1. Sonaha sada halak Samaria mangkargai aha na dob ibahen Jesus?

DONG sapuluh dalahi na gadamon. Parah tumang do naborit ni sidea. Bani sada panorang, ididah sidea ma Jesus hun na daoh. Domma itangar sidea anggo Jesus boi pamalumkon sagala naborit. Jadi pos ma uhur ni sidea anggo sidea pe boi malum. Halani ai gogoh ma sidea mandilo ia, “Jesus, Guru, idop ma uhurmu bannami!” Ipamalum Jesus ma sidea ganupan. Tontu malas tumang uhur ni sidea. Tapi pitah sada do na manjumpahi Jesus laho martarima kasih. Halak samaria do dalahi ai janah ipatuduh do anggo ia mangkargai aha na ibahen Jesus. Gabe tarojur ma ia mamuji Naibata “marhasoman sora na gogoh”.​—Luk. 17:12-19.

2-3. (a) Aha do ra na mambahen hita lupa mangkatahon tarima kasih? (b) Aha do na laho iulas hita bani artikel on?

² Songon halak Samaria ai, sihol do homa hita mangkatahon tarima kasih bani halak na bujur hubanta. Tapi ra do lupa hita mangkatahon tarima kasih atap pe mangkargai pambahenan ni sidea.

³ Bani artikel on iulas hita ma mase ponting mangkatahon tarima kasih atap pe patuduhkon anggo hita mangkargai pambahenan ni halak. Holi iulas hita ma contoh-contoh hun Bibel ise do na martarima kasih ampa na lang martarima kasih. Anjaha iulas hita ma sonaha carani hita gabe halak sipartarima kasih.

4-5. Mase maningon ihargai hita pambahenan ni halak?

⁴ Ipatuduh Jahowa do siusihan na madear pasal na mangkargai pambahenan ni halak. Ibere Ia do upah bani ise pe na mambahen malas uhur-Ni. (2 Sam. 22:21; Ps. 13:6; Mat. 10:40, 41) Bani Bibel pe iparentahkon do ase  hita gabe ‘sitiru Naibata, songon anak na hinaholongan!’ (Ep. 5:1) Jadi marosuh do hita mangkargai pambahenan ni halak halani sihol mangusihi Jahowa.

⁵ Pardiateihon ma alasan na legan mase hita sihol mangkatahon tarima kasih. On boi ipausih songon sipanganon na sodap. Lambin sodap do sipanganon ai anggo ibere hubani na legan. Jadi sanggah adong na martarima kasih hubanta, sodap tumang ma pangahapta. Sonai homa sanggah hita mangkatahon tarima kasih bani na legan, gabe malas ma uhurni. Ibotoh ia ma lang soya-soya aha na ibahen ia hubanta. Ujungni lambin orot ma parhasomananta pakonsi.

6. Mase mangkatahon tarima kasih boi ipausih songon jambu omas?

⁶ Tontu ihargai halak do anggo hita martarima kasih. Bibel mangkatahon, “Doskon jambu omas na i atas ni pinggan pirak do, hata na niluarhon topat bani panorangni.” (Pod. 25:11) Bayangkon ma sonaha jengesni jambu omas na inahkon i atas pinggan pirak. Tontu arga tumang do ai. Porini dong na mambere hadiah sisonai bamu, tontu martarima kasih do ham hu bani anjaha ihargai ia do ai. Jadi usih songon jambu omas na lang boi maseda, sonai ma homa sanggah nasiam mangkatahon tarima kasih bani hasoman. Harga tumang do ai bani, janah tongtong do idingat ia ai.

