1-2. (a) Ise do si Oinike, janah aha do tantangan na iahapkon ia laho mangajari anakni pasal Jahowa pakon Jesus? (b) Saritahon ma gambar sampul.

 TONGON lang adong ipatugah bani Bibel pasal pandidion ni si Timoteus. Tapi boi do ibayangkon hita sonaha situasini sanggah ai. (Pod. 23:25) Bayangkon hita ma sonaha pangahap ni si Oinike, inang ni si Timoteus sanggah mangidah si Timoteus masuk hubagas bah ai. Tarsirom do homa si Oinike halani i lambungni do si Lois inangni. Ra do homa tangis si Oinike halani malas tumang uhurni sanggah mangidah si Timoteus kaluar hun bagas bah ai. Jadi marhasil do si Oinike mangatasi tantangan laho mangajari anakni mangkaholongi Jahowa pakon Jesus Kristus. Tapi aha do tantangan na iahapkon si Oinike laho mangkorjahon ai?

² Halak Junani do bapa ni si Timoteus janah inangni pakon ompungni halak Jahudi. Jadi si Timoteus tubuh ibagas kaluarga na lang sarupa haporsayaonni. (Lah. 16:1) Leganni ai, ra domma remaja si Timoteus sanggah si Oinike pakon si Lois gabe halak Kristen. Tapi totap do homa lang sarupa haporsayaon ni sidea pakon bapa ni si Timoteus. Jadi, na ija do na ipilih si Timoteus? Iihutkon ia do haporsayaon ni bapani ai? Iihutkon ia do hasomalan ni halak Jahudi na dob ibotoh ia humbani na etek? Atap ra do ia gabe susian ni Jesus Kristus?

3. Domu bani Podah 1:8, 9, sonaha pangahap ni Jahowa mangidah ganupan inang na mangajari niombahni ase marhasoman pakon-Si?

³ Sonai ma homa holong ni uhur ni ganup inang bani kaluargani. Sihol do sidea mangajari niombahni ase boi marhasoman pakon Jahowa janah ihargai Jahowa do na ihorjahon sidea ai. (Basa Podah 1:8, 9.) Tontu iurupi Jahowa do ganupan inang, laho mangajari niombahni ase mangkaholongi janah mangidangi-Si.

4. Aha do tantangan na iahapkon bahat inang sonari on?

 ⁴ Tontu sahalak inang sihol do ia anggo niombahni mangidangi Jahowa songon si Timoteus. Tapi ibotoh sidea do homa tantangan na iahapkon niombah ni sidea i dunia na jahat on. (1 Ptr. 5:8) Leganni ai, lambin susah do iahapkon sahalak inang laho pagodangkon niombahni halani lang adong be suamini atap lang sisombah Jahowa suamini. Umpamani, hasomanta naboru na margoran si Kristina * mangkatahon, “Bujur do suamiku janah holong do uhurni bani kaluargani. Tapi lang marosuh ia anggo niombahnami gabe Saksi Jahowa. Halani ai, gati do ahu tangis mamingkirhon sonaha ma carani laho mangurupi niombahku ase manombah Jahowa.”

5. Aha do na laho iulas hita bani artikel on?

⁵ Anggo nasiam sahalak inang, boi do nasiam marhasil songon si Oinike. Bani artikel on, iulas hita ma sonaha nasiam boi maniru si Oinike laho mangajari niombahmu marhitei parsahapmu ampa pambahenanmu. Iulas hita homa sonaha Jahowa boi mangurupi nasiam mangkorjahon ai.

6. Domu bani 2 Timoteus 3:14, 15, mase si Timoteus boi gabe halak Kristen?

⁶ Sanggah etek ope si Timoteus, marusaha do inangni mangajarhon “Surat na Pansing in” hu bani mangihutkon ajaran ni halak Jahudi. Tapi lape ibotoh si Oinike hasintongan pasal Jesus Kristus. Hassi pe sonai, parbinotohan ai boi mangurupi si Timoteus gabe halak Kristen. Halani domma lambin magodang si Timoteus, boi do ia mamilih laho gabe halak Kristen. Janah domma iurupi inangni ia ase ‘porsaya’ bani hasintongan pasal Jesus Kristus. (Basa 2 Timoteus 3:14, 15.) Tontu malas tumang do uhur ni si Oinike halani boi mangatasi tantangan laho mangajari anakni pasal Jahowa. Sosok do na ihorjahonni ai pakon arti ni goranni, ai ma “manaluhon”.

