1-2. Sonaha Jahowa mambahen dalan ase hita boi gabe kaluarga-Ni, janah mase?

JAHOWA mangontang hita ase gabe bagian humbani kaluarga-Ni janah manombah-Si. Tontu malas uhurta manjalo ontangan ai. Ganup halak na dob gabe kaluarga ni Naibata domma mangondoskon diri hu Bani janah porsaya bani tobusan ni Jesus. Halani ai, gabe martuah do ganupan hita. Sonari boi do hita marmalas ni uhur janah dong pangarapan manggoluh sadokah ni dokahni i surga atap pe i tanoh on.

² Halani holong ni uhur ni Jahowa, ibahen Ia do dalan ase boi hita gabe kaluarga-Ni. (Joh. 3:16) Marhitei tobusan, hita boi marhasoman orot pakon-Si. Jadi “harga do [hita] itobus”. (1 Kor. 6:20) Hassi pe Ia Naibata Pargogoh Na So Tarimbang, tapi boi do hita mandilo Ia Bapa. Janah songon na dob iulas hita bani artikel na salpu, Jahowa do Bapa na sidearan.

3. Sungkun-sungkun aha do ra na dong ibagas uhurta? (Tonggor ma kotak “ Ai Tongon do Itanda Jahowa Ahu?”)

³ Songon panurat ni Bibel, ra do sungkun-sungkun hita ibagas uhurta, “Naha ma pambalasku bani Jahowa, halani haganup pambahenan-Ni bangku?” (Ps. 116:12) Sasintongni lang tarbalas hita habujuran-Ni ai. Hassi pe sonai, marusaha do hita patuduhkon holongta hu Bani. Apostel Johannes manurat, “Maruhur holong ma hita, ai parlobei do Ia mangkaholongi hita.” (1 Joh. 4:19) Jadi sonaha ma carani hita patuduhkon holong hu Bani?

4. Domu bani Jakobus 4:8, mase hita sihol marhasoman pakon Jahowa?

⁴ Sihol do Jahowa ase hita dohor hu Bani anjaha marbuali  pakon-Si. (Basa Jakobus 4:8.) Iojur do hita ase tongtong martonggo. (Rom 12:12) Lang ongga Ia loja atap sibuk laho manangihon tonggonta. Sadihari pe hita martonggo, sirsir do Ia manangihon. Hita pe porlu manangihon hata-Ni marhitei mambasa Bibel ampa publikasinta. Itangihon hita do homa Ia anggo dear hita manangihon i partumpuan. Usih songon dakdanak na dohor pakon namatorasni halani gati marbuali, sonai homa ma hita gabe dohor bani Jahowa anggo gati marbuali pakon-Si.

5. Sonaha do dearni hita martonggo?

⁵ Rimangi ma sonaha do tonggo ni nasiam. Sanggah hita martonggo, sihol do Jahowa ase ipatugah hita ganup na ibagas uhurta. (Ps. 62:9) Jadi pingkirhon ma sungkun-sungkun on: ‘Sanggah martonggo ahu, ai lalab do sarupa na huhatahon songon na manghapal, atap hun bagas uhur do luar na huhatahon ai?’ Tontu holong tumang do nasiam bani Jahowa janah sihol patoguhkon parhasomananmu pakon-Si. Ase boi sonai, maningon tongtong ma nasiam marbuali pakon-Si. Patugah ma hu Bani sonaha pangahapmu, mase malas uhurmu, atap aha na mambahen pusok uhurmu. Pos ma uhurmu boi do nasiam mangindo pangurupion-Ni.

