Satatan bani 5 Musa 22:25-27 sedo na laho mambuktihon hasalahan ni dalahi ai, halani domma tangkas marsalah do ia. Tapi tujuan ni titah ai ibahen laho patugahkon mase naboru ai ihatahon lang marsalah. Pardiateihon ma ayat sebelumni.

Bani ayat sebelumni, ipatugah dong sada dalahi “i huta” na marsaor pakon sada naboru na martunangan. Naboru na dob martunangan dos do ai pakon na dob marhajabuan. Jadi mardousa do dalahi ai halani marbangkis pakon naboru na dob martunangan. Ai mardousa do homa naboru ai? Ihatahon, lang “mandoruhi ia age pe ibagas huta”. Porini mandoraki ia, tontu dong ma halak na manangar janah boi ma ia iurupi. Tapi lang sonai ibahen ia. Halani ai, patut ma haduasi sidea iuhum halani domma marsalah.​—5 Mus. 22:23, 24.

Tapi legan do situasi na tarjadi bani 5 Musa 22:25-27. Ihatahon, “Tapi anggo i ladang do jumpah dalahi ai naboru, na dob martunangan ai, gabe itangkap ia anjaha marsaor pakonsi, jadi pitah dalahi na marsaor pakonsi ai do na maningon matei. Tapi seng bulih kahuaonmu naboru ai, ai seng dong bani naboru ai dousa, na boi mambahen matei ia, halani paharani ai usih do ai hubani sada halak, na mandorab anjaha na mamunuh hasomanni; ai i ladang do naboru ai jumpahsi, anjaha age pe mandoruhi naboru na dob martunangan ai, seng dong age sahalak na tarbahen mangurupisi.”

Bani parkara on, porsaya do pangintuai bani naboru ai. Mase? Halani hassi pe “mandoruhi naboru na dob martunangan ai, seng dong age sahalak na tarbahen mangurupisi”. Halani ai ma ihatahon lang mardousa naboru ai. Tapi anggo dalahi ai, ihatahon do anggo ia domma marbangkis halani “itangkap” ia naboru na dob martunangan ai lanjar iperkosa.

Jadi, hassi pe bani titah ai ipatorang mase naboru ai ihatahon lang mardousa, tangkas do anggo dalahi ai domma mardousa halani iparseda ia naboru ai. Tontu “pangkei do pareksaon” ni pangintuai parkara ai. Tangkas do iarusi sidea aturan ni Naibata halani gati do ai ipatugah bani sidea. Halani ai sanggah mambahen haputusan, iihutkon sidea do aturan ni Naibata.​—5 Mus. 13:15; 17:4; 2 Mus. 20:14.