholong ni atei do sanina botou mangidah halak na lape marhajabuan. Gabe sunsah do sidea halani ai. Namin iahap sidea ma na lang marhajabuan ai sibere-bere humbani Naibata.”

¹² Sada botou na mangidangi i Betel mangkatahon, “Dong piga-piga sanina botou na marpingkir anggo ganup halak na lape marhajabuan sihol mangindahi rongkapni. Atap sanggah marsaor sidea, ihatahon ma na laho manorihi rongkapni do ai. Ongga do ahu itugaskon hu sada nagori. Jadi das ma ahu ijai bani ari partumpuan. Hasoman na manjalo ahu i rumahni mangkatahon dong dua botou na saumuranku i kuria ai na lape mompo. Tapi nini sedo na laho mangindahi pasangan bangku ia. Hape daskonsi hanami i Balei Harajaon, mintor iboan ia ma ahu manjumpahi haduasi botou ai. Gabe maila ma pangahapnami na tolu.”

13. Aha do na mangojur sada botou na lape marhajabuan?

¹³ Botou na legan na mangidangi i Betel mangkatahon, “Dong hutanda piga-piga perintis na domma marumur tapi lape marhajabuan. Hassi pe sonai, bahat do na boi ibahen sidea i kuria. Umpamani, sirsir do sidea mangurupi na legan, janah lang iahap sidea dearan do sidea marimbangkon na marhajabuan. Lang homa iahap sidea anggo sidea lang martuah halani lape marhajabuan anjaha marniombah.” Tontu malas tumang uhurta anggo ganup halak i kuria marsipasangapan. Gabe pos ma uhurmu hassi pe lape marhajabuan ham, ihaholongi anjaha parduli do sidea bamu.

14. Sonaha hita mangkargai sanina botou na lape marhajabuan?

¹⁴ Anggo lang sunsah pangahapta mangidah sanina botounta na lape marhajabuan, tontu martarima kasih ma sidea hubanta. Jadi, rahanan ma ipindahi hita sifat-sifat na dear, na mambahen sidea totap setia. Anggo sonai ibahen hita, gabe ibotoh sidea ma lang dong i kuria  na mangkatahon bani sidea, “Seng benahangku ho.” (1 Kor. 12:21) Tapi gabe pos ma uhur ni sidea maharga do sidea banta anjaha marguna do sidea ibagas kuria.

15. Aha do na ibahen bahat sanina botou ase boi mangidangi i ianan na mamorluhon?

¹⁵ Bahat do sanina botou na manadingkon nagori atap hutani laho pindah hu ianan atap kuria na mamorluhon bahat parbarita. (Lah. 16:9) Hape legan do ijai bahasani. Jadi bahat ma pengorbanan na maningon ibahen sidea. Umpamani, maningon iparlajari sidea ma bahasa na baru. Ra, dobkonsi martahun tahun ma baru sidea lancar marsahap ibagas bahasa ai. Hassi pe sonai, gabe ipatoguh do kuria halani siusihan na madear na ibahen sidea. Gabe tarojur do homa sanina botou mangidah pambahenan ni sidea ai. Tontu holong do uhurta mangidah sanina botou na sisonai!

16. Aha do na manontuhon ase sahalak sanina boi ilatih gabe siparugas atap sintua?

¹⁶ Anggo adong sanina i kuria na lape lancar marsahap ibagas bahasa na igunahon i kuria, ulang malang badan penatua laho manlatih ia ase boi gabe siparugas atap sintua. Sedo ai na manontuhon sasahalak boi gabe siparugas atap sintua. Tapi, songon na dob ihatahon Bibel, halak na patuduhkon sifat-sifat na madear anjaha na marsijoloman bani Hata ni Naibata do na boi mangidangi gabe siparugas atap sintua.​—1 Tim. 3:1-10, 12, 13; Tit. 1:5-9.

17. Sungkun-sungkun aha ma na porlu irimangi kaluarga na pindah hu nagori na legan?

¹⁷ Dong do homa halak Kristen na maningon pindah hu nagori na legan ase boi mandapot horja. Halani ai, ra do niombahni maningon marsikolah i sikolah na manggunahon sahap i nagori ai. Anjaha namatorasni pe ra do maningon marlajar bahasa ijai ase urah mandapot horja. Tapi, porini adong kuria atap kalompok na manggunahon sahap ni sidea, huja do dearan sidea martumpu? Hu kuria na manggunahon bahasa i nagori ai do, atap hu kuria na manggunahon bahasa ni sidea?

18. Domu bani Galatia 6:5, sonaha hita mangkargai haputusan na ibahen kopala kaluarga?

¹⁸ Kopala kaluarga do na manontuhon huja sidea martumpu. Halani tanggung jawabni do ai, maningon ipingkiri ia ma aha do na sidearan hubani kaluargani. (Basa Galatia 6:5.) Haputusan aha pe na ibahen ia, maningon totap ma hita manjalo ampa mangkaholongi sidea.​—Rom 15:7.

19. Aha do na maningon ipingkiri anjaha itonggohon kopala kaluarga?

¹⁹ Dong do homa kaluarga na martumpu  i kuria na manggunahon bahasa ni sidea, hape lang lancar niombahni manggunahon bahasa ai. Gabe lang sai iarusi niombahni ma aha do na iulas i partumpuan. On boi mambahen parhasomananni lang orot hubani Jahowa. Mase boi sonai? Halani bahasa na igunahon i nagori ai do na igunahon sidea i sikolah. Anggo sonai situasini, maningon ipingkiri kopala kaluarga ma sonaha ia boi mangurupi niombahni, anjaha itonggohon ia ma ai. Ai porlu do ia mangajari niombahni ase lancar manggunahon bahasa ni sidea? Atap maningon pindah do ia hu kuria na manggunahon bahasa na urah iarusi niombahni? Haputusan aha pe na ibahen kopala kaluarga ai, ganup sanina botou i kuria maningon mangkargai haputusanni anjaha totap mangkaholongi sidea.

20. Sonaha hita boi mangkargai sanina botou na marlajar bahasanta?

²⁰ Songon na dob iulas hita nongkan ai, dong do piga-piga sanina botou na marusaha marlajar bahasanta. Halani ai, ra do lang urah bani sidea laho mangkatahon aha na ibagas pingkiranni. Tapi pardiateihon hita ma holong ni sidea hubani Jahowa ampa harosuhni laho mangidangi-Si. Jadi, anggo marusaha hita mangidah sifat-sifat ni sidea na madear, on ma na mangurupi hita ase mangkargai anjaha mangkaholongi sidea. Tontu lang ihatahon hita bani sidea, “Seng benahangku ho,” halani lape lancar sidea marsahap ibagas bahasanta.

21-22. Aha do na ibere Jahowa hubanta?

²¹ Tontu martarima kasih do hita bani Jahowa halani ibere do tugas banta ganupan i kuria. Maharga do hita bani Jahowa, lang soal naboru atap dalahi, marhajabuan atap lape, na matua atap na maposo, atap pe na marlajar bahasa. Halani ai, maningon marsipasangapan do homa hita.​—Rom 12:4, 5; Kol. 3:10, 11.

²² Jadi, bahat do parlajaran na dapot hita humbani limbaga ni si Paulus pasal angkula ni jolma. Sai totap ma idalankon hita parlajaran ai. On ma na mangurupi hita ase boi patoguhkon sanina botou i kuria. Iurupi do homa hita ase tongtong mangkaholongi anjaha mangkargai sidea.