PANGALAMAN
Arta humbani Naibata Mangurupi Ahu Totap Marhasil
BANI borngin na golap, jongjong ma hanami i lobei ni Sungai Niger na doras, bolagni hira-hira 1,6 km. Ijia, masa do porang suku i Nigeria. Anggo idipari hanami sungai ai, bahat do bahayani. Tapi maningon mandipar do hanami, janah lang pitah sahali sonai. Mase ma boi masa sisonai bannami? Paima ai, husaritahon ma lobei pasal kaluargangku.
Goran ni bapangku si John Mills. Ia ididi bani tahun 1913 i New York City, sanggah marumur 25 tahun. Anjaha Sanina Russell ma na padaskon ambilan pandidion. Lang piga dokah hunjai, laho ma Bapa hu Trinidad. Ijai marhajabuan ma Bapa pakon Inang. Goran ni Inang si Constance Farmer janah parbarita na ringgas do Inang. Haduasi sidea marpangarapan hu surga. Gati do Bapa pakon Sanina William R. Brown mamutar “Drama-Foto Penciptaan”. Bani tahun 1923 itugaskon ma Sanina Brown pakon istrini hu Afrika Barat. Tapi namatorasku totap do tading i Trinidad.
HOLONG DO NAMATORAS BANNAMI
Siah halak do hanami marsanina. Si Rutherford ma goranni na sikahanan, dos songon goran ni presiden Lembaga Alkitab dan Risalah Menara Pengawal. Tubuh ma ahu bani tanggal 30 Desember 1922. Ibahen ma goranku dos songon sada sanina ai ma si Clayton J. Woodworth. Dihut do sanina ai pasirsirhon artikel bani majallah The Golden Age (sonari goran majallah ai Sadarlah!). Ipasikolahkon do ganup hanami. Tapi na siporlunan iojur do hanami ase mambere gok panorang laho mangidangi Naibata. Jenges tumang do inang patorangkon ayat-ayat ni Bibel bannami. Gati do ituri-turihon bapa sarita hun Bibel bannami. Pandei tumang do ia manurihon ai. Gabe boi ma ibayangkon hanami saritani ai.
Marguna tumang do ai bannami. Lima hanami dalahi, tolu dihut bani Sikolah Gilead. Anjaha tolu botouhu dihut marintis sadokah martahun-tahun i Trinidad pakon i Tobago. Marhitei pangajaran ampa siusihan humbani namatorasnami, gabe songon hayu “na sinuan i rumah ni Jahowa” do hanami. Iurupi sidea do hanami ase totap marbunga “bani alaman ni Naibatanta”.—Ps. 92:14.
Paima laho marbarita, ibahen ma partumpuan i rumahnami. Gati do parintis marsarita pasal Sanina George Young, sahalak misionaris hun Kanada na ongga roh hu Trinidad. Namatorasku pe marosuh marsarita pasal Sanina Brown na domma pindah hu Afrika Barat. Halani manangar sarita ni sidea ai, tarojur ma ahu ase dihut marbarita sanggah marumur sapuluh tahun.
PANGALAMANKU SANGGAH MARBARITA
Ondi ai, tangkas do ipatugah bani majallahta pasal ugama palsu, pardagangan na jahat, ampa politik na sambor. Halani ai bani tahun 1936 isuruh pambobai ni gereja ma ase ilarang gubernur i Trinidad hita mambagihon publikasinta. Jadi ipaponop hanami ma publikasi ai. Tapi totap do ibagihon hanami ai ronsi bois. Marbaris ma hanami mardalan mamakei plakat, dong homa na marlereng laho mambagihon selebaran. Sobali ai, dihut do ahu marbarita pakon sanina botou hun kota Tunapuna. Ipakei hanami ma motor na ibahen speaker i atasni laho marbarita das hu huta-huta bagas i Trinidad. Malas tumang uhurhu! On ma na mangojur ahu ase ididi sanggah marumur 16 tahun.
