Winston, saritahon ma sonaha mungkahni ham mananda Naibata.

Ahu tading i sada huta i Queensland, Australia, anjaha lang siparugama kaluargangku. Halani parhuta-huta bagas do hanami, pitah kaluarga ampa hade-hade do na hutanda. Sanggah marumur 12 tahun, sihol ma ahu mambotoh pasal Naibata. Jadi martonggo ma ahu ase iurupi mambotoh hasintongan pasal-Si. Ujungni pindah ma ahu hu Adelaide, Australia Selatan janah marhorja ijai. Sanggah marumur 21 tahun mardalani ma ahu hu Sydney. Ijai pajumpah ma ahu pakon si Pam. Isaritahon ia do pasal sada kalompok ugama Inggris-Israel. Porsaya do kalompok ai anggo halak Inggris ai ginompar ni sapuluh suku Israel na dob magou. Sidea mangkatahon bani abad paualuhkon SM, iboan ma sapuluh suku hun harajaon utara hu habuangan. Jadi, sanggah mulak ahu hu Adelaide, husaritahon ma pasal ai bani hasomanku sahorja na baru ope marlajar Bibel pakon Saksi Jahowa. Marjam-jam do hanami marsarita. Isaritahon ia ma pasal haporsayaon ni Saksi Jahowa. Dob hutangar ai, gabe hubotoh ma on ma balos ni tonggongku sanggah dakdanak hinan. Ujungni huparlajari ma hasintongan pasal Naibata ampa Harajaon-Ni. Dapot ahu ma “mutiara na maharga tumang”.​—Mat. 13:45, 46.

 Pam, humbani dakdanak pe domma ipindahi ham mutiara ai kan. Sonaha do boi dapotmu ai?

Ahu magodang i Coffs Harbour, New South Wales. Namatorasku pakon ompung humbani inang porsaya bani ajaran ni kalompok Inggris-Israel. Humbani dakdanak, ahu, botouhu, kakakku, pakon bahat sepupuku domma iajari ase porsaya anggo Naibata marosuh bani ginompar ni halak Inggris. Tapi lang masuk akal huahap ai anjaha lang dohor ahu bani Naibata. Sanggah marumur 14 tahun, roh ma ahu hu gereja-gereja na dong i hutanami, songon Gereja Anglikan, Gereja Baptis, pakon Gereja Masehi Advent Hari Ketujuh. Tapi totap do lang hubotoh hasintongan pasal Naibata.

Ujungni pindah ma hanami hu Sydney, janah jumpah ma ahu pakon si Winston sanggah na mardalani ai ia. Songon na ipatugah ia nongkan, ujungni marlajar ma ia pakon Saksi Jahowa. Sanggah surat-suratan hanami, bahat do ipatugah ia ayat-ayat ni Bibel! Mungkahni lang marosuh ahu janah haru do ahu. Tapi lambin dokah, gabe huarusi ma hasintongan pasal Naibata do na ipatugah si Winston ai.

Bani tahun 1962, pindah ma hu Adelaide ase lambin dohor bani si Winston. Domma iatur ia ase tading ahu pakon si Thomas ampa si Janice Sloman na ongga gabe misionaris i Papua Nugini. Bujur tumang do sidea bangku. Ijia, marumur 18 tahun do ahu. Iurupi sidea do ahu ase lambin mananda Jahowa. Jadi mulai ma huparlajari Bibel. Janah lambin porsaya ma ahu domma dapot ahu hasintongan ai. Dob marhajabuan ahu pakon si Winston, mangidangi Jahowa ma hanami. Hassi pe bahat tantangan, tapi ai do na mambahen hanami lambin mangkargai mutiara na maharga ai.

Winston, saritahon ma sonaha mungkahni nasiam mangidangi.

Lang piga dokah dob marhajabuan hanami, bahat do tugas na boi ihorjahon hanami ibagas pangidangion. (1 Kor. 16:9) Sanggah irohi sintua kaliling kurianami, ai ma Sanina Jack Porter, iojur sidea do ase merintis hanami. Jadi gabe perintis biasa ma hanami sadokah lima tahun. Sanggah marumur 29 tahun, itugaskon ma ahu gabe sintua kaliling i Kepulauan Pasifik Selatan na iawasi cabang Fiji. Pulau-pulau na irohi hanami ai ma Samoa Amerika, Samoa, Kiribati, Nauru, Niue, Tokelau, Tonga, Tuvalu, pakon Vanuatu.

