1. Sonaha tolu Saksi Jahowa na ipatugah bani paragrap on patuduhkon anggo sidea setia bani Jahowa?

BAYANGKON ma tolu situasi na masa bani hasomanta. (1) Sada anak boru na marsikolah ope, ipindo guruni ma ia ase dihut bani ari raya ni sidea. Tapi halani ibotoh ia ai lang iharosuhkon Jahowa, dear ma ipatorang anggo ia lang boi dihut. (2) Sada garama na parmaila marbarita hun rumah hu rumah. Ibotoh ia ma rumah na laho ihartuki sidea ai rumah ni hasomanni na gati mangejek Saksi Jahowa. Hassi pe sonai totap do ia marbarita hujai. (3) Sada kopala kaluarga na mansarihon kaluargani. Ipindo bosni ma ia ase mambahen laporan na lang jujur. Anggo lang ra, ipakaluar ma ia hun parhorjaanni. Tapi dear ma ipatorang ia bani bosni anggo Jahowa mangindo ase jujur juakjuak-Ni janah sihol do ia manangihon titah ai.​—Rom 13:1-4; Heb. 13:18.

2. Sungkun-sungkun aha ma na laho iulas hita, janah mase?

² Humbani sidea na tolu ai ibotoh hita ma anggo sidea barani janah jujur. Tapi na sipontingan, ibotoh hita ma anggo sidea setia bani Jahowa. Halani ai ma ase lang ra sidea manlanggar titah ni Naibata. Tontu megah ma pangahap ni Jahowa mangidah sidea. Hita pe sihol do mambahen megah uhur ni Jahowa. Jadi bani artikel on iulas hita ma sungkun-sungkun on: Aha do artini setia? Mase hita maningon setia? Janah sonaha hita boi totap setia hassi pe ibagas situasi na sunsah?

3. (a) Sonaha hita patuduhkon anggo hita setia bani Jahowa? (b) Contoh aha do na mangurupi hita ase mangarusi artini setia?

³ Sonaha do caranta patuduhkon anggo hita setia bani  Jahowa? Maningon ihaholongi hita ma Ia humbani gok ni uhur janah horjahon hita ma na mambahen malas uhur-Ni. Bani bahasa aslini hata “setia” na igunahon ibagas Bibel boi do mangartihon gok janah lang martikas. * (3 Mus. 22:21, 22) Umpamani bani Titah ihatahon binatang na lang martikas do na boi igalangkon halak Israel bani Jahowa. Lang boi igalangkon sidea binatang na lang dong naheini, pinggolni, atap matani, sonai homa na boritan. Jadi binatang na sehat ma na maningon igalangkon sidea. (Mal. 1:6-9) Ase iarusi hita mase ibere Naibata titah sisonai, pardiateihon ma contoh on. Anggo hita sihol mamboli barang umpamani mamboli buah, buku, atap pe ugas-ugas, tontu na madear do ipilih hita. Lang ra hita mamboli barang ai anggo maseda age pe otik. Sonai ma na ipindo Jahowa banta. Ia sihol ase hita tongtong setia janah patuduhkon holong humbani gok ni uhurta.

4. (a) Mase halak na lang sempurna boi setia? (b) Domu bani Psalmen 103:12-14, aha do na iarusi Jahowa pasal manisia?

⁴ Tapi ai maningon sempurna do hita ase boi setia? Tontu lang. Sasintongni jolma na mardousa do hita janah bahat tumang do hasalahanta. Tapi ulang pala haru hita halani ai. Pardiateihon ma dua alasan. Na parlobei, lang hasalahanta ai na sai ididah Jahowa. Bibel mangkatahon, “Anggo ihira Ham ganup dousa, ale Jahowa, ise ma na tahan jongjong, ale Jahowa?” (Ps. 130:3) Ibotoh Ia do anggo hita lang gokan dear janah sirsir do Ia manasap hasalahanta. (Ps. 86:5) Na paduahon, iarusi Jahowa do hahuranganta janah lang ipindo Ia lobih humbani na tarbahen hita. (Basa Psalmen 103:12-14.) Jadi sonaha ma hita boi mambere na gok hu Bani?

