Paima marhajabuan namatorasku, domma marlajar hasintongan sidea bani tahun 1920-an. Anggo ahu tubuh bani tahun 1939, anjaha tading i Inggris do hanami. Humbani dakdanak pe, domma dihut ahu martumpu pakon namatorasku. Sanggah marumur onom tahun, dihut ma ahu bani Sekolah Pelayanan Teokratis. Hudingat do sanggah parlobei sahali ahu dapot tugas, halani gijang mimbarni, maningon naik ma ahu hu atas kotak ase boi hutonggor ganup hadirinni. Mabiar tumang do ahu sanggah ai halani bahatan hadirinni halak na dob magodang.

Hinan, iketik bapangku ma bani sada kartu aha na porlu huhatahon laho mamungkah parsahapan sanggah marbarita. Marumur ualuh tahun do ahu sanggah parlobei sahali sahalakku marbarita hu sada rumah. Malas tumang uhurhu halani ra simada rumah ai mambasa kartuku janah ijalo ia do buku “Karena Allah Itu Benar Adanya”. Mintor marlingkati ma ahu laho mansaritahon ai hubani bapa. Marosuh tumang do ahu sanggah martumpu ampa marbarita. Ai do na mangojur ahu gabe marcita-cita mangidangi ibagas dinas sepenuh waktu.

Lambin marosuh do ahu mambasa Bibel dobkonsi ibere bapa bangku majallah Ambilan na Madear. Tiap hujalo majallah ai, mintor hubasa do ganup isini. Gabe lambin toguh do haporsayaonku bani Jahowa, janah ujungni mangondoskon diri ma ahu hu Bani.

Bani tahun 1950, laho ma hanami sakaluarga hu Kebaktian Wilayah Pertambahan Teokratis i New York. Tema kebaktian bani ari Kamis, 3 Agustus, ai ma “Hari Utusan Injil”. Sanggah ai, Sanina Carey Barber do na padaskon ambilan pandidion. I pudian ni ari gabe Pangurus Pusat  do Sanina ai. Bani ujungni ambilanni, isungkun ia ma dua sungkun-sungkun bani na laho ididi. Jongjong ma ahu janah hubalosi ma, “Eak!” Marumur 11 tahun ma ahu sanggah ai. Mabiar do ahu sanggah laho ididi halani lang hubotoh marlangei. Tapi ihasomani bapa anggi ma ahu das hu kolam, janah ihatahon ia ma lang pala mahua ai. Tongon mintor podas do salosei ai. Jadi sanggah ai, daskonsi hanami i kolam, iombah sada sanina ma ahu janah ibere ma ahu hubani sanina na laho mandidi ahu. Dob ai, ididi ma ahu. Dobkonsi ai, iombah ma use ahu kaluar hun kolam. Humbani ari ai, Jahowa do na papintor dalanku.

Sasintongni, sihol do ahu merintis dobkonsi tamat sikolah. Tapi halani iojur gurungku ahu kuliah, gabe kuliah ma ahu. Hape sanggah kuliah, gabe hubotoh ma lang boi ahu pongkut mangidangi Jahowa anggo totap kuliah. Jadi huputuskon ma maningon hupasoh do kuliahku ai. Halani ai, hutonggohon ma ai hubani Jahowa. Dob ai, hutulis ma surat hubani dosenku janah hupatorang ma bani sidea lang boi be hutoruskon kuliahku. Dobkonsi ai, halani porsaya ahu bani Jahowa mintor merintis ma ahu.

Bani bulan Juli 1957, mulai ma ahu mangidangi ibagas dinas sepenuh waktu. Paima ai husungkun do lobei sanina i Betel London ai boi do ahu mangidangi rap pakon perintis na marpangalaman. Ujungni mangidangi ma ahu pakon Sanina Bert Vaisey i Wellingborough. Sahalak parbarita na ringgas tumang do ia. Janah iurupi do ahu ase dear mambahen jadwal ibagas pangidangion. Pitah ahu pakon Sanina Vaisey dassa dalahi i kurianami. Leganni ai, dong onom botou na domma matua. Halani ringgas ahu mambahen persiapan janah aktif homa bai ganup partumpuan, gabe lambin toguh ma haporsayaonku hubani Jahowa.