7. Hassi pe si Timoteus domma ididi, sonaha si Oinike totap mangurupi ia?

⁷ Tontu malas tumang do uhur ni si Oinike halani si Timoteus domma ididi. Tapi dong ope na mambahen haru uhurni. Ra ipingkirhon ia do, ai gabe marhasoman pakon halak na lang dear do holi si Timoteus on? Ai ra do ia marsikolah hu Aten janah manjalo ajaran humbani filsuf ijai? Ai habayakon do na ipindahi si Timoteus on holi? Hassi pe si Oinike lang boi mambahen haputusan bani si Timoteus, tapi boi do ia mangurupi si Timoteus ase mambahen haputusan na dear. Sonaha carani? Maningon marusaha do si Oinike mangurupi si Timoteus laho patoguhkon holongni hubani Jahowa pakon Jesus Kristus. Jadi sonari pe lang urah iahapkon namatoras pagodangkon niombahni hassi pe sidea haduasi Saksi Jahowa atap pitah sada na Saksi Jahowa. Anggo sonai, aha ma na boi iparlajari namatoras humbani si Oinike?

8. Anggo Saksi Jahowa suamimu, sonaha nasiam boi mangurupi ia laho mangajari niombahmu pasal Jahowa?

⁸ Rup ma marlajar Bibel pakon niombahmu. Nasiam hasoman naboru, anggo Saksi Jahowa do suamimu sihol do Jahowa ase iurupi nasiam suamimu mangajarhon pasal Bibel bani niombahmu. Sada carani ai ma mangurupi suamimu mambahen parlajaran Bibel kaluarga. Patugah ma aha do gunani anggo ibahen nasiam parlajaran Bibel kaluarga janah pingkirhon ma sonaha carani ase parlajaran Bibel kaluarga nasiam parohkon malas ni uhur bani ganupan. Boi  do homa iurupi nasiam suamimu mambahen rencana pasal aha na laho iulas. Leganni ai, anggo domma sosok umur ni niombahmu marlajar Bibel humbani buku Hagoluhan na Martuah Sadokah ni Dokahni, dear do homa anggo rup ham pakon suamimu manstudihon sidea.

9. Anggo suamimu lang Saksi Jahowa, ise do na boi mangurupi nasiam mangajari niombahmu?

⁹ Piga-piga inang na lang adong be suamini atap suamini lang sisombah Jahowa, maningon sidea sandiri do na mangajarhon Bibel bani niombahni. Anggo sonai do situasi kaluargamu, ulang ma haru tumang uhurmu. Dingat ma tongtong do Jahowa mangurupi nasiam. Anjaha gunahon ma bahan-bahan na ipasirsir organisasi laho mangajari niombahmu. Boi do homa nasiam manungkun namatoras na dob marpangalaman pasal sonaha sidea manggunahon bahan-bahan ai laho mambahen parlajaran Bibel kaluarga. * (Pod. 11:14) Leganni ai, boi do homa Jahowa mangurupi nasiam ase boi ibotoh nasiam aha na ibagas uhur pakon pingkiran niombahmu. (Pod. 20:5) Ra boi do isungkun nasiam niombahmu, ‘Ai adong do na mambahen ho mabiar i sikolah?’ Sungkun-sungkun na sonai boi mambahen gabe ra niombahmu marsarita hu bamu.

10. Aha ope cara na boi ibahen ham laho mangurupi niombahmu marlajar pasal Jahowa?

¹⁰ Pindahi ma panorang laho mangajari niombahmu pasal Jahowa. Patugah ma pasal Jahowa ampa ganup pasu-pasu na dob ibere Ia hu bamu. (5 Mus. 6:6, 7; Jes. 63:7) Ponting tumang do on tarlobih anggo lang boi taratur nasiam marlajar Bibel pakon niombahmu i rumah. Si Kristina na ipatugah nongkan ai mangkatahon, “Halani lang bahat kesempatan laho marlajar Bibel pakon niombahku, hupindahi ma panorang na sosok laho marsahapi pakon sidea. Sanggah mardalani hanami, hupatugah ma pasal tompaan ni Jahowa pakon sifat-sifat-Ni na boi mambahen niombahku lambin dohor hu Bani. Dobkonsi sidea lambin magodang, huojur ma sidea ase totap marlajar Bibel.” Leganni ai, saritahon ma na dear pasal organisasi ni Jahowa ampa sanina botou. Ulang ma ipabajan-bajan ham sintua. Halani aha na ihatahon ham pasal sidea dong do pengaruhni ai bani niombahmu.

