1-2. (a) Aha ma na ibahen Sibolis laho mangoto-otoi jolma? (b) Aha na laho iulas hita bani artikel on?

“BAPA ni ladung” do Sibolis ai. Humbani mungkahni, domma ioto-otoi ia si Adam pakon si Hawa. (Joh. 8:44) Ipararat ia do ladung pasal halak na matei. Halani mabiar bani tonduy ni halak na matei, bahat ma halak na mambahen hasomalan atap adat bani halak na matei. Ai ma na mambahen sanina botou maningon ‘maruntol mangkopkop haporsayaonni’ sanggah dong kaluargani na marujung goluh.​—Jud. 3.

² Porini sonai situasi ni nasiam, aha do na boi mangurupi nasiam ase totap mandalankon hasintongan ni Bibel? (Ep. 6:11) Sonaha nasiam boi mangapoh janah patoguhkon sanina botounta na ipaksa mangkorjahon hasomalan na lang iharosuhkon Jahowa? Bani artikel on, iulas hita ma podah aha na ibere Jahowa laho mangurupi hita. Paima ai, iulas hita ma lobei aha na iajarhon Bibel pasal halak na matei.

3. Aha do na masa halani ladung na parlobei ai?

³ Jahowa marosuh ase manisia boi manggoluh sadokah ni dokahni. Tapi ase boi sonai, maningon itangihon si Adam pakon si Hawa do titah ni Naibata. Nini do bani sidea, “Anggo humbani hayu pambotohan ni na madear ampa na masambor in, seng bulih panganonmu; halani ijin ipangan ho hunjai, maningon matei do ho.” (1 Mus. 2:16, 17) Tapi roh ma Sibolis mangoto-otoi si Hawa. Marhitei ulog, ihatahon ia ma, “Seng tongon matei nasiam.” Hape porsaya do si Hawa bani ladungni ai janah ipangan ma buah ai. Dob ai dihut homa suamini mangankon ai.  (1 Mus. 3:4, 6) Halani ai, gabe masuk ma dousa ampa hamatean hu dunia on.​—Rom 5:12.

4-5. Aha ope ladung na ipararat Sibolis laho mangoto-otoi jolma?

⁴ Ujungni matei ma si Adam pakon si Hawa, songon na dob ihatahon Naibata. Tapi totap do Sibolis marladung. Ipararat ia homa ladung na legan, ai ma anggo matei sasada halak pitah dagingni do na matei. Tapi anggo tonduyni totap do manggoluh. Ronsi sonari bahat do halak na porsaya bani ladung ai.​—1 Tim. 4:1.

⁵ Mase porsaya sidea? Iarusi Sibolis do pangahap ni jolma bani hamatean. Sanggah itompa jolma, ibahen Naibata do ase sidea boi manggoluh sadokah ni dokahni. Jadi lang dong hita na sihol matei. (Par. 3:11) Halani ai songon munsuh do hamatean ai banta.​—1 Kor. 15:26.

6-7. (a) Ai boi do iponopkon Sibolis hasintongan pasal hamatean? Patorang. (b) Sonaha hasintongan ni Bibel mangurupi hita ase ulang mabiar bani na matei?

⁶ Tapi lang boi iponopkon Sibolis hasintongan tarsingat hamatean. Bahat halak domma mambotoh hasintongan pasal hamatean ampa pangarapan bani halak na matei. Janah ipararat sidea do hasintongan ai. (Par. 9:5, 10; Lah. 24:15) Tontu tarapoh ma uhurta halani mangarusi hasintongan ai. Gabe lang mabiartu hita matei. Lang homa mabiar hita bani halak na matei. Ibotoh hita do anggo sidea lang boi mangganggu hita. Songon na sinok modom do sidea. (Joh. 11:11-14) Jadi lang ibotoh sidea aha na masa. Hassi pe domma marratus tahun sidea matei, tapi sanggah ipapuho holi, tongkin dassa iahap sidea ai. Songon sangkidop mata dassa.