7. Songon na ipatugah bani buku Psalmen, sonaha si Daud pakon ginompar ni si Asap patuduhkon tarima kasih?

⁷ Hinan, bahat do juakjuak ni Naibata na patuduhkon tarima kasih. Umpamani si Daud. (Basa Psalmen 30:13.) Harga tumang do bani manombah Naibata. Ipatuduh ia do ai marhitei pambahenan.  Isumbangkon ia ma bahat artani laho pajongjongkon rumah panumbahan. Sonai homa ginompar ni si Asap, ipatuduh do tarima kasih marhitei mambahen doding puji-pujian. Sada humbani doding ai patugahkon anggo sidea martarima kasih bani Naibata. Ipuji sidea ma ganup ‘halongangan na binahen-Ni’. (Ps. 75:2) Jadi martarima kasih do si Daud pakon ginompar ni si Asap halani mangkargai ganup pasu-pasu na ijalo sidea humbani Naibata. Rimangi nasiam ma sonaha nasiam boi mangusihi sidea.

8-9. Sonaha si Paulus mangkargai sanina botou, janah aha do hasilni?

⁸ Ihargai apostel Paulus do sanina botou. Taridah do ai marhitei parsahap ampa pambahenanni. Sanggah martonggo, martarima kasih do ia bani Jahowa halani habujuron ni sidea. Humbani suratni taridah do anggo ia mangkargai sidea. Bani Rom bindu 16 ayat 1 ronsi 15, dong 27 goran ni sanina botou na isobut si Paulus. Umpamani, ipatugah do anggo si Priska ampa si Akila mambere hosahni laho mangurupisi. Ipatorang do homa anggo si Poibe domma ‘mangurupi buei halak’, tarmasuk dirini. Ipuji si Paulus do horja ni sanina botou na hinaholonganni ai.​—Rom 16:1-15.

⁹ Hassi pe dong hahurangan ni sanina botou, tapi habujuron ni sidea do na idingat si Paulus. Ai ma na ipatugah ia bani ujung ni suratni. Tontu gabe tarojur ma sanina botou sanggah surat ni si Paulus ibasahon i kuria! Hasilni lambin orot ma parhasomanan ni sidea pakon si Paulus. Sonai homa hita, pasomal-somal hita ma mangkargai aha na ihatahon ampa na ibahen sanina botou.

10. Humbani cara ni Jesus martarima kasih, aha ma na boi iparlajari hita?

¹⁰ Jesus pe, ihargai ia do horja ni ganup susianni. Ipatuduh do ai ibagas suratni bani piga-piga kuria i Asia Kecil. Umpamani bani kuria i Tiatira, sonon do lobei ihatahon, “Hubotoh do sagala horjamu pakon holong ni uhurmu pakon haporsayaonmu pakon pansarihonmu pakon hasabaronmu ampa pambahenanmu na parpudi on, na bueinan humbani na parlobei ai.” (Pangk. 2:19) Lang pitah haringgason ni sidea na ipatugah Jesus. Tapi ipuji do homa paruhuran ni sidea na jenges. (Pangk. 2:25-28) Hassi pe ijai dong piga-piga sanina na porlu ipodahi, tapi totap do iojur Jesus sidea. Sasintongni lang maningon ihargai Jesus sidea halani ia do kopala kuria. Hassi pe sonai martarima kasih do ia bani sidea. Sada siusihan na madear do on bani ganup sintua i kuria!

11. Songon na ipatugah bani Heber 12:16, hasalahan aha do na ibahen si Esau?

¹¹ Bani Bibel ipatugah dong piga-piga halak na lang mambotoh martarima kasih. Umpamani si Esau. Halani anak sikahanan ia, sasintongni bahat do pasu-pasu na laho jaloonni. Tapi lang ihargai ia ai hassi pe namatorasni halak na mangkaholongi Jahowa. (Basa Heber 12:16.) Hunja ibotoh hita? Halani sipanganon tumang, ijual ia do hak sikahanan ai bani si Jakob, anggini. (1 Mus. 25:30-34) Ujungni pusok tumang ma ia halani lang be mandapot pasu-pasu ai. Halani domma ijual ia hak sikahanan ai, sasintongni lang dong be alasanni laho manggila.

