1. Cita-cita aha ma na boi ibahen hita?

 HALANI halak Kristen do hita, holong tumang do uhurta bani Jahowa. Sihol do uhurta mambere na sidearan ibagas pangidangion. Tapi ase boi ihorjahon hita ai, porlu do ibahen hita cita-cita ibagas pangidangion. Umpamani, sonaha ase lambin dear sifat-sifatta, marlajar keterampilan na marguna bani organisasi, ampa mangindahi cara sonaha boi mangurupi halak na legan.

2. Mase maningon ibahen hita cita-cita ibagas pangidangion anjaha marusaha pasaudkon ai?

² Mase maningon marusaha hita ase lambin dear ibagas pangidangion? Alasan na sipontingan ai ma halani sihol uhurta mambahen malas uhur ni Jahowa. Malas do uhur-Ni anggo igunahon hita hapandeianta laho mangidangi-Si. Leganni ai, sihol do hita mambahen hamajuan ase ibotoh hita sonaha mangurupi sanina botou. (1 Tes. 4:9, 10) Lang soal domma sadiha dokah hita ibagas hasintongan, ganup do hita porlu mambahen hamajuan. Sonari ulas hita ma sonaha carani.

3. Podah aha do na ibere Apostel Paulus hubani si Timoteus? (1 Timoteus 4:12-16)

³ Age pe poso ope si Timoteus sanggah ikirim Apostel Paulus suratni na parlobei, tapi ijia domma gabe sintua na marpangalaman si Timoteus. Hassi pe sonai, tong do iojur si Paulus ia mambahen hamajuan. (Basa 1 Timoteus 4:12-16.) Anggo iparuhurhon ham surat ni si Paulus ai, ibotoh ham ma adong dua na ipindo ia humbani si Timoteus. Na parlobei, porlu do lambin dear ia patuduhkon sifat-sifat Kristen songon holong, haporsayaon, ampa borsih ibagas parlahou. Na paduahon, porlu do inunuti ia mambasa i lobei  ni na mabuei, mamodahi, ampa mangajari. Bani artikel on, iulas hita ma sonaha sitiruan na ibahen si Timoteus boi mangurupi hita mambahen cita-cita ase lambin pandei ibagas pangidangion. Holi iulas hita homa cara-cara na boi ibahen hita ase lambin bahat na ihorjahon ibagas pangidangion.

4. Domu bani Pilippi 2:19-22, mase ibere tugas na borat hubani si Timoteus?

⁴ Mase ibere tugas na borat hubani si Timoteus? Halani dear tumang sifat-sifatni. (Basa Pilippi 2:19-22.) Humbani na ihatahon si Paulus pasal si Timoteus, ibotoh hita ma anggo ia sahalak na toruh maruhur, setia, rajin, janah martanggung jawab. Ihaholongi ia do homa sanina botou anjaha isarihon ia do sidea. Halani ai, holong tumang ma uhur ni si Paulus mangidah si Timoteus. Janah pos do uhurni mambere tugas-tugas na borat bani si Timoteus. (1 Kor. 4:17) Sonai ma homa anggo marusaha hita ase lambin dear sifat-sifatta janah lambin bahat na ihorjahon hita ibagas kuria, gabe ihaholongi Jahowa ma hita.​—Ps. 25:9; 138:6.

5. (a) Sonaha carani ase ibotoh ham sifat na ija do na porlu ipadear? (b) Songon na ipatuduh bani gambar, sonaha hasomanta na poso ai marusaha patuduhkon uhur na sapangahapan, songon na dob icita-citahon ia?

⁵ Tontuhon ma sifat na porlu ipadear ham. Tonggohon janah pingkirhon ma aha do na porlu ipadear humbani dirimu. Dob ai, tontuhon ma sifat na ija do na porlu itingkathon ham. Umpamani, ai porlu do lambin dear ipatuduh ham uhur na sapangahapan? Ai lambin marosuh do uhurmu laho mangurupi hasoman sahaporsayaon? Ai porlu do ham lambin urah manalpuhon hasalahan ni halak janah mardamei pakon sidea? Boi do homa isungkun ham hasoman na ihaporsayai atap adong do saran na boi ibere ia bamu.​—Pod. 27:6.

