1. Aha do podah ni si Petrus bani halak Kristen, anjaha mase songon na lang mungkin iahap hita mandalankon ai?

GANUPAN hita age na marpangarapan hu surga atap i tanoh on, boi marlajar humbani hata ni apostel Petrus na isurat bani halak Kristen bani abad na parlobei. Nini si Petrus do sonon, “Songon Sipandilo nasiam pansing, sonai ma homa nasiam pansing ibagas haganup parlahou nasiam. Ai tarsurat do, ‘Pansing ma nasiam, ai na pansing do Ahu!’” (1 Ptr. 1:15, 16) Jadi, maningon itiru hita do Jahowa halani Ia do Na Tang Sipansingan. Maningon pansing do homa hita ibagas ganup parlahounta. Tapi ai boi do hita pansing hape jolma na pardousa do hita? Dingat ma pangalaman ni si Petrus. Ongga do namin ia mambahen na lepak. Tapi humbani pangalamanni ibotoh hita ma anggo hita boi do homa gabe “pansing”.

2. Sungkun-sungkun aha do na laho iulas hita bani artikel on?

² Bani artikel on, iulas hita ma sungkun-sungkun on: Aha do artini pansing? Aha do na iajarhon Bibel pasal Jahowa Naibata na pansing? Sonaha hita boi pansing ibagas ganup parlahounta? Anjaha sonaha hita boi totap pansing janah orot homa parhasomananta pakon Jahowa?

3. Aha do pandapot ni buei halak pasal halak na pansing, tapi hunja do dapotta hatorangan na sintong pasal ai?

³ Bahat do halak na mangkatahon anggo halak na pansing ai, ai ma songon pemimpin ugama. Marbaju na khusus do sidea anjaha bohini serius torus idahon. Tapi lang sonai artini pansing ai. Hassi pe Jahowa pansing, ihatahon do homa Ia “Naibata na martuah”. (1 Tim. 1:11) Halani ai, halak na manombah-Si pe tontu “martuah” do homa. (Ps. 144:15) Ongga do homa ipasingat Jesus halak na sangaja mamakei baju khusus  laho pajuntul-juntulhon dirini. (Mat. 6:1; Mrk. 12:38) Sasintongni ibotoh hita do artini pansing ai halani domma iparlajari hita humbani Bibel. Ibotoh hita do anggo Naibata lang ongga mangindo aha na lang boi tarhorjahon hita. Jadi sanggah iparentahkon Naibata hubanta, “pansing ma nasiam”, artini boi do ihorjahon hita parentah ai. Tapi ase boi ihorjahon hita ai, maningon iarusi hita ma lobei aha do artini na pansing.

4. Aha do artini “pansing”?

⁴ Aha do artini pansing ai? Bani Bibel hata “pansing” ai boi do artini dear marparlahou atap borsih i lobei ni Naibata. Anjaha boi do homa artini dong sada kalompok halak na ipapulig laho manombah Naibata. Jadi hita boi ihatahon pansing anggo iihutkon hita cara na sintong laho manombah Naibata, borsih parlahounta, anjaha orot parhasomananta pakon-Si. Tontu megah tumang do uhurta halani age pe Jahowa ai na Tang Sipansingan tapi ra do Ia marhasoman pakon hita.

5. Aha do na boi iparlajari hita pasal Jahowa humbani malekat-Ni?

⁵ Naibata na pansing do Jahowa sonai homa ganup pambahenan-Ni. On boi homa ibotoh hita humbani aha na ihatahon serapim, ai ma malekat na dohor hun tahta ni Jahowa. Marsurak do sidea mangkatahon sonon, “Na pansing, na pansing, na pansing do Jahowa Zebaot.” (Jes. 6:3) Tontu malekat na pansing do sidea ai halani boi sidea dohorhon tahta ni Jahowa. Anjaha anggo roh malekat ai hu sada ianan i tanoh on, gabe ianan na pansing do homa ai. Umpamani, songon si Musa sanggah ididah ia dong apuy na gajag ibagas naporon, gabe pansing ma ianan ai.​—2 Mus. 3:2-5; Jos. 5:15.

6-7. (a) Domu bani 2 Musa 15:1, 11, sonaha si Musa patuduhkon anggo Jahowa ai Naibata na pansing? (b) Sonaha ganup halak Israel boi mambotoh anggo Jahowa ai Naibata na pansing? (Tonggor ma gambar sampul.)