12-13. Sonaha halak Israel patuduhkon anggo sidea lang mangkargai habujuron ni Naibata, janah sonaha ujungni?

 ¹² Contoh na legan ai ma halak Israel. Sasintongni bahat do alasan ni sidea laho martarima kasih bani Jahowa. Ipaluah do sidea humbani parjabolonan dobkonsi ibahen Jahowa Sapuluh Tulah bani halak Masir. Sanggah iayaki tentara Masir sidea i Laut Sigerger, iripaskon Naibata do ganup tentara ai. Halani ai martarima kasih ma sidea bani Jahowa. Idodingkon sidea ma doding hamonangan laho mamuji-Si. Tapi, ai totap do sidea mangkargai habujuron-Ni ai?

¹³ Sanggah dong masalah, mintor lupa do sidea bani habujuron ni Naibata. Tangkas do ai taridah humbani pambahenan ni sidea. (Ps. 106:7) Bibel mangkatahon, “Marungut-ungut ma ganup tumpuan ni halak Israel dompak si Musa pakon si Aron.” Sasintongni dompak Jahowa do sidea marungut-ungut. (2 Mus. 16:2, 8) Halani ai gabe borit ma uhur ni Jahowa. Ipatugah Jahowa ma maningon matei do ganup halak Israel ai i padang gurun, sobali si Josua pakon si Kaleb. (4 Mus. 14:22-24; 26:65) Sonari ulas hita ma sonaha ase hita ulang songon sidea, janah sonaha hita boi maniru sidea na mambotoh martarima kasih.

14-15. (a) Ibagas kaluarga, sonaha suami istri patuduhkon tarima kasih? (b) Sonaha namatoras mangajari niombah ase mambotoh mangkatahon tarima kasih?

¹⁴ Ibagas kaluarga. Bahat do gunani anggo ganup anggota kaluarga patuduhkon tarima kasih. Anggo somal suami istri mangkatahon tarima kasih, lambin orot ma parhajabuan ni sidea. Anjaha lambin urah ma sidea marsisasapan dousa. Anggo suami mangkargai istrini, lang pitah ibotoh ia aha na dear na dob ibahen istrini. Tapi porlu do homa ia mamujisi. (Pod. 31:10, 28) Istri pe maningon ibotoh do aha na dear na ibahen suamini. Dob ai, hatahon ma tarima kasih bani suamini pasal ai.

¹⁵ Nasiam na matoras, sonaha nasiam mangajari niombah ase mambotoh mangkatahon tarima kasih? Dingat ma, aha na ibahen pakon na ihatahon nasiam do na itiru sidea. Halani ai, bahen ma sitiruon na dear. Ajari ma sidea ase mangkatahon tarima kasih anggo  dong na bujur bani sidea. Janah urupi ma sidea ase mangarusi maningon humbani borsih ni uhur do mangkorjahon ai. Sada hasomanta naboru na margoran si Clary mangkatahon, “Domma mabalu inang sanggah marumur 32 tahun. Sahalaksi ma pagodangkon ahu pakon dua botouhu. Dob marumur 32 tahun ahu, gabe huarusi ma sonaha boratni ia pagodangkon hanami. Jadi huhatahon ma hu bani tarima kasih banggal halani ganup pambahenanni laho pagodangkon hanami. Baru-baru on, ipatugah inang ma bangku harga tumang do na huhatahon ai. Gati do ipingkiri ia na huhatahon ai janah malas uhurni mardingat ai.”

