Ahu tubuh i Quebec City, sada provinsi i Kanada na marsahap Prancis. Si Louis pakon si Zélia, namatorasku, bujur anjaha holong tumang do bangku. Parmaila do bapangku anjaha marosuh ia mambasa. Anggo ahu marosuh do manurat janah marcita-cita do ahu gabe sahalak wartawan.

Sanggah marumur 12 tahun ahu, roh ma hasoman sahorja ni bapangku hu rumahnami, ai ma si Rodolphe Soucy pakon hasomanni. Saksi Jahowa do sidea. Lang sai hubotoh ise do Saksi Jahowa. Lang homa sihol ahu mambotoh ugama ni sidea. Tapi longang do uhurhu mangidah cara ni sidea manggunahon ayat-ayat ni Bibel sanggah mambalosi sungkun-sungkunnami. Sonai do homa pangahap ni namatorasku. Halani ai gabe ra ma hanami marlajar Bibel pakon sidea.

Sanggah ai, marsikolah i sikolah Katolik do ahu. Bani sada panorang, husaritahon ma na huparlajari hun Bibel hubani hasoman i kalas. Ujungni, ibotoh guru-guru ma ai. Pastor do sidea. Tapi lang adong igunahon sidea ayat ni Bibel laho patuduhkon anggo na huhatahon ai salah. Tapi sanggah i kalas, dong ma sada guru na mangkatahon anggo ahu sahalak panlawan. Hassi pe borit uhurhu sanggah ai, tapi dong do gunani situasi ai bangku. Gabe hubotoh ma anggo na iajarhon sikolah ai lang sosok pakon na iajarhon Bibel. Nini uhurhu ma maningon kaluar do ahu hunjai. Jadi dob huhatahon ai bani namatorasku, pindah ma ahu hu sikolah na legan.

Hassi pe tongtong ahu marlajar Bibel, tapi dokah do ahu mambahen hamajuon halani mabiar marbarita hun rumah hu rumah. Banggal do pangaruh ni Gareja Katolik i ianannami. Janah marusaha do sidea  manlarang horja parambilanonta. Ijia, si Maurice Duplessis do na gabe Perdana Menteri i Quebec. Janah rap marhorja do ia pakon ganup gareja laho mangojur buei halak ase manlawan Saksi-Saksi Jahowa. Sanggah ai, maningon barani do sahalak Saksi marbarita.

Dong sada hasomanta na margoran si John Rae. Lulusan Sikolah Gilead kalas na pasiahkon do ia. Toruh maruhur, lamlam, anjaha basar do halakni. Bahat do pangalamanni, janah ia ma na  mangurupi ahu ase lambin barani. Gati do ia mamodahi ahu. Tapi, bahatan do pambahenanni na boi hutiru. Halani lang sai ibotoh ia marsahap Prancis, gati ma ahu mangkasomanisi sanggah marbarita. Halani gati rap mangidangi pakonsi, tarojur ma ahu gabe sahalak Saksi Jahowa. Ujungni, sapuluh tahun dob parlobei sahali ahu jumpah pakon Saksi Jahowa, ididi ma ahu bani tanggal 26 Mei 1951.

Hassi pe etek kurianami, tapi bahatan do hasoman na merintis. On ma na mangojur ahu ase gabe perintis homa. Ijia, pitah Bibel do na igunahon hanami sanggah marbarita hun rumah hu rumah. Halani lang dong publikasi na boi ibagihon sanggah marbarita, maningon pentar ma hanami mamakei ayat ni Bibel. Halani ai, marusaha ma ahu mangarusi isi ni Bibel ase boi ahu mangajarhon hasintongan. Tapi ijia, bahat do halak na lang ra mambasa Bibel sobali na iluarhon Gareja Katolik.

Tahun 1952, marhajabuan ma ahu pakon si Simone Patry. Sakuria do hanami. Dob ai, pindah ma hanami hu Montreal. Dob satahun, tubuh ma si Lise, borunami. Lang piga dokah paima marhajabuan, lang be merintis ahu. Hassi pe sonai, dob marhajabuan, isederhanahon hanami ma goluhnami ase boi mangurupi kuria ampa kaluarga.

