1. Mase isarupahon Jesus susianni songon biribiri?

OROT tumang do Jesus pakon susianni. Halani ai ma isarupahon Jesus sidea songon biribirini. (Joh. 10:14) Mase sonai? Halani anggo biribiri, itanda do sora ni parmahanni. Ongga do sada dalahi mangidah pasal ai. Ia mangkatahon, “Sanggah ai, sihol marfoto ma hanami pakon sahulanan biribiri. Idilo hanami ma biribiri ai ase dohor sidea. Tapi lang ra sidea halani lang itanda sidea soranami. Dob ai, roh ma sada dakdanak mandilo biribiri ai. Mintor roh ma sidea halani dakdanak ai do hape parmahanni.”

2-3. (a) Sonaha susian ni Jesus boi manangihon hatani? (b) Aha do na laho iulas hita bani artikel on pakon artikel na mangihut?

² Humbani pangalaman ni dalahi ai, gabe idingat hita ma hata ni Jesus pasal biribirini. Nini Jesus do sonon, “Tangihonon ni sidea do sorangku.” (Joh. 10:16) Tapi i surga do Jesus sonari. Halani ai, sonaha ma hita boi manangihon hatani? Sada carani, ai ma marhitei mandalankon podahni ibagas goluhta siganup ari.​—Mat. 7:24, 25.

³ Bani artikel on pakon artikel na mangihut, iulas hita ma piga-piga podah ni Jesus. Ihatahon Jesus do bani susianni dong na lang boi ibahen sidea anjaha dong homa na maningon ibahen sidea. Bani artikel na parlobei on, iulas hita ma dua podah ni Jesus na patugahkon aha na lang boi ibahen hita.

4. Domu bani Lukas 12:22, aha do na boi mambahen hita holsohan?

⁴ Basa Lukas 12:22. Ipodahi Jesus do susianni ase ‘ulang holsohan’ sidea pasal haporluan siganup ari. Pos do uhurta anggo podah ni Jesus ai sintong janah dear. Tapi sipata lang urah iahap hita mandalankon ai. Mase sonai?

5. Mase dong halak na holsohan pasal hagoluhanni siganup ari?

 ⁵ Dong do na holsohan pasal hagoluhanni siganup ari. Umpamani pasal sipanganon, pakeian, ampa rumah. Ra do i nagori ni sidea bahatan do halak na miskin janah susah homa manorihi horja. Ra do homa ibagas sada kaluarga, marujung goluh halak na somalni mansari duit laho mansarihon haporluan ni sidea. Leganni ai, halani pandemi COVID-19, bahat do halak na hona PHK. (Par. 9:11) Anggo masa sisonai bamu, sonaha nasiam boi mandalankon podah ni Jesus ase ulang lalab holsohan?

6. Aha do na masa bani apostel Petrus?

⁶ Bani sada panorang, marparau ma si Petrus pakon apostel na legan i Laut Galilea. Sanggah ai, doras ma logou janah itonggor sidea ma Jesus mardalan i atas bah. Nini si Petrus ma bani Jesus, “Tuhan, anggo ham do in, hatahon ham ma ahu roh bamu, mardalan i atas bah on.” Nini Jesus ma hu bani, “Roh ma.” Dob ai, turun ma si Petrus hun parau ai janah “mardalan i atas bah ai, laho manjumpahkon Jesus”. Tapi aha ma na masa dobkonsi ai? Halani “mangidah logou na doras ai, gabe mabiar ma ia, anjaha sanggah mulai ia mogap, mardilo ma ia, ‘Tuhan, paluah ahu’”. Mintor isurdukkon Jesus ma tanganni janah itangkap ma si Petrus. Mungkahni boi do si  Petrus mardalan i atas laut ai halani torus ia mangidah Jesus. Tapi dobkonsi itonggor ia logou na doras, gabe mabiar tumang ma ia anjaha gabe lonong ma ia halani ai.—Mat. 14:24-31.

