1-2. Aha do na boi iparlajari hita humbani pangalaman ni si Angelito?

SAKSI JAHOWA do namatorasmu? Dingat ma hassi pe namatorasmu Saksi Jahowa, lape tontu nasiam boi gabe hasoman ni Jahowa halani sidea marhasoman pakon-Si. Lang soal namatorasta Saksi atap lang, maningon hita sandiri do na paorotkon parhasomananta pakon-Si.

² Pardiateihon ma pangalaman ni si Angelito. Saksi Jahowa do ganup kaluargani. Hassi pe sonai sanggah poso ope ia, pangahapni lang orot ia pakon Naibata. Ia mangkatahon, “Husombah pe Jahowa halani sonai do na hudidah ihorjahon kaluargangku.” Tapi ibere ia ma panorang laho mambasa Bibel ampa manrimangi isini. Janah gati do homa ia martonggo hubani Jahowa. Sonaha hasilni? Si Angelito mangkatahon, “Gabe hubotoh ma ase lambin orot ahu pakon Jahowa maningon marusaha do ahu mananda Ia.” Humbani pangalaman ni si Angelito, gabe dong ma sungkun-sungkun: Aha do bedani mambotoh pakon mananda Jahowa? Janah sonaha hita boi lambin mananda Jahowa?

3. Aha do bedani mambotoh pakon mananda Jahowa?

³ Ra do nini uhurta domma itanda hita Jahowa halani domma mambotoh goran-Ni, aha na ihatahon ampa na ihorjahon-Si. Tapi sedo ai artini mananda Jahowa. Porlu do homa ibotoh hita sonaha paruhuran-Ni. Halani ai, maningon ipasirsir  hita ma panorang laho marlajar pasal Jahowa. Dob ai, gabe iarusi hita ma aha na ihatahon ampa na ihorjahon-Si. On ma na mangurupi hita laho mambotoh ai iharosuhkon Jahowa do atap lang aha na ipingkirhon ampa na ihorjahon hita. Anggo domma iarusi hita harosuh ni uhur-Ni, maningon marusaha ma homa hita mandalankon ai.

4. Sonaha siusihan na isurat bani Bibel boi mangurupi hita?

⁴ Ra, gabe irisai halak ma hita halani sihol mangidangi Jahowa. Ra do manggila sidea halani dihut hita martumpu pakon Saksi Jahowa. Tapi anggo porsaya hita bani Jahowa, lang ongga tadingkonon-Ni hita. Gabe lambin toguh ma parhasomananta pakon-Si janah martahan do ai ronsi sadokahni. Ai boi do itanda hita Jahowa? Boi. Umpamani, si Musa pakon si Daud domma mambuktihon anggo sidea boi marhasoman pakon Naibata. Sanggah iulas hita siusihan na ibahen sidea, gabe ibotoh hita ma sonaha sidea mananda Jahowa janah aha ma parlajaranni hubanta.

5. Aha do na ipilih si Musa?

⁵ Si Musa mamilih mangidangi Naibata. Sanggah marumur 40 tahun, ipilih si Musa do rap pakon halak Israel marimbangkon itanda gabe “anak ni boru ni Parao”. (Heb. 11:24) Itadingkon ia do jabatanni. Ibotoh si Musa do gabe manggila ma holi Parao halani iurupi ia halak Israel. Raja na markuasa do Parao janah songon Naibata do ia iahap halak Masir. Hassi pe sonai lang mabiar si Musa. Tangkas ma toguh do haporsayaonni. Porsaya do ia bani Jahowa. On ma na mambahen orot parhasomananni pakon Jahowa sadokah goluhni.​—Pod. 3:5.

6. Aha ma na boi iparlajari hita humbani si Musa?

⁶ Aha ma na boi iparlajari hita? Songon si Musa ganup hita maningon mamutuskon: Ai ra do hita mangidangi Naibata rap pakon juakjuak-Ni? Ra do gabe bahat halak na marsogam ni uhur hubanta halani ai. Tapi anggo porsaya hita bani Bapa Jahowa, sai urupan-Ni do hita.