6. Sonaha ase totap hita dohor bani Bapanta na i surga ai?

⁶ Ase boi totap dohor bani Bapanta in, maningon tongtong ma hita martarima kasih. Dos songon panurat ni psalmen ma pangahapta. Ia manurat, “Buei do halongangan ampa ranggian-Mu, na dob binahen-Mu bennami, Ham Jahowa Naibatangku; seng adong na songon Ham. Porini sihol ambilankononku atap baritahononku ai, seng targorani ibahen bueini.” (Ps. 40:6) Tapi lang sungkup pitah mangkatahon tarima kasih. Maningon ipatuduh hita do homa ai marhitei parsahap ampa parlahounta. On patuduhkon legan do hita pakon buei halak i dunia on. Bahatan do halak sonari lang mangkargai aha na dob binahen ni Naibata bani sidea. Dos songon na ihatahon Bibel, bahat do halak na so mambotoh martarima kasih. On ma tanda anggo hita manggoluh bani “panorang parpudi”. (2 Tim. 3:1, 2) Ulang ma iihutkon hita parlahou ni sidea ai.

7. Aha do na iharosuhkon Jahowa, janah mase?

⁷ Lang adong namatoras marosuh mangidah niombahni martinggili. Sonai homa ma Jahowa sihol do Ia ase ganup anak-Ni mardamei. Anggo marsihaholongan hita, taridah ma anggo hita halak Kristen. (Joh. 13:35) Tontu setuju do hita bani na ihatahon panurat ni psalmen on, “Naha dearni ampa naha jengesni, anggo rap hundul na marsanina.” (Ps. 133:1) Anggo ihaholongi hita sanina botou, on patuduhkon holong do homa hita bani Jahowa. (1 Joh. 4:20) Malas tumang uhurta halani boi marsada pakon sanina botou na ‘basar anjaha paridop ni uhur’!​—Ep. 4:32.

8. Domu bani 1 Johannes 5:3, mase hita unduk hubani Jahowa?

⁸ Jahowa sihol ase dakdanak mambalosi namatorasni. Sihol do homa Ia ase hita manangihon-Si. (Ep. 6:1) Maningon unduk do hita hu Bani halani Ia do Sitompa hita janah pentaran do Ia marimbangkon ise pe. Tapi na sipontingan mase hita unduk hu Bani halani hita mangkaholongi-Si. (Basa 1 Johannes 5:3.) Hassi pe bahat alasan  mase hita maningon unduk hu Bani, tapi lang ipaksa Ia hita mangkorjahon ai. Ibere do hubanta habebason laho mamilih, anjaha malas do uhur-Ni anggo hita unduk hu Bani halani mangkaholongi-Si.

9-10. Mase ponting ibotoh hita aturan ni Jahowa janah mandalankon ai?

⁹ Sihol do namatoras mambahen na madear hubani niombahni. Halani ai ma ase ibahen sidea aturan laho manlinggomi niombahni. Anggo itangihon niombah namatorasni, on patuduhkon porsaya janah hormat do sidea bani namatorasni. Tarlobih ma hita, ponting tumang do ase ibotoh hita aturan ni Bapanta na i surga in janah mandalankon ai ibagas goluhta. Anggo sonai ibahen hita, on patuduhkon holong anjaha hormat do hita bani Jahowa. Marguna do ai hubanta. (Jes. 48:17, 18) Tapi bahat do halak i dunia on gabe sunsah hagoluhanni halani lang ra manangihon Jahowa.​—Gal. 6:7, 8.

¹⁰ Anggo idalankon hita aturan ni Jahowa, gabe sehat ma hita, damei pangahapta, janah lambin orot ma hita hu Bani. Jahowa do na mambotoh na sidearan hubanta. Si Aurora na tading i Amerika Serikat mangkatahon, “Domma huahapkon anggo hutangihon Jahowa, martuah do goluhku.” Tongon do ai. Ai dong do gunani na iahapkon ham halani mandalankon aturan ni Jahowa?

11. Sonaha tonggo boi mangurupi hita?

¹¹ Sipata ra do lang urah manangihon Jahowa halani ganupan hita mardousa. Halani ai martonggo ma mangindo  pangurupion-Ni. Mangelek do panurat ni psalmen hubani Naibata, “Paruhuri Ham ma ahu ase huramotkon undang-undang-Mu, anjaha hudalankon ai humbani gok ni uhur.” (Ps. 119:34) Si Denise, sahalak parintis biasa mangkatahon, “Sanggah dong parentah ni Jahowa na huahap lang tarhorjahon, martonggo ma ahu ase ipargogohi mangkorjahon ai.” Pos do uhurta ibalosi Jahowa do tonggo sisonai.​—Luk. 11:9-13.