7. Aha do na boi iparlajari hita humbani si Petrus?

⁷ Dong parlajaran na ponting na idapot hita humbani si Petrus. Mungkahni lang mabiar ia turun hun parau ai, anjaha halani torus itonggor ia Jesus, gabe boi ma ia mardalan i atas bah ai. Tapi sanggah logou na doras ai na itonggor ia, gabe mabiar ma ia janah lonong. Sonai do homa hita sonari on. Tongon, sonari hita lang mardalan i atas bah. Tapi maningon torus ma ipatoguh hita haporsayaonta sanggah dong sitaronon. Anggo galek haporsayaonta bani Jahowa pakon janji-Ni, gabe mabiar ma hita janah holsohan. Halani ai, sonaha pe bahatni sitarononta maningon totap ma toguh haporsayaonta bani Jahowa. Anjaha porsaya ma hita sai iurupi Ia do hita. Sonaha carani hita boi patoguhkon haporsayaonta?

8. Aha ma na boi mangurupi hita ase lang sai holsohan pasal haporluanta siganup ari?

⁸ Anggo totap hita porsaya bani Jahowa, ai ma na mangurupi hita ase lang lalab holsohan. Dingat hita ma janji ni Naibata na mangkatahon sai bereon-Ni do ganup haporluanta anggo ibahen hita Harajaon-Ni na sipontingan ibagas goluhta. (Mat. 6:32, 33) Anjaha sai tongtong do ipasaud Ia janji-Ni ai. (5 Mus. 8:4, 15, 16; Ps. 37:25) Gari manuk-manuk ampa bunga pe ipardiateihon Jahowa do. Halani ai, ulang ma hita holsohan pasal aha na laho ipangan hita atap aha na laho pakeionta. (Mat. 6:26-30; Pil. 4:6, 7) Songon namatoras, ipasirsir sidea do na porlu bani niombahni halani holong uhur ni sidea bani anakni ai. Tarlobih ma Bapanta Jahowa, holong tumang do uhur-Ni banta. Halani ai, pasti do ibere Ia ganup haporluanta. Pos ma uhurta sai tongtong do isarihon Ia hita.

9. Aha do na iparlajari hita humbani pangalaman ni sapasang suami istri?

⁹ Pardiateihon hita ma sada pangalaman na patuduhkon anggo Jahowa tongtong do ibere Ia haporluanta. Dong pasangan suami istri na mangidangi sepenuh waktu, laho hu tempat pengungsian mangalop sada botou laho martumpu. Dokahni pardalanan ai dong hira-hira lobih sajam. Nini sanina ai ma, “Dob salosei partumpuan, iarahkon hanami ma botou ai mangan. Tapi idingat hanami ma lang dong sipanganon i rumah. Hape dob das hanami i rumah, ididah hanami ma dong dua karanjang marisi sipanganon i lobei ni pintunami. Lang ibotoh hanami ise na mambahen ai ijai. Ibotoh Jahowa do hape na ihaporluhon hanami.” Lang piga dokah dobkonsi ai, maseda ma motor ni sidea halani domma tua homa. Hape porlu tumang do sidea kendaraan ase boi mangidangi. Jadi ibahen sidea ma ai i garasi. Dob ai, dong sada dalahi mangidah motor ai janah isungkun ia ma saninanta, “Motor ni ise do on?” Ihatahon sanina ai ma motorni do ai, tapi maseda ope. Nini dalahi ai ma use, “Lang pala mahua ai. Rosuh tumang istringku motor sisonon janah pas do homa warnani. Ai ijual ham do on?” Jadi ijual sanina ai ma motor ai janah boi ma iboli ia use motor na legan. Dob ai, nini sanina ai ma, “Lang tarhatahon hanami be malas ni uhurnami. Pasti Jahowa do na mambahen ganupan on.”