Salpu ma sapuluh tahun, tapi lape ongga hupingkiri laho merintis use. Tahun 1962, dihut ma ahu bani Sekolah Pelayanan Kerajaan na ibahen i Betel Kanada. Dokahni sikolah ai sabulan. Sakamar do ahu pakon hasomanta si Camille Ouellette. Longang do uhurhu mangidah haringgasonni marbarita, hape sahalak kopala kaluarga do homa ia. Ijia, otik dassa sanina botou i Quebec na totap merintis dobkonsi marniombah. Tapi ai do na isura-surahon si Camille. Sadokah rap hanami, iojur ia do ahu ase merintis use. Dob piga-piga bulan, ujungni  huputuskon ma laho merintis use. Piga-piga hasoman mangkatahon lang dear haputusan na hubahen ai. Hassi pe sonai, totap do hudalankon haputusankai. Pos do uhurhu sai iurupi Jahowa do ahu.

Tahun 1964, itugaskon ma hanami gabe perintis istimewa i Quebec City, hutanami. Ijai ma hanami mangidangi sadokah piga-piga tahun. Sanggah ai, domma lambin dear situasini hassi pe dong ope na mangkasogamkon Saksi.

Sada panorang, ari Sabtu bod ni ari, itangkap ma ahu i Sainte-Marie, sada kota na etek dohor hun Quebec City. Iboan sahalak petugas ma ahu hu kantor polisi janah ipenjarahon ma ahu halani marbarita hun rumah hu rumah. Dob ai, iboan ma ahu manjumpahi sahalak hakim na margoran si Baillargeon. Isungkun ia ma ise do na gabe pengacaraku. Sanggah husobut goran ni si Glen How, * mabiar ma ia janah ihatahon, “Ulang! Ulang ia!” Ijia, itanda do Sanina Glen ai sahalak pengacara na gati monang i pangadilan sanggah mambela Saksi Jahowa. Lang piga dokah dobkonsi ai, ibebaskon ma ahu.

Halani bahat halak lang marosuh bani Saksi Jahowa, gabe sunsah ma hanami mangindahi ianan partumpuan na laho isewa. Pitah sada gudang na lang dong pemanas ruanganni ma na dapotnami. Jadi sadokah musim dingin, ase ulang borgohan hanami, ibahen sanina-sanina ma pemanas ruangan na manggunahon minak. Piga-piga jam paima martumpu, gati do hanami marbuali janah mandadang dohorhon pemanas ai laho mansaritahon pangalaman na patoguhkon uhur.

Malas tumang uhur boi mangidah sonaha horja parambilanon ijon ipasu-pasu. Bani tahun 1960-an, otik dassa kuria i Quebec City. Ipasada do wilayah Côte-Nord pakon Gaspé Peninsula. Tapi sonari dong lobih dua wilayah ijon, janah sanina botou pe domma martumpu i Balei Harajaon.

Tahun 1970, itugaskon ma hanami gabe sintua kaliling. Dob ai tahun 1973, itugaskon ma hanami gabe pengawas distrik. Sadokah martahun-tahun, bahat do ahu marlajar humbani sanina-sanina na marpangalaman, songon si Laurier Saumur pakon si David Splane. * Sintua kaliling do homa sidea. Somalni, dob salosei kebaktian, gati do ahu marbuali pakon si David pasal sonaha ase lambin pandei hanami mangajari. Hudingat ongga do ihatahon si David sonon bangku, “Léonce, marosuh do ahu manangar ambilanmu nongkan ai da. Dear do ai. Tapi anggo ahu ambia, boi do hubahen ai gabe tolu ambilan.” Mabahattu do na hupatorang bani ambilanku. Jadi, porlu do ahu marlajar sonaha ase pondok ambilanku tapi tangkas iarusi.

Itugaskon do pengawas distrik laho patoguhkon sintua kaliling. Tapi bahat do parbarita i Quebec na mananda ahu. Jadi sanggah roh  ahu hu wilayah ai, gati do iarahkon sidea  ahu laho marbarita. Jadi gabe hurang ma panorang na hubere bani sintua kaliling halani marosuh ahu mangidangi pakon sidea. Bani sada ari, dong sada sintua kaliling na dear pasingatkon ahu. Nini do, “Dear do anggo ibere ham panorang bani sanina ijon. Tapi ulang ham lupa anggo ham roh hujon laho manjumpahi ahu do kan. Ahu pe porlu do ipatoguh.” Humbani sipasingat na dear ai, gabe marlajar do ahu mangatur panorang.