6. Sonaha carani ase saud itingkathon ham sifat-sifat na porlu ipadear ham?

⁶ Marusaha ma laho pasaudkon ai. Sonaha carani? Parlajari ma lobih bahat pasal sifat na sihol itingkathon ham. Umpamani, sihol do ham ase lambin urah manalpuhon hasalahan ni halak. Jadi, basa anjaha rimangi ma contoh-contoh na isurat ibagas Bibel pasal halak na ra manalpuhon hasalahan pakon na lang ra. Contohni Jesus, ra do ia manalpuhon hasalahan  ni halak. (Luk. 7:47, 48) Janah lang pitah hahurangan ni halak na ididah ia. Tapi ididah do aha na boi ibahen sidea. Legan do anggo halak Parisei na “mapas bani hasomanni”. (Luk. 18:9) Dobkonsi irimangi ham contoh-contoh ai, sungkun ma dirimu: ‘Aha do na huidah humbani halak na legan? Sifat na ija do na sihol hutiru humbani sidea?’ Anggo lang urah iahap ham manalpuhon hasalahan ni sasahalak, suratkon ma piga-piga sifatni na madear, dob ai sungkun ma use dirimu: ‘Sonaha do Jesus mangidah ia? Ai ra do Jesus manalpuhon hasalahanni?’ Anggo ibahen hita sonai, gabe boi ma iubah hita cara marpingkirta. Mungkahni ra do lang urah iahap hita manalpuhon hasalahan ni halak na mambahen borit uhurta. Tapi anggo totap marusaha hita, dokah-dokah lambin urah ma iahap hita manalpuhon hasalahan ni halak.

7. Domu bani Podah 22:29, sonaha Jahowa manggunahon parhorja-parhorja na pandei?

⁷ Cita-cita na legan na boi ibahen ham ai ma mamparlajari keterampilan na marguna bani organisasi. Pingkirhon ma sadiha bahat do parhorja na iporluhon laho pajongjongkon fasilitas Betel, Balai Pertemuan, ampa Balei Harajaon. Bahat do sidea na mamparlajari keterampilan na baru humbani sanina botou na marpangalaman. Songon na ipatuduh bani gambar, sanina atap botou boi rap mamparlajari keterampilan na iporluhon ase boi mangurus Balai Pertemuan pakon Balei Harajaon. On artini, Naibata Jahowa “Raja na . . . manongtong” in pakon Jesus Kristus, “Raja ni sagala raja”, manggunahon bahat parhorja na pentar. (1 Tim. 1:17; 6:15; basa Podah 22:29.) Tontu sihol do uhurta manggunahon keterampilanta laho pasangapkon Jahowa, sedo pasangapkon dirinta sandiri.​—Joh. 8:54.

8. Sonaha ase boi ibotoh ham keterampilan aha do na porlu iparlajari ham?

⁸ Tontuhon ma keterampilan na sihol iparlajari ham. Keterampilan aha do na sihol iparlajari ham? Boi do isungkun ham bani sintua i kuria atap sintua kaliling keterampilan aha do iahap sidea na porlu iparlajari ham. Umpamani, anggo ihatahon sidea porlu do itingkathon ham keterampilanmu laho marbarita ampa mangajari, sungkun ma bani sidea sonaha carani. Dob ai, horjahon ham ma ai. Sonaha carani ase boi saud ibahen ham cita-citamu ai?

9. Sonaha carani ase saud iparlajari ham sada keterampilan?

⁹ Marusaha ma laho pasaudkon ai. Umpamani, sihol do ham ase lambin pandei mangajari. Halani ai, parlajari ma brosur Marlatih Ase Lambin Pandei Mambasa ampa Mangajar. Anggo mandapot tugas ham i partumpuan tongah minggu, pindo ma ase ibogei sanina na marpangalaman ham sanggah mambahen persiapan. Dob ai sungkun ma hu bani na ija do na porlu ipadear. Dear ma persiapkon tugas na ibere bamu ase boi ididah hasoman ringgas do ham janah martanggung jawab.​—Pod. 21:5; 2 Kor. 8:22.

