Sumpah ai ma “sada pernyataan atap janji na serius na ihatahon secara resmi. Janah gati do sanggah marsumpah, Naibata . . . ibahen jadi saksini”. Sumpah boi ihatahon tumang atap pe isurat.

Adong do piga-piga halak na mangkatahon salah do anggo marsumpah halani Jesus mangkatahon, “Sabonar na so bulih do hanima marbija [atap marsumpah] barang marbulawan pe . . . Sonon ma hatanima, ‘Eak’, anggo eak, ‘Lang’, anggo lang. Lobih hunjai, humbani na jahat ma ai.” (Mat. 5:33-37) Tontu ibotoh Jesus do bani Titah ni si Musa adong aturan laho marsumpah bani piga-piga situasi janah adong do juakjuak ni Naibata na setia na marsumpah. (1 Mus. 14:22, 23; 2 Mus. 22:10, 11) Jahowa sandiri pe ongga do marsumpah. (Heb. 6:13-17) Jadi, lang ilarang Jesus hita marsumpah. Tapi ipasingat ia do hita ase ulang urah-urah marsumpah. Halani ai, maningon idalankon hita ma aha na ihatahon hita, ai do harosuh ni Jahowa.

Sonaha anggo isuruh ham marsumpah? Parlobei, pastihon ma na boi do ihorjahon ham sumpah ai. Anggo lang pos uhurmu tarhorjahon ham ai, dearan ma ulang pala marsumpah. Bibel pasingatkon hita, “Dearan do ulang ho marbagah-bagah humbani na marbagah-bagah, hape seng ipasaud.” (Par. 5:4) Dob ai, paruhurhon ma prinsip-prinsip ni Bibel na markaitan pakon sumpah ai, janah horjahon ma domu bani panggora ni uhurmu na borsih. Aha ma piga-piga prinsip ni Bibel na domu hujai?

Adong do sumpah na sadalan pakon harosuh ni Naibata. Umpamani, ibahen Saksi Jahowa do ikrar sanggah marhajabuan sidea. Sarupa do ikrar on songon sumpah. I lobei ni Naibata pakon saksi-saksi marjanji do pengantin naboru pakon pengantin dalahi ase marsihaholongan, marsihargaan, ampa marsipasangapan “sadokah [sidea] na dua manggoluh”. (Ra do lang pas sonai ibahen pasangan na legan. Tapi, tong do ibahen sidea ikrar parhajabuan i lobei ni Naibata.) Dob ai pe ase gabe suami istri sidea. Halani ai, lang boi sidea marhajabuan use pakon na legan sadokah manggoluh ope pasanganni. (1 Mus. 2:24; 1 Kor. 7:39) Sadalan do pangaturan on pakon harosuh ni Naibata.

Adong do sumpah na marlawanan pakon harosuh ni Naibata. Juakjuak ni Naibata lang boi marsumpah manggunahon sinjata laho mambela negara atap manadingkon haporsayaonni. Anggo ihorjahon hita sonai, na manlanggar parentah ni Naibata do hita ijai. “Seng hun dunia on” juakjuak ni Naibata. Halani ai, lang boi hita dihut bani ganup urusan ni sidea.​—Joh. 15:19; Jes. 2:4; Jak. 1:27.

 Adong do sumpah na markaitan bani panggora ni uhur. Sipata, porlu do ipingkirhon hita podah ni Jesus paima mambahen haputusan laho marsumpah atap lang. Jesus mangkatahon, “Bere nasiam ma bani Kesar na Kesar simadasi, anjaha bani Naibata na Naibata simadasi.”​—Luk. 20:25.

Misalni, anggo halak Kristen mambahen permohonan kewarganegaraan atap laho mandapot pasport. Ibotoh ia do maningon mambahen sumpah setia bani negara. Tapi anggo marlawanan sumpah ai pakon parentah ni Naibata, tontu lang ra ia marsumpah halani targanggu panggora ni uhurni. Tapi ra do pamarentah mambere izin laho mangubah isi ni sumpah ai ase totap borsih panggora ni uhurni sanggah marsumpah.

Mambahen sumpah na sisonai sadalan do pakon Rom 13:1. Ijai ihatahon, “Unduk ma ganup halak bani pamarentah na markuasa.” Jadi halak Kristen boi do mamutuskon lang salah mambahen sumpah sisonai halani Naibata do na manuruh hita ase unduk bani pamarentah.

Ponting tumang do mangihutkon panggora ni uhur sanggah hita isuruh mamakei barang atap mambahen gerakan sanggah marsumpah. Songon halak Rom pakon halak Skit hinan, sidea mamakei podang laho mangindo gogoh bani naibatani, songon jaminan bani na marsumpah ai. Anggo halak Junani, sanggah marsumpah iangkat sidea do tanganni hu langit. Ai patuduhkon sidea porsaya adong hagogohon ni naibata na mampardiateihon aha na ihatahon, aha na ihorjahon, ampa hubani ise sidea martanggung jawab.

Tontu lang ra juakjuak ni Naibata marsumpah mamakei lambang-lambang nasional na markaitan hubani ugama palsu. Tapi sonaha anggo isuruh pangadilan ham mambahen tanganmu i atas ni Bibel anjaha marsumpah mambere hasaksian na tongon? Anggo sonai situasini, boi do ham mangkorjahon ai halani bani Bibel pe adong do ipatugah pasal juakjuak ni Naibata na marsumpah mambahen gerakan. (1 Mus. 24:2, 3, 9; 47:29-31) Jadi ponting do mardingat ai. Halani anggo ham mambahen na sisonai, ham marsumpah i lobei ni Naibata laho mangkatahon na sasintongni. Maningon jujur ma ham mambalosi ganup na isungkun hu bamu.

Halani maharga tumang do parhasomananta pakon Jahowa, paima marsumpah martonggo ma. Janah dear ma pingkirhon sumpah na laho ibahen ham ai. Anjaha pastihon ma panggora ni uhurmu lang targanggu atap lang manlanggar prinsip ni Bibel. Anggo domma iputuskon ham marsumpah dear ma dalankon ai.​—1 Ptr. 2:12.