⁷ Tontu setuju do hita hasintongan pasal hamatean ai urah iarusi janah masuk akal. Tapi anggo ladung ni Sibolis mambahen kahou pingkiran dassa. Sobali pakahouhon, ladung ai pe mambahen ipahiri goran ni Jahowa. Ase iarusi hita sambor tumang do ladung ai, ulas hita ma sungkun-sungkun on: Sonaha ladung ai pahirihon goran ni Jahowa? Sonaha ai mambahen halak marpingkir tobusan ni Jesus ai lang porlu? Sonaha ai mambahen lambin sunsah pangahap ni jolma?

8. Sonaha Jeremia 19:5 patuduhkon anggo ladung ni Sibolis mambahen goran ni Jahowa ipahiri?

⁸ Pahirihon goran ni Jahowa. Sada humbani ladung ai ihatahon anggo halak na matei iarsik-arsik do i apuy naraka. Pahirihon goran ni Jahowa do ajaran ai. Mase? Gabe iagan halak ma Naibata na parholong ai dos songon Sibolis. (1 Joh. 4:8) Sonaha ma pangahapmu manangar ai? Na sipontingan, sonaha ma pangahap ni Jahowa? Tontu lang marosuh ia manangar ai halani ihagigihon Ia do ganup hajahaton.​—Basa Jeremia 19:5.

9. Halani ladung ni Sibolis, gabe sonaha ma pangahap ni halak pasal tobusan na isobut bani Johannes 3:16 pakon 15:13?

⁹ Iagan halak ma lang porlu tobusan ai. (Mat. 20:28) Ladung na legan na ipararat Sibolis ai ma manggoluh ope tonduy ni halak na matei. Anggo tongon do ai, tontu manggoluh sadokah ni dokahni ma ganup halak. Jadi, lang porlu be ibere Jesus hosahni laho manobus jolma ase boi manggoluh sadokah ni dokahni. Hape marhitei tobusan do Jahowa pakon Jesus patuduhkon holong na sibanggalan hubani manisia. (Basa Johannes 3:16; 15:13.) Bayangkon ma sonaha pangahap ni sidea halani lang ihargai halak tobusan ai!

10. Sonaha ladung ni Sibolis tarsingat hamatean mambahen lambin sunsah pangahap ni jolma?

¹⁰ Mambahen lambin sunsah pangahap ni jolma. Anggo dong dakdanak na matei, ihatahon ma bani namatorasni anggo anakni ai ialop Naibata laho ibahen gabe malekat i surga. Ai gabe tarapoh do namatorasni manangar ai atap lambin sunsah do pangahapni? Anggo dong na manlawan ajaran ni gareja, ibahen pamimpin gareja ma ajaran pasal apuy naraka gabe dalan laho manggantung anjaha manutung halak na manlawan ai. Buku Inkuisisi Spanyol (dewan pengadilan Katolik Spanyol) mangkatahon porsaya do pamimpin gareja anggo na manlawan ai itutung, “gabe ibotoh ia ma sonaha milasni apuy naraka ai”. Jadi iarapkon sidea ma mubah ia paima matei ase ulang masuk naraka holi ia. Bani piga-piga ianan dong na manombah tonduy ni ompungni. Dong homa na manggalangkon sipanganon bani halak na matei ase ipasu-pasu sidea janah ase ulang manggila tonduy ni na matei ai. Sasintongni sedo gabe tarapoh halak halani ladung ai. Tapi lambin mabiar do sidea janah holsohan.

11. Aha do na ibahen kaluarga ase hita mangkorjahon na ihasogamkon Naibata?

¹¹ Sipata, ra do kaluarga mamaksa hita ase dihut bani hasomalan na lang iharosuhkon Naibata. Anggo lang ra hita, ra do gabe ipaila hita janah ihatahon sidea ma anggo hita lang hormat bani na matei ai. Atap ra do homa ihatahon anggo tonduy na matei ai roh do holi mangganggu hita. Tapi anggo holong do hita bani Naibata janah rosuh mandalankon titah-Ni, tontu lang ra hita mangihutkon sidea. Aha ma na mangurupi hita ase totap mangkorjahon harosuh ni Naibata? Ulas hita ma piga-piga prinsip ni Bibel.

