1. Aha do na sihol ibahen juakjuak ni Naibata, janah mase? (Tonggor ma gambar sampul.)

IPARENTAHKON Jesus do susianni ase ‘laho . . . janah [mangajari] sagala bangsa ase gabe susianni’. (Mat. 28:19) Tontu sihol do juakjuak ni Naibata marlajar ase lambin pandei mandalankon tugas ai. (2 Tim. 4:5) Marguna tumang do horja ai janah pontingan do ai marimbangkon aha pe. Tapi ra do pangahapta lang sai urah mandalankon ai.

2. Mase lang urah mandalankon tugas pangidangion?

² Dong horja na legan na maningon ihorjahon. Umpamani, dong sanina botou na maningon gogoh marhorja laho pasirsirhon haporluanni ampa kaluargani. Ra do homa dong tanggung jawab na legan ibagas kaluarga, na boritan, na stres, atap pe hurang gogohni halani domma matua. Hassi pe sonai situasinta, sonaha hita boi mandalankon tugas pangidangion domu hubani tuk ni gogohta?

3. Aha do artini na ihatahon Jesus bani Mateus 13:23?

³ Anggo halani situasi do na mambahen gabe hurang panorangta laho mangidangi, ulang ma hita maretek ni uhur. Ibotoh Jesus do lang boi dos na ibahen juakjuak ni Naibata ibagas pangidangion. (Basa Mateus 13:23.) Tapi anggo ibere hita na sidearan, ihargai Jahowa do ai. (Heb. 6:10-12) Leganni ai, ra do pangahapta boi do hape hita mambere lobih bahat panorang laho mangidangi. Bani artikel on, ulas hita ma sonaha hita mambahen pangidangion na siporlunan, sonaha mambahen parubahan ibagas hagoluhan, ampa sonaha ase lambin pandei hita sanggah marbarita ampa mangajari. Tapi paima ai,  ulas hita ma lobei aha do artini mangidangi humbani tuk ni gogohta.

4. Aha do artini mangidangi humbani tuk ni gogohta?

⁴ Mangidangi humbani tuk ni gogohta artini sedo pitah bahatni panorang na igunahon hita laho mangidangi. Tapi maningon marbarita do hita anjaha mangajari halak domu bani na tarbahen hita. Ponting do homa bani Jahowa alasan mase hita mangidangi. Ia sihol ase hita mandalankon tugas pangidangion * halani holongta hu Bani pakon hasoman. (Mrk. 12:30, 31; Kol. 3:23) Maningon do homa hita mangidangi Naibata humbani gok ni uhurta. Artini igunahon hita ma gogohta anjaha ibere hita ma na sidearan laho mangidangi-Si. Anggo iarusi hita ponting tumang do tugas pangidangionta, tontu marusaha do hita padaskon ambilan na madear bani buei halak.

5-6. Patugah ma sarita na patuduhkon anggo hita boi totap marbarita hassi pe lang bahat panorangta laho mangidangi.

⁵ Bayangkon ma sarita on. Dong sada garama na rosuh tumang margitar. Megah do pangahapni anggo boi margitar sadihari pe dong panorangni. Ujungni ijalo ma ia margitar i sada restoran, tapi pitah ari Sabtu pakon Minggu dassa. Hape lang sungkup gajini ai. Halani ai ipindahi ia ma horja na legan. Anjaha ijalo ma ia marhorja gabe kasir i sada toko, tiap ari Senin ronsi ari Jumat. Hassi pe bahatan panorangni marhorja i toko ai, tapi rosuhan do ia margitar. Halani ai marusaha ma ia lambin pandei margitar ase boi ai na gabe horjani sepenuh waktu.

⁶ Ra do sonai homa situasinta. Sihol do hita mambere gok panorang laho mangidangi. Tapi halani situasi, lang tarbahen hita mangkorjahon ai. Hassi pe sonai tong do hujai uhurta. Halani ai marusaha ma hita lambin pandei marbarita ase bahat halak na marosuh manangar  baritanta. Tapi ra do sungkun-sungkun hita sonaha hita boi mambahen pangidangion na siporlunan ibagas goluhta.

7-8. Sonaha hita boi mangusihi Jesus sanggah mangidangi?

⁷ Ipatuduh Jesus do siusihan na madear ibagas na mangidangi. Mambaritahon Harajaon ni Naibata do na siporlunan ibagas goluhni. (Joh. 4:34, 35) Marratus kilometer do idalani ia ase boi marbarita bani buei halak. Laho do ia hu rumah-rumah atap huja pe sidea boi ijumpahi. Tangkas ma, pangidangion do na sipontingan bani Jesus.

