1. Domu bani Epesus 6:10-13, sonaha cara ni Jahowa mansarihon hita? Patorang.

SADA cara ni Naibata laho mansarihon hita ai ma iurupi do hita ase boi manlawan munsuhta. Tontu malas do uhurta halani ai. Sibolis pakon malekatni do munsuhta. Domma ipatugah Jahowa hubanta pasal sidea janah ibere do homa sinjata ase boi hita manlawan sidea. (Basa Epesus 6:10-13.) Anggo igunahon hita ai anjaha totap marpangunsandeian bani Jahowa, boi ma hita monang manlawan Sibolis. Sarupa ma holi pangahapta songon apostel Paulus na mangkatahon, “Anggo Naibata hasomanta, ise ma imbangta?”​—Rom 8:31.

2. Aha do na laho iulas hita bani artikel on?

² Halani hita halak Kristen, tontu marlajar pasal Jahowa janah mangidangi-Si do na sipontingan banta. (Ps. 25:5) Jadi lang pala porlu ibotoh hita ganup na ihorjahon Sibolis ampa malekatni. Hassi pe sonai, porlu do homa botohonta aha na ibahen Sibolis laho mangoto-otoi hita. Mase? Ase lang boi ia pakahouhon hita. (2 Kor. 2:11) Bani artikel on, ulas hita ma aha do cara na gati ibahen sidea laho mangoto-otoi jolma. Ulas hita homa sonaha hita boi manlawan sidea.

3-4. (a) Aha do spiritisme ai? (b) Sadiha bahat do halak na porsaya bani spiritisme?

³ Sada cara na igunahon Sibolis ampa malekatni laho pakahouhon jolma ai ma marhitei spiritisme. Halak na mangkorjahon spiritisme mangaku anggo sidea boi mangkorjahon aha na lang boi ibahen halak na legan.  Umpamani, ihatahon sidea anggo sidea boi meramal aha na masa bani ari na laho roh. Dong homa na mangaku boi manungkun bani halak na matei. Dong homa na boi mambahen tabas-tabas. *

⁴ Sadiha bahat do halak na porsaya bani spiritisme? Dong penelitian ibahen i 18 nagori i Amerika Latin pakon i Karibia. Bani laporan ai ipatugah sapartolu halak ijai porsaya bani sihir ampa hadatuon. Anjaha porsaya do homa sidea anggo sidea boi manungkun bani halak na matei. Penelitian na legan ibahen i 18 nagori i Afrika. Ijai, lobih humbani satongah pendudukni porsaya bani hadatuon. Hunjon ibotoh hita ma marusaha do Sibolis pakahouhon “haganup dunia on”. Halani ai, maningon marusaha ma hita padaohkon diri humbani spiritisme.​—Pangk. 12:9.

5. Sonaha pangahap ni Jahowa mangidah spiritisme?

⁵ Jahowa ai ma “Naibata hatengeran ni uhur [“hasintongan”, Terjemahan Dunia Baru]”. (Ps. 31:6) Jadi, sonaha ma pangahap ni Jahowa mangidah spiritisme? Ihagigihon Ia do ai! Iparentahkon Ia do bani halak Israel na hinan, “Seng bulih jumpah i tongah-tongah nasiam sada halak, na pabontaskon anakni barang boruni humbani apuy, barang halak partondung, barang sijujur ari, barang sipartabas, barang parsibalik mata, barang sibahen uti-utian, barang sibahen pangidahan, barang siparsungkun bani [begu ni na matei], barang siparbegu ganjang. Ai magigi tumang do uhur ni Jahowa mangidah haganup halak na mangkorjahon na sonai.” (5 Mus. 18:10-12) Tongon sonari lang idalankon halak Kristen Titah ni si Musa. Hassi pe sonai, seng mubah pangahap ni Jahowa mangidah spiritisme.​—Mal. 3:6.

6. (a) Marhitei spiritisme, sonaha Sibolis mambahen halak gabe sunsah? (b) Domu bani Parambilan 9:5, aha do na iajarhon Bibel tarsingat halak na matei?

⁶ Jahowa mambotoh gabe sunsah do halak ibahen spiritisme. Marhitei spiritisme, ipararat Sibolis do ladungni. Umpamani, dong ope tonduy ni halak na matei. (Basa Parambilan 9:5.) Halani ai, gabe mabiar ma jolma janah mandaoh humbani Jahowa. Sihol do Sibolis ase halak na mangkorjahon spiritisme ai porsayanan bani begu-begu marimbangkon bani Naibata. Halani ai ipasingat Jahowa do hita ase padaohkon diri humbani spiritisme.

7. Aha do na ipatugah Naibata hubanta?

⁷ Songon na dob iulas hita nongkan ai, domma ipatugah Naibata hubanta sonaha ase hita ulang ipakahou Sibolis pakon malekatni. Ulas hita ma aha do na porlu bahenonta ase boi manlawan sidea.