Sompat do ahu ipenjarahon halani lang ra dihut dinas militer. Dobkonsi ai, pajumpah ma ahu pakon si Barbara, sahalak perintis istimewa. Anjaha marhajabuan ma hanami bani tahun 1959. Sirsir do hanami itugaskon huja pe. Mungkahni itugaskon ma hanami hu Lancashire, bagian barat laut i Inggris. Dob ai, bulan Januari 1961 iontang ma ahu dihut bani Sekolah Pelayanan Kerajaan, sadokah sabulan i Betel London. Tarsonggot tumang ahu halani dob salosei sikolah ai, itugaskon do ahu gabe sintua kaliling. Jadi ilatih sahalak sintua kaliling na marpangalaman ma ahu sadokah dua minggu i kota Birmingham. Janah dihut do si Barbara mangkasomani ahu. Dobkonsi ai mulak ma use hanami hu Lancashire pakon Cheshire.

Bani bulan Agustus 1962, sanggah cuti hanami dapotnami ma surat hun kantor cabang. Ibagas surat ai dong formulir Sikolah Gilead. Dobkonsi itonggohon hanami ai, iisi hanami ma formulir ai janah ikirim hanami use hu kantor cabang. Lima bulan dobkonsi ai, laho ma hanami hu Brooklyn, New York, dihut bani kalas Gilead na patolupuluh ualuhkon. Sadokah sapuluh bulan iparlajari hanami ma ganup isi ni Bibel ijai.

 Sanggah i Sikolah Gilead, bahat do na iparlajari hanami pasal Hata ni Naibata, organisasi-Ni, ampa sanina botou i sab dunia on. Sanggah ai marumur 20-an ope hanami. Janah bahat do homa na boi iparlajari hanami humbani hasoman sakalasnami ijia. Malas tumang uhurhu halani bai ganup ari boi rup marhorja pakon Sanina Fred Rusk. Dihut do homa ia mangajari hanami. Dong sada parlajaran na hudingat tumang na iajarhon ia, ai ma sanggah mambere podah, maningon maronjolan humbani Bibel do podah ai. Leganni ai, roh do homa Sanina Nathan Knorr, Frederick Franz, pakon Karl Klein hu kalasnami laho padaskon ambilan. Anjaha bahat do parlajaran na boi dapotnami humbani Sanina A.  H. Macmillan na toruh maruhur. Humbani ambilan na ipadas ia, gabe ibotoh hanami ma sonaha Jahowa manogu-nogu juakjuak-Ni sanggah dong parlajouan humbani tahun 1914 ronsi awal tahun 1919!

Paima salosei sikolahnami, ipatugah Sanina Knorr ma bangku pakon istringku si Barbara anggo hanami itugaskon hu Burundi i Afrika. Mintor laho ma hanami hu perpustakaan Betel laho mangindahi hun Buku Tahunan sadiha bahat do parbarita na mangidangi i Burundi. Tapi lang dong ipatugah sadiha bahatni parbarita ijai. Hape hu daerah na lape ongga ihorjahon do hanami itugaskon. Ujungni laho ma hanami hu Afrika hassi pe lang bahat na ibotoh hanami pasal daerah ai. Sasintongni, mabiar tumang do hanami. Tapi dob martonggo, lang be mabiar hanami.

Ijai, legan tumang do cuacani, hasomalanni ampa bahasani pakon i nagori asalnami. Sonari maningon iparlajari hanami do bahasa Prancis. Dob ai, lang homa ibotoh hanami ija do hanami tading. Dua ari dobkonsi das hanami, roh ma si Harry Arnott, hasoman sakalasnami i Gilead manjumpahi hanami, paima mulak ia hu penugasanni i Zambia. Jadi, iurupi ia ma hanami mangindahi rumah. Ujungni dapot ma sada apartemen janah ijai ma hanami tading. Lang piga dokah hunjai, mintor roh ma tantangan hun pamarentah. Lape ongga itangar sidea pasal Saksi Jahowa. Baru pe tongkin hanami marbarita ijai mintor isuruh ma hanami laho hun nagori ai halani lang dong surat izin kerjanami. Jadi, maningon mambahen penyesuaian ma use hanami i nagori na baru, ai ma Uganda.