⁶ Dobkonsi halak Israel mandipari Laut Sigerger, ihatahon si Musa ma bani sidea Naibata na pansing do Jahowa ai. (Basa 2 Musa 15:1, 11.) Anggo bangsa i Masir butak do parlahouni sonai homa bangsa i Kanaan. Manombah gana-gana do sidea. Igalangkon sidea do homa anakni gabe galangan situtungon anjaha ihorjahon sidea seks na so patut. (3 Mus. 18:3, 4, 21-24; 5 Mus. 18:9, 10) Tapi anggo Jahowa lang ongga ipindo ia bangsa Israel mangkorjahon na butak atap na jahat. Hunjai taridah ma pansing do Jahowa ai. Ase boi tongtong idingat halak Israel pasal ai, ibahen ma bani gotong ni sintua ni malim sada tutup pardompakan janah iuhir ma ijai sonon, “Pinapansing bani Jahowa.”​—2 Mus. 28:36-38.

⁷ Jadi ise pe halak Israel na mangidah tutup pardompakan ai, gabe idingat sidea ma Naibata na pansing do Jahowa. Tapi sonaha anggo Israel na daoh iananni humbani sintua ni malim? Totap do boi idingat sidea Naibata na pansing do Jahowa. Mase? Halani dong holi panorangni maningon ipatumpu do ganup dalahi, naboru, pakon dakdanak janah ibasahon ma bani sidea ganup Titah ni Naibata. (5 Mus. 31:9-12) Porini dihut ham bani partumpuan ai itangar ham ma ihatahon sonon, “Ahu do Jahowa Naibatanima . . . maningon pansing do hanima, ai na pansing do Ahu.” “Maningon pansing do hanima, ai pansing do Ahu, Jahowa.”​—3 Mus. 11:44, 45; 20:7, 26.

8. Aha do na boi iparlajari hita humbani 3 Musa 19:2 pakon 1 Petrus 1:14-16?

⁸ Sonari pardiateihon hita ma na isurat bani 3 Musa 19:2. Ijai nini Jahowa do bani si Musa sonon, “Hatahon ma hubani ganup  tumpuan ni halak Israel, ‘Maningon pansing do hanima, ai pansing do Ahu, Jahowa, Naibatanima.’” Ra do humbani ayat ai homa ihatahon si Petrus bani halak Kristen ijia, ‘Pansing ma nasiam.’ (Basa 1 Petrus 1:14-16.) Tongon sonari on hita lang be mandalankon Titah ni si Musa. Tapi humbani surat ni si Petrus ai, dapot hita ma bahat parlajaran humbani 3 Musa 19:2. Halani Naibata na pansing do Jahowa, ganup halak na mangkaholongi-Si maningon pansing homa lang soal sidea marpangarapan hu surga atap i tanoh on.​—1 Ptr. 1:4; 2 Ptr. 3:13.

9. Parlajaran aha do na boi dapot hita humbani 3 Musa bindu 19?

⁹ Halani hita sihol mambahen malas uhur ni Jahowa, tontu marusaha do hita ase boi pansing i lobei-Ni. Domma ipatugah Naibata hubanta sonaha carani hita boi gabe pansing. On boi ibotoh hita humbani buku 3 Musa bindu 19. Sada pakar bahasa Ibrani na margoran si Marcus Kalisch mangkatahon, “Humbani buku 1 ronsi 5 Musa, buku 3 Musa bindu 19 on ma buku na sipontingan ampa na paling lengkap.” Bani hata pambuka i buku 3 Musa 19 ai dong ihatahon, “Maningon pansing ma nasiam.” Jadi ulas hita ma piga-piga ayat humbani bindu ai ase ibotoh hita sonaha carani hita boi pansing ibagas goluhta siganup ari.

10-11. Domu bani 3 Musa 19:3, aha do na porlu ibahen hita, anjaha mase maningon ibahen hita sonai?

¹⁰ Dobkonsi ihatahon Jahowa maningon pansing halak Israel, nini ma use sonon, ‘Maningon pasangaponnima do inang ampa bapanima, ai Ahu do Jahowa, Naibatanima.’​—3 Mus. 19:2, 3.

¹¹ Tangkas ma maningon ipasangap hita do namatorasta. Bani sada ari, isungkun sada dalahi ma hubani Jesus, “Aha do na madear sihorjahononku, ase dapot ahu hagoluhan sisadokah ni dokahni?” Humbani balos ni Jesus, ibotoh hita ma dong ihatahon ia maningon pasangaponni do bapa ampa inangni. (Mat. 19:16-19) Ongga do ipinsang Jesus halak Parisei halani lang ipasangap sidea namatorasni. Halani pambahenan ni sidea ai, gabe ‘isedai sidea do titah ni Naibata’. (Mat. 15:3-6) “Titah ni Naibata” tarmasuk ma ai Sapuluh Titah  ampa na isurat bani buku 3 Musa 19:3. (2 Mus. 20:12) Jadi dingat hita ma dobkonsi ihatahon Naibata “maningon pansing do hanima, ai pansing do Ahu, Jahowa Naibatanima”, iparentahkon Ia do use maningon ipasangap halak Israel do bapa ampa inangni.