11. Domu bani Jakobus 3:18, mase ponting manjaga hadameion ibagas kaluarga?

¹¹ Jaga ma hadameion ibagas kaluarga. Patuduh ma na holong do uhurmu bani suamimu pakon niombahmu. Saritahon ma na dear pasal suamimu janah hormat ma hu bani, dob ai ajari ma niombahmu ase mangkorjahon na sarupa. Anggo ibahen nasiam sonai, damei ma kaluargamu janah lambin urah ma bani niombahmu laho marlajar pasal Jahowa. (Basa Jakobus 3:18.) Pardiateihon ma pangalaman ni si Jozsef, sahalak perintis istimewa i Romania. Sanggah remaja ope, ia, inangni, kakakni, pakon dua anggini manombah Jahowa. Tapi lang marosuh bapani mangidah ai. Si Jozsef mangkatahon, “Marusaha do inangnami manjaga hadameion ibagas kaluarga. Hassi pe lambin kasar bapa, tapi lambin bujur do inang. Anggo ididah inang hanami lang hormat janah lang unduk bani bapa, iulas inang ma bannami Epesus 6:1-3. Dob ai isaritahon inang ma sifat-sifat ni bapa na dear janah iurupi ma hanami ase totap mambahen malas uhur ni bapa. Ai ma na mambahen totap damei kaluarganami.”

12. Domu bani 2 Timoteus 1:5, aha do pangaruh pambahenanni si Oinike bani si Timoteus?

¹² Basa 2 Timoteus 1:5. Dear do siusihan na ipatuduh si Oinike bani si Timoteus. Iajari do si Timoteus anggo haporsayaon ai maningon ipatuduh do marhitei pambahenan. (Jak. 2:26) Janah marhitei pambahenan inangni, boi do ididah si Timoteus banggal tumang do holong ni uhurni inangni bani Jahowa. Tangkas do homa ididah si Timoteus malas tumang uhurni inangni halani mangidangi Jahowa. Jadi, aha ma pengaruhni ai bani si Timoteus? Apostel Paulus mangkatahon toguh do haporsayaon ni si Timoteus songon haporsayaon ni inangni. Sadokah on, domma ipardiateihon si Timoteus pambahenan ni inangni janah itiru ia ma ai. Sonai homa sonari on, bahat do inang na marhasil mangurupi kaluargani gabe Saksi Jahowa marhitei pambahenan ni sidea. (1 Ptr. 3:1, 2) Sonaha carani ase boi nasiam mangkorjahon na sonai?

13. Mase sahalak inang maningon mambahen Jahowa gabe na sipontingan ibagas goluhni?

¹³ Bahen ma Jahowa gabe na sipontingan ibagas goluhmu. (5 Mus. 6:5, 6) Bahat do pengorbanan na ibahen sahalak inang. Ibere nasiam do panorang, duit, janah sipata hurang modom laho mansarihon niombahmu. Tapi ulang ma gabe masibuktu nasiam mangkorjahon ai janah gabe lupa nasiam bani parhasomananmu pakon Jahowa. Halani ai bahen ma jadwal ase boi nasiam martonggo, mambahen parlajaran Bibelmu sandiri janah martumpu. Anggo ibahen nasiam sonai, lambin toguh ma parhasomananmu pakon Jahowa janah boi ma ai gabe siusihan bani kaluargamu pakon halak na legan.

14-15. Aha do na iparlajari nasiam humbani si Lena, si Maria, ampa si João?

¹⁴ Pardiateihon ma piga-piga pangalaman ni na maposo na marlajar mangkaholongi Jahowa marhitei mamparuhurhon pambahenan ni inangni. Si Lena boru ni si Kristina mangkatahon, “Lang boi hanami marlajar Bibel anggo i rumah bapa. Hassi pe sonai, totap do inang roh martumpu. Age pe lape iarusi hanami pasal Bibel, tapi pambahenan ni inang ai boi mangurupi hanami marhaporsayaon na toguh. Janah porsaya do hanami hasintongan do na iajarhon Saksi Jahowa ai, age pe hanami lape dihut martumpu.”

¹⁵ Hasomanta si Maria, manggila do bapani anggo sidea laho martumpu. Ia mangkatahon, “Sahalak na barani tumang do inang. Hudingat do sanggah dakdanak ahu, sipata lang ra ahu mangkorjahon sada horja halani mabiar bani halak. Tapi, halani inang totap barani janah mambahen Jahowa na sipontingan ibagas goluhni, ai ma na mangurupi ahu ase barani.” Hasomanta si João, manggila do bapani anggo iulas sidea pasal Jahowa atap Bibel sanggah i rumah bapani. Ia mangkatahon, “Hassi pe sonai pambahenan ni bapa bannami, tapi totap do marusaha inang mambahen malas uhur ni bapa janah mambahen Jahowa na sipontingan ibagas goluhni. Ai ma na mambahen ahu totap toguh.”

