1. Aha ma na masa halani simburu abang-abang ni si Josep mangidah si Josep?

HASSI PE holong uhur ni si Jakob mangidah ganup anakni, tapi holongan do uhurni mangidah si Josep. Halani ai, sonaha ma pangahap ni abang-abang ni si Josep mangidah ai? Gabe simburu ma sidea janah sogam ma uhurni mangidah anggini ai. Sasintongni lang adong alasan ni sidea marsogam ni uhur hubani si Josep. Hassi pe sonai, ijual sidea ma ia gabe jabolon. Dob ai, ihatahon ma bani bapani anggo anak na hinaholonganni ai domma matei ipangan binatang panoroh. Jadi halani simburu, lang be damei kaluarga ai janah si Jakob pe gabe pusok tumang uhurni.​—1 Mus. 37:3, 4, 27-34.

2. Domu bani Galatia 5:19-21, mase bahaya tumang sifat simburu ai?

² Bani Bibel ihatahon tarmasuk “horja ni daging” na parohkon hamatean do sifat subil atap simburu. * Halak na simburu lang boi manean Harajaon ni Naibata. (Basa Galatia 5:19-21.) Somalni, halani simburu do mungkahni gabe adong parmunsuhan, partinggilan, ampa ringis.

3. Bani artikel on, aha do na laho iulas hita?

³ Humbani pambahenan ni abang-abang ni si Josep ai, taridah ma anggo biak simburu boi pasedahon parhasomanan ampa hadameion ibagas kaluarga. Hassi pe lang ihorjahon hita songon na ibahen sidea ai, tapi halani lang sempurna anjaha dong uhur na sipangoto-otoi, sipata gabe simburu do hita bani halak na legan. (Jer. 17:9) Halani ai, bani artikel on, iulas hita ma aha do na mambahen  sasada halak gabe simburu. Janah iulas hita homa sonaha hita mangambukkon ai, anjaha sonaha hita boi gabe siboan damei.

4. Mase halak Palistim simburu hubani si Isak?

⁴ Halani sasada halak bayak. Bayak tumang do si Isak. Halani ai, simburu ma halak Palistim mangidahsi. (1 Mus. 26:12-14) Gabe itutup sidea ma ganup parigi ni si Isak. Hape hunjai do ia mambere minum biribiri ampa lombuni. (1 Mus. 26:15, 16, 27) Songon halak Palistim ai, bahat do halak sonari na simburu mangidah halak na bayakan marimbangkon dirini. Lang pitah iharosuhkon ia habayakon ni halak ai. Tapi marosuh do ia ase halak na bayak ai gabe miskin.

5. Mase pambobai ugama simburu hubani Jesus?

⁵ Sanggah sasada halak iharosuhkon. Gabe simburu do pambobai ugama mangidah Jesus halani bahat halak marosuh hu bani. (Mat. 7:28, 29) Sinuruh ni Naibata do Jesus janah hasintongan do na iajarhon ia. Hassi pe sonai, ipararat sidea do ladung laho pasambor-samborhon Jesus. (Mrk. 15:10; Joh. 11:47, 48; 12:12, 13, 19) Aha ma parlajaranni hubanta? Anggo dong sasada halak na iharosuhkon i kuria halani dear pambahenan atap paruhuranni, ulang ma hita gabe simburu. Tapi marusaha ma hita mangusihisi.​—1 Kor. 11:1; 3 Joh. 11.

6. Halani simburu, aha ma na ibahen si Diotrepes?

⁶ Sanggah sasada halak mandapot tanggung jawab i kuria. Bani abad na parlobei, simburu do si Diotrepes hubani sanina na mambobahon i kuria. Sihol do ia gabe halak na “sigijangan” i kuria. Halani ai, ipasambor-sambor ia ma apostel Johannes pakon sanina na legan. (3 Joh. 9, 10) Hassi pe lang sonai pambahenanta, tapi sipata ra do simburu hita hubani sanina atap botou na mandapot tugas na iharosuhkon hita. Tarlobih ma sanggah iahap hita dearan do hita na mangkorjahon ai marimbangkonsi.

7. Aha do pangaruh ni simburu ai hubanta?

⁷ Usih songon suga-suga do simburu ai. Anggo domma marbanggal simburu ai ibagas uhurta, lambin sunsah ma hita mangambukkon ai. Biak na sambor songon subil, gijang ni uhur, ampa mamontingkon diri boi mambahen hita lambin simburu. Usih songon bunga na lang boi marbanggal halani ipisat suga-suga, sonai homa biak na madear songon holong, idop ni uhur, ampa habujuran, lang boi marbanggal ibagas uhur anggo simburu hita. Halani ai, mintor podas ma iambukkon hita simburu ai hun bagas uhurta. Sonaha carani?