Sanina botou hun Tunapuna na marbarita mamakei motor na marspeaker na banggal
Songon arta humbani Jahowa do siusihan ampa pangajaran ni namatorasku, pakon pangalaman nongkan ai. In do na mangojur ahu ase gabe misionaris. Sai lalab do hudingat ai ronsi laho ahu hu Aruba bani tahun 1944. Ijai rap marhorja ma ahu pakon Sanina Edmund W. Cummings. Malas tumang uhurnami halani dong sapuluh halak na roh hu acara Pardingatan tahun 1945. Satahun dobkonsi ai, dong ma sada kuria ijai.
Pakon si Oris, malas tumang do uhurhu
Lang piga dokah hunjai, mambere hasaksian ma ahu bani si Oris Williams, hasomanku sahorja. Ia mangkatahon porsaya tumang do ia bani aha na dob iparlajarisi sadokah on. Tapi dob marlajar Bibel, gabe ibotoh ia ma aha do na sasintongni iajarhon Bibel. Jadi ididi ma ia bani 5 Januari 1947. Dob ai, marsihaholongan janah marhajabuan ma hanami. Marintis ma si Oris bulan November 1950. Lambin sonang do huahap dobkonsi marjabu hanami.
SONANG MANGIDANGI I NIGERIA
Tahun 1955 iontang ma hanami hu Sikolah Gilead. Halani malas tumang uhurnami, kaluar ma hanami hun parhorjaan. Ijual hanami ma rumahnami pakon na leganni janah itadingkon hanami ma Aruba. Tanggal 29 Juli 1956 wisuda ma hanami humbani Sikolah Gilead kalas 27 janah itugaskon hu Nigeria.
Tahun 1957, pakon kaluarga Betel i Lagos, Nigeria
Ongga do ihatahon istringku sonon, “Iurupi Naibata do hanami ase boi mandalankon tugasnami. Sasintongni lang marosuh hinan ahu gabe misionaris songon suamingku. Rosuhan do ahu mangurus rumah janah pagodangkon niombah. Tapi hubotoh ma ponting tumang do marbarita ai. Dobkonsi wisuda Sikolah Gilead, sirsir ma uhurhu gabe misionaris. Tapi, sanggah naik hanami hu kapal, roh ma sada sanina hasoman ni Sanina Knorr manjumpahi hanami laho mangkatahon selamat jalan. Ipatugah ia ma anggo hanami itugaskon hu Betel. Tarsonggot ma ahu! Lang sai marosuh ahu manangar ai. Tapi mintor podas ma hubahen hamubahon. Lambin dokah marosuh ma ahu mangidangi i Betel. Ijon margantih do tugasku. Tapi marosuh tumang do ahu sanggah itugaskon gabe penerima tamu. Ijai ma ahu boi jumpah pakon sanina botou hun Nigeria. Huidah ma dong sidea na roh ai horahan, loheian, anjaha kotor homa bajuni. Malas tumang uhurhu boi mangurupi janah pasirsirhon haporluan ni sidea. Pangidangion bani Jahowa do ganup na ihorjahon hanami i Betel. Malas tumang uhurhu.” Tongon, ganup tugas na ibere bannami mambahen sonang goluhnami.
Tahun 1961 mulak ma hanami hu Trinidad. Pas homa roh Sanina Brown hujai. Isaritahon ia ma pangalamanni na madear sanggah i Afrika. Husaritahon ma homa sonaha dearni horja parambilanon i Nigeria. Jadi itampeihon sanina ai ma tanganni hu abarangku, dob ai nini ma hubani Bapa, “Oh Johnny, lape ongga ho hu Afrika kan, hape anggo si Woodworth domma!” Ibalosi Bapa ma, “Mantap ma ai Worth! Totap ma ho semangat ambia!” Halani ojur-ojur ampa
siusihan humbani sidea na domma dokah anjaha ringgas mangidangi Jahowa, gabe lambin hinsah ma uhurhu ibagas pangidangion.Si William “Bible” Brown pakon si Antonia, istrini, na patoguhkon hanami
Tahun 1962, ilatih ma use ahu bani Sikolah Gilead kalas 37. Dokahni sikolah ai sapuluh bulan. Dob ai, dihut do homa Sanina Wilfred Gooch Sikolah Gilead kalas 38 janah itugaskon hu Inggris. Halani ai, gabe ahu ma manggantihonsi mangawasi kantor cabang i Nigeria. Songon Sanina Brown, gati do ahu markaliling janah jumpah pakon sanina botou i Nigeria. Lambin hutanda janah huhaholongi ma sidea. Age pe lang bahat artani, tapi tong do malas uhur ni sidea. Hunjon taridah ma sedo arta atap duit na mambahen hita martuah. Hassi pe sonai situasini, tapi totap do borsih janah rapi sidea sanggah martumpu. Sanggah laho hu kebaktian, gati do sidea naik truk ampa bolekaja * (bus ijai na lang dong jandelani). Gati do isurat hata na madear bani bus ai, umpamani, “Bah na mangkatektek gabe laut na bolag.”