Hinan, bahat do halak na tading i huta-huta bagas na lang marosuh bani ajaran ni Saksi Jahowa. Halani ai maningon maruhur ma hanami. (Mat. 10:16) Otik do parbarita ijai. Janah dong do kuria na lang boi pasirsirhon ianan parbornginan bannami. Jadi ipindahi hanami ma ianan parbornginan hubani parhuta ai. Anjaha bujur do sidea bannami.

Marosuh do nasiam bani horja penerjemahan kan Winston. Sonaha do mungkahni?

Sanggah baru ope hanami mangidangi i pulau Tonga, otik do publikasinta ibagas bahasa Tonga. Halani ai ma sanggah mangajari halak, ipakei sanina botou ma buku Kebenaran Yang Membimbing Kepada Hidup Yang Kekal ibagas sahap Inggris. Jadi sanggah ibahen sikolah sintua sadokah ompat minggu, setuju ma tolu sintua manerjemahkon buku Kebenaran hubagas sahap Tonga hassi pe lang sai pandei sidea marbahasa Inggris. Si Pam ma na mangetik terjemahanni, janah ikirim hanami ma hasilni hu cabang Amerika Serikat laho isetak. Sadokah ualuh minggu ma iterjemahkon buku ai. Hassi pe lang pala jenges terjemahanni, tapi bahat do halak Tonga na marlajar hasintongan  mamakei buku ai. Age pe lang penerjemah hanami, tapi ai do na mambahen marosuh hanami bani horja ai.

Pam, sonaha do hagoluhan i pulau marimbangkon i Australia?

Legan tumang do situasini! Piga-piga daerah, panas tumang cuacani, bahat rongit, mossi, pakon panahit. Janah sipata ra do lang bahat sipanganon ijai. Tapi bani ianan na legan, boi do hanami mangidah pemandangan na jenges hun ianannami tading na isobut fale, ai ma rumah adat ni halak Polinesia, lang mardingding janah martayub rumbia. Sanggah torang bulan, tangkas ma taridah bona ni kalapa ampa laut. Gabe tarojur ma hanami laho manrimangi janah martonggo. On ma na mangurupi hanami ase totap mamingkirhon na madear.

Marosuh tumang do hanami bani dakdanak ijai. Lucu tumang sidea janah longang do sidea sanggah mangidah halak na markulit putih. Sanggah hanami hu Niue, dong sada dakdanak na manjamah-jamah tangan ni si Winston. Anjaha ihatahon ia ma, “Ih marosuh tumang ahu mangidah ambulu ni ham on.” Tongon, lape ongga ididah ia tangan na sisonai. Ai ma ase sonai ihatahon ia.

Pusok do homa uhurnami mangidah bahat halak na masombuh ijai. Jenges do namin pemandangan ijai. Tapi lang dong ianan partambaran na dear janah sunsah homa bah ijai. Hassi pe sonai lang haru pangahap ni sanina botou ijai. Malas uhur ni sidea halani boi tading pakon kaluarga, dong homa ianan partumpuan laho mamuji Jahowa. Mangidah ai, gabe tarojur ma hanami ase totap mangkorjahon na sipontingan janah ihasonangkon hanami ma aha na dong bannami.

Pam, sonaha ma ibahen ham ondi ai mambuat bah ampa marmasak?

Sanggah i Kiribati, ibahen hanami ma tataring i lantai laho marmasak. Sabut ni kalapa ma ibahen hanami gantini soban. Untung ma ongga iajari bapa ahu sonaha pagarahon apuy. Dob ai, maningon hu sumur do hanami laho mambuat bah. Anggo naboru ijai laho mambuat bah, somal do ibahen sidea tungkot songon kail, hira-hira dua meter ma ganjangni. Bani ujung ni kail ai igantung sidea ma kaleng. Marbaris ma ahu pakon sidea laho mambuat bah ai. Itimpalhon sidea ma kaleng ai hubagas sumur janah mintor podas itarik sidea ase igoki bah kaleng ai. Songon na urah huidah mambahen sisonai. Hape, sanggah hutimpalhon tungkot ai, pitah mumbang hansa kalengku. Marulak-ulak do hubahen, tapi lalab lang marhasil. Itartawai sidea ma ahu. Ujungni, iurupi sada naboru ma ahu. Tongtong do sidea bujur janah ra mangurupi ahu.

Tontu marosuh do nasiam tene mangidangi i pulau ai. Boi do isaritahon nasiam pangalaman na lang tarlupahon ijai?