16. Aha do pengaruhni pambahenan ni sahalak inang bani na legan?

¹⁶ Nasiam inang, dingat ma dong do pengaruhni pambahenanmu bani halak na legan. Pardiateihon hita ma aha do pengaruhni pambahenanni si Oinike bani si Paulus. Ibotoh ia do anggo haporsayaonni si Timoteus “marianan hinan homa ibagas uhur ni . . . si Oinike”. (2 Tim. 1:5) Hunja  ibotoh hita anggo domma ibotoh si Paulus pasal ai? Ra bani penugasanni na parlobei sanggah pajumpah si Paulus pakon si Oinike i Listra. Janah ia do ra na mangurupi sidea gabe halak Kristen. (Lah. 14:4-18) Dingat ma: Hira-hira 15 tahun dobkonsi ai, ikirim si Paulus ma surat hubani si Timoteus. Bani suratni ai ihatahon si Paulus do bani si Timoteus idingatni do pambahenan ni si Oinike janah patut do ia gabe siusihan. Jadi tangkas ma pambahenan ampa haporsayaon ni si Oinike banggal tumang do pengaruhni bani si Paulus ampa bani halak Kristen na legan bani abad na parlobei. Jadi anggo lang dong be suamimu atap kaluargamu lang sahaporsayaon pakon nasiam, pos ma uhurmu ganup pambahenanmu laho pagodangkon niombahmu boi do ai patoguhkon janah mangojur halak na legan.

17. Aha do na maningon bahenonmu anggo niombahmu lang ra mangidangi Jahowa?

¹⁷ Aha do na maningon bahenonmu anggo niombahmu lang ra mangidangi Jahowa? Dingat ma porlu do panorang laho manlatih niombah. Songon na dong i gambar, anggo nasiam manuan sada suan-suanan ra ipingkirhon nasiam do sonaha carani ase marbuah suan-suanan ai. Tongon lang ibotoh nasiam marbuah do holi suan-suanan ai atap lang. Tapi totap do isiram janah ibahen ham na sidearan ase boi dear partubuhni suan-suanan ai. (Mrk. 4:26-29) Sonai ma homa nasiam ganup inang, tontu ipingkirhon nasiam do sonaha carani ase boi niombahmu mangkaholongi  Jahowa. Memang lang boi ibahen nasiam haputusan bani niombahmu. Tapi anggo tongtong ilatih nasiam sidea, on patuduhkon domma ibahen ham na sidearan bani niombahmu ase boi sidea marhasoman pakon Naibata.​—Pod. 22:6.

18. Sonaha Jahowa boi mangurupi niombahmu ase boi sidea marhasoman pakon-Si?

¹⁸ Humbani sapari domma bahat na maposo na iurupi Jahowa gabe hasoman-Ni. (Ps. 22:10, 11) Tontu ra do homa Ia mangurupi niombahmu, anggo ra sidea marhasoman pakon-Si. (1 Kor. 3:6, 7) Hassi pe songon na lang ibagas uhurni hasintongan ai, tapi holong do tong uhur ni Jahowa bani sidea. (Ps. 11:4) Age pe pitah otik dassa ipatuduh sidea anggo sidea “marosuh manjalo hasintongan”, tongtong do ra Ia mangurupi sidea. (Lah. 13:48, Terjemahan Dunia Baru; 2 Kron. 16:9) Sanggah porlu ham mamodahi niombahmu, iurupi Jahowa do ham laho mambere podah na sosok janah bani panorang na topat. (Pod. 15:23) Atap boi do homa igunahon Jahowa sanina botou i kuria laho mangurupi sidea. Dobkonsi sidea magodang, boi do homa iurupi Jahowa sidea laho mardingat aha na ongga iparlajari sidea sanggah dakdanak. (Joh. 14:26) Tontu ipasu-pasu Jahowa do ham anggo tongtong ham marusaha mangajari niombahmu, marhitei parsahap ampa pambahenanmu na dear.

19. Aha do na mambahen malas uhur ni Jahowa bamu?

¹⁹ Holong do uhur ni Jahowa bamu lang soal niombahmu mangidangi Jahowa atap lang. Holong do uhur-Ni bamu halani ham mangkaholongi-Si. Hassi pe ham domma mabalu, marjanji do Jahowa gabe Bapa bani niombahmu janah Parlinggoman bamu. (Ps. 68:6) Tontu lang boi ipaksa ham niombahmu laho mangidangi Jahowa. Tapi pos ma uhurmu, malas do uhur ni Jahowa anggo tongtong ham mangindo pangurupion bani Jahowa janah mambere na sidearan laho mangajari niombahmu.