5. Mase maningon ihaholongi hita Jahowa ase boi setia hu Bani?

⁵ Ase boi hita setia, maningon ipatuduh hita do holong bani Jahowa. Janah maningon do holong ai ipatuduh humbani gok ni uhurta. Anggo sonai holongta, boi do hita totap setia hassi pe dong parlajouan. (1 Kron. 28:9; Mat. 22:37) Dingat ma use tolu contoh humbani hasomanta nongkan ai. Aha do na mambahen sidea totap setia? Ai lang marosuh anak boru ai marsonang-sonang pakon hasomanni? Atap ai marosuh do garama na parmaila ai iejek hasoman sakalasni? Ai sihol do kopala kaluarga ai ipecat hun parhorjaanni? Tontu lang. Halani ibotoh sidea do prinsip ni Bibel janah sihol sidea mandalankon ai ase malas uhur ni Jahowa. Torang ma, holong do na mambahen sidea ase totap setia bani Jahowa.

6. (a) Mase hita maningon setia? (b) Mase si Adam pakon si Hawa lang setia bani Jahowa?

⁶ Mase ganupan hita maningon setia? Halani Sibolis domma manlawan dompak Naibata janah isangsihon ia do homa holongta bani Jahowa. Dingat ma aha na masa i pohon Eden. Ijia dong sada malekat na manlawan dompak Jahowa. Halani ai ma ase igoran ia Setan atap “Sipanlawan”. Ihatahon ia jahat do Jahowa ai janah lang parduli bani manisia. Dob ai iihutkon si Adam pakon si Hawa do Sibolis laho manlawan bani Jahowa. (1 Mus. 3:1-6) Sasintongni aha na idapot  sidea i pohon Eden boi patoguhkon holong ni sidea. Tapi halani lang humbani gok ni uhur sidea mangkaholongi Jahowa, gabe dihut ma sidea manlawan. Ra, gabe sungkun-sungkun ma hita ibagas uhur: Ai boi do manisia totap setia bani Jahowa anggo lang mangkaholongi-Si? Ongga do homa sonai isungkun Sibolis bani Jahowa pasal si Job.

7. Songon na ipatugah bani Job 1:8-11, sonaha do pangahap ni Jahowa pakon Sibolis mangidah si Job?

⁷ Si Job manggoluh sanggah halak Israel tading i Masir. Ijia lang dong jolma na setia songon si Job. Tongon jolma na lang gokan dear do si Job, janah dong do hasalahanni. Hassi pe sonai totap do Jahowa mangkaholongisi halani setia ia. Ra, halani ai gabe irisai Sibolis ma Jahowa. Nini Sibolis lang dong jolma na boi totap setia. Jadi ipatuduh Jahowa ma si Job, sahalak dalahi na tongtong marsijoloman hu Bani. Gabe ipindo Sibolis ma ase ilajou ia. Tapi porsaya do Jahowa bani si Job, hasoman-Ni ai. Halani ai ipaturut Ia ma Sibolis manlajou si Job.​—Basa Job 1:8-11.

8. Sonaha Sibolis manlajou si Job?

⁸ Kejam janah pamunuh do Sibolis. Ibuat ia ma ganup na dong bani si Job, artani, ampa jabolonni. Ibunuh homa sapuluh niombahni. Dob ai ibahen ma si Job hona puru atap bisul na parah humbani jampal ni naheini das hu pakpak ni uluni. Gabe mandolei tumang ma istrini. Jadi isuruh ia ma ase si Job mamurai Naibata janah matei. Gari si Job pe  sihol do uhurni matei. Hassi pe sonai tong do setia ia bani Naibata. Halani ai ibahen Sibolis ma cara na legan, ai ma marhitei tolu hasomanni. Jadi roh ma hasoman-hasomanni piga-piga ari laho mangidahsi. Tapi parroh ni sidea ai sedo na laho mangapoh si Job. Irisai sidea do ia, anjaha ihatahon do na lang tongon pasalsi. Umpamani, ihatahon sidea ma Naibata do na parohkon sitarononni ai, janah lang parduli Naibata age pe setia ia. Iagan sidea homa halani hasalahanni do ase sonai sitarononni!​—Job 1:13-22; 2:7-11; 15:4, 5; 22:3-6; 25:4-6.