12. Sonaha carani hita mandalankon parentah na isurat bani 3 Musa 19:3, janah sungkun-sungkun aha ma na porlu irimangi hita?

¹² Anggo irimangi hita parentah ni Jahowa pasal pasangapkon namatoras, boi ma isungkun hita dirinta sandiri, ‘Ai domma hupasangap namatorasku?’ Anggo hurang ope pangahapmu, ulang ham maretek ni uhur. Tapi sonari boi ma ibere ham panorangmu laho mangurupi sidea. Umpamani, boi do ibere ham na porlu bani sidea atap mangurupi sidea ase lambin dohor bani Jahowa. Boi do homa ibere ham panorangmu laho patoguhkon uhur ni sidea ampa mangkasomani sidea. Anggo domma ibahen ham sonai, on artini domma idalankon ham na ihatahon bani 3 Musa 19:3.

13. (a) Aha do parentah na legan na idapot hita humbani 3 Musa 19:3? (b) Domu bani Lukas 4:16-18, sonaha hita boi maniru Jesus?

¹³ Humbani 3 Musa 19:3, dong do homa parlajaran na legan ase hita totap pansing marhitei mandalankon Sabat. Tongon halak Kristen lang be mandalankon ari Sabat. Tapi dong do parlajaran humbani ari Sabat. Hita boi marlajar humbani na ibahen halak Israel bani ari Sabat. Bani ari ai, lang dong sidea na marhorja, tapi ibere sidea do panorangni laho manombah Jahowa. * Halani ai ma ase laho Jesus bani ari Sabat hu sinagoga laho mambasa Hata ni Naibata. (2 Mus. 31:12-15; basa Lukas 4:16-18.) Jadi humbani parentah ni Jahowa na isurat bani 3 Musa 19:3 na mangkatahon “ramotkononnima do ari Sabat-Ku”, iojur do hita ase mambere panorangta laho manombah Jahowa bai ganup ari. Sonaha hita boi mandalankon parentah ai? Anggo totap hita mambere panorang laho manombah Naibata, on boi mambahen hita lambin orot pakon Naibata anjaha lambin pansing ma hita.

14. Hatorangan na ponting aha do na ipatugah bani 3 Musa bindu 19?

¹⁴ Bani buku 3 Musa bindu 19, dong marulak-ulak ihatahon hatorangan na ponting na mangurupi hita ase boi gabe pansing. Umpamani, bani hata panutup i ayat 4 isurat do sonon, “Ahu do Jahowa, Naibatanima.” Dong hira-hira 16 hali hata ai isuratkon bani bindu ai janah sosok do ai songon na ihatahon bani Titah na parlobei, “Ahu do Jahowa Naibatamu . . . Lang malo ho marnaibata na legan i lobei ni bohing-Ku.” (2 Mus. 20:2, 3) Jadi ase hita boi gabe pansing, maningon Jahowa do na sipontingan ibagas goluhta, lang boi adong na legan. Anjaha halani hita igoran Saksi-Saksi Jahowa, maningon ijaga hita do parlahounta ase ulang mambahen butak goran ni Naibata na pansing ai.​—3 Mus. 19:12; Jes. 57:15.

15. Parlajaran aha do na idapot hita humbani pangaturan ni Naibata pasal galangan binatang na isurat bani 3 Musa bindu 19?

¹⁵ Anggo iakui halak Israel Jahowa do Naibata ni sidea, maningon idalankon sidea do ganup parentah ni Naibata. 3 Musa 18:4 mangkatahon, “Maningon horjahononnima do titah-Ku anjaha ramotkononnima paraturan-Ku anjaha marparlahou hanima ibagas ai, ai Ahu do Jahowa Naibatanima.” Bani bindu 19 dong isurat paraturan ni Naibata bani  halak Israel. Umpamani, bani ayat 5-8, 21, 22, isurat do ijai paraturan pasal galangan binatang na maningon ibere halak Israel. Paraturan ai ibahen ase ulang ‘ipabutak sidea na pinapansing ni Jahowa’. Anggo irimangi hita ganup ayat ai, gabe tarojur ma hita mambahen malas uhur ni Jahowa anjaha mambere galangan pujian songon na isurat bani Heber 13:15.

