1-2. Aha do na mambahen sunsah pangahap ni Jesus?

BANI borngin paima hamateanni, sunsah tumang do pangahap ni Jesus. Tongkin nari itaron ia ma hamatean na marsik. Tapi sedo pitah ai na mambahen sunsah pangahapni. Sasintongni, holong tumang uhurni bani Bapani janah sihol do ia pamalaskon uhur-Ni. Jadi haru uhurni, anggo lang setia ia ronsi matei, ipabador ma goran ni Jahowa. Leganni ai, holong tumang do uhurni bani jolma. Porini lang setia ia, lang dong pangarapan bani manisia laho manggoluh sadokah ni dokahni.

² Hassi pe sunsah tumang pangahap ni Jesus, tapi damei do iahapkon ia ibagas uhurni. Nini do bani apostelni, “Damei na adong bangku do hubere bannima.” (Joh. 14:27) Jadi iahapkon ia do “damei ni Naibata” halani orot parhasomananni pakon Jahowa. On ma na mangurupisi ase lang be sai haru.​—Pil. 4:6, 7.

3. Aha ma na laho iulas hita bani artikel on?

³ Tontu lang songon sitaronon ni Jesus sitarononta. Hassi pe sonai, bahat do parlajouan na roh hubanta halani mangihutkonsi. (Mat. 16:24, 25; Joh. 15:20) Janah ra do sipata haru uhurta. Aha do na porlu ibahen hita ase boi mangahapkon damei sanggah sonai situasinta? Sanggah i tanoh on, dong tolu na ibahen Jesus ase totap damei pangahapni, hassi pe marsitaronon. Bani artikel on ulas hita ma ai. Anjaha ulas hita use sonaha hita boi mangusihisi.

4. Bani 1 Tessalonika 5:17 iojur do ase hita totap martonggo. Bere ma contoh sonaha Jesus mangkorjahon ai.

⁴ Basa 1 Tessalonika 5:17. Lambin gati do Jesus martonggo paima hamateanni. Umpamani, martonggo do lobei  ia paima mambagihon ruti ampa anggur sanggah mambahen pardingatan hamateanni. (1 Kor. 11:23-25) Dobkonsi salosei marayahon Paskah, martonggo do ia rap pakon susianni. (Joh. 17:1-26) Bani borngin ai, sanggah ia i taman Getsemane pakon susianni, marulak-ulak do homa ia martonggo. (Mat. 26:36-39, 42, 44) Anjaha, paima rotap hosahni martonggo do ia bani Jahowa. (Luk. 23:46) Marhitei tonggo, ipatugah Jesus do bani Jahowa sonaha pangahapni.

5. Mase gabe galek haporsayaon ni apostel ni Jesus?

⁵ Halani gati Jesus martonggo janah marpangunsandeian bani Jahowa, ai ma na mangurupi ia boi totap martahan. Tapi apostelni lang sonai. Halani lang jaga janah lang martonggo, gabe tarpodom ma sidea bani borngin ai anjaha mabiar sanggah dong parlajouan. (Mat. 26:40, 41, 43, 45, 56) Jadi porini dong parsoalanta tiru hita ma Jesus janah tongtong ma martonggo. Ai ma na mangurupi hita ase totap boi martahan. Aha ma na boi itonggohon hita?

6. Sanggah dong parsoalan, sonaha do haporsayaon boi mangurupi hita ase totap damei?

⁶ Martonggo ma bani Jahowa ase ‘iambahi haporsayaonta’. (Luk. 17:5; Joh. 14:1) Maningon toguh do haporsayaonta halani bahat parlajouan na ibahen Sibolis hubanta. (Luk. 22:31) Sonaha do haporsayaon boi mangurupi hita ase totap martahan sanggah bahat parsoalanta? Tongon marusaha do hita pasaloseihon parsoalanta. Tapi anggo toguh haporsayaonta, porsaya do hita iurupi  Jahowa do hita bani panorang na topat. Janah porsaya do homa hita cara-Ni do na sidearan laho mangurupi hita. Ai ma na mambahen damei uhur ampa pingkiranta.​—1 Ptr. 5:6, 7.

7. Aha do na boi iparlajari hita humbani si Robert?

⁷ Aha pe parsoalanta anggo gati hita martonggo, boi ma iahapkon hita hadameion. Ai ma na iahapkon si Robert, sahalak sintua na marumur 80-an. Nini do, “Podah bani Pilippi 4:6, 7 mangurupi ahu sanggah dong parsoalan. Ondi ai sunsah tumang do parduitonnami, anjaha sompat do homa ahu lang be sintua.” Aha do na mangurupi si Robert ase boi totap damei pangahapni? Nini do, “Sanggah haru atap pusok uhurhu mintor podas do ahu martonggo. Anggo lambin gati ahu martonggo janah hu patugah ganup na ibagas uhurhu, gabe damei ma huahap.”

