1-2. (a) Pesta aha do na somal irayahon bangsa-bangsa? (Tonggor ma kotak “ Aha do Tahun Parolob-oloban Ai?”) (b) Domu bani Lukas 4:16-18, pasal aha do na ipatugah Jesus?

BANI piga-piga nagori, somal do mambahen pesta olob-olob. Umpamani laho marayahon 50 tahun pamarentahanni atap hamardekaonni. Ra do ibahen sidea perayaan ai pitah sadari. Ra do homa saminggu atap lobih. Tapi dob marujung pesta banggal ai, mintor podas do ilupahon sidea ai.

² Hinan pe sahali 50 tahun somal do halak Israel mamestahon tahun parolob-oloban. Pesta ai mamboan haluahon bani sidea. Tapi, mase porlu ibotoh hita ai? Halani pangaturan ijia pasingatkon hita pasal pangaturan na ibahen Jahowa hubanta. Pangaturan on mamboan haluahon sadokah ni dokahni janah humbani sonari pe domma iahapkon hita gunani ai. Bani Bibel ipatugah Jesus do homa pasal ai. Jadi sonari ulas hita ma pasal haluahon na sibanggalan marimbangkon haluahon na irayahon bangsa-bangsa ampa halak Israel hinan.​—Basa Lukas 4:16-18.

3. Domu bani 3 Musa 25:8-12, aha do gunani tahun Parolob-oloban bani halak Israel?

³ Ase iarusi hita pasal haluahon na ipatugah Jesus, ulas hita ma lobei pasal tahun Parolob-oloban na iaturhon Naibata bani halak Israel hinan. Jahowa mangkatahon bani halak Israel, “Maningon papansingonmu do tahun palimapuluhkon ai, anjaha tingtingkononkon haluahon i tanoh in, bani haganup na marianan ijin, maningon tahun parolob-oloban do in bennima. Mulak ma ijai hanima ganup hu parbagiananni anjaha ganup hanima hubani sindohorni.” (Basa 3 Musa 25:8-12.)  Bani artikel na salpu domma iulas hita aha do gunani ari Sabat bani halak Israel hinan. Sonari ulas hita ma aha do gunani tahun Parolob-oloban ai bani sidea. Umpamani bayangkon ma dong sada dalahi halak Israel na bahat utangni. Tarpaksa ma ijual ia jumani laho manggalari utangni ai. Tapi boi do dapotsi use jumani ai halani ihatahon sanggah tahun Parolob-oloban, ‘mulak hu parbagiananni’ do ganup halak. Jadi totap ma adong tading-tadingan na laho bereonni bani niombahni. Contoh na legan, dong sada dalahi na tarpaksa manjual anakni atap pe dirini sandiri gabe jabolon halani lang targalarsi utangni. Tapi bani tahun Parolob-oloban, boi ma ia atap anakni ai ‘mulak hubani sindohorni’ atap kaluargani. Tangkas ma pangaturan on patuduhkon parduli tumang do Jahowa bani juakjuak-Ni.

4-5. Mase maningon iparlajari hita pasal tahun Parolob-oloban na ibahen bani halak Israel hinan?

⁴ Aha ope gunani tahun Parolob-oloban ai? Bibel patorangkon, “Ulang ma adong halak na [miskin] i tongah-tongah nasiam, ai sabonar pasu-pasuon ni Jahowa do ham i tanoh na binere ni Jahowa Naibatamu bamu, bahen parbagianan siteanonmu.” (5 Mus. 15:4) Tapi legan tumang do na tarjadi sonari on. Gati do ididah hita halak na bayak lambin bayak janah halak na miskin lambin sunsah.

⁵ Sonari halak Kristen lang be mangihutkon Titah ni si Musa. Halani ai, lang iihutkon hita aturan na ibahen bani tahun Parolob-oloban songon paluahkon jabolon, manasap utang ni hasoman, ampa paulakkon juma hubani simadasi. (Rom 7:4; 10:4; Ep. 2:15) Hassi pe sonai, ponting do iparlajari hita pasal tahun Haluahon ai. Mase? Halani sonari dong do homa haluahon na iahapkon hita, na pasingatkon hita pasal aha na dob iaturhon Jahowa bani halak Israel hinan.

6. Humbani aha do ganup manisia porlu ipaluah?

⁶ Sasintongni ganupan hita porlu do ipaluah halani iparjabolon dousa do ganup jolma. Halani dousa, borit-boritan ma hita, matua, janah matei. Sanggah ididah hita  sormin atap pe laho hita martambar, iahapkon hita ma tongon do ai. Sanggah mambahen hasalahan, maretek ni uhur do homa hita. Halani ai ma apostel Paulus mangkatahon, “Ipatunduk do ahu bani titah ni dousa, na adong ibagas pagoringku.” Nini use, “Aih, ahu jolma na masombuh on. Ise ma na paluahkon ahu hun bani angkula hamatean on?”​—Rom 7:23, 24.