10. Sonaha Psalmen 37:5 boi patoguhkon uhurta ase ulang holsohan pasal haporluanta siganup ari?

¹⁰ Jadi dalankon hita ma hata ni Jesus na mangkatahon ase ulang holsohan hita pasal haporluanta siganup ari. Pos ma uhurta sai bereon ni Jahowa do ganup na porlu banta. (Basa Psalmen 37:5; 1 Ptr. 5:7) Anggo irimangi hita use situasi na iulas bani  paragrap  5, age bahat hasunsahan, tapi ronsi sonari sai iurupi Jahowa do kopala kaluarga mansarihon kaluargani. Porini pe holi lang dong horja ni sidea, atap hona PHK, pos ma uhurta boi do igunahon Naibata cara na legan laho mansarihon hita. Sonari ulas hita ma aha ope na ihatahon parmahanta na lang boi ihorjahon hita.

11. Domu bani Mateus 7:1, 2, aha do parentah ni Jesus hubanta, janah mase lang urah mandalankon parentah ai?

¹¹ Basa Mateus 7:1, 2. Ibotoh Jesus do jolma na lang sempurna do susianni janah urah-urah sidea manonggor hasalahan ni na legan. Halani ai ma ihatahon Jesus, “Ulang hanima manguhum-uhumi.” Tontu lang urah mandalankon parentah ai halani ganup hita lang sempurna. Halani ai, aha ma na boi mangurupi hita? Tangihon hita ma Jesus janah marusaha ma hita ase ulang manguhumi na legan.

12-13. Anggo irimangi hita sonaha pambahenan ni Jahowa bani si Daud, sonaha ai boi mangurupi hita ase ulang manguhumi na legan?

¹² Rimangi hita ma sitiruon na ibahen Jahowa. Sai na dear do na ididah Ia hun banta. Sonai ma na ibahen Jahowa bani Raja Daud. Sasintongni ongga do si Daud mambahen hasalahan na banggal. Umpamani, ibuat ia do istrini halak, ai ma si Batseba janah iatur ia homa ase ibunuh suami ni si Batseba. (2 Sam. 11:2-4, 14, 15, 24) Halani pambahenanni ai, lang pitah ia na marsitaronon, tapi dihut do homa istrini na legan. (2 Sam. 12:10, 11) Leganni ai, ongga do homa ilanggar si Daud parentah ni Jahowa. Sasintongni ilarang Jahowa do raja Israel mangetong jumlah ni tentarani. Tapi lang ibahen si Daud sonai. Ra do gijang uhurni halani bahat tumang tentarani janah ra do nini uhurni ai do na boi mambahen sidea monang. Halani ai iuhum Jahowa ma bangsa ai, gabe matei ma hira-hira 70.000 halak Israel halani sampar.​—2 Sam. 24:1-4, 10-15.

¹³ Anggo ham manggoluh i Israel bani panorang ai, sonaha ma pangahapmu mangidah si Daud? Ra do nini uhurmu lang mungkin be isasap Jahowa dousani ai. Tapi lang sonai na ibahen Jahowa. Itonggor Jahowa do ganup na dear na ongga ibahen si Daud. Anjaha ididah Jahowa homa tongon-tongon do ia manosali pambahenanni ai. Halani ai ma isasap Jahowa dousa ni si Daud. Ibotoh Jahowa do holong tumang uhur ni si Daud hu Bani janah tongtong do si Daud sihol mangkorjahon na madear. Tontu malas tumang ma uhurta halani sai na dear do na ididah Jahowa hun banta.​—1 Raj. 9:4; 1 Kron. 29:10, 17.

14. Aha do na boi mangurupi hita ase lang manguhumi na legan?

¹⁴ Age pe dong hahuranganta, tapi sedo ai na lalab itonggor Jahowa. Janah lang ipaksa Ia ase sempurna hita. Sonai ma homa hita namin bani hasomanta. Ulang iarapkon hita sidea ase sempurna. Tongon, sipata urahan do hita mangidah hahurangan ni halak. Tapi anggo itiru hita Jahowa, boi do hita totap mardear pakon na legan age pe itonggor hita homa hahurangan ni sidea. Songon sada berlian, sanggah lape iuhir, lang pala jenges idahon. Tapi anggo domma iuhir gabe lambin jenges janah harga tumang. Sonai do homa na ibahen Jahowa pakon Jesus. Age pe dong hahurangan ni jolma, tapi na dear ibagas dirini do na ididah sidea.