8. Domu bani Johannes 8:29, aha use na mambahen damei pangahap ni Jesus?

⁸ Basa Johannes 8:29. Sanggah Jesus iparburu, totap do damei pangahapni halani domma ibahen ia malas uhur ni Jahowa. Gari ibagas situasi na borat pe, totap do ia mandalankon harosuh ni Bapani. Holong tumang do uhurni bani Jahowa, anjaha mangidangi Jahowa do na sipontingan ibagas goluhni. Sanggah i surga dihut do ia manompa haganupan. (Pod. 8:30, Terjemahan Dunia Baru) Anjaha sanggah i tanoh on, ringgas do ia mangajarhon  pasal Bapani bani na legan. (Mat. 6:9; Joh. 5:17) Ai ma na mambahen malas tumang uhur ni Jesus.​—Joh. 4:34-36.

9. Mase gabe damei uhurta anggo ringgas hita marbarita?

⁹ Songon Jesus, boi do hita unduk bani Jahowa janah ‘lambin surung ibagas horja ni Tuhan in’. (1 Kor. 15:58) Anggo ringgas hita marbarita, gabe lang pala haru uhurta hassi pe bahat parsoalan. (Lah. 18:5) Umpamani sanggah hita marbarita, gati do hita pajumpah pakon halak na marsitaronon. Sipata boratan do sitaronon ni sidea marimbangkon hita. Tapi, dobkonsi marlajar pasal Jahowa anjaha mandalankon parentah-Ni, gabe lambin dear ma hagoluhan ni sidea janah martuah. Halani mangidah ai, hita pe lambin porsaya ma anggo Jahowa tongtong do mangurupi hita. Ai ma na mambahen damei uhurta. Sonai ma na iahapkon sada hasomanta naboru na depresi. Nini do, “Anggo ringgas ahu marbarita, gabe malas do uhurhu, lang urah-urah ahu mandolei. Anjaha lambin dohor do huahap pakon Jahowa.”

10. Aha do na boi iparlajari hita humbani si Brenda?

¹⁰ Dong pangalaman hasomanta naboru na margoran si Brenda. Ia pakon boruni hona panahit na parah bani sistem saraf pusat. Jadi si Brenda maningon do markursi roda janah domma hurang gogohni. Anggo tarbahensi, marbarita do ia hun rumah-rumah. Tapi gatinan do ia marbarita marhitei surat. Nini do, “Anggo sonari on, lang boi malum panahithu on. Jadi dearan ma ahu ringgas mangidangi. Anggo sonai hubahen lang be panahithu ai na lalab hupingkiri, tapi na hupingkiri sonaha ma carani mangurupi kunjunganku. Ai ma na mambahen toguh pangarapanku.”

11-13. (a) Aha do na patuduhkon anggo apostel ampa halak na legan gabe hasoman na dear bani Jesus? (b) Aha ma pangaruhni ai bani Jesus?

¹¹ Sadokah Jesus mangidangi, tongtong do apostelni mangkasomanisi. Sosok do sidea songon na ihatahon bani buku Podah, “Adong do homa hasoman na sangkanan humbani sanina.” (Pod. 18:24) Sanggah Jesus i tanoh on, lang dong sanina atap botouni na porsaya hu bani. (Joh. 7:3-5) Ongga do ihatahon sidea podouan do Jesus. (Mrk. 3:21) Tapi apostelni lang sonai. Halani ai, paima matei ia nini do bani sidea, “Hanima do na tahan i lambungku ibagas haganup sitarononku.”​—Luk. 22:28.

¹² Tongon gati do apostelni ai mambahen na lepak. Tapi sedo ai na lalab idingat-dingat Jesus. (Mat. 26:40; Mrk. 10:13, 14; Joh. 6:66-69) Haporsayaon ni sidea do na ipardiateihon Jesus. Bani borngin paima ia itangkap, nini do bani sidea, “Huan-huan do hanima huhatahon, ai domma hupabotohkon bannima, na hutangar humbani Bapa.” (Joh. 15:15) Hunjon tangkas ma apostelni ai gati do patoguhkon uhur ni Jesus. Janah halani ringgas sidea mangidangi ai ma na mambahen malas uhurni.​—Luk. 10:17, 21.

