1-2. (a) Aha do na iharosuhkon hita? (b) Aha do na mambahen pos uhurta?

GANUPAN hita sihol ihaholongi. Anjaha marosuh do hita ase ganup halak mambahen na pintor atap adil hubanta. Porini gati halak manjahati hita, ra do gabe pusok uhurta janah mandolei.

² Ibotoh Jahowa do homa anggo hita sihol ihaholongi janah sihol ase pintor pambahenan ni halak hubanta. Porini adong halak na lang mambahen sisonai ai, gabe pusok ma uhurta. Anggo sonai, rimangi ma Titah * na ibere Jahowa hubani bangsa Israel marhitei si Musa. Marhitei titah ai, taridah ma banggal do holong ni Jahowa hubanta janah sihol do Ia mambahen na pintor hubanta. Lambin porsaya ma hita parduli do Jahowa hubanta.

3. (a) Songon na ipatorang bani Rom 13:8-10, aha do na boi iparlajari hita humbani Titah ni si Musa? (b) Sungkun-sungkun aha ma na laho iulas hita?

³ Anggo iparlajari hita Titah ni si Musa ai, ibotoh hita ma sonaha banggalni holong ni Jahowa hubanta. (Basa Rom 13:8-10.) Bani artikel on ulas hita ma piga-piga humbani titah ai janah balosi hita ma sungkun-sungkun on: Marhitei Titah ai, mase boi ihatahon anggo Jahowa mangkaholongi hita? Sonaha Titah ai mangojur halak ase mangkorjahon na pintor? Maningon sonaha do pangintuai mandalankon Titah ai? Bani ise do marguna tumang Titah  ai? Balosni sungkun-sungkun ai boi mangapoh hita janah mambere pangarapan hubanta. Lambin dohor ma hita hubani Jahowa, Bapanta na parholong in.​—Lah. 17:27; Rom 15:4.

4. (a) Mase boi ihatahon halani holong do ibere Naibata Titah ni si Musa? (b) Songon na isurat bani Mateus 22:36-40, aha do rimpunan ni ganup titah ai?

⁴ Boi ihatahon halani holong-Ni do Jahowa mambere Titah ni si Musa. Mase sonai? Halani aha pe na ibahen Ia humbani holong do ganupan ai. (1 Joh. 4:8) Dua dassa rimpunan ni ganupan titah ai: mangkaholongi Naibata pakon mangkaholongi hasoman jolma. (3 Mus. 19:18; 5 Mus. 6:5; basa Mateus 22:36-40.) Jadi humbani 600 lobih titah ai boi ma ididah hita sonaha Jahowa patuduhkon holong-Ni. Ulas hita ma piga-piga contoh.

5-6. Aha do na iharosuhkon Jahowa humbani halak na marhajabuan, anjaha aha do na ipardiateihon-Si? Bere ma contoh.

⁵ Setia ma bani pasanganmu, anjaha pardiateihon ma niombahmu. Sihol do Jahowa ase na marhajabuan mangkaholongi pasanganni sadokah manggoluh. (1 Mus. 2:24; Mat. 19:3-6) Halani ai ma bani titah papituhon ihatahon do ulang marbangkis. (5 Mus. 5:18) Anggo adong na marbangkis, jahat tumang do pambahenanni ai. “Mardousa dompak Naibata” do ia. (1 Mus. 39:7-9) Ra do martahun-tahun pusok uhur ni pasanganni halani parbangkisonni ai.

⁶ Ibotoh Jahowa do sonaha pambahenan ni halak bani pasanganni. Sihol do Ia ase suami bujur bani istrini. Sada suami na unduk bani Titah tontu lang ra mansirangkon istrini halani parsoalan na otik. (5 Mus. 24:1-4; Mat. 19:3, 8) Tapi porini dong parsoalan na banggal na mambahen sidea maningon marsirang, ibere ma surat sirang bani istrini. Surat sirang ai boi manlinggomi istrini ase ulang ituduh mangkorjahon parriah-riahon. Tapi paima ai, isungkun ma lobei pangintuai. Tujuanni atap na boi do pangintuai mangurupi sidea ase ulang marsirang. Anggo adong halak Israel na mansirangkon istrini halani parsoalan na otik, ra do ipaturut Jahowa parsoalan ai. Hassi pe sonai, ididah Jahowa do sonaha sitarononni ampa iluh-iluhni.​—Mal. 2:13-16.