7-8. Aha do na tongtong iparlajari si Musa?

⁷ Totap do iparlajari si Musa pasal paruhuran ni Jahowa janah ihorjahon do harosuh-Ni. Umpamani, sanggah isuruh Jahowa si Musa mambobahon halak Israel luar hun Masir, marulak-ulak do ihatahon ia hubani Jahowa lang tarhorjahonsi ai. Tapi humbani balos ni Jahowa, taridah ma Naibata na paridop ni uhur do Ia. Iarusi do pangahap ni si Musa janah ra do Ia mangurupisi. (2 Mus. 4:10-16) Hasilni, gabe barani ma si Musa padaskon uhuman ni Jahowa dompak Parao. Dob ai, ididah si Musa ma sonaha Jahowa manggunahon kuasa-Ni laho paluahkon halak Israel janah manripaskon Parao pakon tentarani i Laut Sigerger.​—2 Mus. 14:26-31; Ps. 136:15.

⁸ Tapi dob luar hun Masir, gati do halak Israel marungut-ungut dompak si Musa. Hassi pe sonai ididah si Musa do sonaha hasabaron ni Jahowa dompak halak Israel na dob ipaluah hun parjabolonan. (Ps. 78:40-43) Ididah si Musa do homa sonaha toruh ni uhur Jahowa sanggah lang saud iripaskon halak Israel dob mangelek si Musa hu Bani.​—2 Mus. 32:9-14.

9. Domu bani Heber 11:27, sonaha do dohorni parhasomanan ni si Musa pakon Jahowa?

⁹ Dobkonsi ai, lambin orot do parhasomanan ni si Musa pakon Jahowa janah songon na ididah ia do Naibata. (Basa Heber 11:27.) Bani Bibel ihatahon, “Marsahap ma Jahowa pakon si Musa dumpar bohi  songon sada halak na marsahap hubani hasomanni.” (2 Mus. 33:11) Hunjon taridah ma orot tumang do parhasomanan ni sidea.

10. Aha ma na maningon bahenonta laho mananda Jahowa?

¹⁰ Aha ma parlajaranni? Ase lambin itanda hita Jahowa, lang sungkup pitah ibotoh hita paruhuran-Ni. Tapi porlu do homa ihorjahon hita harosuh ni uhur-Ni. Jahowa marosuh ase “haganup jolma maluah anjaha das mananda hasintongan”. (1 Tim. 2:3, 4) Hita boi mangkorjahon harosuh-Ni ai marhitei mangajari halak pasal-Si.

11. Mase hita boi mananda Naibata sanggah mangurupi halak marlajar pasal-Si?

¹¹ Sanggah hita mangurupi halak ase lambin mananda Jahowa, gati do iahapkon hita lambin orot parhasomananta pakon-Si. Umpamani, ididah hita ma idop ni uhur-Ni halani itogu-togu do hita ase boi jumpah pakon halak na sihol marhasoman pakon-Si. (Joh. 6:44) Ibotoh hita ma margogoh do Hata ni Naibata sanggah ididah hita halak na iurupi hita marlajar Bibel, ra manadingkon parlahouni na sambor janah patuduhkon parlahou na madear. (Kol. 3:9, 10) Anjaha ididah hita ma homa hasabaron ni Naibata halani ibere do panorang bani buei halak ase marlajar pasal-Si janah mandapot haluahon.​—Rom 10:13-15.

12. Domu bani 2 Musa 33:13, aha do na ipindo si Musa bani Jahowa, janah mase?

¹² Ihargai si Musa do parhasomananni pakon Jahowa. Igunahon Jahowa do si Musa mambahen buei tanda halongangan. Tontu lambin itanda si Musa ma Jahowa. (Basa 2 Musa 33:13.) Tapi totap do ipindo ia Jahowa ase iurupi ia mananda-Si. Sanggah ai domma marumur 80-an si Musa. Hassi pe sonai ibotoh ia porlu tumang do ia tongtong marlajar pasal Jahowa.