⁸ Songon Jesus, hita pe boi padaskon barita na madear bani ganup halak ija pe sidea boi ijumpahi. Sirsir ma hita patugahkon pasal ai sadihari pe dong panorang. (Mrk. 6:31-34; 1 Ptr. 2:21) Dong do sanina botou i kuria na boi gabe parintis istimewa, parintis biasa, ampa parintis ekstra. Dong do homa na marlajar bahasa na legan atap pe pindah hu ianan na mamorluhon bahat parbarita. Tapi dong do homa na lang boi mangkorjahon na sisonai. Hassi pe sonai, marusaha do sidea mambahen na sidearan sanggah mangidangi. Atap na sonaha pe situasinta, lang ipindo Jahowa lobih humbani na boi tarbahen hita. Sihol do Ia ase ganup hita marmalas ni uhur sanggah mambaritahon ‘ambilan na madear humbani Naibata na martuah in’.​—1 Tim. 1:11; 5 Mus. 30:11.

9. (a) Hassi pe dong horjani, sonaha si Paulus mambahen pangidangion na sipontingan? (b) Domu bani Lahoan 28:16, 30, 31, siusihan aha ma na ipatuduh si Paulus hubanta?

⁹ Si Paulus pe mambahen pangidangion na sipontingan ibagas goluhni. Sanggah i Korint ia sadokah pardalananni na paduahon gabe missionaris, marhorja do ia mambahen tenda halani otik mando duitni. Tapi sedo ai na siporlunan bani. Ihorjahon ia pe ai, ase ulang pala igalar halak Korint ia sanggah padaskon ambilan na madear bani sidea. (2 Kor. 11:7) Hassi pe dong horjani, tongtong do ia marbarita age pe ari Sabat. Dobkonsi mubah situasini, lambin ringgas ma ia marbarita. “Igogohi si Paulus ma marambilan, laho manaksihon bani Jahudi, paboa Jesus do Kristus in”. (Lah. 18:3-5; 2 Kor. 11:9) Dob ai itangkap ma ia janah gabe tahanan rumah i Rom sadokah dua tahun. Hassi pe sonai, totap do ia marbarita age bani halak na manjumpahisi atap pe marhitei surat. (Basa Lahoan 28:16, 30, 31.) Lang ipaturut si Paulus aha pe manlanglangi ia laho mangidangi. Ia manuratkon, “Halani na dob ijalo hanami [tugas pangidangion] on . . . , seng marnaloja hanami.” (2 Kor. 4:1) Tiru hita ma si Paulus. Hassi pe bahat panorang na igunahon hita laho marhorja, tapi bahen hita ma pangidangion na sipontingan ibagas goluhta.

10-11. Sonaha hita boi mangidangi humbani tuk ni gogohta hassi pe boritan?

¹⁰ Anggo hita lang boi marbarita hu rumah-rumah halani domma matua atap pe boritan, dong do cara na legan ase boi totap mangidangi. Songon halak Kristen bani abad na parlobei, laho do sidea marbarita huja pe halak boi ijumpahi. Marbarita do sidea hu rumah-rumah, hu tiga, i dalan, ampa i ianan na legan. (Lah. 17:17; 20:20) Sonai homa anggo lang boi hita dokah mardalan, boi do  hita hundul ija pe bahat halak ase boi hita marbarita bani sidea. Boi do homa hita mambere hasaksian marhitei surat atap pe talepon. Bahat do sanina botounta na marmalas ni uhur halani boi marbarita manggunahon cara sisonai.

¹¹ Hassi pe boritan, boi do nasiam totap marbarita humbani tuk ni gogohmu. Sonai do na ibahen si Paulus. Nini do, “Haganup do tarhorjahon ahu marhiteihon Ia, na margogohi ahu.” (Pil. 4:13) Sanggah mandalankon tugas pangidangionni, boritan do si Paulus. Halani ai ma ia porlu ipargogohi. Ipatorang ia do bani halak Kristen i Galatia, halani naboritni ai do ase boi ia ‘mamboan ambilan na madear bani sidea’. (Gal. 4:13) Jadi sanggah boritan pe, boi do hita totap marbarita. Umpamani bani dokter, perawat, ampa parhorja i rumah sakit, halani ra do sanggah roh hasomanta marbarita hu rumah ni sidea, gati do lang i rumah sidea.