8. (a) Aha do na porlu bahenonta ase boi manlawan Sibolis? (b) Sonaha Psalmen 146:4 patuduhkon ladung do na ihatahon Sibolis tarsingat halak na matei?

⁸ Basa janah rimangi ma isi ni Bibel. Ponting tumang do ai ase lang boi hita ioto-otoi ladung na ipararat Sibolis. Songon podang na marot do Hata ni Naibata ai, na boi manlinggomi hita humbani ladung ni Sibolis. (Ep. 6:17) Umpamani,  marhitei Bibel ibotoh hita ma anggo na matei lang boi marsahap pakon na manggoluh. (Basa Psalmen 146:4.) Leganni ai, ibotoh hita pitah Jahowa dassa na boi patugahkon aha na laho masa bani ari simagira. (Jes. 45:21; 46:10) Anggo tongtong ibasa janah irimangi hita isi ni Bibel, ai do na mangurupi hita ase lang ipakahou Sibolis anjaha gabe ihagigihon hita ma ladungni ai.

9. Aha do piga-piga contoh spiritisme na maningon ipadaoh hita?

⁹ Padaoh hita ma aha pe na dong kaitanni pakon spiritisme. Halani hita halak Kristen, lang ra hita mangkorjahon spiritisme. Umpamani, lang ra hita mardatu atap manungkun bani na matei. Songon na dob iulas bani artikel na salpu, hita lang ra dihut bani adat na matei na ibahen halani porsaya dong ope tonduy ni na matei ai. Lang homa ra hita mangidah ramalan bintang atap pe manungkun bani peramal laho mambotoh aha na laho masa bani ari simagira. (Jes. 8:19) Sambor tumang do ganup horja sisonai, halani dos do ai hita marsahap pakon Sibolis ampa malekatni.

10-11. (a) Dob marlajar hasintongan, aha ma na ibahen halak Kristen bani abad na parlobei? (b) Domu bani 1 Korint 10:21, mase maningon itiru hita sidea, janah sonaha carani?

¹⁰ Ambukkon ma barang-barang na dong kaitanni pakon spiritisme. Bani abad na parlobei, bahat do halak i Epesus na mangkorjahon spiritisme. Tapi dob iparlajari sidea hasintongan, mubah ma sidea. Bibel mangkatahon, “Buei do sihorjahon hadatuon hinan, mamboan pustaha-pustahani, lanjar itutung ma ai i lobei ni halak na mabuei.” (Lah. 19:19) Aha pe ihorjahon sidea do laho manlawan Sibolis. Sasintongni mahal do buku-buku ni sidea ai. Boi do namin ai ibere atap ijual bani halak na legan. Tapi  rahanan do iahap sidea manutung ganupan ai ase malas uhur ni Jahowa.

¹¹ Sonaha hita boi mangusihi sidea? Dear do anggo ra hita mangambukkon ganup barang-barang na dong kaitanni pakon spiritisme. Umpamani, buku mantera atap jimat na ibahen laho manjaga daging.​—Basa 1 Korint 10:21.

12. Sungkun-sungkun aha do na porlu ipingkirhon hita sanggah mamilih hiburan?

¹² Maruhur ma sanggah mamilih hiburan. Sungkun ma dirimu, ‘Ai ra do ahu mambasa buku, majallah, atap artikel na dong i internet na markaitan pakon spiritisme? Sonaha musik na hutangar, film atap acara TV na hutonton, atap game na hupilih? Ai dong do kaitanni ganupan ai pakon spiritisme? Dong do na patuduhkon vampir, zombi, atap begu-begu? Ai ibahen do sihir atap mantra ai songon na dear idahon janah lang marbahaya?’ Tongon lang ganup hiburan atap sarita dong kaitanni pakon spiritisme. Hassi pe sonai, sanggah mamilih hiburan padaoh hita ma aha pe na ihagigihon Jahowa. Marusaha ma hita ase tongtong “maruhur na borsih” i lobei ni Naibata.​—Lah. 24:16. *

13. Sarita pasal aha do na lang boi sai ipararat hita?

¹³ Ulang ma sai isaritahon hita pasal Sibolis ampa malekatni. Maningon itiru hita ma Jesus. (1 Ptr. 2:21) Paima roh hu tanoh on, i surga do ia tading. Tontu bahat do na ibotoh ia pasal Sibolis ampa malekatni. Tapi lang ai na  isaritahon ia sanggah i tanoh on. Rosuhan do ia mangajarhon pasal Jahowa bani halak na legan, sedo mangajarhon pasal pambahenan ni Sibolis. Jadi tiru ma Jesus. Ulang ma ipararat hita sarita pasal Sibolis ampa malekatni. Tapi marhitei parsahapta, patuduh hita ma anggo “hata na madear” pasal hasintongan do na dong ibagas uhurta.​—Ps. 45:2.