12. Hasomalan aha do na ihagigihon Naibata?

¹² “Paholang hanima ma dirinima” humbani hasomalan na ihagigihon Naibata. (2 Kor. 6:17) Bani sada nagori i Karibia, bahat halak na porsaya dong do “beguni” halak na matei janah boi manguhum  halak na jahat hu bani. Porsaya do homa sidea anggo “begu” ai boi “pasedahon sada huta”. Leganni ai, dong homa hasomalan i Afrika, anggo dong na matei maningon itutup do ganup kaca i rumah ai janah ipabalik poto ni na matei ai hu dingding. Mase ibahen sonai? Ase ulang ididah na matei ai dirini. Tontu lang ra hita mangihutkon hasomalan sisonai halani ladung do ai.​—1 Kor. 10:21, 22.

13. Anggo lang sai iarusi nasiam sada hasomalan, aha ma na maningon bahenonmu domu bani Jakobus 1:5?

¹³ Porini lang sai iarusi nasiam hasomalan ai sosok do bani Bibel atap lang, martonggo ma bani Jahowa janah pindo ma hapentaran hu Bani. (Basa Jakobus 1:5.) Dob ai, riset ma hun publikasinta pasal ai. Boi do homa iulas nasiam pasal ai pakon sintua i kuria. Holi sedo sidea na mambahen haputusan bani nasiam. Tapi iurupi do nasiam ase mangarusi prinsip ni Bibel na markaitan hujai. Anggo sonai ibahen nasiam, gabe boi ma iarusi nasiam “parleganan ni na madear ampa na masambor”.​—Heb. 5:14.

14. Sonaha ase ulang ibahen hita halak tartolsu?

¹⁴ “Bahen nasiam ma haganup ai pasangapkon Naibata. Ulang ma bahen nasiam parsangsian bani halak.” (1 Kor. 10:31, 32) Paima dihut bani sada hasomalan, pingkirhon ma sonaha pangahap ni halak na legan tarlobih hasoman sahaporsayaon. Ulang ma bahen hita tartolsu atap ise pe. (Mrk. 9:42) Ulang homa ibahen hita borit uhur ni halak na lang sahaporsayaon pakon hita. Ulang ipabajan-bajan hita adat ni sidea. Dingat ma ponting do hita patuduhkon holong! Anggo lamlam janah hormat hita sanggah marbalos, ra do gabe mubah pangahap ni sidea na marsogam ni uhur banta. Ujungni gabe ipasangap ma goran ni Jahowa.

15-16. (a) Mase dear anggo ipatugah hita pasal haporsayaonta bani na legan? Bere ma contoh. (b) Sonaha hita mandalankon podah bani Rom 1:16?

¹⁵ Patugah ma bani kaluarga anggo ham sahalak Saksi Jahowa. (Jes. 43:10) Lambin urah do holi iahap ham martukar pingkiran pakon kaluarga ampa tetangga anggo domma ibotoh sidea Saksi Jahowa do ham. Si Francisco na tading i Mozambik manuratkon, “Dob marlajar Bibel ahu pakon istringku si Carolina, ipatugah hanami ma bani kaluarga  anggo hanami lang be mangihutkon adat bani halak na matei. Lang piga dokah, iuji ma haporsayaonnami sanggah matei sanina ni istringku. Ijon dong hasomalan na ibahen ase ulang manggila tonduy ni na matei ai. Iparidi ma bangkei ni na matei ai, dob ai iuseihon ma bah bokas ni paridian ai hu sada ianan. Janah maningon ijai ma modom sindohorni sadokah tolu borngin. Jadi isuruh sidea ma istringku modom ijai.”