 Sasintongni, mabiar do hanami laho hu Uganda halani lape adong visa-nami. Tapi porsaya do hanami hubani Jahowa. Dong sada sanina hun Kanada na mangidangi i Uganda na mangurupi hanami. Ipatorang ia ma situasinami bani petugas imigrasi. Jadi ihatahon petugas ai ma anggo hanami boi tading ijai sadokah piga-piga bulan. Tapi anggo domma dong visa-nami, boi ma hanami totap tading i nagori ai. Hunjon gabe ibotoh hanami ma sai iurupi Jahowa do hanami.

Legan tumang do situasi i Uganda pakon i Burundi. Anggo i Uganda, domma ipungkah horja parambilanon hassi pe pitah 28 halak dassa Saksi Jahowa i nagori ai. Bahat do homa na boi marbahasa Inggris i daerah penugasannami. Hassi pe sonai maningon iparlajari hanami do siotikanni sada bahasa ijon, ase boi hanami mangurupi halak mambahen hamajuon. Jadi mulai ma hanami marbarita i daerah Kampala. Somal do halak ijai marsahap Luganda. Halani ai iparlajari hanami ma bahasa ai. Dob martahun-tahun do ase boi lancar hanami marsahap Luganda. Hassi pe sonai, lang soya-soya ai, halani gabe lambin pandei ma hanami marbarita. Lambin iarusi hanami ma sonaha mangurupi parlajar Bibelnami ase lambin orot hubani Jahowa. Sidea pe gabe ra do mansaritahon sonaha pangahapni sanggah marlajar Bibel rap pakon hanami.

Malas tumang uhurnami halani boi mangurupi halak mananda hasintongan. Lambin marmalas ni uhur do hanami dobkonsi itugaskon gabe sintua kaliling. Domu bani tugah-tugah na ibere cabang Kenya, mulai ma hanami markaliling laho mangindahi ija do daerah na mamorluhon perintis istimewa. Bujur-bujur tumang halak ijai. Gati do hanami ialo-alo hassi pe lape itanda sidea Saksi Jahowa. Sipata ipasirsir sidea do homa sipanganon bennami.

Dob ai hutoruskon ma pardalanan sahalakku. Markareta api ma ahu sadokah dua ari hu pelabuhan i kota Mombasa, Kenya. Dob ai, markapal laut ma ahu hu Seychelles, sada pulau i Samudra Hindia. Humbani tahun 1965 ronsi 1972, dihut do si Barbara mangkasomani ahu sanggah roh use ahu hu pulau-pulau ai. Mungkahni, pitah dua dassa parbarita i pulau ai. Tapi dobkonsi ai, dong ma kalompok ibahen, janah ujungni gabe adong ma kuria. Laho do hanami mangidah sanina botou i Eritrea, Etiopia, pakon Sudan.

Gabe mubah do situasi politik i Uganda halani dong parubahan sistem pamarentahan ijai. Sadokah martahun-tahun gabe sunsah ma situasi ijai. Tapi gabe hubotoh ma dearan do anggo iihutkon hita podah ni Bibel na mangkatahon, “Bere ma bani Kesar na humbani Kesar.” (Mrk. 12:17) Bani sada ari, isuruh ma ase ganup halak hun luar nagori manlapor hu kantor polisi na dohor hun rumahni. Mintor ibahen hanami ma sonai. Piga-piga ari dobkonsi ai, laho ma ahu hu Kampala rap pakon sahalak hasoman na misionaris homa. Tapi, i tongah pardalanan istop polisi ma motornami. Mabiar tumang do hanami sanggah ai halani ituduh gabe mata-mata. Jadi iboan ma hanami hu kantor polisi pusat. Ijai ipatorang hanami do anggo hanami misionaris, janah domma manlapor hanami hu kantor polisi na i dohor ni rumahnami. Tapi lang porsaya sidea. Jadi ikawal ma hanami, iboan hu kantor polisi ai. Das ijai idingat petugas na ijai ma hanami janah ihatahon sidea ma anggo hanami domma manlapor. Halani ai ibebaskon ma hanami.