10. Saritahon ma sada pangalaman na patuduhkon anggo hita boi mamparlajari sada keterampilan.

¹⁰ Aha do na boi ibahen ham anggo sada keterampilan na laho iparlajari ham lang urah iahap ham? Totap ma marusaha! Sonai ma na ibahen Sanina Garry. Hurang lancar do ia mambasa. Idingat ia do sanggah ia mandapot tugas mambasa i partumpuan, maila tumang do ia. Tapi totap do ia marusaha. Ia mangkatahon halani ra ia manjalo pelatihan humbani bahat sanina na marpangalaman ampa humbani publikasi,  sonari domma boi ia marambilan i Balei Harajaon, i kebaktian wilayah, ampa i kebaktian regional.

11. Songon si Timoteus, sonaha carani ase lambin bahat na boi ihorjahon hita bani Jahowa?

¹¹ Ai gabe sahalak parambilan atap guru na pandei do si Timoteus? Lang adong ipatugah Bibel pasal ai. Tapi pasti do lambin pandei si Timoteus mangkorjahon tugasni halani ra ia mandalankon podah ni si Paulus. (2 Tim. 3:10) Sonai homa hita, anggo marusaha hita ase lambin pandei ibagas pangidangion, lambin bahat ma na boi ihorjahon hita bani Jahowa.

12. Pangurupion aha do na ongga ijalo ham humbani sanina botou?

¹² Gati do hita iurupi sanina botou. Umpamani, anggo opname hita i rumah sakit, malas do uhurta sanggah sintua na mangidangi i Panitia Penghubung Rumah Sakit atap Kelompok Pengunjung Pasien roh mangidah hita. Sanggah adong masalahta, sirsir do sintua mambere panorang laho mangurupi ampa patoguhkon uhurta. Sanggah porlu hita iurupi laho manstudihon parlajar Bibelta, malas do uhurta anggo adong perintis na marpangalaman mangurupi hita. Malas do uhur ni ganup sanina botou ai sanggah mangurupi hita. Boi do homa iahapkon hita malas ni uhur na sisonai anggo ra hita mangurupi halak na legan. “Martuahan do na mambere ase na manjalo,” nini Jesus. (Lah. 20:35) Jadi anggo sihol uhurmu laho mangurupi halak na legan, aha ma na porlu ibahen ham?

13. Sanggah laho mambahen tujuan, aha do na porlu idingat hita?

¹³ Sanggah laho mambahen cita-cita atap tujuan, tontuhon ma aha na laho sibahenonmu. Umpamani, ra do nini uhurmu, ‘Sihol uhurhu lambin bahat mangurupi i kuria.’ Tapi anggo sonai ibahen ham, ra do lang urah ibotoh ham sonaha mangkorjahon ai janah attigan do ai ibahen. Halani ai bahen ma tujuan na jelas. Boi do isuratkon ham tujuanmu ampa sonaha pasaudkon ai.

14. Sanggah laho mambahen tujuan, mase porlu masuk akal hita?

¹⁴ Leganni ai, porlu do homa masuk akal hita sanggah mambahen tujuan. Mase? Halani lang boi ikendalihon hita ganup situasi. Contohni, halani pangurupion ni si Paulus, jongjong ma sada kuria na baru  i kota Tessalonika. Tontu sihol do uhurni totap tading ijai ase boi mangurupi halak Kristen na dong ijai. Tapi adong do halak na marsogam ni uhur bani si Paulus janah ipaksa sidea do ase itadingkon ia kota ai. (Lah. 17:1-5, 10) Anggo totap si Paulus tading ijai, gabe tarancam ma halak Kristen na ijai. Hassi pe sonai, ra do si Paulus mambahen penyesuaian. Dob ai, isuruh ia ma si Timoteus hu Tessalonika laho patoguhkon haporsayaon ni ganup hasoman na ijai. (1 Tes. 3:1-3) Tontu malas tumang do uhur ni halak Kristen na i Tessalonika halani ra si Timoteus mangurupi sidea.