13. Sonaha hita mangkargai parhasomananta pakon Naibata?

¹³ Aha ma parlajaranni? Lang soal sadiha dokah hita mangidangi Jahowa, maningon tongtong ma ihargai hita parhasomananta pakon-Si. Sada cara hita boi patuduhkon ai, ai ma marhitei tonggo.

14. Mase tonggo boi mangurupi hita lambin mananda Naibata?

¹⁴ Anggo sihol nasiam lambin orot pakon sasada halak, maningon gati ma ham marsahap pakon-Si. Jadi ase boi orot pakon Naibata, maningon gati ma nasiam martonggo janah ulang mabiar patugahkon hu Bani sonaha pangahapmu. (Ep. 6:18) Si Krista na tading i Turki mangkatahon, “Lambin huhaholongi do Jahowa. Lambin porsaya do ahu hu Bani sanggah hupatugah ganupan na ibagas pingkiranku. Dob ai hubotoh ma sonaha Ia mangurupi ahu. Lambin orot do ahu bani Jahowa dob huahapkon sonaha Ia mambalosi tonggongku. Songon Bapa ampa Hasoman do Ia bangku.”

15. Bani Jahowa, halak na sonaha do Raja Daud ai?

¹⁵ Sanggah tubuh Raja Daud, ganup halak i nagorini tarmasuk namatorasni manombah Jahowa. Tapi sedo halani ai ase isombah si Daud Jahowa. Marusaha do ia laho patoguhkon parhasomananni pakon Jahowa. Halani ai, gabe holong tumang ma uhur ni Jahowa hu bani. “Harosuh ni uhur-[Ni]” do si Daud ai. (Lah. 13:22) Jadi sonaha si Daud boi marhasoman orot pakon Jahowa?

16. Aha ma na ibotoh si Daud pasal Jahowa sanggah ia mangidah tompaon?

¹⁶ Si Daud marlajar humbani tompaon ni Jahowa. Sanggah poso ope si Daud, bahatan do panorangni i halimisan laho marmahan biribiri ni bapani. Ra, sanggah marmahan ai ma  irimangi ia tompaon ni Jahowa. Umpamani, bani bornginni ari, sanggah mangkawah ia dompak langit ididah ia ma marribu bintang. Tapi lang pitah bintang ai na iparuhurhonsi. Ipingkirhon ia do homa ise na manompa ganupan in janah sonaha paruhuran-Ni. Gabe tarojur ma ia manuratkon on, “Haganup do langit mambaritahon hamuliaon ni Naibata, anjaha hajangkajang mangambilankon pambahenan ni tangan-Ni.” (Ps. 19:2, 3) Sanggah irimangi ia sonaha parjadini manisia, gabe ibotoh ia ma pentar tumang do Jahowa ai. (Ps. 139:14) Sanggah irimangi si Daud ganupan ai, ibotoh ia ma etek tumang do dirini marimbangkon Jahowa.​—Ps. 139:6.

17. Aha ma gunani anggo irimangi hita tompaon ni Jahowa?

¹⁷ Aha ma parlajaranni? Pasirsir ma panorang laho mampardiateihon sonaha jengesni tompaon ni Jahowa, anjaha rimangi ma ai. Pardiateihon ma tompaon na ididah nasiam bai ganup ari, songon poyon-poyon, binatang, ampa marmasam halak ase lambin itanda nasiam Jahowa. Dob ai, gabe lambin bahat ma na iparlajari nasiam pasal-Si, Bapa na parholong in. (Rom 1:20) Hasilni, lambin ihaholongi nasiam ma Ia.

18. Songon na ipatuduh bani Psalmen 18, aha ma na ibotoh si Daud?

¹⁸ Si Daud mambotoh anggo Jahowa mangurupisi. Umpamani sanggah si Daud manlinggomi biribiri ni bapani humbani singa ampa gipul, ibotoh si Daud Jahowa do na mangurupisi mamunuh binatang-binatang ai. Sanggah ia manlawan sada puanglima na margoran si Goliat, tangkas do ibotoh si Daud anggo Jahowa tongtong mangurupisi. (1 Sam. 17:37) Anjaha sanggah lintun ia humbani Raja Saul, ibotoh si Daud Jahowa do na paluahkonsi. Anggo halak na gijang maruhur do ia, ra do nini uhurni ganupan ai tarjadi halani dirini sandiri. (Psalmen 18) Tapi halani halak na toruh maruhur si Daud, ibotoh ia ma Jahowa do na mangurupisi sadokah goluhni.​—Ps. 138:6.