8. Biak na sonaha na boi mangurupi hita mangambukkon simburu ai?

⁸ Boi do iambukkon hita simburu ai anggo martoruh ni uhur hita janah mangkasonangkon na dong banta. Anggo tongtong ipatuduh hita ai, gabe lang ra be hita simburu. Sahalak na toruh maruhur lang ihira gijangan dirini marimbangkon halak na legan. (Gal. 6:3, 4) Anjaha halak na mangkasonangkon na dong, lang ra mambandingkon dirini pakon na legan. (1 Tim. 6:7, 8) Malas do uhurni sanggah ididah ia halak na legan mandapot na madear.

9. Domu bani Galatia 5:16 pakon Pilippi 2:3, 4, sonaha tonduy na pansing boi mangurupi hita?

⁹ Maningon iurupi tonduy na pansing  do hita ase boi mangambukkon simburu, patuduhkon toruh ni uhur, ampa mangkasonangkon na dong. (Basa Galatia 5:16; Pilippi 2:3, 4.) Marhitei tonduy-Ni, iurupi Naibata do hita mamareksa aha na dong ibagas uhur ampa pingkiranta. Dob ai, gabe boi ma hita mangambukkon pingkiran na sambor janah totap mamingkirhon na madear. (Ps. 26:2; 51:12) Paruhurhon hita ma siusihan humbani si Musa pakon si Paulus na marhasil mangambukkon uhur na simburu.

10. Sonaha si Musa patuduhkon anggo ia lang parsimburu? (Tonggor ma gambar sampul.)

¹⁰ Bahat do tanggung jawab ni si Musa. Tapi lang ilanglangi ia halak na legan laho mandapot tanggung jawab ai. Umpamani, bani sada panorang ibuat Jahowa ma deba humbani tonduy-Ni na sogop hubani si Musa, janah ibere hubani pangintuai ni Israel na jongjong i dohor ni lampo-lampo. Lang piga dokah dobkonsi ai, itangar si Musa ma dong dua pangintuai na lang dihut martumpu hujai, mandapot tonduy na pansing janah marparlahou songon nabi. Aha ma na ibahen si Musa sanggah ihatahon si Josua ase ilarang sidea? Lang simburu si Musa halani ibere Jahowa tonduy-Ni bani sidea. Tapi toruh maruhur anjaha malas do homa uhurni halani sidea boi manjahai. (4 Mus. 11:24-29) Aha ma na boi iparlajari hita?

11. Sonaha sintua boi mangusihi si Musa?

¹¹ Anggo sintua do ham, ongga do ham ipindo ase manlatih sanina i kuria laho mangkorjahon tugas na iharosuhkon ham? Umpamani, marosuh do ham mambobahon parlajaran Ambilan na Madear tiap minggu. Tapi anggo toruh maruhur ham songon si Musa, tontu lang borit uhurmu anggo ipindo ham manlatih sanina na legan mangkorjahon tugas ai, ase boi ia dear mambobahon i pudian ni ari. Anjaha malas do uhurmu mangurupisi.

12. Sonaha sanina botou patuduhkon toruh ni uhur ampa mangkasonangkon na dong?

¹² Pardiateihon ma situasi na legan. Sadokah martahun-tahun, bahat do sanina na mangidangi gabe koordinator badan penatua. Tapi dob marumur 80 tahun sidea, maningon ra ma sidea mambere tugas ai bani na legan. Sintua kaliling na marumur 70 tahun pe, toruh maruhur do mambere tugasni ase ihorjahon sanina na legan. Janah sirsir do sidea manjalo tugas na baru ibagas pangidangion. Baru-baru on, bahat do anggota Betel i sab tanoh on na itugaskon hu lapangan. Lang borit uhur ni sidea mangidah sanina botou na legan na sonari mangkorjahon tugas ni sidea hinan.

13. Aha do na boi mambahen si Paulus gabe simburu bani 12 apostel?

¹³ Contoh na legan na patuduhkon toruh ni uhur janah mangkasonangkon na dong ai ma apostel Paulus. Lang ra ia simburu. Hassi pe ringgas ibagas pangidangion, tapi toruh maruhur do ia mangkatahon, “Ahu do sietekan humbani apostel in, na seng talup namin goranon apostel.” (1 Kor. 15:9, 10) Sanggah Jesus mangidangi i tanoh on, sai iirikkon 12 apostel ai do ia. Tapi ijia lape gabe halak Kristen si Paulus. Jadi, hassi pe si Paulus itugaskon gabe apostel bani buei bangsa, tapi lang tarmasuk ia bani na 12 apostel ai. (Rom 11:13; Lah. 1:21-26) Hassi pe sonai, lang simburu si Paulus bani 12 apostel na orot bani Jesus, tapi ihasonangkon ia do tugasni.