14-15. (a) Mase lang pala mabiartu hita bani Sibolis ampa malekatni? (b) Bukti aha do na patuduhkon anggo Jahowa manlinggomi juakjuak-Ni?

¹⁴ Ulang ma mabiartu hita bani Sibolis ampa malekatni. Sonari on, bahat do sitaronon na roh hubanta. Sipata dong na sompong boritan, hona mara, atap matei. Tapi ulang ma iahap hita halani Sibolis do masa ganupan ai. Bani Bibel ihatahon ganupan hita tunduk do bani “panorang ampa na masa”. (Par. 9:11) Leganni ai, domma ipatuduh Jahowa gogohan do Ia marimbangkon Sibolis ampa malekatni. Umpamani, ilarang Jahowa do Sibolis mamunuh si Job. (Job 2:6) Bani panorang ni si Musa, taridah do banggalan kuasa-Ni marimbangkon ganup datu ni halak Masir. (2 Mus. 8:18; 9:11) Marhitei kuasa ni Jahowa, idabuh Jesus do Sibolis pakon malekatni hun surga hu tanoh on. Lang piga dokah nari, idabuh ma holi sidea hu ruang partoruh ase lang boi be sidea manjahati ise pe.​—Pangk. 12:9; 20:2, 3.

¹⁵ Sonari, bahat do bukti na patuduhkon sai tongtong do Jahowa manlinggomi juakjuak-Ni. Dingat ma: Ipararat hita do hasintongan hu sab dunia on. (Mat. 28:19, 20) Halani ai, gabe ibotoh halak ma parladung do Sibolis ai. Anggo banggal do kuasa ni Sibolis, domma iparontihon ia horja parambilanonta ai. Tapi lang tarbahensi ai. Jadi ulang ma mabiartu hita bani Sibolis ampa malekatni. Domma ibotoh hita “manatap manonggor do mata ni Jahowa hu sab tanoh on, laho mambere gogoh hubani halak paruhur na marsijoloman hu Bani”. (2 Kron. 16:9) Anggo setia hita bani Jahowa, lang tarbahen Sibolis laho pasedahon hita.

16-17. Patugah ma sada contoh na patuduhkon porlu do habaranion laho manlawan begu-begu.

¹⁶ Sipata, anggo lang ra hita dihut bani hasomalan ni kaluarga na markaitan pakon begu-begu gabe manggila do sidea banta. Mabiar do sidea hona mara ma holi hita halani ai. Tapi pasu-pasuon ni Jahowa do hita anggo barani manulak ai. Pardiateihon ma pangalaman ni si Erica na tading i Ghana. Datu bolon do bapani. Halani ai maningon dihut ma ia mangankon jagal na dob igalangkon hubani ompung ni bapani ai. Tapi halani ia domma marlajar Bibel sanggah marumur 21 tahun, lang be ra ia mangankon ai. Gabe ihatahon kaluargani ma anggo ia lang pasangapkon ompungni ai. Porsaya do sidea gabe podouan janah boritan ma holi si Erica ibahen ompungni ai.

¹⁷ Sai lalab do ipaksa kaluargani ase si Erica mangihutkon hasomalan ni sidea. Tapi totap do lang ra ia. Ujungni iusir ma ia hun rumah. Tapi dong ma Saksi na mangarahkon ia tading i rumah ni sidea. Tangkas ma ipasu-pasu Jahowa do si Erica. Dapotsi ma kaluarga na baru. Ganup hasoman sahaporsayaonni ai songon sanina botouni do bani. (Mrk. 10:29, 30) Hassi pe lang be iakui kaluargani ia janah itutung do ganup barang-barangni, totap do ia setia bani Jahowa. Ujungni ididi ma ia anjaha gabe perintis biasa do ia sonari. Jadi lang mabiar si Erica bani begu-begu ai. Ihatahon si Erica ma pasal kaluargani, “Sai hutonggohon do kaluargangku ase ra mananda Jahowa. Sihol do ahu ase sidea pe mandapot haluahon ampa pasu-pasu halani mangidangi Jahowa, Naibata na parholong in.”

18. Pasu-pasu aha ma na dapot hita anggo marpangunsandeian bani Jahowa?

¹⁸ Tontu lang ganupan hita sarupa tantanganni pakon si Erica. Tapi totap ma lawan hita Sibolis ampa malekatni janah marpangunsandeian ma bani Jahowa. Anggo sonai ibahen hita, jaloonta ma bahat pasu-pasu. Lang be ioto-otoi Sibolis hita anjaha lang mabiartu hita bani sidea. Ujungni lambin orot ma parhasomananta pakon Jahowa. Si Jakobus mangkatahon, “Ondoskon nasiam ma diri nasiam bani Naibata. Lawan nasiam ma Sibolis in, jadi maporus ma ia humbani nasiam. Padohor nasiam ma bani Naibata, jadi padohoron-Ni ma bani nasiam.”​—Jak. 4:7, 8.