Tahun 1976, lang husangka boritan ma si Simone, istringku ai. Dob ai, marujung goluh ma ia. Pusok tumang uhurhu. Gabe istri na bujur tumang do ia bangku halani lang mangkaporluhon dirini sandiri, janah holong tumang do ia bani Jahowa. Age pe pusok uhurhu, tapi boi do ahu martahan halani ringgas ibagas pangidangion. Martarima kasih do homa ahu bani Jahowa halani sai urupan-Ni do ahu. Dob ai, marhajabuan ma use ahu pakon si Carolyn Elliott. Ia sahalak perintis na marbahasa Inggris, na roh hu Quebec laho mangidangi ijon. Basar do si Carolyn janah parduli bani na legan, tarlobih hubani halak na parmaila. Banggal tumang do pangurupionni bangku sadokah ahu gabe sintua kaliling.

Bani bulan Januari 1978, ibahen ma Sekolah Dinas Perintis na parlobei i Quebec. Janah itugaskon ma ahu ase mangajar i sikolah ai. Mabiar do ahu mungkahni halani lape ongga ahu dihut bani sikolah ai. Gari bukuni pe lang ongga huidah. Jadi songon na baru do huahap ganupan. Sonai do homa pangahap ni murid-muridni. Tapi untung ma, bahat do perintis na marpangalaman dihut bani sikolah ai. Hassi pe ahu guruni, tapi bahat do homa na boi huparlajari humbani sidea.

Dob ai, bani tahun 1978, ibahen ma Kebaktian Internasional i Stadion Olimpiade Montreal na marjudul “Iman yang Berkemenangan”. On ma kebaktian na sibanggalan na ongga ibahen i  Quebec. Dong lobih 80.000 halak na roh. Itugaskon ma ahu bani Departemen Layanan Berita. Marsahapi ma ahu pakon bahat wartawan. Malas tumang uhurhu halani bahat na madear na isurat sidea pasal Saksi Jahowa. Iwawancarai ma hanami janah ibahen ma ai gabe acara i TV pakon i Radio. Lobih do 20 jam ai iputar. Dong homa marratus artikel na isetak sidea. Sada hasaksian na jenges tumang do on.

Tahun 1996, dong ma parubahan na banggal. Humbani na ididi ahu, tong do i kuria na marsahap Prancis ahu mangidangi. Tapi on, itugaskon ma ahu hu distrik Toronto, ianan na marbahasa Inggris. Sompat do mabiar ahu padaskon ambilan halani lang sai hubotoh marbahasa Inggris. Lambin gati ma ahu martonggo janah marondos bani Jahowa.

Sanggah parlobei sahali mandapot tugas hu Toronto, mabiar tumang do ahu. Tapi dob ai, malas tumang uhur sadokah dua tahun mangidangi ijai. Sabar do si Carolyn mangurupi ahu ase lambin dear marbahasa Inggris. Sanina botou ijai pe sirsir do mangurupi janah patoguhkon ahu. Mintor podas do dapotnami hasoman na baru ijai.

Sobali mambahen persiapan laho kebaktian, tiap ari Jumat, gati do hupasirsir panorangku sajam laho marbarita hun rumah hu rumah. Ra do adong hasoman na marpingkir, ‘Ai mase pala laho marbarita, hape laho kebaktian ma on.’ Huahap gabe ipatoguh do uhurhu anggo laho ahu marbarita. Ronsi sonari pe, tong do malas uhurhu dob mulak marbarita.

Tahun 1998, itugaskon ma ahu pakon si Carolyn gabe perintis istimewa hu Montreal. Sadokah martahun-tahun, tugasku ai ma mangatur parambilanon i ianan na irohi buei halak. Rap marhorja do homa ahu pakon wartawan laho mambere hatorangan pasal ise do Saksi Jahowa sasintongni. Malas uhurnami boi marbarita hubani halak na baru pindah hu Kanada, pakon hubani halak na rosuh marlajar Bibel.

Jadi sadokah 68 tahun ahu mangidangi Jahowa, banggal do pasu-pasu na huahapkon. Malas tumang uhurhu halani lang be mabiar marbarita, janah boi mangurupi bahat halak mananda hasintongan. Si Lise borungku ai pakon suamini pe, gabe perintis biasa do homa dob magodang niombah ni sidea. Malas do uhurhu mangidah haringgason ni sidea ibagas pangidangion. Martarima kasih do homa ahu halani siusihan na madear na ipatuduh sanina botou, sonai homa bani podah na ibere sidea. Ganupan ai boi patoguhkon parhasomananku pakon Jahowa janah mangurupi ahu mangkorjahon marmasam tugas ibagas pangidangion. Domma huahapkon maningon marpangunsandeian bani Jahowa do ase boi hita mangkorjahon tugas-tugas hun organisasi-Ni. (Ps. 51:13) Tongtong do ahu martarima kasih bani Jahowa halani boi pasangapkon goran-Ni.​—Ps. 54:8.