9. Hassi pe marsik sitarononni, aha do na lang ibahen si Job?

⁹ Sonaha ma pangahap ni si Job manangar ai? Jolma na lang gokan dear do ia. Halani ai, gabe manggila ma ia janah lepak ma parsahapni. Ihatahon ia ma pintoran do dirini marimbangkon Naibata. (Job 6:3; 13:4, 5; 32:2; 34:5) Hassi pe sonai marsik ni sitarononni, tapi lang ra ia manlawan dompak Jahowa. Lang homa porsaya ia bani na ihatahon hasomanni ai. Nini do, “Antigan pe lang ra ahu mangkatahon paboa sintong hanima; ronsi matei ahu hupartahankon, paboa seng dong salahku.” (Job 27:5) Humbani na ihatahonni ai, gabe ibotoh hita ma tongtong do si Job setia bani Jahowa. Hita pe boi mangusihi si Job.

10. Sonaha tuduhan ni Sibolis dong kaitanni hubanta?

¹⁰ Sonaha tuduhan ni Sibolis dong kaitanni hubanta? Sasintongni, isangsihon Sibolis do holong ni ganup jolma bani Naibata. Ihatahon ia do anggo marsitaronon hita, gabe itadingkon hita ma Naibata. (Job 2:4, 5; Pangk. 12:10) Sonaha pangahapmu manangar ai? Ai lang borit uhurmu? Hassi pe sonai, tongtong ma dingat anggo Jahowa totap do porsaya hubanta, janah ibere do panorang banta laho mambuktihon parladung do Sibolis ai. Halani ai ipaturut Jahowa ma Sibolis manlajou hita. Tapi marjanji do Ia sai urupan-Ni do hita ase boi totap setia. (Heb. 13:6) Sada hasangapon do halani porsaya Pargogoh Na So Tarimbang in hubanta! Jadi ai domma iarusi nasiam mase ponting tumang ase totap setia? Anggo setia hita, gabe tarbukti ma parladung do Sibolis, gabe ipapansing ma goran ni Naibata, janah gabe tarbukti ma homa Jahowa do na talup mamarentah. Sonaha ase hita boi totap setia?

11. Aha ma na boi itiru hita humbani si Job?

¹¹ Bani “panorang parpudi” on, lambin bahat do parlajouan na ibahen Sibolis hubanta. (2 Tim. 3:1) Anggo sonai, aha ma na maningon bahenonta ase boi totap setia? Tiru hita ma si Job. Paima roh parlajouan, tongtong do idalankon si Job titah ni Naibata. On patuduhkon anggo ia setia. Jadi pardiateihon hita ma tolu parlajaran na boi mangurupi hita ase totap setia songon si Job.

12. (a) Songon na ipatugah bani Job 26:7, 8, 14, aha do na mambahen si Job gabe hormat bani Jahowa? (b) Aha do na porlu ibahen hita ase hormat bani Jahowa?

¹² Ipatoguh si Job do holongni bani Naibata marhitei mamingkirhon pambahenan-Ni na banggal. Gati do ipardiateihon si Job tompaon ni Jahowa. (Basa Job 26:7, 8, 14.) Longang tumang do uhurni sanggah mangidah langit, hombun, ampa longgur. Gabe iarusi ia ma bahat nari ope na lang ibotoh ia. Leganni ai, marosuh do ia  bani hata ni Naibata. Ai ma ase ihatahon ia, “Huparimbagaskon do hata na luar hun pamangan-Ni.” (Job 23:12) Gabe hormat janah holong ma uhurni bani Jahowa. Halani ai, sihol ma ia mambahen malas uhur-Ni. Marusaha do si Job ase tongtong setia bani Jahowa. Hita pe, porlu do mambahen na sisonai. Bahatan do sonari tompaon na boi iparlajari hita marimbangkon na boi iparlajari si Job hinan. Dong homa Bibel na mangurupi hita lambin mananda Jahowa. Ganupan on boi mambahen hita lambin hormat bani Jahowa janah mangkaholongi-Si humbani gok ni uhurta. Gabe tarojur ma hita manangihon-Si janah tongtong setia hu Bani.​—Job 28:28.