12. Aha do artini na ihatahon Jesus bani Mateus 6:22?

¹² Jesus mangkatahon, “Palita ni angkula do mata. Anggo dear [“sada na itonggor,” Terjemahan Dunia Baru] matamu, lihar ma ganup angkulamu.” (Mat. 6:22) Aha do maksud ni Jesus ai? Artini porlu do ibahen hita parubahan ase boi mambahen pangidangion na sipontingan ibagas goluhta. Ibahen Jesus do sitiruon laho mangajari susianni ase totap mamingkirhon pasal Harajaon ni Naibata. Jadi tiru hita ma Jesus marhitei  ‘palobeihon Harajaon ampa hapintoron ni Naibata’.​—Mat. 6:33.

13. Aha do na porlu ibahen hita ase boi palobeihon pangidangion?

¹³ Parubahan aha do na porlu ibahen ase hita boi palobeihon pangidangion? Pangkei ma hita manggunahon panorang ase dong panorangta mangurupi halak laho mananda Jahowa. * Umpamani, ai boi do iatur hita panorangta marhorja ase boi mangidangi ibagas minggu ai? Ai boi do ihurangi hita panorangta laho mardalani?

14. Parubahan aha do na ibahen sapasang suami istri ase bahat panorangni mangidangi?

¹⁴ Pardiateihon ma pangalaman ni sada sintua na margoran si Elias pakon istrini. Ia mangkatahon, “Sihol do hanami marintis. Tapi paima ai, maningon dong parubahan na ibahen hanami ase lambin bahat panorangnami mangidangi. Umpamani, ihurangi hanami ma pangaluaran na lang porlu janah lang be gati hanami mardalani. Dob ai ipindo hanami ma bani bosnami ase ihurangi panorangnami marhorja. Hasilni, gabe boi ma hanami marbarita bani bod ni ari ampa mangurupi bahat halak marlajar Bibel. Anjaha boi do homa hanami marbarita dua hali sabulan bani ari na legan. Malas tumang uhur!”

15-16. Domu bani 1 Timoteus 4:13, 15, sonaha ase hita lambin pandei ibagas pangidangion? (Tonggor ma kotak “ Ase Boi Ahu Mangidangi humbani Tuk ni Gogohku.”)

¹⁵ Ase boi homa hita mangidangi humbani tuk ni gogohta, marusaha ma ase  lambin pandei hita marbarita ampa mangajari. I parhorjaan somal do sasada halak ilatih lobei ase pandei ia mandalankon horjani. Sonai ma homa bani parbarita Harajaon ni Naibata. Porlu do torus ilatih hita dirinta ase lambin pandei ibagas pangidangion.​—Pod. 1:5; basa 1 Timoteus 4:13, 15.

¹⁶ Sonaha carani ase lambin pandei hita ibagas pangidangion? Pardiateihon ma tugah-tugah na ibere bani Partumpuan Hagoluhan pakon Pangidangion Kristen. Marhitei partumpuan ai, iurupi do hita ase lambin pandei mangidangi. Umpamani, sanggah ketua membere podah bani sanina atap botou dobkonsi salosei sidea padaskon tugasni, pardiateihon ma ai. Jadi boi ma iihutkon hita podahni ai sanggah padaskon barita na madear bani halak. Boi do homa ipindo hita bani pengawas kalompok dinas ase iurupi hita. Boi do homa hita rup marbarita pakonsi, pakon parbarita na marpangalaman, pakon parintis, atap pe pakon sintua kaliling. Anggo lambin pandei hita manggunahon publikasi na dong bani Alat Laho Mangajarhon Bibel, lambin marmalas ni uhur ma hita sanggah mangidangi.

17. Sonaha ma pangahapmu anggo mangidangi humbani tuk ni gogohmu?

¹⁷ Sada hasangapon do boi gabe ‘hasoman sahorja’ ni Naibata. (1 Kor. 3:9) Anggo ‘itanda ham na ija do na siporlunan’ anjaha totap mamingkirhon pangidangion, gabe boi ma nasiam mangidangi Jahowa “ibagas malas ni uhur”. (Pil. 1:10; Ps. 100:2) Pos ma uhurmu sai ipargogohi Naibata do ham ase boi mangidangi Jahowa humbani tuk ni gogohmu hassi pe dong hasunsahan. (2 Kor. 4:1, 7; 6:4) Lang soal sadiha bahat panorang na boi ibere ham laho mangidangi, tontu malas do uhurmu anggo ihorjahon ham ai humbani gok ni uhur. (Gal. 6:4) Anggo mangidangi ham humbani tuk ni gogohmu taridah ma holong do uhurmu bani Jahowa ampa hasoman jolma. “Anggo ihorjahon ham in, na paluahkon dirimu do ham ijin sonai age na manangihon ham.”​—1 Tim. 4:16.