15. Anggo idingat hita situasi ni halak, mase ai boi mangurupi hita ase ulang manguhumi na legan?

¹⁵ Aha ope na boi mangurupi hita ase ulang manguhumi na legan? Dingat hita ma situasi  ni sidea. Pardiateihon hita ma contoh na ibahen Jesus. Sanggah ia i rumah panumbahan, ididah ia ma sada naboru na mabalu na miskin na pamasukkon dua ringis hubagas poti parartaan. Tapi lang dong nini Jesus sonon, “Mase pitah ai na ibere naboru ai?” Jadi sedo bahatni sumbangan na ibere naboru ai na itonggor Jesus. Tapi iparuhurhon Jesus do aha na mangojur naboru ai mambere sumbangan ai. Janah ibotoh Jesus do homa situasini. Ipuji Jesus do naboru ai halani humbani gok ni uhurni do naboru ai mambere.​—Luk. 21:1-4.

16. Parlajaran aha do na idapot nasiam humbani pangalaman ni si Veronica?

¹⁶ Pardiateihon ma pangalaman ni botou Veronica. Hunjai ididah hita holi ponting tumang ase mamparuhurhon situasi ni halak na legan. Bani kuria ni botou ai, dong sahalak naboru na mabalu janah sada niombahni. Nini si Veronica ma, “Jarang tumang do sidea martumpu ampa marbarita. Songon na lang sosok huahap pambahenanni ai. Tapi bani sada panorang, marbarita ma ahu pakonsi. Isaritahon ia ma bangku ganup sitarononni anjaha autis do hape anakni ai. Sasintongni domma pongkut tumang ia marhorja laho mansarihon haporluan ni sidea janah domma marusaha ia ase totap dohor bani Jahowa. Sipata ra do anakni ai hurang sehat sanggah ari partumpuan. Jadi maningon martumpu ma sidea hu kuria na legan.” Nini si Veronica use, “Borat tumang do hape sitarononni  anjaha sasintongni domma bahat tumang na ibere ia bani Jahowa. Ai ma na mambahen lambin holong uhurhu hu bani.”

17. Podah aha do na idapot hita humbani Jakobus 2:8, janah sonaha hita boi mandalankon ai?

¹⁷ Anggo ibagas uhurta urah-urah hita manguhumi na legan, dingat hita ma podah ni Bibel na mangkatahon ase hita maningon mangkaholongi hasomanta. (Basa Jakobus 2:8.) Dob ai, martonggo ma hita bani Jahowa ase iurupi hita lang manguhumi na legan. Horjahon hita ma homa songon na itonggohon hita. Umpamani bere hita ma panorangta ase lambin bagas mananda sanina botou na legan. Boi do iarahkon hita sidea marbarita atap iontang hita sidea rup mangan pakon hita. Anggo marusaha hita mananda hasomanta, lambin urah ma hita mangidah na dear humbani hasomanta songon na ibahen Jahowa pakon Jesus. Anggo ibahen hita sonai, on artini domma iparuhurhon hita podah ni parmahanta na madear ase ulang manguhumi na legan.

18. Sonaha hita patuduhkon anggo hita ra manangihon sora ni parmahanta?

¹⁸ Songon hulanan biribiri na manangihon sora ni parmahanni, susian ni Jesus pe ra manangihon sora ni Jesus. Anggo torus hita marusaha ase lang holsohan pasal haporluanta siganup ari anjaha lang manguhumi na legan, ipasu-pasu Jahowa pakon Jesus ma hita. Lang soal hita bagian humbani “hulanan na etek” atap ‘biribiri na legan’, sai totap ma hita manangihon sora ni Jesus janah mandalankon parentahni. (Luk. 12:32; Joh. 10:11, 14, 16) Bani artikel na mangihut, iulas hita ma dong dua nari parentah ni Jesus na maningon ihorjahon hita.