16. Patugah ma sada contoh sonaha hita boi patoguhkon na legan.

¹⁶ Ibagas Kuria. Sipata dong do sanina botou na maretek ni uhur. Anggo ipuji hita sidea, gabe toguh ma uhurni. Ai ma na iahapkon si Jorge, sada sintua na marumur 28 tahun. Boritan do ia anjaha domma sabulan ia lang boi martumpu. Dobkonsi boi use roh martumpu, gabe mandolei ma ia halani lape boi mandalankon tugasni i kuria. Ia mangkatahon, “Huahap lang marguna be ahu halani lang boi hudalankon tugasku. Tapi dob salosei martumpu, dong sada sanina na manjumpahi ahu, nini ma, ‘Tarima kasih da sanina, bahat tumang do na boi iusihi hanami sakaluarga humbani ham. Ambilan na ipadas ham hinan, ai pe mangojur hanami sakaluarga. Halani ai ma gabe toguh hanami.’ Gabe tariluh ma ahu manangar ai. Pas tumang hatani ai bangku.”

17. Domu bani Kolosse 3:15, sonaha hita mangkargai sibere-bere humbani Jahowa?

¹⁷ Hubani Jahowa. Bahat tumang do pangajaran na ipasirsir Jahowa hubanta. Dong partumpuan, publikasi, ampa situs web. Ra do sanggah itangar ham ambilan, mambasa buku, atap pe manonton JW Broadcasting, gabe sonon ma ninuhurmu, ‘Aih sosok tumang bangku tene.’ Sonaha hita patuduhkon anggo hita mangkargai ganupan ai? (Basa Kolosse 3:15.) Sanggah martonggo, pasomal hita ma mangkatahon tarima kasih halani sibere-bere-Ni ai.​—Jak. 1:17.

18. Aha ope cara na legan laho mangkatahon tarima kasih bani Jahowa?

¹⁸ Cara na legan hita mangkatahon tarima kasih bani Jahowa marhitei manjaga  Balei Harajaon totap borsih. Dihut ma hita paborsihkon Balei Harajaon mangihutkon jadwal na iatur kuria. Pangkei ma manggunahon alat-alat elektronik na dong ijai. Anggo sonai ibahen hita, lang bahat na porlu ipadear. Halani otik pangaluaran hujai, gabe boi ma ipakei duitni laho padearhon atap pe pajongjongkon Balei Harajaon na legan i sab dunia on.

19. Aha do na boi iparlajari hita humbani pangalaman ni sada sintua kaliling pakon istrini?

¹⁹ Bani sanina botou na ibagas dinas sepenuh waktu. Anggo hita mamuji sanina botou, gabe pongkut ma sidea mandalankon tugasni hassi pe dong tantangan. Pardiateihon ma pangalaman ni sada sintua kaliling pakon istrini. Dobkonsi sadari bod marbarita, mulak ma sidea hu rumah. Musim dingin do ijia. Halani borgohni, maningon mamakei jaket na hapal ma istrini sanggah modom. Patarni ihatahon ia ma bani suamini lang sanggup be ia dihut bani horja kaliling. Hape patarni ai use, roh ma surat hun kantor cabang bani istrini. Ibagas surat ai, ipuji do istrini halani martahan ia ibagas tugasni. Iarusi sidea do lang urah pindah-pindah rumah tiap minggu. Suamini mangkatahon, “Tarojur tumang do istringku dobkonsi mambasa surat ai. Lang ongga be ipindo ia ase maronti hanami hun tugas kaliling. Gabe ia do na patoguhkon ahu sanggah ahu mangkatahon sihol maronti humbani tugasnami.” Ujungni totap do sidea mangidangi ibagas horja kaliling sadokah ompat puluh tahun lobih.

20. Aha ma na maningon ibahen hita bai ganup ari, janah mase?

²⁰ Jadi, andohar ma hita patuduhkon tarima kasih bai ganup ari. Ipatuduh hita ma ai marhitei parsahap ampa parlahounta. Bahat do halak i dunia on lang ibotoh martarima kasih. Anggo ra hita mangkatahon tarima kasih, ra do ai boi mangurupi halak na ibagas hasunsahan. Gabe toguh ma uhur ni sidea. Parhasomananta pe boi lambin orot. Na sipontingan, domma itiru hita Naibata Jahowa, Bapanta na parholong in.