7-8. (a) Aha do parentah ni Naibata bani namatoras? (Tonggor ma gambar sampul.) (b) Aha do na dob iparlajari hita?

⁷ Humbani Titah ni si Musa ibotoh hita ma anggo Jahowa mangkaholongi dakdanak. Iparentahkon do ase namatoras lang pitah mansarihon haporluan ni sidea. Tapi maningon ibere do panorang laho mangurupi sidea marhasoman pakon Jahowa. Maningon iajari do niombah ase unduk bani Titah-Ni janah mangkaholongi-Si. (5 Mus. 6:6-9; 7:13) Halani silayak-layak humbani Jahowa do niombah ai, maningon ihaholongi sidea ma niombahni. (Ps. 127:3) Tapi halani kejam bangsa Israel bani niombahni gabe iuhum Jahowa ma sidea.​—Jer. 7:31, 33.

⁸ Parlajaranni: Ipardiateihon Jahowa do pambahenan ni na marhajabuan bani pasanganni. Anjaha sihol do Ia ase namatoras mangkaholongi niombahni. Iuhum do namatoras anggo lang mandalankon titah-Ni ai.

9-11. Mase ibere Jahowa titah na pasapuluhkon?

⁹ Ulang harosuhkon aha pe na dong bani hasoman. Ai do na ihatahon bani titah pasapuluhkon. (5 Mus. 5:21; Rom 7:7) Marhitei titah ai, Jahowa sihol mangajarhon bani juakjuak-Ni porlu do sidea  manjaga uhur ampa pingkiran. Ibotoh Jahowa do humbani uhur ampa pingkiran na jahat do mungkahni sasada halak mangkorjahon hajahaton. (Pod. 4:23) Anggo ipaturut halak Israel pingkiran sisonai tubuh ibagas uhurni, ujungni gabe ihorjahon sidea ma na jahat bani hasomanni. Ongga do masa sisonai ai bani Raja Daud. Sasintongni halak na bujur do ia. Tapi bani sada panorang, marosuh ia mangidah istrini halak. Ujungni, gabe mardousa ma si Daud. (Jak. 1:14, 15) Marbangkis ma ia pakon naboru ai. Dob ai, marusaha ma ia mangoto-otoi anjaha mamunuh suami ni naboru ai.​—2 Sam. 11:2-4; 12:7-11.

¹⁰ Jadi pentar tumang do Jahowa ai janah parholong. Ibotoh Ia do aha na ibagas uhur. (1 Kron. 28:9) Marhitei titah ai ipatugah ma ase ulang lepak pambahenan ni juakjuak-Ni, maningon do iambukkon sidea pingkiran na salah.

¹¹ Parlajaranni: Lang pitah na taridah tumang na boi ididah Jahowa. Ibotoh Ia do aha na dong ibagas uhurta. (1 Sam. 16:7) Lang adong age aha pe na boi ponop i lobei-Ni. Tapi, pitah na madear do na ipindahi ia hun banta. Hassi pe sonai, Ia sihol ase itanda hita dirinta janah irajai hita pingkiran na lepak ai ase ulang ihorjahon hita na salah.​—2 Kron. 16:9; Mat. 5:27-30.

12. Aha do na iajarhon Titah ni si Musa hubanta?

¹² Marhitei Titah ni si Musa ibotoh hita ma sihaholongi hapintoron do Jahowa ai. (Ps. 37:28; Jes. 61:8) Ipatuduh Ia do siusihan na jenges sonaha mambahen na pintor bani na legan. Anggo ra halak Israel mandalankon titah-Ni, ipasu-pasu Jahowa ma sidea. Tapi anggo lang ra sidea mandalankon ai, gabe marsitaronon ma sidea. Pardiateihon hita ma dua contoh humbani Titah ai.

13-14. Aha do na ihatahon bani titah na parlobei pakon na paduahon, anjaha aha ma gunani ai bani halak Israel anggo ra sidea mandalankon?

¹³ Pitah manombah Jahowa. Titah na parlobei mangkatahon Jahowa dassa na maningon isombah. Dob ai, titah na paduahon mangkatahon lang boi ipauli sidea gana-gana bahen sisombahon. (2 Mus. 20:3-6) Sasintongni sedo Jahowa na mandapot guna humbani titah ai, tapi halak Israel do. Anggo setia sidea bani Jahowa, martuah ma hagoluhan ni sidea. Tapi anggo isombah sidea naibata na legan, gabe bahat ma sitaronon ni sidea.