Ijia, gati do hanami istop polisi sanggah ibagas  pardalanan. Mabiar tumang do hanami tarlobih anggo polisi na manstop hanami ai tenggen. Sanggah masa ai, mintor martonggo do hanami. Ujungni, lang be mabiar hanami. Janah ibere ma hanami lewat. Tapi bani tahun 1973, isuruh do ase ganup halak hun luar nagori manadingkon Uganda.

Jadi mubah ma use tugasnami. Itugaskon do hanami hu Pantai Gading, Afrika Barat. Sada tantangan do on bennami. Maningon mambahen penyesuaian ma use hanami pakon misionaris na roh humbani nagori na legan, janah maningon marlajar bahasa Prancis use. Tapi sai tongtong do iurupi Jahowa hanami. Itogu-togu Ia do hanami ase pajumpah pakon halak na bujur anjaha na toruh maruhur na ra manjalo hasintongan. Tongon, ipapintor Jahowa do dalannami halani porsaya hu Bani.

Tapi dobkonsi ganupan ai, hona naborit kanker ma si Barbara. Maningon marulak-ulak ma hanami laho hu Eropa laho martambar. Anjaha bani tahun 1983, ibotoh hanami ma lang boi be hanami mangidangi i Afrika. Pusok tumang uhurnami halani ai.

Sanggah mangidangi i Betel London hanami, lambin parah do naboritni si Barbara, janah ujungni marujung goluh ma ia. Huahapkon do pangurupion humbani hasoman-hasoman i Betel. Dong homa sapasang suami istri na tongtong mangurupi ahu ase totap marpangunsandeian bani Jahowa. Dobkonsi ai, pajumpah ma ahu pakon Botou Ann, na gabe komuter i Betel. Ongga do ia gabe perintis istimewa janah holong tumang do uhurni bani Jahowa. Jadi bani tahun 1989, marhajabuan ma hanami. Anjaha mangidangi i Betel London ma hanami ronsi sonari.

Humbani 1995 ronsi 2018, malas tumang uhurhu boi mangidangi gabe wakil kantor pusat (hinan isobut pengawas zona). Sadokah martahun-tahun dong ma hira-hira 60 nagori na irohi hanami. Bani tiap nagori huidah ma sonaha Jahowa mamasu-masu juakjuak-Ni lang soal sonaha situasi ni sidea.

Bani 2017, roh use ahu hu Afrika. Malas tumang uhurhu halani on ma parlobei sahali si Ann dihut pakon ahu hu Burundi. Longang do uhurnami mangidah domma bahat Saksi Jahowa ijai. Anjaha daerah na somal idalani hanami laho marbarita hun rumah hu rumah bani tahun 1964, sonari domma dong Betel ijai. Dong 15.500 lobih parbarita i nagori ai.

Malas tumang uhurhu dob hujalo daftar nagori na maningon hurohi bani tahun 2018. Ijai huidah dong Pantai Gading. Songon na mulak hu huta do huahap sanggah das hanami i Abidjan, ibukota nagori ai. Bani buku daptar talepon huidah ma dong Sanina Sossou, na tading i sabolah ni kamarnami. Huagan ma ia pengawas kota hinan sanggah ahu mangidangi ijai. Hape anakni do ai.

Sai tongtong do ipasaud Jahowa janji-Ni. Humbani sitaronon na huahapkon huidah ma ipapintor Jahowa do dalanku anggo porsaya ahu hu Bani. Halani ai, sihol do ahu tongtong mardalan i dalan na domma itontuhon Jahowa. Lambin torang do dalan ai ronsi das hu dunia na baru.​—Pod. 4:18.