“Martarima Kasih pasal Haganup”
AI TONGTONG do ham martarima kasih? Ponting tumang do irimangi hita sungkun-sungkun ai. Bibel mangkatahon bahat do halak sonari on “na so mambotoh martarima kasih”. (2 Tim. 3:2) Ra do ongga ham pajumpah pakon halak na mangarap maningon do ia iurupi halak na legan. Tapi dobkonsi ai lang ra ia mangkatahon tarima kasih bani na mangurupisi ai. Tontu lang marosuh ham marhasoman pakon halak sisonai.
Tapi hita lang songon halak i dunia on. Bani Bibel dong ojuran: “Gabe sipartarima kasih ma nasiam.” Halani ai ma ase hita “martarima kasih pasal haganup”. (Kol. 3:15; 1 Tes. 5:18) Dear do anggo hita martarima kasih. Dong piga-piga alasan mase maningon ihorjahon hita ai.
IBOTOH HITA DONG NA MANGKARGAI HITA
Sada alasan na ponting mase maningon martarima kasih halani gabe ibotoh hita ma ihargai halak do hita. Anggo sasada halak martarima kasih, gabe sabas do pangahapni. Sonai homa na manjalo hata tarima kasih ai. Mase ai boi mambahen hita ampa halak na legan marmalas ni uhur? Umpamani, anggo dong sasada halak na sirsir mangurupi ham, tontu halani na talup do ham manjalo ai. On patuduhkon parduli do ia bamu. Sanggah ibotoh ham pasal ai, gabe ihargai ham ma ai. Sonai ma na iahapkon si Rut. Gabe malas tumang do uhurni halani bujur si Boas hu bani. Gabe ibotoh ia ma dong do hape halak na parduli hu bani.—Rut 2:10-13.
Tontu na sipontingan maningon martarima kasih do hita bani Naibata. Tongon ra do ipingkiri ham sibere-bere na dob ijalo ham hum Bani. (5 Mus. 8:17, 18; Lah. 14:17) Tapi lang sungkup pitah ai. Maningon irimangi ham do ganup sibere-bere na dob ipasirsir Jahowa bamu pakon bani na hinaholonganmu. Anggo ibahen ham sonai, lambin holong ma uhurmu hu Bani janah ibotoh ham ma harga do ham Bani.—1 Joh. 4:9.
Maningon irimangi hita do ganup pasu-pasu na dob ibere Jahowa hu banta. Janah maningon ihatahon hita do tarima kasih hu Bani halani habujuran-Ni in. (Ps. 100:4, 5) Dong na mangkatahon, “Lambin tambah do malas uhur ni sasada halak na gati mangkatahon tarima kasih.”
PAOROTKON PARHASOMANAN
Alasan na legan mase ponting mangkatahon tarima kasih ai ma halani ai boi patoguhkon parhasomanan. Sihol do hita ihargai hasoman. Jadi anggo martarima kasih ham bani hasoman na dob mangurupi, gabe orot ma parhasomanan ni nasiam. (Rom 16:3, 4) Leganni ai, halak na gati martarima kasih rosuh do uhurni mangurupi halak na legan. Ibotoh ia do sanggah dong halak na bujur hu bani. Janah sihol do homa ia mambahen sisonai bani halak na bujur ai. Anjaha parrohkon malas ni uhur do mangurupi halak na legan. Halani ai ma Jesus mangkatahon, “Martuahan do na mambere ase na manjalo.”—Lah. 20:35.
Si Robert Emmons sahalak dosen hun University of California, mambahen penelitian pasal mangkatahon tarima kasih. Nini do, “Ase boi mangkatahon tarima kasih maningon ibotoh hita do na porlu hita iurupi halak. Sipata hita do na iurupi, janah sipata hita do na mangurupi.” Sasintongni ase boi hita totap manggoluh, porlu do hita iurupi halak na legan. Umpamani, porlu do 1 Kor. 12:21) Sasahalak na ra martarima kasih patudukan anggo ia mangkargai pambahenan ni halak hu bani. Halani ai, ai ipasomal ham do mangkatahon tarima kasih bani na legan?
hita mamboli sipanganon atap martambar hu bani halak na legan. (TOTAP MAMINGKIRHON NA DEAR
Alasan na leganni ai ma on boi mangurupi hita mamingkirhon pasal na madear. Usih songon saringan do pingkiranta ai. Rosuhmu do mamilih mamingkirhon na sada, janah mangambukkon na legan. Anggo martarima kasih ham artini ham mamilih mamingkirhon na dear, janah lang mampardiateihon na lang dear. Lambin gati ham martarima kasih, lambin bahat ma na dear na dapotmu, janah lambin marosuh ma ham mangkatahon tarima kasih. Anggo totap ham mamingkirhon ai, lambin iurupi ma ham mandalankon podah ni apostel Paulus on, “Marmalas ni uhur ma nasiam tongtong ibagas Tuhan in.”—Pil. 4:4.
Gabe iurupi do ham mangambukkon pingkiran na lang dear anggo ra patuduhkon tarima kasih. Tontu lang boi ham patuduhkon ai sanggah sunsah pangahapmu, simburu, atap pe sanggah manggila. Halak sipartarima kasih pe lang holongan bani duit. Ihargai ia do aha pe na dong bani. Janah lang ra ia mangindahi na lang ihaporluhonni.—Pil. 4:12.
PINGKIRHON MA PASU-PASU NA DOB IJALO HAM
Sihol do Sibolis ase ham lungunan janah galek halani hasunsahan bani ari parpudi on. Marosuh do ia ase ham marparlahou na bajan janah marungut-ungut. Anggo sonai ham, gabe lang ra be halak manjalo barita na ipadas ham. Sasintongni anggo martarima kasih ham, gabe boi do ipatuduh ham buah ni tonduy. Umpamani, halani mangkargai sibere-bere ni Naibata gabe marmalas ni uhur ma ham, anjaha lambin porsaya ma ham bani ganup janji-Ni.—Gal. 5:22, 23.
Halani Saksi Jahowa ham, tontu setuju do ham bani hatorangan na iulas i artikel on. Tapi, ra do iahap ham lang tongtong urah patuduhkon tarima kasih ampa mamingkirhon na madear. Hassi pe sonai, ulang ma maretek ni uhur. Boi do ham gabe halak na tongtong martarima kasih. Sonaha carani? Pasirsir ma panorang laho manrimangi aha na maharga na dapotmu. On boi mangojur ham ase martarima kasih. Gabe martuahan do holi pangahapmu marimbangkon halak na pitah mamingkiri hasunsahanni. Anggo sai ipingkirhon ham sibere-bere ni Naibata ampa pangurupion ni hasoman hu bamu, gabe marmalas ni uhur anjaha tarojur ma ham. Ra, boi do ibahen ham catatan pasal ai. Bani ganup ari tulis ma dua atap tolu na madear, na boi mangojur ham laho mangkatahon tarima kasih.
Piga-piga peneliti mangkatahon, “Anggo somal hita martarima kasih, dong do pengaruhni ai bani cara kerja ni otak. Lambin urah ma hita mamingkirhon na dear ibagas goluhta.” Martuahan do halak sipartarima kasih. Halani ai pingkirhon ma pasu-pasu na dob ijalo ham. Hamalaskon ma ganup na madear na masa ibagas goluhmu. Anjaha tongtong ma mangkatahon tarima kasih. Ulang pitah manjalo, tapi ‘puji ma Jahowa, ai layak do Ia’. Anjaha, ‘martarima kasih ma pasal haganup’.—1 Kron. 16:34; 1 Tes. 5:18.