12. Domu bani Epesus 5:1, aha ma na maningon ibahen hita?

¹² Basa Epesus 5:1. Halani “anak na hinaholongan” ni Jahowa do hita, maningon marusaha ma hita maniru Ia. Itiru hita do Ia anggo hita marsihaholongan, bujur, anjaha marsisasapan dousa. Anggo ididah halak na legan ai, ra do gabe tarojur sidea mananda Naibata. (1 Ptr. 2:12) Maningon marusaha do namatoras mangkaholongi niombah songon Jahowa mangkaholongi hita. Anggo itiru namatoras Jahowa, ra do homa niombahni sihol paorotkon parhasomananni pakon Bapa na parholong in.

13. Aha do na porlu ibahen hita ase barani?

¹³ Somalni megah do pangahap ni dakdanak mangidah bapani. Janah marosuh do ia mansaritahon pasal ai bani hasomanni. Hita pe megah do pangahapta bani Bapanta na i surga janah sihol do  hita ase halak na legan mananda-Si. Dos do pangahapta songon pangahap ni Raja Daud na manurat, “Marhitei Jahowa do marmegah-megah tonduyhu.” (Ps. 34:3) Tapi sonaha porini mabiar hita? Sonaha ase hita gabe barani? Hita boi lambin barani anggo ibayangkon hita malas uhur ni Jahowa anggo ra hita mansaritahon pasal-Si bani na legan, janah halak na legan pe boi martuah halani marlajar pasal-Si. Ibere Jahowa do habaranion hubanta. Iurupi Ia do halak Kristen bani abad na parlobei. Tontu ra do homa Ia mangurupi hita sonari on.​—1 Tes. 2:2.

14. Mase maningon iambilankon hita barita na madear?

¹⁴ Naibata na so sitonggor jumbak do Jahowa ai. Tontu marosuh do Ia anggo hita patuduhkon holong bani na legan lang soal hunja asal ni sidea. (Lah. 10:34, 35) Cara na sidearan hita patuduhkon holong ai ma marhitei marbarita bani halak na legan. (Mat. 28:19, 20) Aha hasilni? Anggo ra sidea manangihon, lambin martuah ma goluhni. Janah bani ari simagira, dapot sidea ma hagoluhan na sadokah ni dokahni i Paradeiso.​—1 Tim. 4:16.

15-16. Aha do na mambahen hita marmalas ni uhur?

¹⁵ Bapa na parholong do Jahowa. Halani ai, sihol do Ia ase martuah hita. (Jes. 65:14) Sonari on, bahat do na mambahen hita marsitaronon. Hassi pe sonai, totap do hita boi marmalas ni uhur. Umpamani, pos do uhurta anggo Jahowa mangkaholongi hita. Iajarhon do hasintongan ni Bibel hubanta. (Jer. 15:16) Gabe sada kaluarga do hita pakon ganup halak na mangkaholongi Jahowa ampa aturan-Ni. Anjaha marsihaholongan do homa ganup hita.​—Ps. 106:4, 5.

¹⁶ Marmalas ni uhur do homa hita mambotoh lambin dear do hagoluhanta bani ari simagira. Lang piga dokah nari, iripaskon ma ganup parjahat. Marhitei Harajaon ni Naibata, ipadear ma sab tanoh on gabe Paradeiso. Sanggah ai, ipapuho do holi halak na matei. Tontu malas do uhurta halani boi pajumpah use pakon na hinaholonganta. (Joh. 5:28, 29) Tapi na sipontingan, pos do uhurta anggo tongkin nari ganup na i surga ampa na i tanoh on manombah anjaha mamuji Jahowa, Bapa na parholong in.