Na Isungkun Pambasa
Sanggah Sibolis mangkatahon bani si Hawa lang matei ia anggo ipangan ia buah ni hayu pambotohan ni na madear ampa na masambor in, ai dong do maksud ni Sibolis laho mangajarhon anggo halak na matei ai manggoluh ope tonduyni, songon na ihaporsayai halak sonari on?
Ra do lang sonai. Lang dong ihatahon Sibolis anggo ipangan si Hawa buah na ilarang Naibata ai, pitah dagingni dassa na matei tapi tonduyni totap ope manggoluh i sada ianan. Marhitei ulog, ihatahon Sibolis do anggo ipangan si Hawa buah ni hayu ai, ‘seng tongon matei ia’. Maksudni totap do manggoluh i tanoh on si Hawa, marmalas ni uhur janah lang be Naibata na mangatur sidea.—1 Mus. 2:17; 3:3-5.
Anggo lang i Eden do hape asal ni ajaran ai mulai ihaporsayai, nantigan ma halak mulai porsaya bani ajaran ai? Lang boi ipastihon hita ai. Tapi sanggah roh Bah na Sumbang bani panorang ni si Noak, masap do ganup ajaran ugama palsu, sonai homa halakni. Pitah si Noak ampa kaluargani do na maluah janah parugama na sintong do sidea.
Halani ai, tontu ajaran manggoluh ope tonduy ni na matei mulai adong dobkonsi Bah na Sumbang. Sanggah igeori Naibata sahap ni jolma i Babel janah ipaerap Ia ganup halak “hu sab dunia on”, tontu ijai ma mungkahni ipararat sidea ajaran ai. (1 Mus. 11:8, 9) Tapi, lang soal hunja mungkahni ajaran ai, porsaya do hita anggo Sibolis “bapa ni ladung” ai do na mambahen ase ipararat ajaran ai. Janah malas do uhurni mangidah bahat halak porsaya bani ajaran ai.—Joh. 8:44.