Tongon do hata ai. Marhasil do horjanami pakon ganup sanina botou i Nigeria. Halani ai, sobali i Amerika Serikat, i Nigeria do parlobei sahali dong 100.000 parbarita bani tahun 1974. Ipasu-pasu do horja parambilanon i nagori ai!
Ijia, masa homa porang suku i Nigeria humbani tahun 1967 ronsi 1970. Piga-piga bulan, sanina na tading i Biafra, i dipar ni Sungai Niger, lang boi manghubungi kantor cabang. Jadi maningon laho ma hanami hujai manaruhkon publikasi bani sidea. Songon na hupatugah nongkan ai, halani martonggo janah porsaya bani Jahowa, boi ma hanami mandipari sungai ai ronsi piga-piga hali.
Tangkas do hudingat bahaya na dong halani ai. Ra do itembak tentara, hona naborit, ampa na leganni. Tapi biaran do hanami i dipar ni sungai ai halani bahat pemberontak ijai. Ongga do ahu marsolu mandipari Sungai Niger hun Asaba hu Onitsha, janah laho hu Enugu, laho patoguhkon sanina na mangawasi ijai. Bani panorang na legan, laho do homa hanami hu Aba laho patoguhkon sintua na dong ijai. Sanggah borngin, somal do ipamatei lampu ijai ase lang boi ididah munsuh. I Port Harcourt, mintor podas ma itutup hanami partumpuan marhitei tonggo, sanggah masuk tentara hu kota Biafra.
Ase totap porsaya sanina botou anggo sidea isarihon Jahowa, ponting tumang do partumpuan ai. Hunjai dapot sidea ma podah na mangurupi sidea ase totap netral janah marsada. Ujungni totap do sidea setia. Hassi pe bahat do halak ijai marsogam ni uhur bani suku na legan, tapi anggo sanina botou totap do marsihaholongan janah marsada. Malas tumang do uhurhu boi mangkasomani anjaha mangurupi sidea bani panorang sisonai!
Tahun 1969 ibahen ma Kebaktian Internasional i Yankee Stadium, New York, na marjudul “Damei i Tanoh On”. Sanina Milton G. Henschel ma na gabe ketua janah ahu ma asistenni. Bahat do na huparlajari humbani sanina ai. Marguna tumang do ai halani tahun 1970 ibahen do homa Kebaktian Internasional i Lagos, Nigeria na marjudul “Halak na Iharosuhkon Naibata”. Tontu halani pangurupion ni Naibata do ase boi acara ai mardalan dear halani baru ope salosei porang suku ijai. Ibagas 17 bahasa do acara ai ibahen. Dong 121.128 hadirin kebaktian ai. Roh do homa Sanina Knorr pakon Sanina Henschel, ampa sanina botou na legan mamakei pesawat na isewa hun Amerika Serikat pakon Inggris. Ijia dong 3.775 halak na ididi. Bahatan do on marimbangkon halak na ididi sanggah Pentakosta. Sibuk tumang ma ahu halani dihut mangurupi acara ai. Lang isangka hanami bahat tumang do tambah parbarita i nagori ai.
