Ai domma ibasa nasiam majallah Ambilan na Madear bani tahun on? Anggo sonai, balosi ma sungkun-sungkun na i toruh on:

Bani Jakobus 5:11 ihatahon ‘paridop ni uhur banggal do Jahowa’. Aha do artini ai hubanta?

Halani idop ni uhur ni Jahowa, ra do Ia manasap dousanta. Humbani Jakobus 5:11 ibotoh hita do homa sirsir do Jahowa mangurupi hita sanggah hita ibagas hasunsahan. Halani ai sihol do hita maniru Ia.​—w21.01, alaman 20-21.

Mase itotapkon Jahowa dong na gabe kopala?

Halani holong ni Jahowa do ase itotapkon Ia dong na gabe kopala. Anggo adong kopala, gabe adong ma hadameion halani ganupan mardalan dear anjaha taratur. Janah ibotoh ganup anggota kaluarga homa ise do holi na mambahen haputusan, anjaha ise na martanggung jawab laho mandalankon ai.​—w21.02, alaman 3.

Mase halak Kristen maningon jaga sanggah manggunahon pesan elektronik atap media sosial?

Halani anggo hita dihut bani grup media sosial na bahat anggotani, susah do hita mamilih hasoman na dear. (1 Tim. 5:13) Dong homa na mambagihon i grup sisonai barita na lape tontu sintong isini. Anjaha dong homa na marjualan atap manawarhon bisnis bani grup media sosial na ganup anggotani Saksi Jahowa.​—w21.03, alaman 31.

Mase ipaturut Jahowa marsitaronon Jesus janah matei?

Parlobei, maningon igantung do Jesus bani sada hayu ase boi halak Jahudi ipaluah humbani papa atap kutukan. (Gal. 3:10, 13) Na paduahon, ipaturut Naibata do Anak-Ni marsitaronon laho manlatih ia ase boi mandalankon tugasni gabe Sintua ni Malim. Anjaha na patoluhon, halani setia Jesus ronsi matei, on patuduhkon boi do jolma totap setia age pe bahat sitarononni. (Job 1:9-11)​—w21.04, alaman 16-17.

Sanggah hita marbarita i daerah na jarang halakni i rumah, aha do na boi ibahen hita?

Marusaha ma manjumpahi halak bani panorang na legan sanggah sidea i rumah. Marusaha ma marbarita i ianan na legan. Boi do homa hita manggunahon marmasam cara laho marbarita, umpamani manulis surat.​—w21.05, alaman 15-16.

Aha do maksud ni si Paulus sanggah ia mangkatahon, “Domma matei ahu bani titah in marhitei titah in”? (Gal. 2:19)

Marhitei Titah ni si Musa, taridah ma ganup do jolma mardousa. Anjaha marhitei Titah ai, iurupi do halak Israel mambotoh ise do Kristus na ijanjihon ai. (Gal. 3:19, 24) Halani domma porsaya si Paulus bani Kristus, ai ma na mambahen ase ia mangkatahon ‘matei do ahu bani titah’. Artini lang maningon idalankon ia be Titah ni si Musa.​—w21.06, alaman 31.

Sonaha do Jahowa patuduhkon hasabaron?

Sabar do Jahowa age pe ihina goran-Ni, bahat na manlawan pamarentahan-Ni, malekat pakon jolma manlawan dompak-Si, ifitnah Sibolis Ia ampa juakjuak-Ni, marsitaronon juakjuak-Ni, bahat juakjuak-Ni na marujung goluh, marsitaronon jolma halani hajahaton, bahat na mangkorjahon na butak, ampa iparseda jolma tompaon-Ni i tanoh on.​—w21.07, alaman 9-12.

Sonaha si Josep patuduhkon hasabaron?

Totap do sabar si Josep bani abangni, hassi pe halani pambahenan ni sidea, gabe marsitaronon anjaha ipenjarahon ia sadokah martahun-tahun i Masir.​—w21.08, alaman 12.

Aha do artini bangsa-bangsa idugur songon na isurat bani Haggai 2:6-9, 20-22?

Sanggah hita mambaritahon pasal Harajaon ni Naibata, dong do na manjalo barita ai. Tapi bahat do homa na manulak. Anggo lalab sidea lang ra manjalo pamarentahan ni Naibata, lang piga dokah nari ripaskonon-Ni ma sidea.​—w21.09, alaman 15-19.

Mase hita lang marnaloja ibagas pangidangion?

Malas tumang do uhur ni Jahowa mangidah haringgasonta. Anggo lang marnaloja hita mangidangi, gabe dapot hita ma hagoluhan na sadokah ni dokahni.​—w21.10, alaman 25-26.

Sonaha 3 Musa bindu 19 mangurupi hita mandalankon podah on: “Sonai ma homa nasiam pansing ibagas haganup parlahou nasiam”? (1 Ptr. 1:15)

Ayat ai ra do ikutip humbani 3 Musa 19:2. Bani bindu 19, dong ipatugah piga-piga contoh sonaha hita boi mandalankon podah na isurat bani 1 Petrus 1:15 ibagas goluhta siganup ari.​—w21.12, alaman 3-4.