¹⁴ Pardiateihon ma aha na masa bani halak Kanaan. Gabe sambor do parlahou ni sidea halani manombah gana-gana, sedo Jahowa, Naibata na sintong. (Ps. 115:4-8) Ihorjahon sidea do parriah-riahon anjaha itutung homa niombahni bahen galangan. Sonai ma homa na masa bani halak Israel sanggah itadingkon sidea Jahowa janah manombah gana-gana. Gabe sunsah do pangahap ni kaluarga ni sidea. (2 Kron. 28:1-4) Itadingkon pambobai ni sidea do homa uhum ni Jahowa. Kejam anjaha koras do sidea bani halak na galek. (Hes. 34:1-4) Jadi ipasingat Jahowa ma halak Israel ai. Laho uhuman-Ni ma sidea halani na jahat ai sidea bani naboru na galek pakon dakdanakni. (5 Mus. 10:17, 18; 27:19) Tapi, anggo setia sidea bani Jahowa, janah pintor pambahenan ni sidea bani halak na legan, ipasu-pasu Jahowa ma sidea.​—1 Raj. 10:4-9.

15. Aha ma na boi iparlajari hita pasal Jahowa?

¹⁵ Parlajaranni: Lang boi isalahkon hita Jahowa anggo adong sanina botou na mambahen hita marsitaronon. Hassi pe sonai ibotoh Jahowa do sanggah adong  na mambahen na jahat hubanta. Banggalan do holong ni Naibata hubanta marimbangkon holong ni sada inang hubani dakdanakni. (Jes. 49:15) Hassi pe lang mintor iurupi Ia hita, pos ma uhurta uhuman-Ni do holi parjahat na lang ra mambahen hamubahon.

16-18. Pasal aha deba na iatur bani Titah ni si Musa, janah aha ma parlajaranni hubanta?

¹⁶ Bani Titah, bahat do aturan na maningon idalankon halak Israel. Halani ai maningon adil ma pangintuai ai sanggah manguhumi. Tanggung jawab ni pangintuai sedo pitah mangurupi halak Israel ase dohor bani Jahowa. Tapi sanggah dong parsoalan atap pe hajahaton, maningon do homa isaloseihon sidea ai. Ulas hita ma piga-piga contoh.

¹⁷ Anggo dong halak Israel na mamunuh, lang mintor iuhum matei ia. Paima mamutuskon uhuman aha do na sosok bani, maningon ipareksa pangintuai ma lobei mase boi masa ai. (5 Mus. 19:2-7, 11-13) Leganni ai, anggo dong na marsalisih umpamani pasal pambagian arta atap pe parsoalan ibagas kaluarga, maningon isaloseihon pangintuai do homa ai. (2 Mus. 21:35; 5 Mus. 22:13-19) Anggo adil sidea sanggah manguhumi, janah halak Israel pe ra mandalankon Titah ni Naibata, martuah ma sidea ganupan anjaha ipasangap ma Jahowa.

¹⁸ Parlajaranni: Ponting do bani Jahowa ganup na ihorjahon hita. Ia sihol ase hita mangkaholongi na legan janah pintor pambahenanta bani sidea. Anjaha ipardiateihon Ia do homa aha na ibahen pakon na ihatahon hita, hassi pe lang dong halak na mangidah hita.​—Heb. 4:13.

19-21. (a) Aha do na maningon ibahen pangintuai pakon hakim sanggah manguhumi? (b) Titah aha do na ibere Jahowa laho manlinggomi juakjuak-Ni, anjaha aha ma parlajaranni?

¹⁹ Anggo bangsa-bangsa na legan, lang pintor aturan na ibahen sidea. Halani ai lang marosuh Jahowa anggo juakjuak-Ni mangihutkon sidea. Jadi iparentahkon ma bani pangintuai pakon hakim ase ulang manonggor jumbak sidea sanggah mandalankon aturan-Ni. Ulang ma kasar sidea atap mapintortu. Tapi maronjolan bani holong ampa hapintoron ma sidea sanggah manguhumi.​—5 Mus. 1:13-17; 16:18-20.