14. Anggo toruh maruhur hita janah mangkasonangkon na adong, aha ma na ibahen hita?

¹⁴ Anggo toruh maruhur hita janah mangkasonangkon na adong, itiru hita  do si Paulus. Ihargai hita do halak na mandapot tanggung jawab humbani Jahowa. (Lah. 21:20-26) Domma ipilih Ia ase dong sintua na mambobahon i kuria. Hassi pe lang sempurna, tapi “sibere-bere bani jolma” do sidea ai ididah Jahowa. (Ep. 4:8, 11) Anggo ihargai hita sidea janah ra mandalankon tugah-tugah na ibere sidea, lambin orot ma hita pakon Jahowa janah mardamei ma hita pakon sanina botou.

15. Aha ma na maningon ibahen hita?

¹⁵ Lang dong hadameion anggo simburu hita atap dong na simburu hubanta. Jadi maningon podas ma iambukkon hita ai hun bagas uhurta ase ulang marbanggal. Anggo ihorjahon hita ai, gabe boi ma “iparayak hita na padameihon ampa na patorsa-torsahon hita samah hita”, songon na dob iparentahkon Jahowa. (Rom 14:19) Sonaha hita mangurupi hasoman mangambukkon uhur na simburu, janah sonaha ase hita boi gabe siboan damei?

16. Sonaha hita boi mangurupi hasoman ase ulang simburu?

¹⁶ Banggal do pangaruhni aha na ihatahon ampa na ihorjahon hita hubani halak na legan. Dunia on marosuh ase hita “mangenjengkon” aha na dong banta. (1 Joh. 2:16) Tapi patubuhkon simburu do parlahou sisonai. Ase lang simburu halak hubanta, ulang ma sai ipatugah-tugah hita aha na dong banta, atap pe aha na laho iboli hita. Leganni ai, totap ma hita martoruh ni uhur sanggah ibere tanggung jawab  i kuria. Anggo sai isaritahon hita aha na dob ihorjahon hita, on ma na mambahen halak gabe simburu. Tapi anggo ipardiateihon hita na porlu bani hasoman, janah ipuji hita aha na madear na ibahen sidea, gabe ihasonangkon sidea ma aha na dong bani. Hasilni, gabe marsada ma hita janah dong hadameion i kuria.

17. Hamubahon aha ma na dob ibahen abang ni si Josep, janah aha ma hasilni?

¹⁷ Sonaha hita boi mangambukkon uhur na simburu? Pingkirhon ma aha na ibahen abang-abang ni si Josep. Martahun-tahun dob ibahen sidea na jahat bani si Josep, jumpah ma use sidea i Masir. Paima ipatugah si Josep ise do ia sasintongni, iuji ia ma lobei abangni ai laho mangidah domma mubah sidea atap lang. Iarahkon ia ma ganup saninani ai mangan. Tapi bahatan do sipanganon na ibere ia hubani si Benjamin, anggini. (1 Mus. 43:33, 34) Hassi pe sonai, lang simburu abangni ai hubani si Benjamin. Ipatuduh sidea do holongni hubani anggini ampa bani si Jakob, bapani. (1 Mus. 44:30-34) Halani lang be simburu, gabe mardamei ma use sidea. (1 Mus. 45:4, 15) Sonai homa hita anggo marusaha hita mangambukkon uhur na simburu, gabe totap ma dong hadameion ibagas kaluarga ampa i kuria.

18. Domu bani Jakobus 3:17, 18, aha do hasilni anggo marusaha hita gabe siboan damei?

¹⁸ Jahowa sihol ase hita mangambukkon uhur na simburu janah gabe halak siboan damei. Jadi maningon marusaha ma hita mangkorjahon ai. Songon na dob iulas hita bani artikel on, sipata ra do simburu hita bani na legan. (Jak. 4:5) Janah bahat do halak i dunia on na patuduhkon biak sisonai. Tapi anggo marusaha hita patuduhkon toruh ni uhur, mangkasonangkon aha na dong, anjaha mangkargai halak na legan, gabe lang be simburu hita. Tapi gabe halak siboan damei do hita. Ujungni, lambin urah ma hita patuduhkon biak na madear.​—Basa Jakobus 3:17, 18.