Si Winston: Mungkahni lang iarusi hanami hasomalan ni halak ijai. Umpamani, sanggah iontang sidea hanami mangan hu rumahni, ipasirsir sidea ma ganup sipanganon hu lobeinami. Lang ibotoh hanami hape maningon itebahon hanami do ai bani sidea. Jadi iboiskon hanami ma ganup sipanganon ai. Hassi pe sonai, sabar do sidea bannami. Ujungni, sanggah iontang use, itebahon hanami ma deba sipanganon ai bani sidea. Malas tumang do uhur ni sidea paima-imahon parrohnami use. Ondi ai lang dong Saksi na legan na roh hu kuria ni sidea sobali hanami.

Gabe hasaksian na dear do parohnami hubani parhuta ijai. Ondi ai lang porsaya sidea anggo Saksi Jahowa dong i nagori na legan. Jadi sanggah roh hanami hujai, gabe porsaya ma sidea dong do hape Saksi Jahowa i nagori na legan. Gabe longang ma sidea.

Si Pam: Sada pangalaman na jenges tumang sanggah hanami i Kiribati. Ijai dong sada kuria na otik parbaritani. Janah pitah sada dassa sintua ijai ai ma si Itinikai Matera.  Parduli tumang do ia bannami. Ongga do ia roh mamboan sada tolur ni dayok ibagas karanjang. Nini ma, “On bani nasiam da.” Ijia, jarang do hanami mandapot tolur ni dayok. Hassi pe tolur hansa na boi ibere ia, tapi martarima kasih tumang do hanami.

Pam, sanggah keguguran ham, aha do na mangurupi nasiam ase boi martahan?

Bani tahun 1973, hamil ma ahu sanggah hanami mangidangi i Pasifik Selatan. Halani ai, mulak ma hanami hu Australia. Tapi dob ompat bulan, keguguran ma ahu. Pusok tumang uhurnami. Tapi lambin dokah, lang be sai lungunan hanami. Ujungni lang be pusok uhurnami dobkonsi ibasa hanami majallah Menara Pengawal 15 April 2009. Bani “Pertanyaan Pembaca” dong sungkun-sungkun, “Apakah ada harapan kebangkitan bagi bayi yang meninggal dalam kandungan ibunya?” Bani artikel ai ipatorang anggo Jahowa tongtong do pintor pambahenan-Ni. Anjaha sasapon-Ni ma ganup sitaronon sanggah roh Jesus laho ‘mansedahon horja ni Setan’. (1 Joh. 3:8) Malas tumang uhurnami halani bahat “mutiara” na maharga na ibere Jahowa bani juakjuak-Ni. Halani ibotoh hita dong Harajaon ni Naibata, gabe tarapoh tumang do uhurta hassi pe bahat sitarononta.

Dobkonsi keguguran ahu, mangidangi ma use hanami ibagas dinas sepenuh waktu. Dong do piga-piga bulan hanami mangidangi i Bethel Australia. Dob ai itugaskon ma si Winston gabe sintua kaliling. Dobkonsi ompat tahun mangidangi i South Wales ampa Sydney, iontang ma use hanami mangidangi hu cabang Australia bani tahun 1981. Ijon ma hanami ronsi sonari.

Winston, halani ongga ham mangidangi i Pasifik Selatan, dong do gunani ai dobkonsi itugaskon ham gabe anggota Panitia Cabang i Australasia?

Eak, bahat do gunani ai. Hinan, Australia do na mangawasi Samoa Amerika pakon Samoa. Dob ai, ipadomu ma cabang Selandia Baru pakon Australia gabe cabang Australasia na mangawasi Australia, Samoa Amerika, pakon Samoa, Kepulauan Cook, Selandia Baru, Niue, Timor-Leste, Tokelau, ampa Tonga. Gati do homa ahu itugaskon gabe wakil cabang hu pulau-pulau ai. Halani ongga rup marhorja pakon sanina botou na ijai, on ma na mangurupi ahu sanggah manrohi sidea.

Humbani pangalamannami, ibotoh hanami ma sedo pitah halak na matoras dassa na mangindahi Naibata. Dong do homa na maposo na sihol mandapot “mutiara na maharga” age pe kaluargani lang sonai. (2 Raj. 5:2, 3; 2 Kron. 34:1-3) Parholong do Naibata ai janah sihol ase ganup halak age na matua sonai homa na maposo ase mandapot hagoluhan!

Hira-hira 50 tahun na salpu, si Pam pakon ahu domma mangindahi Naibata. Janah lang isangka hanami bahat tumang dapot hanami. Songon mutiara do hasintongan on. Janah sihol do hanami ase totap manjolom poltik hasintongan ai!