1. Ise do na mambere kesanggupan laho marsahapi?

 SIBERE-BERE humbani Jahowa do kesanggupan laho marsahapi. Hunja ibotoh hita ai? Sanggah itompa Naibata jolma na parlobei, ai ma si Adam, mintor boi do ia marsahapi pakon Naibata. Anjaha mintor boi do homa ia mambahen kosa kata na baru. Marhitei ai, gabe boi ma idalankon ia tugasni laho mambahen goran ni ganup binatang. (1 Mus. 2:19) Anjaha malas tumang ma uhurni sanggah parlobei sahali ia marsahapi pakon si Hawa, parinangonni na jenges ai!​—1 Mus. 2:22, 23.

2. Contoh aha do na patuduhkon anggo kesanggupan ai domma isalahgunahon?

² Lang piga dokah, gabe isalahgunahon do kesanggupan ai. Contohni, ioto-otoi Sibolis ma si Hawa. Ai mambahen jolma gabe mardousa janah lang sempurna. (1 Mus. 3:1-4) Isalahkon si Adam do si Hawa ampa Jahowa, hape ia do na marsalah. (1 Mus. 3:12) Dobkonsi ibunuh si Kain si Abel, margabus do ia bani Jahowa. (1 Mus. 4:9) Dob ai, ginompar ni si Kain na margoran si Lamek, ibahen ia do sada puisi na manggambarhon anggo halak ijia rosuh bani kekerasan. (1 Mus. 4:23, 24) Anggo sonari on sonaha? Gati do ibogei hita pamimpin politik marsahap na sambor. Bahatan do film sonari on marisi sahap na kotor. Buei do homa parsikolah manangar hata na lang dear i parsikolahan, sonai homa i parhorjaan. Ganup bukti ai patuduhkon sambor tumang do situasi ni halak i dunia on.

3. Anggo lang jaga hita, gabe sonaha ma parsahapta, anjaha aha ma na laho iulas hita bani artikel on?

³ Anggo lang jaga hita, ra do gabe igunahon hita hata na sambor halani magatitu itangar hita ai. Halani halak Kristen  hita, sihol do uhurta pamalaskon uhur ni Jahowa. Halani ai, gunahon hita ma parsahapta laho pasangapkon Naibata. Bani artikel on, iulas hita ma sonaha hita manggunahon ai (1) sanggah marbarita, (2) sanggah martumpu, ampa (3) sanggah marsahapi. Parlobei, ulas hita ma mase ipardiateihon Jahowa kesanggupanta marsahapi.

4. Domu bani Maleaki 3:16, mase ponting parsahapanta bani Jahowa?

⁴ Basa Maleaki 3:16. Bani “buku pardingatan” isurat Jahowa do goran ni halak na mangkabiari-Si anjaha na mangkargahon goran-Ni. Ibotoh ham do alasanni? Halani aha na isahapkon hita, ai patuduhkon aha na dong ibagas uhurta. Jesus mangkatahon, “In na manggoki uhur, ai do iluarhon pamangan.” (Mat. 12:34) Humbani parsahapanta taridah do sadiha banggal holongta bani Jahowa. Anjaha sihol do Jahowa ase halak na mangkaholongi-Si boi manggoluh sadokah ni dokahni i dunia na baru.

5. (a) Mase maningon ijaga hita parsahapta? (b) Songon na ipatuduh bani gambar, parsahap na sonaha do na maningon ipadaoh hita?

⁵ Ase ijalo Jahowa panombahanta maningon ijaga hita do parsahapta. (Jak. 1:26) Bahat do halak na kasar marsahap, urah manggila, atap toal. Ai patuduhkon lang ihaholongi sidea Jahowa. (2 Tim. 3:1-5) Pasti lang marosuh hita sonai. Sihol do hita ase parsahapta pamalaskon uhur ni Naibata. Ai boi do malas uhur ni Jahowa anggo dear hita marsahap sanggah martumpu ampa sanggah marbarita, hape sanggah lang adong sanina botou kasar hita hubani kaluarganta?​—1 Ptr. 3:7.

6. Aha do gunani halani dear ipakei si Kimberly kesanggupan marsahapi?

⁶ Anggo dear ipakei hita kesanggupanta marsahapi, taridah ma anggo hita sisombah Jahowa. Gabe ibotoh halak na i sekelilingta ma parlegananni “na mambalosi Naibata humbani na so mambalosi Naibata”. (Mal. 3:18) Pardiateihon  ma pangalaman ni botounta si Kimberly. * Isuruh guruni ma ia mangkorjahon tugas kalompok i sikolah. Dob salosei mangkorjahon tugas ai, ipardiateihon hasomanni ma anggo si Kimberly legan pakon hasoman-hasomanni. Lang ongga ipabajan-bajan ia hasomanni, tapi na dear tumang do isahapkon ia. Janah lang ongga ia mangkatahon hata na lang suman. Gabe tartarik ma hasomanni ai, janah ra ma ia marlajar Bibel pakon si Kimberly. Tontu malas tumang uhur ni Jahowa sanggah hita dear manggunahon kesanggupan ai anjaha tartarik halak marlajar hasintongan.