16. Prinsip aha ope na idapot hita humbani 3 Musa bindu 19?

¹⁶ Ase boi hita pansing, lang boi hita sarupa pakon halak na so sisombah Jahowa. Tontu lang urah mangkorjahon ai halani sipata dong hasoman i sikolah, i parhorjaan, atap pe kaluarganta na mangarahkon hita mangkorjahon na lang sosok pakon harosuh ni Naibata. Anggo sonai na masa, maningon ibahen hita do haputusan na dear. Aha ma na boi mangurupi hita mangkorjahon ai? Pardiateihon ma prinsip na dong bani 3 Musa 19:19. Ijai ihatahon, “Seng bulih pakeionmu pakean na pinauli humbani dua masam bonangni.” Marhitei titah ai, ibotoh halak Israel ma lang boi sarupa sidea pakon bangsa na legan. Tapi anggo sonari sedo artini lang boi hita mamakei baju humbani dua masam bahan na marbeda songon katun pakon linen. Tapi maksudni lang boi hita mangihutkon halak na lang sosok haporsayaon ampa parlahouni pakon isi ni Bibel, age pe sidea ai hasomanta i sikolah, i parhorjaan, atap pe kaluarganta. Tongon, holong do uhurta bani kaluarganta janah bujur hita bani tetangganta. Tapi na sipontingan maningon idalankon hita do parentah ni Naibata ibagas ganup haputusanta. Maningon sonai do ibahen hita ase boi hita pansing i lobei ni Naibata.​—2 Kor. 6:14-16; 1 Ptr. 4:3, 4.

17-18. Parlajaran aha do na idapot hita humbani 3 Musa 19:23-25?

¹⁷ Leganni ai, halani ihatahon Naibata “Ahu do Jahowa Naibatanima”, on artini maningon marusaha do halak Israel ase totap orot marhasoman pakon Naibata. Anjaha maningon ibahen sidea ma ai na sipontingan ibagas goluhni. Sonaha ma sidea boi patuduhkon ai? Sada carani boi ibotoh hita humbani 3 Musa 19:23-25. (Basa.) Parentah ai marlaku bani halak Israel dobkonsi masuk sidea hu Tanoh Parpadanan. Ijai ihatahon anggo dong halak Israel na manuan sada hayu, buahni ai lang boi ipangan sadokah tolu tahun. Dob ai, bani tahun na paompatkon, maningon ibere do buahni ai gabe galangan bani Jahowa. Bani tahun na palimahon ma baru pe sidea boi mangankon buahni ai. Hunjai gabe iarusi halak Israel ma maningon Jahowa do na sipontingan  ibagas goluh ni sidea, sedo harosuh ni sidea sandiri. Sihol do Jahowa ase porsaya sidea anggo tongtong ringgas sidea manombah-Si, sai bereon-Ni do ganup haporluan ni sidea. Anjaha isuruh Naibata buah ai ibere gabe galangan, on artini sihol do Jahowa ase rosuh sidea marsibere-bere.

¹⁸ Humbani na isurat bani 3 Musa 19:23-25, gabe idingat hita ma podah ni Jesus sanggah ia marambilan i dolog. Nini do sonon, “Ulang ma holsohan hanima pasal . . . sipanganon atap siinumon.” Dob ai, nini Jesus use, “Ibotoh Bapanima na i nagori atas ai do na porlu ai bennima.” Gari manuk-manuk pe ibere Jahowa do, tarlobih ma hita. (Mat. 6:25, 26, 32) Jadi porsaya ma hita sai bereon ni Jahowa do ganup haporluanta. Maningon rosuh do homa hita marsibere-bere bani halak na mamorluhon. Anjaha lang pala ipatugah-tugah hita pambahenanta ai bani na legan. Dob ai, ibere hita do homa sumbangan laho manutupi pangaluaran i kuria. Pos ma uhurta ipardiateihon Jahowa do ganup na ibahen hita ai anjaha pasu-pasuon-Ni ma hita. (Mat. 6:2-4) Anggo ibahen hita sonai, on artini domma idalankon hita aha na ihatahon bani 3 Musa 19:23-25.

19. Aha do na dob iparlajari hita humbani buku 3 Musa?

¹⁹ Domma iulas hita humbani buku 3 Musa bindu 19 sonaha hita boi gabe pansing. Maningon itiru hita do Naibata. Anggo ibahen hita sonai, on artini marusaha do hita ase ‘pansing ibagas haganup parlahounta’. (1 Ptr. 1:15) Bahat do halak na lang sisombah Jahowa na mangidah parlahounta na madear. Halani ai gabe ipasangap sidea do goran ni Jahowa. (1 Ptr. 2:12) Tapi dong ope na boi iparlajari hita humbani buku 3 Musa bindu 19. Bani artikel na mangihut, iulas hita ma ayat-ayat na legan bani bindu ai ase ibotoh hita aha ope na porlu bahenonta ase hita gabe “pansing” songon na ipodahkon si Petrus hubanta.