¹³ Lang pitah apostelni na gabe hasoman ni Jesus. Tapi, dong piga-piga naboru ampa dalahi na gabe hasomanni. Gati do sidea mangurupi Jesus sanggah mangidangi. Dong na mangontang ia mangan hu rumahni. (Luk. 10:38-42; Joh. 12:1, 2) Dong homa na mambere artani laho  mangurupi Jesus. (Luk. 8:3) Bujur do sidea hu bani, halani Jesus pe bujur do bani sidea. Lang ongga ipangindo Jesus lobih humbani na boi tarbahen sidea. Hassi pe susianni ai lang sempurna, tapi ihargai ia do pambahenan ni sidea laho mangurupisi. Anjaha ai ma na mangurupi Jesus ase totap damei pangahapni.

14-15. Sonaha hita boi mandapot hasoman na bujur, anjaha sonaha sidea boi mangurupi hita?

¹⁴ Hasomanta pe boi do mangurupi hita ase totap setia bani Jahowa. Tapi ase dapot hita hasoman na bujur, maningon bujur do hita bani halak na legan. (Mat. 7:12) Umpamani, bani Bibel iojur do hita ase mangurupi halak na legan tarlobih ma bani “na hurangan”. (Ep. 4:28) Jadi boi ma ipingkirhon hita ise do sanina botou na porlu iurupi. Porini dong na matua atap na boritan, ai ra do hita hu tiga laho mamboli haporluan ni sidea? Anggo dong na sunsah parduitonni, ai ra do hita mambere sipanganon bani sidea? Porini ibotoh hita carani manggunahon situs jw.org^® ampa JW Library^®, ai ra do hita mangajari sanina botou manggunahon ai? Anggo ringgas hita mangurupi na legan gabe malas tumang do uhurta.​—Lah. 20:35.

¹⁵ Sanggah dong parsoalan, iurupi hasomanta do hita ase totap damei uhurta. Songon si Elihu na ra manangihon sarita ni si Job, sidea pe ra do manangihon sanggah ipatugah hita na ibagas uhurta. (Job 32:4) Tapi ulang ma ipindo hita sidea na mambahen haputusan hubanta.  Anggo ibere sidea podah humbani Bibel, dear ma tangihon hita. (Pod. 15:22) Sapari, sanggah dong na mambere bani si Daud aha na ihaporluhonsi, martoruh ni uhur do ia manjalo ai. Jadi anggo dong na mambere na ihaporluhon hita, martoruh ni uhur ma hita manjalo. (2 Sam. 17:27-29) Ganup hasomanta na bujur, sibere-bere humbani Naibata do ai.​—Jak. 1:17.

16. Domu bani Pilippi 4:6, 7, aha do na maningon bahenonta ase mandapot hadameion? Patorang ma.

¹⁶ Basa Pilippi 4:6, 7. Mase ihatahon Jahowa hita boi mangahapkon hadameion “ibagas Kristus Jesus”? Halani ase boi damei pangahapta maningon iarusi hita do tugas na ibere Jahowa bani Jesus, anjaha maningon porsaya do hita hu bani. Umpamani, marhitei tobusan ni Jesus do dousanta boi isasap. (1 Joh. 2:12) Tontu gabe tarapoh do hita halani ai. Dob ai halani Jesus domma gabe Raja bani Harajaon ni Naibata, tongkin nari sasaponni ma ganup sitaronon na ibahen Sibolis. (Jes. 65:17; 1 Joh. 3:8; Pangk. 21:3, 4) Sada pangarapan na dear tumang do ai. Anjaha ibere Jesus do homa hagogohan hu banta ase boi idalankon hita tugas hun bani. On ma na mambahen hita ase totap barani bani panorang parpudi on. (Mat. 28:19, 20) Jadi ponting tumang do pangapohon, pangarapan, ampa habaranion. Ai ma na mambahen hita boi tongtong mangahapkon hadameion.

17. (a) Aha do na boi ibahen hita ase totap damei uhurta? (b) Domu bani Johannes 16:33, aha do na mambahen toguh uhurta?

¹⁷ Jadi porini bahat parsoalanta, aha ma na boi ibahen hita ase totap damei uhurta? Tiru hita ma Jesus. Na parlobei, tongtong ma hita martonggo. Na paduahon, unduk ma bani Jahowa anjaha ringgas ma hita marbarita age pe ibagas situasi na borat. Na patoluhon, anggo adong hasomanta na mangurupi hita, jalo hita ma ai. Hasilni iahapkon hita ma damei ni Naibata na manjaga uhur ampa pingkiranta. Gabe toguh ma uhurta, janah iurupi ma hita ase totap martahan, lang soal aha pe na masa hubanta.​—Basa Johannes 16:33.