HOLSOH ni uhur usih do ai songon boban na borat. (Pod. 12:25) Ongga do holsohan ham halani sitaronon? Ongga do iahap ham songon na lang tartaron ham be sitarononmu ai? Anggo ongga, lang pitah ham na sonai. Bahat do hita holsohan halani marmasam alasan. Umpamani, adong na mangurus na boritan, adong na matei na hinaholonganni, ampa dong na marsitaronon halani hona bencana. Aha do na boi mangurupi hita sanggah masa sisonai? *

Sanggah adong holsoh ni uhur, boi ma hita marlajar humbani si Daud sonaha cara mangatasi ai. Buei do sitarononni, janah sipata narus matei do ia. (1 Sam. 17:34, 35; 18:10, 11) Aha ma na mangurupi si Daud sanggah adong holsoh ni uhurni? Anjaha sonaha hita boi maniru ia?

Bayangkon ma sonaha pangahap ni si Daud sanggah ia melarikan diri humbani Raja Saul, na marusaha laho mamunuhsi. Sanggah mulak ia hu rumahni i Ziklag, hape domma roh munsuh mambuat ganup artani, rumahni itutung, anjaha kaluargani pe itaban. Sonaha pangahap ni si Daud sanggah ai? “Ipagogoh si Daud pakon hasomanni ai ma sorani tangis-tangis, pala seng dong be gogoh ni sidea tangis.” Ambahni ai, adong hasomanni na mangkatahon ‘laho manggijikisi pakon batu’. (1 Sam. 30:1-6) Sanggah ai, sahali tolu ma roh parsoalanni: Kaluargani itaban, mabiar ia hasomanni mamunuhsi, anjaha si Saul totap marusaha mamunuh ia. Tontu pusok tumang uhur ni si Daud!

Aha ma na ihorjahon si Daud use? Mintor “ipatenger si Daud ma uhurni bani Jahowa, Naibatani”. Sonaha carani? Martonggo ma ia bani Jahowa anjaha mardingat sonaha Jahowa mangurupi ia hinan. (1 Sam. 17:37; Ps. 18:3, 7) Ipatuduh si Daud do anggo ia porlu mangindahi tugah-tugah humbani Jahowa, ase mambotoh aha na maningon sihorjahononni. Dob ibotoh ia tugah-tugah humbani Jahowa, mintor ihorjahon ia ma ai. Hasilni, ipasu-pasu Jahowa ma ia pakon hasoman-hasomanni. Ganup arta pakon kaluargani mulak use hubani sidea. (1 Sam. 30:7-9, 18, 19) Ai iparuhurhon ham do tolu cara na ibahen si Daud? Martonggo do ia bani Jahowa mangindo pangurupion, mardingat sonaha Jahowa domma mangurupi ia, anjaha mangkorjahon domu bani tugah-tugah na ibere Jahowa. Sonaha hita boi maniru si Daud? Paruhurhon ma tolu cara ai.

1. Martonggo. Sanggah holsohan, boi do hita martonggo mangindo ase iurupi janah iparuhuri Jahowa hita. Sanggah ipatugah hita ganup na adong ibagas uhurta, ai boi mambahen lambin damei pangahapta. Boi do homa pondok tonggonta janah ibagas uhur, anggo maningon sonai situasini. Sanggah martonggo hita, on patuduhkon na porsaya do hita bani Jahowa, songon si Daud. Ia mangkatahon, “Jahowa, dolog batu bangku, batar-batarhu, na paluahkon ahu, Naibatangku, batu gingging anjaha parlingodanku.” (Ps. 18:3) Tongon do marguna  tonggo ai? Sahalak perintis na margoran si Kahlia mangkatahon, “Dob martonggo, damei ma huahap. Gabe boi ma hutiru cara marpingkir ni Jahowa anjaha lambin martenger ni uhur ma ahu hu Bani.” Tongon, sibere-bere ni Jahowa do tonggo ai, na boi mangurupi hita sanggah adong holsoh ni uhur.

2. Mardingat. Ongga do adong sitarononmu na borat, janah boi ham martahan halani pangurupion ni Jahowa? Anggo idingat hita ai, gabe ipargogohi ma hita anjaha lambin porsaya ma hita hu Bani. (Ps. 18:18-20) Sahalak sintua na margoran si Joshua mangkatahon, “Husurat do ganup tonggongku na ibalosi. Anggo hubahen sonai, gabe hudingat ma age pe gati hupatugah pangindoanku secara khusus, tapi pitah na huhaporluhon do na ibere Jahowa.” Tongon, anggo idingat hita aha na dob ibahen Jahowa hubanta, lambin ipargogohi ma hita laho manaluhon holsoh ni uhurta.

3. Mangkorjahon. Paima mambahen haputusan, dear do anggo itorihi hita naha nini Bibel. (Ps. 19:8, 12) Buei do hasomanta na mambahen riset sanggah mambasa Bibel mangkatahon lambin iarusi sidea do ayat ai, anjaha lambin urah mandalankon ai. Sahalak sintua na margoran si Jarrod patorangkon, “Anggo huriset sada ayat lambin huarusi ma aha do harosuh ni Jahowa. On mangurupi ahu lambin marpos ni uhur hubani ayat ai. Halani ai, lambin urah ma hudalankon parentah-Ni.” Sanggah itorihi hita tugah-tugah ni Jahowa humbani Bibel anjaha mandalankon ai, gabe iurupi ma hita ase totap damei janah marmalas ni uhur sanggah adong na mambahen hita holsohan.

Tangkas do iarusi si Daud ase boi ia manaluhon holsoh ni uhur, porlu do pangurupion ni Jahowa. Arga tumang do bani pangurupion ni Naibata. Ia mangkatahon, “Mangunsagahkon Naibatangku tarlumpat ahu do tembok. Naibata do na manggonditkon hagogohon bangku.” (Ps. 18:30, 33) Ra do songon tembok na so tarlumpati iahap hita parsoalanta. Tapi marhitei pangurupion ni Jahowa, tarlumpati hita do tembok aha pe! Pos ma uhurta, anggo martonggo hita, mardingat sonaha Jahowa mangurupi hita, ampa mangkorjahon tugah-tugah na ibere Ia, ipargogohi anjaha iparuhuri Jahowa do hita. Hasilni, boi ma hita totap marmalas ni uhur age pe adong na mambahen hita holsohan.