13-14. (a) Domu bani Job 31:1, aha do na patuduhkon anggo si Job unduk bani Naibata? (b) Sonaha hita boi maniru si Job?

¹³ Ase boi totap setia marusaha do si Job mandalankon parentah ni Naibata. Ibotoh si Job do anggo marusaha ia mandalankon parentah ni Naibata, ai do na mangurupi ia ase totap setia. Umpamani, halani domma marhajabuan, marusaha do ia ase lang manggoda naboru na legan. (Basa Job 31:1.) Sonari on pe bahat do na ibahen dunia on ase buei halak lalab mamingkirhon pasal seks. Songon si Job, ai marusaha do hita ase lang manggoda na lang pasanganta? Ai marusaha do hita ase lang mangidah aha pe na dong kaitanni pakon pornografi? (Mat. 5:28) Anggo tongtong hita manrajai diri janah mandalankon parentah ni Naibata, boi ma hita totap setia hu Bani.

¹⁴ Ibotoh si Job do homa lang marosuh Naibata anggo ibahen ia duit ai na sipontingan. Halani ai marusaha ma ia mangihutkon harosuh ni Naibata. Ibotoh ia do homa anggo holongan uhurni bani duit atap pe arta, gabe mardousa ma ia janah  iuhum Naibata. (Job 31:24, 25, 28) Sonari on pe, bahat do halak i dunia on na holongan bani duit atap pe arta. Tapi Bibel pasingatkon hita sedo duit atap arta na siporlunan. Anggo itangihon hita sipasingat ai gabe iurupi ma hita totap setia.​—Pod. 30:8, 9; Mat. 6:19-21.

15. (a) Pangarapan aha do na irimangi si Job na mangurupi ia ase totap setia? (b) Aha do gunani anggo irimangi hita pangarapan na ibere Jahowa?

¹⁵ Ase boi totap setia irimangi si Job do pangarapan na ibere Jahowa hu bani. Porsaya do ia anggo totap ia setia, ipardiateihon Naibata do ai. (Job 31:6) Hassi pe bahat sitarononni, pos do uhurni jaloonni do holi upah humbani Jahowa. Ai do na mangurupi ia totap setia. Janah tongon do ai. Malas do uhur ni Jahowa bani si Job halani totap ia setia. Hassi pe lang gokan dear si Job, ipasu-pasu Jahowa do ia lobih humbani mungkahni. (Job 42:12-17; Jak. 5:11) Ai porsaya do homa hita ibere Jahowa do holi banta pasu-pasu anggo totap setia? Seng ongga mubah Jahowa. (Mal. 3:6) Ipardiateihon Jahowa do hita anggo totap setia. Anggo idingat hita ai, gabe lambin porsaya ma hita bani pasu-pasu atap pe pangarapan na dob ibere Jahowa hubanta.​—1 Tes. 5:8, 9.

16. Aha do na sihol bahenonta?

¹⁶ Marusaha ma ase totap setia lang soal aha pe na masa! Sipata ra do pangahapta pitah hita dassa na marsitaronon. Tapi dong do marjuta halak juakjuak ni Naibata na marusaha ase totap setia, anjaha nasiam pe dihut ma sada. Songon juakjuak ni Naibata sapari, nasiam pe boi do totap setia hassi pe maningon matei. (Heb. 11:36-38; 12:1) Jadi, tiru hita ma si Job na totap setia bani Jahowa. Anggo totap hita setia, parohkon hasangapon do ai bani Jahowa ronsi sadokah ni dokah ni!