7. Pasal haluahon, panjahaion aha ma na ipatugah nabi Jesaya?

⁷ Malas uhurta halani domma ibahen Jahowa dalan laho paluahkon hita humbani dousa. Jesus do dalan hu haluahon ai. Lobih pitu ratus tahun paima roh ia hu tanoh on, ipatugah nabi Jesaya ma panjahaion pasal haluahon na sibanggalan humbani na iahapkon halak Israel hinan. Ia manuratkon, “Tonduy ni Tuhan Jahowa do na sogop bangku, ai domma iminaki Jahowa ahu, laho mangambilankon ambilan na madear bani halak na [lamlam]; isuruh do ahu pauli-ulihon halak paruhur na maropuk, maningtingkon haluahon bani halak na [iparjabolon].” (Jes. 61:1) Ise do na imaksud ijon?

8. Ise do na manggoki panjahaion ni si Jesaya ai?

⁸ Panjahaion ai mulai igoki dobkonsi ipungkah Jesus pangidangionni. Sanggah laho ia hu sinagoga i Nasaret, huta hagodanganni ai, ibasahon ia ma panjahaion ni si Jesaya bani halak Jahudi na martumpu ijai. Jesus mangkatahon, “Tonduy ni [Jahowa] in do sogop hu bangku, ai iminaki do ahu, laho mangambilankon ambilan na madear bani halak na masombuh. Isuruh do ahu laho patugahkon haluahon bani na tartutup ampa mambahen marpangidah use na mapitung, laho paluahkon halak na niodoh-odoh, ampa patugahkon tahun paridop ni uhuran ni [Jahowa] in.” (Luk. 4:16-19) Sonaha Jesus manggoki panjahaion ai?

9. Haluahon aha ma na iarapkon buei jolma sanggah Jesus i tanoh on?

⁹ Haluahon na ibasa Jesus humbani na isuratkon si Jesaya mulai igoki bani abad na parlobei. Hunja ibotoh hita ai? Dob ibasahon Jesus ai, ia mangkatahon, “Sadari on ma jumpah na tarsurat in, na binogei nasiam in.” (Luk. 4:21) Ra, bahat halak na manangar ai mangarapkon anggo sidea ipaluah humbani pamarentahan Rom. Ra do pangahap ni sidea dos songon dua dalahi na mangkatahon, “Mangarap hinan do hanami, ia ma na paluahkon Israel.” (Luk. 24:13, 21) Hape lang ongga iojur Jesus ase susianni manlawan hubani pamarentah  Rom. Tapi iparentahkon do sidea mambere “bani Kesar, na humbani Kesar”. (Mat. 22:21) Jadi sonaha ma Jesus mamboan haluahon bani panorang ai?

10. Humbani aha do halak ipaluah Jesus?

¹⁰ Jesus roh laho mangurupi halak ase mandapot haluahon marhitei dua cara. Na parlobei, iurupi do halak ase maluah humbani ajaran palsu. Ijia, bahat do halak Jahudi na ipaksa pambobai ugama ase mangihutkon adat ampa ajaran na ibahen jolma. Iagan pambobai ugama ai do sidea manogu-nogu halak hubani Jahowa. (Mat. 5:31-37; 15:1-11) Hape sasintongni pambobai na pitung do sidea ai. Halani lang ra sidea manjalo Kristus ampa ajaranni, gabe lang itanda sidea Naibata janah totap ma pitung sidea. Anjaha totap ma sidea mardousa. (Joh. 9:1, 14-16, 35-41) Tapi anggo Jesus, iurupi do halak na toruh maruhur ase maluah humbani ajaran palsu. Ipatuduh do ai marhitei ajaran ampa pambahenanni.​—Mrk. 1:22; 2:23–3:5.

11. Sonaha cara na paduahon Jesus paluahkon hita?

¹¹ Na paduahon, Jesus pasirsirhon haluahon bani ganup manisia na iparjabolon dousa tean-teanon. Marhitei tobusan, isasap Naibata ma dousa ni ganup halak na porsaya bani tobusan anjaha patuduhkon haporsayaonni marhitei parlahou. (Heb. 10:12-18) Jesus mangkatahon, “Anggo ipaluah Anak in nasiam, na maluah botul ma nasiam.” (Joh. 8:36) Banggalan do haluahon on marimbangkon haluahon na ijalo halak Israel hinan. Anggo halak Israel, dob ipaluah ra do gabe jabolon use sidea ronsi matei. Tapi haluahon na ibere Jesus totap do ronsi sadokah ni dokahni.