Dong 121.128 hadirin Kebaktian Internasional “Halak na Iharosuhkon Naibata”, ibagas 17 bahasa tarmasuk Ibo
Sadokah 30 tahun lobih ma ahu mangidangi i Nigeria. Sipata gabe sintua kaliling ampa pangawas zona i Afrika Barat. Malas tumang uhur ni misionaris ijai halani roh hanami laho patoguhkon sidea. Malas do homa uhurhu halani boi mangurupi sidea ase porsaya lang ongga ihalupahon hanami sidea. Hunjon hubotoh ma maningon ipatoguh do sanina botou ase sidea boi
mambahen hamajuon janah manjaga hasadaon ibagas kuria.Halani pangurupion Naibata do ase boi hanami martahan hassi pe dong porang atap pe naborit. Istringku si Oris mangkatahon,
“Ongga do piga-piga hali hanami hona malaria. Bani sada ari, pingsan ma si Worth janah maningon iboan hu rumah sakit. Nini dokter lang boi malum ia, hape malum do! Dob sadar si Worth, marbarita ma ia janah ipatugah ma pasal Harajaon ni Naibata bani perawat, ai ma Bapa Nwambiwe. Roh ma hanami hu rumah ni bapa ai. Anjaha ra ma ia marlajar Bibel. Sonari domma gabe sintua ia i Aba. Bahat do halak na domma iurupi hanami gabe Saksi Jahowa. Dong halak Muslim ampa na leganni. Malas tumang uhurnami boi mananda halak Nigeria, bahasa, budaya, ampa hasomalanni. Janah holong do hanami bani sidea.”
Parlajaran na legan: Ase boi marhasil mandalankon tugas i nagori na legan, maningon ihaholongi hita sanina botou ijai age lang dos suku ampa hasomalanta.
TUGAS NA BARU
Dob mangidangi i Betel Nigeria, tahun 1987 itugaskon ma hanami gabe misionaris hu St. Lucia, sada pulo na jenges tumang i Karibia. Malas tumang uhurnami ijai. Tapi dong homa tantanganni. Anggo i Afrika somal do dalahi bahat istrini. Tapi anggo ijon bahat do halak na marjabu uhur-uhur. Hassi pe sonai, bahat do parlajar Bibelnami na mambahen hamubahon dobkonsi marlajar Bibel.
Holong tumang do uhurhu bani si Oris, 68 tahun ma hanami marhajabuan
Halani domma matua hanami, itugaskon Pangurus Pusat ma hanami hu kantor pusat i Brooklyn, New York, AS tahun 2005. Bani ganup ari martarima kasih do ahu bani Jahowa halani marhajabuan pakon si Oris. Tapi tahun 2015 marujung goluh ma ia. Lang tarhatahon sonaha pusok ni uhurhu sanggah ai. Bujur tumang do si Oris janah parholong. Malas tumang uhurhu sadokah 68 tahun hanami marhajabuan. Ibotoh hanami ma ase boi hita martuah ibagas kaluarga atap i kuria, maningon hormat ma hita bani pangawas, sirsir marsisasapan dousa, toruh maruhur, janah patuduhkon paruhuran na madear.
Sanggah maretek ni uhur, marpangunsandeian bani Jahowa do hanami ase boi totap mangidangi-Si. Halani ra hanami mangihutkon parubahan tugas, tongtong do dear hasilni. Anjaha lambin dear do holi hasilni i Paradeiso!—Jes. 60:17; 2 Kor. 13:11.
Ipasu-pasu Jahowa do horja ni namatorasku pakon sanina botou i Trinidad ampa i Tobago. Dong 9.892 halak na gabe Saksi Jahowa ijai. Bahat do sanina botou na ringgas marbarita i Aruba, kuriangku na hinan. Dong 14 kuria janah lambin martambah do parbarita ijai. Sonai homa i Nigeria, dong 381.398 parbarita ijai. Anjaha i St. Lucia dong 783 Saksi Jahowa.
Sonari domma marumur 90-an ahu. Songon na ihatahon Psalmen 92:15, “Marbuah do sidea age dob matua, tongtong tabun anjaha maratah.” Martarima kasih do ahu bani Jahowa halani boi mangidangi-Si sadokah goluhku. Arta na maharga hun Bani do na mangurupi ahu ase totap martahan ibagas pangidangion. Halani holong ni uhur-Ni do ase boi ahu ‘marbunga bani alaman ni Naibatangku’.—Ps. 92:14.
^ par. 18 Tonggor Awake! 8 Maret 1972, alm. 24-26.