19. Aha do na boi iparlajari hita humbani pangalaman ni si Daud?

¹⁹ Aha ma parlajaranni? Ulang ma hita pitah mangindo ase Jahowa mangurupi hita. Tapi pardiateihon ma nantigan janah sonaha Ia domma mangurupi hita. Anggo toruh maruhur hita, ibotoh hita do holi hahuranganta janah porlu do hita iurupi Jahowa laho mangkorjahon aha na lang tarhorjahon hita. Anjaha anggo ididah hita sonaha Jahowa mangurupi, lambin toguh ma parhasomananta pakon-Si. Sonai ma na iahapkon Sanina Isaac hun Fiji na domma martahun-tahun mangidangi Jahowa. Ia mangkatahon, “Anggo hurimangi na tarjadi ibagas goluhku, huahapkon do sonaha Jahowa mangurupi ahu sanggah ahu mulai marlajar Bibel ronsi sonari. Dohor tumang do Jahowa bangku.”

20. Aha ma na iparlajari hita humbani parhasomanan ni si Daud pakon Naibata?

²⁰ Si Daud maniru paruhuran ni Jahowa. Sanggah Jahowa manompa hita, ibahen do ase hita boi maniru paruhuran-Ni. (1 Mus. 1:26) Lambin bahat na iparlajari hita pasal paruhuran-Ni, lambin urah ma hita maniru Ia. Halani domma itanda si Daud Jahowa, gabe boi ma ia maniru Jahowa sanggah marurusan pakon na legan. Pardiateihon ma sada contoh. Sanggah si Daud marbangkis pakon si Batseba anjaha mambahen ase tarbunuh suamini, mardousa do si Daud dompak Jahowa. (2 Sam. 11:1-4, 15) Hassi pe sonai, ipatuduh Jahowa do idop ni uhur hu bani halani sonai do homa si Daud bani na legan. Halani orot parhasomanan ni si Daud pakon Jahowa,  holong tumang ma halak Israel hu bani. Anjaha igunahon Jahowa ma si Daud gabe sitiruon bani raja-raja na legan.​—1 Raj. 15:11; 2 Raj. 14:1-3.

21. Domu bani Epesus 4:24 pakon 5:1, aha ma hasilni anggo hita gabe “sitiru Naibata”?

²¹ Aha ma parlajaranni? Maningon gabe “sitiru Naibata” ma homa hita. Anggo itiru hita Ia, bahat do gunani ai hubanta janah gabe lambin itanda hita ma Ia. Sanggah hita maniru Naibata, taridah ma anggo hita anak-anak-Ni.​—Basa Epesus 4:24; 5:1.

22-23. Aha ma hasilni anggo hita mandalankon aha na iparlajari hita pasal Jahowa?

²² Songon na dob iulas, hita boi mananda Naibata marhitei tompaon-Ni ampa Bibel. Bani Bibel, bahat do contoh-contoh na boi itiru hita umpamani si Musa pakon si Daud. Jadi domma ipatuduh Jahowa carani ase hita boi mananda Ia. Halani ai, tongtong ma hita marusaha ase boi lambin bahat marlajar pasal-Si.

²³ Torus do hita marlajar pasal Jahowa. (Par. 3:11) Hassi pe sonai na sipontingan sedo sadiha bahat na iparlajari hita pasal-Si, tapi aha do na laho bahenonta dob mananda Ia. Anggo idalankon hita aha na dob iparlajari, janah marusaha hita maniru Bapanta na parholong in, gabe lambin dohor ma Ia hubanta. (Jak. 4:8) Marhitei Bibel marjanji do Jahowa seng ongga tadingkonon-Ni halak na mananda-Si.