12. Ise ma na parlobei sahali mandapot guna humbani haluahon na itingtingkon Jesus?

¹² Bani ari Pentakosta tahun 33 M, marhitei tonduy na pansing iminaki Jahowa ma apostel-apostel, ganup dalahi ampa naboru na setia. Ganupan sidea gabe anak ni Naibata. Jadi holi ipapuho ma sidea laho mamarentah pakon Jesus i surga. (Rom 8:2, 15-17) On ma haluahon na parlobei na itingtingkon Jesus i sinagoga nongkan ai. Ganup halak na iminaki ai lang be iparjabolon ajaran ampa hasomalan na iajarhon pambobai ugama ni halak Jahudi. Ipaluah Naibata do homa sidea humbani dousa na parohkon hamatean. Jadi haluahon on imulai bani tahun 33 M, sanggah susian ni Kristus iminaki ronsi ujung ni Pamarentahan Saribu Tahun ni Kristus. Humbani sonari ronsi ujung ni pamarentahan ai, aha ma na masa?

13-14. Ise ope na mandapot haluahon na itingtingkon Jesus?

¹³ Sonari dong marjuta halak humbani sagala bangsa na isobut ‘biribiri na legan’. (Joh. 10:16) Naibata lang mamilih sidea laho mamarentah rap pakon Jesus i surga. Tapi Bibel mangkatahon holi manggoluh sadokah ni dokahni do sidea i tanoh on. Sonai do homa pangarapan ni nasiam?

¹⁴ Gari sonari pe, domma iahapkon nasiam pasu-pasu na iahapkon halak na iminaki ai. Halani porsaya bani tobusan ni Jesus, gabe boi ma nasiam mangindo hasasapan ni dousa bani Jahowa. Gabe damei ma pangahapmu halani mambotoh marosuh do Naibata bani nasiam. (Ep. 1:7; Pangk. 7:14, 15) Pingkirhon use pasu-pasu na idapot nasiam halani ipaluah humbani ajaran palsu. Jesus mangkatahon, “Tandaon nasiam ma hasintongan in, anjaha paluahon ni hasintongan in ma nasiam.” (Joh. 8:32) Tontu malas tumang uhurta halani mandapot haluahon sisonai.

15. Haluahon ampa pasu-pasu aha ma na laho ibere hubanta bani ari simagira?

¹⁵ Tapi dong ope haluahon na sibanggalan humbani haluahon ai. Lang piga dokah nari, iripaskon Jesus ma ganup ugama palsu ampa pamarentahan na jahat sonari on. Tontu ilinggomi Jahowa do “humpulan na banggal” atap halak na mangidangi-Si. Dob ai, ipasu-pasu Jahowa ma sidea i Paradeiso i tanoh  on. (Pangk. 7:9, 14) Bahat do holi halak na ipapuho janah ipaluah humbani dousa tean-teanon.​—Lah. 24:15.

16. Bani ari simagira, aha ma haluahon sibanggalan na laho ibere bani manisia?

¹⁶ Jadi mamarentah ma Jesus rap pakon halak na iminaki sadokah 1.000 tahun. Sanggah ai, iurupi ma ganup halak ase gabe sempurna janah marhasoman orot pakon Jahowa. Aha na iahapkon jolma ijai dos songon na iahapkon halak Israel bani tahun Parolob-oloban. Ujungni ganup halak na setia mangidangi Jahowa mulak use gabe sempurna, maluah humbani dousa.

17. Domu bani Jesaya 65:21-23, aha ma na laho masa bani juakjuak ni Naibata? (Tonggor ma gambar sampul.)

¹⁷ Sonaha holi hagoluhan i tanoh on dong ipatorang bani Jesaya 65:21-23. (Basa.) Ijai holi lang dong na marayoh halani bahat do na porlu ihorjahon. Bibel mangkatahon aha pe na ihorjahon juakjuak ni Jahowa bani panorang ai, lang dong na soya-soya. Bani ujung ni 1.000 tahun ai, pos do uhurta “simardekahononkon do age na tinompa in, humbani parjabolonan ni hamagouan, hu hamardekaon hasangapon ni anak ni Naibata”.​—Rom 8:21.

18. Mase pos uhurta anggo hita boi mangahapkon malas ni uhur bani ari simagira?

¹⁸ Hinan, ibahen Jahowa do pangaturan bani halak Israel ase dong panorang ni sidea laho marhorja ampa marsaran. Sonai ma holi bahenon-Ni bani Pamarentahan Saribu Tahun ni Kristus. Holi bahat ma panorangta laho manombah Jahowa. On ma na mambahen hita marmalas ni uhur i dunia na baru. Ganup halak na setia boi mangahapkon malas ni uhur halani sadokah pamarentahan ni Kristus bahat do horja na pamalaskon uhur janah ganup halak manombah Naibata.