¹⁶ Aha ma na ibahen si Francisco pakon istrini? Nini si Francisco, “Halani holongnami bani Jahowa janah sihol pamalaskon uhur-Ni, lang ra hanami mangkorjahon ai. Gabe manggila ma kaluarga ni istringku. Ihatahon sidea ma anggo hanami lang hormat bani na matei ai. Janah lang ra be sidea hu rumahnami atap pe mangurupi hanami. Halani domma ongga ipatugah hanami pasal haporsayaonnami, sip hansa hanami sanggah na manggila ai sidea. Tapi dong do piga-piga kaluarga na mambela hanami. Janah ipasingat sidea ma anggo hanami domma ongga patorangkon pasal ai bani sidea. Ujungni, lang be manggila sidea bannami. Dob ai, dong ma piga-piga kaluarga na roh hu rumahnami mangindo publikasinta.” Jadi, andohar ma hita songon sidea na lang maila manjolom poltik hasintongan ni Bibel.​—Basa Rom 1:16.

17. Aha do na boi mangurupi hita gabe huan-kuan bani sanina botou na marpusok ni uhur?

¹⁷ Sanggah dong sanina botounta na marpusok ni uhur halani matei na hinaholonganni, marusaha ma hita gabe ‘huan-kuan na itubuhkon gabe sanina ibagas hasosakan’. (Pod. 17:17) Aha do na boi mangurupi hita gabe “huan-kuan”, tarlobih sanggah sidea ipaksa dihut bani hasomalan na ihagigihon Jahowa? Maningon iihutkon hita ma dua prinsip ni Bibel sanggah mangapoh sidea. Ulas hita ma ai.

18. Mase tangis Jesus sanggah matei si Lasarus, anjaha aha ma parlajaranni hubanta?

¹⁸ “Tangis ma pakon na tangis.” (Rom 12:15) Ra do lang ibotoh hita aha na  laho ihatahon sanggah mangapoh sidea na marpusok ni uhur. Hassi pe sonai, sanggah ididah sidea tangis hita, gabe ibotoh sidea ma na parduli do hita bani sidea. Sonai ma na ibahen Jesus sanggah matei si Lasarus. Dob ompat ari, das ma Jesus ijai. Ididah ma tangis do hasoman ni si Lasarus, sonai homa si Maria pakon si Marta. “Tangis” ma homa ia hassi pe tongkin nari laho papuhoonni do si Lasarus. (Joh. 11:17, 33-35) Sanggah tangis Jesus, on patuduhkon sonai do homa pangahap ni Jahowa sanggah matei si Lasarus. Halani tangis Jesus, tarapoh ma si Maria pakon si Marta. Ibotoh sidea ma holong tumang do Jesus bani sidea. Jadi, anggo tangis hita pakon sanina botou na marpusok ni uhur, ibotoh sidea ma holong janah parduli do hita bani sidea.

19. Domu bani Parambilan 3:7, aha ope na boi ibahen hita laho mangapoh na marpusok ni uhur?

¹⁹ “Adong panorang sipsip, anjaha dong panorang marsahapi.” (Par. 3:7) Cara na legan laho mangapoh sanina botou na marpusok ni uhur, ai ma dear manangihon saritani. Paturut ma ipatugah ia aha na dong ibagas uhurni. Porini ‘lepak parsahapni’ ulang borit uhurmu. (Job 6:2, 3) Ra sonai ia halani gulut pingkiranni ibahen kaluargani na lang Saksi Jahowa. Halani ai arahkon ma ia martonggo. Pindo ma bani “Sitangihon tonggo” ase ipargogohi ia janah ibere hauhuran. (Ps. 65:3) Anggo sosok panorangni, basahon ma ayat ni Bibel ampa pangalaman hun publikasinta na sosok bani situasini ase toguh uhurni.

20. Aha do na laho iulas hita bani artikel na mangihut?

²⁰ Tontu martarima kasih tumang do hita halani mambotoh hasintongan pasal halak na matei ampa pangarapan bani sidea! (Joh. 5:28, 29) Halani ai ulang ma mabiar hita mandalankon hasintongan ni Bibel. Anjaha sirsir ma hita mansaritahon ai bai ganup situasi. Bani artikel na mangihut ulas hita ma cara na legan na ibahen Sibolis laho pakahouhon jolma, ai ma marhitei spiritisme. Ulas hita use mase maningon ipadaoh hita dirinta humbani hiburan ampa horja-horja na dong kaitanni bani spiritisme.