7. Aha do na mangojur ham ase dear mamakei kesanggupan marsahapi?

⁷ Ganup do hita sihol patuduhkon pangkargaion bani kesanggupanta laho marsahapi ase boi parohkon hasangapon hubani Jahowa janah paorotkon parhasomananta pakon sanina botou. Halani ai, ulas hita ma piga-piga cara sonaha ase hita ‘gabe siusihan ibagas parsahapta’.

8. Sitiruan aha do na ibere Jesus hubanta sanggah marsahap?

⁸ Tongtong ma dear marsahap hassi pe adong na mambahen ham manggila. Sanggah Jesus mangidangi i tanoh on, bahat do halak mangkatahon anggo ia partenggen, simokkus, hasomanni Sibolis, lang mangkargai ari Sabat, anjaha mangapasi Naibata. (Mat. 11:19; 26:65; Luk. 11:15; Joh. 9:16) Age pe sonai, lang manggila ia. Songon Jesus, ulang ma manggila hita sanggah adong na kasar hubanta. (1 Ptr. 2:21-23) Tontu lang urah mangkorjahon ai. (Jak. 3:2) Jadi, aha ma na boi mangurupi hita?

9. Aha do na boi mangurupi hita ase totap dear marsahap sanggah hita marbarita?

⁹ Sanggah marbarita, ra adong do na kasar marsahap hubanta. Tapi ulang ma manggila hita. Sanina Sam mangkatahon, “Sai hudingat do anggo simada rumah ai porlu manangar hata ni Naibata, anjaha pasti boi do ia mubah.” Sipata halani otik, ra do halak manggila halani lang pas panorangta roh. Sanggah marsahap hita hubani simada rumah na manggila, tiru hita ma na ibahen Botou Lucia. Mintor martonggo do ia mangindo pangurupion ni Jahowa ase totap tenang janah lang kasar marsahap.

10. Domu bani 1 Timoteus 4:13, cita-cita aha ma na porlu ibahen hita?

¹⁰ Marusaha ma gabe guru na lambin pandei. Hassi pe si Timoteus guru na marpangalaman, porlu do ia mambahen hamajuon. (Basa 1 Timoteus 4:13.) Sonaha  ase lambin pandei hita mangajari ibagas pangidangion? Porlu do hita mambahen persiapan. Tontu malas do uhurta halani bahat do ugas-ugasta laho mangurupi hita ase lambin dear mangajari. Umpamani, brosur Marlatih Ase Lambin Pandei Mambasa ampa Mangajar, pakon Jadwal Partumpuan Hagoluhan pakon Pangidangion Kristen i bagian “Ringgas ma ibagas Pangidangion”. Ai domma dear iparlajari janah igunahon ham ai? Anggo dear ibahen hita persiapan, tontu lambin dear ma hita sanggah mangajari.

11. Sonaha piga-piga hasomanta gabe guru na lambin dear?

¹¹ Boi do homa hita gabe guru na lambin dear anggo marlajar humbani sanina botou i kuria. Songon si Sam na isaritahon nongkan ai, iparuhurhon ia do aha na mambahen hasomanta boi dear mangajari, janah itiru ia ma ai. Anggo Botou Talia, ipardiateihon ia do sanina-sanina na marpangalaman sanggah sidea marambilan. Gabe ibotoh ia ma sonaha mangulas topik na gati isungkun halak ibagas pangidangion.

12. Aha do tantangan bani piga-piga hasomanta?

¹² Ganup do hita boi mamuji Jahowa i partumpuan marhitei mandoding ampa mambere komentar. (Ps. 22:23) Tapi bani piga-piga hasomanta, lang urah iahap sidea mandoding ampa markomentar. Ai sonai do homa ham? Anggo sonai, pardiateihon hita ma aha do na mangurupi hasomanta na lang mabiar be mandoding ampa mambere komentar.

13. Aha do na boi mangurupi ham mandoding humbani gok ni uhur sanggah i partumpuan?

¹³ Mandoding humbani gok ni uhur. Alasan sipontingan laho mandodingkon doding Harajaon ai ma mamuji Jahowa. Sada hasomanta na margoran si Sara, iahapkon ia do anggo ia lang pentar mandoding. Tapi, marusaha do ia pasangapkon Jahowa sanggah mandoding i partumpuan. Ase boi sonai, marlatih ma ia i rumah songon na mempersiapkon aha na laho ipadas i partumpuan. “Marlatih ma ahu mandodingkon anjaha marusaha ma ahu mangidah aha kaitanni lirik ni doding ai pakon na laho iulas. Halani ai lang haru be ahu hassi pe lang jenges suarangku”.

14. Anggo parmaila ham, aha do na boi mangurupi ham ase boi mambere komentar i partumpuan?

¹⁴ Rajin ma mambere komentar. Tongon, lang urah bani piga-piga halak mambere komentar i partumpuan. Si Talia mangkatahon, “Maila tumang do ahu marsahap i lobei ni buei halak. Halani ai, mabiar do ahu mambere komentar. Hassi pe sonai, totap do ahu marusaha ase boi mambere komentar.” Sanggah mambahen  persiapan hu partumpuan, sai tongtong do idingat ia bani pingkiranni, anggo komentar na parlobei ai ma langsung mambalosi sungkun-sungkun. Hassi pe pondok, ai domma dear, halani ai do na iharosuhkon na mambobahon acara.