15. Anggo mubah situasinta, mase maningon ibahen hita use tujuan na legan? Bere ma contoh.

¹⁵ Adong do na boi iparlajari hita humbani pangalaman ni si Paulus i kota Tessalonika. Ra do domma ibahen hita tujuan. Tapi halani mubah situasinta, lang boi be ihorjahon hita ai. (Par. 9:11) Anggo ai do na masa bamu, bahen ma use tujuan na legan na boi ihorjahon ham. Sonai ma na ibahen sapasang suami istri na margoran si Ted pakon si Hiedi. Halani masalah kesehatan, lang boi be sidea mangidangi i Betel. Tapi halani mangkaholongi Jahowa, marusaha ma sidea mangindahi cara ase boi totap mangidangi. Mungkahni, merintis biasa ma sidea. Lang piga dokah, ilantik ma sidea gabe perintis istimewa janah ilatih ma si Ted gabe sintua kaliling pangganti. Tapi i pudian ni ari dong ma pangaturan batasan umur bani sintua kaliling. Jadi isadari si Ted pakon si Hiedi ma lang boi be sidea mangidangi ibagas penugasan ai. Hassi pe pusok uhur ni sidea, tapi ibotoh sidea do bahat ope cara laho mangidangi Jahowa. Nini si Ted ma, “Ibotoh hanami do lang pitah sada cara laho mangidangi Jahowa.”

16. Aha ma na boi iparlajari hita humbani Galatia 6:4?

¹⁶ Lang boi ikendalihon hita ganup na masa ibagas goluhta. Halani ai, ulang ma iahap hita maharga hita i lobei ni Jahowa pitah halani penugasanta. Janah ulang ma homa ibanding-bandingkon hita penugasanta pakon penugasan ni halak. Si Hiedi mangkatahon, “Gabe lang be marmalas ni uhur hita anggo ibanding-bandingkon hita goluhta pakon goluh ni halak.” (Basa Galatia 6:4.) Halani ai, ponting tumang do ipindahi hita cara sonaha ase boi mangurupi na legan ampa mangidangi Jahowa. *

17. Aha ma na boi ibahen ham ase boi dapotmu tugas na iharosuhkon ham?

¹⁷ Ase lambin bahat na boi ibahen ham  ibagas pangidangion, sederhanahon ma goluhmu janah ulang ma marutang anggo lang porlu. Ase boi dapotmu cita-cita jangka panjang, bahen ma cita-cita jangka pendek. Umpamani, anggo sihol uhurmu gabe perintis biasa, humbani sonari marusaha ma ham gabe perintis ekstra tetap. Anggo sihol uhurmu gabe siparugas, marusaha ma ham mambere lambin bahat panorang laho marbarita, manorih na boritan, ampa mangurupi na matua i kuria. Pangalaman aha pe na dapotmu sonari, boi do ai mangurupi ham mangkorjahon tugas i lobei ni ari. Halani ai, marusaha ma mambahen na sidearan sanggah mangkorjahon tugas aha pe na ibere bamu.​—Rom 12:11.

18. Aha ma na boi iparlajari ham humbani Botou Beverley? (Tonggor homa gambar.)

¹⁸ Age pe domma matua, boi do homa hita mambahen cita-cita. Pardiateihon ma pangalaman ni Botou Beverley na marumur 75 tahun. Halani adong naboritni, gabe sunsah ma ia mardalan. Age pe sonai, sihol uhurni dihut bani kegiatan khusus sadokah bulan Pardingatan. Halani ai ibahen ia ma tujuan na jelas. Malas tumang uhurni halani dapotsi do cita-citani ai. Gabe tarojur ma homa sanina botou i kuria laho mambere lambin bahat ibagas pangidangion. Jadi, maharga tumang do bani Jahowa pambahenan ni sanina botounta na matua ai, hassi pe lang boi bahat na ibahen sidea.​—Ps. 71:17, 18.

19. Cita-cita aha ma na boi ibahen hita ibagas pangidangion?

¹⁹ Bahen ma tujuan na boi ihorjahon ham. Padear ma sifat-sifatmu ase malas uhur ni Jahowa bamu. Parlajari ma keterampilan na marguna bani organisasi. Marusaha ma mangindahi cara laho mangurupi sanina botou. * Songon si Timoteus, gabe ‘talar ma hasurunganmu bani ganup halak’ halani ipasu-pasu Jahowa horjamu ai.​—1 Tim. 4:15.