BANI panorang ni apostel Paulus, lang dong kapal na mamboan penumpang tumang. Jadi porini dong sasada halak na sihol markapal hu sada ianan, isungkun ia ma atap dong do kapal barang na laho hu ianan na tinujuni janah ra mamboan penumpang. (Lah. 21:2, 3) Hassi pe kapal ai lang hujai tujuanni, boi do homa dihut ia janah turun ma holi ia i sada pelabuhan. Dob ai, itorihi ia ma kapal na legan na marlayar hu ianan na tinujuni ai.​—Lah. 27:1-6.

Hinan lang dong itontuhon sadihari do jadwal ni kapal laho marlayar. Ra do lang saud kapal marlayar halani cuaca lang dear. Jadi anggo domma dear cuaca, laho ma kapal ai marlayar. Leganni ai, ra do homa lang saud marlayar halani porsaya parkapal ai bani tanda-tanda. Umpamani itangar sidea siok ni kawak na dong i tali ni layar ai. Atap dong ididah sidea ponggol-ponggol ni kapal na tardempar i topi ni laut. Jadi, anggo domma ibotoh dong kapal na laho marlayar, iboan halak ai ma barang-barangni hu pelabuhan. Janah ijai ma ia paimahon ronsi dong tugah-tugah na mangkatahon laho marlayar ma kapal ai.

Sahalak sejarawan na margoran si Lionel Casson mangkatahon, ‘Anggo i Rom, lang pala hujai hujon halak laho manorihi kapal. Pelabuhan ni sidea dong i Sungai Tiber. Dohorhon pelabuhan ai dong kota Ostia. Bahat do ijai kantor pengiriman barang. Marhitei kantor ai ma barang-barang ikirim hu marmasam pelabuhan. Umpamani, hu Narbonne [sonari Prancis], Kartago [sonari Tunisia], ampa na leganni. Jadi anggo sasada halak sihol mambotoh kapal na ija do na laho marlayar, boi ma ididah ia jadwalni i kantor ai.’

Tongon, lambin podas do sidea das hu tujuanni halani markapal. Tapi dong do homa bahayani. Songon si Paulus, ongga do piga-piga hali tardempar kapalni.​—2 Kor. 11:25.