15. Aha do na porlu idingat hita sanggah mambere komentar?

¹⁵ Dong do homa sanina botou na lang parmaila tapi sipata lang ra mambere komentar. Mase? Botou Juliet mangkatahon, “Sipata, ragu do ahu mambere komentar halani hurang jenges komentarku ai huahap.” Dingat hita ma, marosuh do Jahowa anggo ai do na sidearan na boi ibahen hita. * Malas tumang do uhur ni Jahowa anggo rajin hita mambere komentar hassi pe mabiar.

16. Hata na sonaha do na maningon ipadaoh hita?

¹⁶ Padaoh hita ma ganup hata “panrisaon”. (Ep. 4:31) Songon na dob iulas hita nongkan ai, lang boi halak Kristen mangkatahon hata na lang suman. Sobali ai, maningon ipadaoh halak Kristen do homa hata pangapasion. Umpamani, ulang ma iapasi hita hasomalan, suku, atap bahasa na legan. Hita pe lang ra mangkatahon aha na mambahen borit uhur ni halak na legan. Sada sanina mangkatahon, “Sipata, ra do ahu marguro-guro atap mansaritahon sada sarita na lucu huahap. Hape domma borit uhur ni halak manangar ai. Tapi sanggah hanami padua-dua, gati do ahu ipasingat istriku ase ulang sonai marsahap.”

17. Domu bani Epesus 4:29, sonaha hita boi patoguhkon halak na legan?

¹⁷ Hatahon ma na boi patoguhkon halak na legan. Dearan do hita mangkatahon pujian marimbangkon marungut-ungut. (Basa Epesus 4:29.) Hinan, halak Israel gati do mangkatahon tarima kasih hubani Jahowa, tapi gati do homa sidea marungut-ungut. Sanggah dong sasahalak marungut-ungut, gabe dihut ma homa halak na legan sonai. Dingat ma na ihatahon sapuluh mata-mata, na mambahen ‘halak Israel gabe marungut-ungut dompak si Musa’. (4 Mus. 13:31–14:4) Tapi, anggo ihatahon hita pujian, boi do ai patoguhkon halak na legan. Tontu, gabe ipatoguh do uhur ni boru ni si Jepta sanggah manangar pujian humbani ganup hasomanni. Ai ma na mangojur ia laho mandalankon tugasni. (Panguh. 11:40, Terjemahan Dunia Baru) Si Sara, na isaritahon nongkan ai mangkatahon, “Sanggah hita mamuji sanina botou, gabe ibotoh sidea ma holong  do Jahowa bani sidea janah maharga do sidea ibagas organisasi-Ni.” Jadi, igunahon hita ma panorangta laho mamuji halak na legan.

18. Domu bani Psalmen 15:1, 2, mase hita mangkatahon na sintong, janah aha do na lang boi ihatahon hita?

¹⁸ Hatahon ma na sintong. Lang boi hita pamalaskon uhur ni Jahowa anggo lang ihatahon hita na sintong. (Pod. 6:16, 17) Magigi do Jahowa mangidah halak na margabus. (Basa Psalmen 15:1, 2.) Hassi pe bahat halak sonari on somal margabus, tapi hita lang ra songon sidea. Tongon, lang ra hita margabus, tapi lang homa ra hita mangoto-otoi halak na legan marhitei sangaja lang patugahkon hatorangan na lengkap.

19. Aha ope na maningon ipadaoh hita?

¹⁹ Ulang ma pararat gosip. (Pod. 25:23; 2 Tes. 3:11) Si Juliet na isaritahon nongkan ai patugahkon aha do pengaruhni gosip ai hu bani. Ia mangkatahon, “Sanggah dong halak na margosip hubangku, gabe lang be porsaya ahu bani. Nini uhurhu ma, ‘Anggo sonari halak na legan igosipi ia, ra do bani panorang na legan ahu do na igosipini.’” Jadi, sanggah marbuali, anggo adong halak na margosip, mintor gantih ma parbualan gabe na madear na boi patoguhkon uhur.​—Kol. 4:6.

20. Aha do na laho bahenonta?

²⁰ Sonari on, lambin sambor do parsahap ni buei jolma. Halani ai, maningon ijaga hita ma parsahapta. Dingat ma, sibere-bere humbani Jahowa do kesanggupan berbicara. Janah ponting tumang do bani Jahowa sonaha caranta manggunahon ai. Halani ai, dear ma gunahon ai sanggah marbarita, martumpu, atap marsahapi. Anggo sonai ibahen hita gabe ipasu-pasu Jahowa ma hita. Tongon, dobkonsi iripaskon holi dunia na jahat on, baru ma lambin urah hita manggunahon kesanggupan berbicaranta ai laho pasangapkon Jahowa. Tapi paima saud ai, pamalas ma uhur-Ni marhitei “hata ni pamangan[mu]”.​—Ps. 19:15.