Anggo marhajabuan use dalahi ai, salosei ma parhajabuanni na parlobei i lobei ni kuria. Anjaha sah do parhajabuanni na paduahon ai. Ase boi iarusi hita ai, pardiateihon ma aha na ihatahon Jesus pasal halak na marsirang janah marhajabuan use.

Bani Mateus 19:9 Jesus patugahkon aha alasanni sasahalak boi marsirang. Ia mangkatahon, “Barang ise na mansirangkon parinangonni, anggo seng halani parbangkison, gabe ibuat na legan, parbangkis do ia ai.” Hunjai gabe ibotoh hita ma (1) pitah halani parbangkison do sasahalak boi marsirang, janah (2) anggo sada dalahi mansirangkon istrini sedo halani parbangkison janah marhajabuan use, na mangkorjahon parriah-riahon do ia ijai. *

Humbani ayat ai, ai boi do dalahi ai manirangkon istrini janah marhajabuan use? Tontu lang. Anggo suami do na marbangkis, istri ma na mamutuskon sidea marsirang atap lang. Tapi anggo iputuskon istrini marsirang do sidea, haduasi sidea boi do marhajabuan use pakon na legan anggo domma kaluar surat ceraini.

Tapi adong do homa istri na ra manalpuhon hasalahan ni suamini ai janah lang ra marsirang. Sonaha anggo suamini do na mangindo sirang age pe domma isalpuhon istrini hasalahanni? Domu bani prinsip ni Bibel lang bebas ia marhajabuan use halani ra do istrini ai totop marsada pakonsi. Jadi anggo totap do dalahi ai marhajabuan pakon halak na legan, hape lang bebas ia mangkorjahon ai, na marbangkis do ia use. Halani ai, maningon ibahen sintua ma use panitia pangadilan laho pasaloseihon parkara ai.​—1 Kor. 5:1, 2; 6:9, 10.

Anggo adong suami na mambahen sonai, sonaha ma kuria mangidah parhajabuanni na parlobei pakon na paduahon? Ai totap ope ihira istrini na parlobei ai? Ai parbangkison do parhajabuanni na paduahon?

Hinan, ianggap hita do parhajabuan na paduahon ai parbangkison anggo manggoluh ope istrini na parlobei, lape marhajabuan, anjaha lang marbangkis. Hape sanggah Jesus mangulas pasal parsirangan ampa parhajabuan use, lang adong isobut ia pasal pasangan na lang marsalah. Tapi Jesus patorangkon anggo adong dalahi na marsirang sedo halani parbangkison janah marhajabuan use, domma marbangkis ia. Anggo sonai situasini, salosei ma parhajabuanni na parlobei.

Anggo adong sada dalahi na mansirangkon istrini janah marhajabuan use, lang mungkin mantan istrini ai mambahen haputusan laho manalpuhon hasalahanni atap  mansirangkon ia. Halani ai, lang be tanggung jawabni mambahen haputusan na banggal ai. Leganni ai, ianggap kuria do homa parhajabuan na paduahon ai sah, hassi pe manggoluh ope istrini ai, lape marhajabuan use, atap mangkorjahon parriah-riahon. *

Contoh na ipatugah nongkan ai mangulas pasal suami na marbangkis janah marsirang. Sonaha anggo sahalak suami marsirang anjaha marhajabuan use, tapi sedo halani marbangkis? Atap, sonaha porini suamini ai mangkorjahon parriah-riahon dobkonsi marsirang janah marhajabuan use, age pe istrini ra manalpuhon hasalahanni? Humbani ganup contoh ai, parsirangan janah marhajabuan use, isobut ma ai marbangkis. Ai ma na mambahen marujung parhajabuanni na parlobei. Halani ai, sah do parhajabuanni na paduahon ai. Songon na ipatugah bani The Watchtower, 15 November 1979 alaman 32, “Sonari domma ipungkah ia parhajabuanni na paduahon janah lang boi uhur-uhurni mangujungi parhajabuanni ai anjaha mulak use hubani mantan istrini. Parhajabuanni na parlobei domma marujung halani marsirang, marbangkis, janah marhajabuan use.”

Pangarusion na terbaru on lang mambahen parhajabuan gabe lang pansing atap sedo dousa na banggal na marbangkis ai. Sahalak dalahi na manirangkon istrini sedo halani parbangkison janah marhajabuan use, lang bebas ia marhajabuan use. Anggo ihorjahon ia sonai, maningon ibahen sintua ma panitia pangadilan. (Anggo istrini na baru ai halak Kristen, maningon ibahen do homa panitia pangadilan.) Tongon, parhajabuanni na paduahon on lang ianggap marbangkis. Hassi pe sonai, lang boi dalahi ai mandapot hak istimewa i kuria sadokah martahun-tahun, ronsi lang adong be na mardingat hasalahanni ai. Anjaha paima mambere hak istimewa hu bani, maningon ipingkirhon sintua do situasini mantan pasanganni ai, pakon dakdanak na itadingkonni hinan.​—Mal. 2:14-16.

Halani serius tumang do akibatni parsirangan janah marhajabuan use na lang domu bani prinsip ni Bibel, maningon itiru halak Kristen ma pangaturan ni Jahowa pasal parhajabuan. Janah sangap ma bahen parhajabuan.​—Par. 5:3, 4; Heb. 13:4.