²⁰ Halani idop ni uhur-Ni, ibere Jahowa ma titah bani juakjuak-Ni ase ulang adong na mambahen na lang pintor bani hasomanni. Umpamani, anggo dong sada dalahi na ituduh mangkorjahon hajahaton, boi do ia mambela dirini mangihutkon isi ni titah ai. Hak ni dalahi ai do homa mambotoh ise do na manuduh ia. (5 Mus. 19:16-19; 25:1) Paima iputuskon na marsalah do ia atap lang, siotikanni maningon  dong dua halak na mambere hasaksian. (5 Mus. 17:6; 19:15) Tapi sonaha porini dong sada dalahi na mangkorjahon hajahaton, hape pitah sahalak na mangidah ai? Ulang ma iagan ia boi ia maluah humbani uhuman. Ididah Jahowa do pambahenanni ai. Sonai homa ibagas kaluarga. Hassi pe bapa do na gabe kopala, tapi lang boi uhur-uhurni. Porini adong parsoalan ibagas kaluarga, maningon boanon ni sidea ma parsoalan ai hu lobei pangintuai ni huta. Sidea ma holi na mambahen haputusan pasal ai.​—5 Mus. 21:18-21.

²¹ Parlajaranni: Tongtong do pintor panguhuman ni Jahowa. Ia do siusihan na sidearan hubanta. (Ps. 9:8) Ibere Jahowa do upah bani halak na ra mangihutkon aturan-Ni. (2 Sam. 22:21-23; Hes. 9:9, 10) Tapi uhumon-Ni do halak na uhur-uhurni sanggah manguhumi. Sipata ra do ibotoh hita dong piga-piga halak na mambahen na jahat hape lang iuhum. Tapi iuhum Jahowa do holi ia domu bani panorang na dob itontuhon. (Pod. 28:13) Anjaha anggo lalab ia lang mubah, ibotoh ia ma holi ‘majangin do madabuh hu tangan ni Naibata na manggoluh in!’​—Heb. 10:30, 31.

22-24. (a) Bani ise do marguna tumang Titah ai, anjaha aha do na boi iparlajari hita pasal Jahowa? (b) Sipasingat aha do na dong bani 2 Musa 22:22-24?

²² Marguna tumang do Titah ai bani halak na galek, songon halak na tading maetek, na mabalu, ampa panginsolat atap halak na manumpang. Sonon do iparentahkon bani hakim i Israel, “Seng bulih  papeolonmu uhum hubani halak dagang barang hubani dakdanak na tading maetek, anjaha seng bulih buatonmu hiou ni puang-puang na mabalu bahen gadeian.” (5 Mus. 24:17) Hunjon taridah ma ipardiateihon Jahowa do halak na galek. Anjaha uhumon-Ni do anggo dong na mambahen na jahat bani sidea.​—Basa 2 Musa 22:22-24.

²³ Bangsa na inggot i Israel somal do berhubungan seks pakon kaluargani na sangkan. Anjaha ihagigihon Jahowa do parlahou sisonai. Halani ai, ibere ma Titah laho manjaga bangsa Israel ase ulang sonai parlahou ni sidea. (3 Mus. 18:6-30) Maningon do homa magigi sidea mangidah parlahou na sambor ai.

²⁴ Parlajaranni: Marosuh do Jahowa ase halak na dong tanggung jawabni dear ma sanggah mandalankon tugasni. Maningon maronjolan bani holong do pambahenan ni sidea. Magigi do Jahowa mangidah seks na sambor. Anjaha ipastihon Ia do ase ganup halak mambahen na pintor tarlobih hubani halak na galek.

25-26. (a) Mase boi ihatahon markaitan do holong pakon hapintoron? (b) Aha ma na laho iulas hita bani seri artikel na mangihut?

²⁵ Markaitan do holong ai pakon hapintoron. Lang boi sasada halak ihatahon pintor anggo lang dong holongni. Jadi anggo porsaya hita tongtong do pintor pambahenan ni Jahowa hubanta, lambin ihaholongi hita ma Ia. Halani hita mangkaholongi Jahowa, gabe iharosuhkon hita ma aturan-Ni. Hasilni, tarojur ma hita mangkaholongi na legan janah mambahen na pintor bani sidea.

²⁶ Marhitei Titah ai, iurupi do halak Israel ase boi dohor bani Jahowa. Tapi dobkonsi ipasaud Jesus ganup Titah ai, halak Kristen lang be mangihutkon Titah ni si Musa. (Rom 10:4) Songon na ihatahon si Paulus “halinoh ni parulihan na sihol roh do hansa titah in”. (Heb. 10:1) Artini, dong do uhum na sidearan gantihni Titah ai. Bani seri artikel na mangihut, iulas hita ma piga-piga contohni anjaha sonaha hita boi patuduhkon holong ampa hapintoron i kuria Kristen.