1. Bani piga-piga ianan, sonaha kopala kaluarga mandalankon tanggung jawabni?

ANGGO iahap ham aha do artini gabe “kopala kaluarga”? Bani piga-piga ianan, bahat do kopala kaluarga na mangihutkon adat istiadat atap pe hasomalan i iananni sanggah mandalankon tanggung jawabni. Botou Yanita na tading i Eropa mangkatahon, “I iananku tading lang ihira anggo naboru. Anjaha gati do sidea ibahen songon jabolon.” Leganni ai, Sanina Lukas na tading i Amerika Serikat mangkatahon, “Bahat do bapa na mangajarhon hubani anakni anggo pandapotni naboru lang ponting.” Tapi lang marosuh Jahowa anggo ibahen kopala kaluarga sonai hubani kaluargani. (Bandingkon Markus 7:13.) Jadi, aha ma na porlu ibahen dalahi-dalahi ase boi sidea gabe kopala kaluarga na bujur?

2. Aha do na maningon ibotoh kopala kaluarga, janah mase?

² Ase boi ia gabe kopala kaluarga na bujur, maningon iarusi ia aha do harosuh ni Naibata. Maningon ibotoh ia do mase adong na itotapkon Jahowa gabe kopala. Anjaha maningon ibotoh ia do homa sonaha ia boi maniru Jahowa pakon Jesus. Mase maningon ibotoh ia ganupan ai? Halani Jahowa do na manotapkon ia gabe kopala kaluarga. Janah sihol do Jahowa ase dear ia mandalankon tanggung jawabni ai.​—Luk. 12:48b.

3. Aha do na boi iparlajari hita humbani 1 Korint 11:3?

³ Basa 1 Korint 11:3. Ayat on patorangkon iorganisasi Jahowa do kaluarga-Ni na i surga ampa na i tanoh on. Jahowa do “ulu” atap kopala humbani haganup. Halani ai, martanggung jawab do sidea bani Jahowa. (Rom 14:10; Ep. 3:14, 15)  Itotapkon Jahowa do Jesus gabe kopala i kuria. Martanggung jawab hubani Jahowa do Jesus sanggah ia mandalankon tugasni. (1 Kor. 15:27) Ibagas kaluarga, suami do na itotapkon Jahowa gabe kopala. Anjaha martanggung jawab hubani Jahowa pakon Jesus do suami sanggah ia mandalankon tugasni.​—1 Ptr. 3:7.

4. Hak aha do na dong bani Jahowa pakon Jesus?

⁴ Halani Jahowa do Kopala ni haganup, dong do hak-Ni mambahen aturan hubanta. Janah maningon idalankon do aturan ai. (Jes. 33:22) Sonai homa Jesus, halani ia do kopala ni kuria, dong do homa hakni mambahen aturan i kuria, anjaha maningon idalankon do aturan ai.​—Gal. 6:2; Kol. 1:18-20.

5. Hak aha do na dong bani kopala kaluarga, janah sonaha ia mandalankon hakni ai?

⁵ Songon Jahowa pakon Jesus, dong do homa hakni kopala kaluarga laho mambahen aturan ibagas kaluargani. (Rom 7:2; Ep. 6:4) Tapi lang boi uhur-uhurni mambahen aturan. Maningon iihutkon ia do prinsip ni Bibel sanggah mambahen aturan. (Pod. 3:5, 6) Anjaha lang adong hakni mambahen aturan bani kaluarga ni halak. (Rom 14:4) Leganni ai, anggo domma magodang niombahni janah lang be tading pakonsi, lang boi be ia mambahen aturan bani sidea. Hassi pe sonai, maningon totap do hormat niombahni ai hu bani.​—Mat. 19:5.

6. Mase itotapkon Jahowa dong na gabe kopala?

⁶ Halani holong-Ni do ase itotapkon Jahowa dong na gabe kopala. Anggo adong kopala, gabe adong ma hadameion halani ganupan mardalan dear anjaha taratur. (1 Kor. 14:33, 40) Tapi anggo lang adong kopala, gabe geor ma haganup janah lang dong malas ni uhur. Umpamani, lang ibotoh ise ma holi na mambahen haputusan, janah ise ma na martanggung jawab laho mandalankon haputusan ai.

7. Domu bani Epesus 5:25, 28, aha ma na iparentahkon Jahowa hubani suami?

⁷ Tapi anggo bahen hadearon do tujuan ni Naibata mambahen pangaturan ai, mase ma bahat naboru na sunsah pangahapni halani pambahenan ni suamini? Sasintongni ai masa halani bahat dalahi lang ra mangihutkon aturan ni Jahowa. Ipilih sidea do mangihutkon hasomalan ampa adat istiadat i iananni. Atap ra do kasar sidea hubani istrini ase itonggor halak songon na “jago” ia. Iagan ia ma anggo kasar ia bani istrini gabe mabiar ma istrini ai, janah idalankon ma aha pe na ihatahon ia. Halani ai, itonggor halak ma boi do ia mangatur-atur istrini. * Tapi anggo sonai ibahen sidea, on patuduhkon lang ihargai sidea naboru. Ujungni, gabe lang marosuh Jahowa mangidah halak sisonai.​—Basa Epesus 5:25, 28.

8. Sonaha sada dalahi boi gabe kopala kaluarga na bujur?

⁸ Sada dalahi boi gabe kopala kaluarga na bujur anggo itiru ia Jahowa pakon Jesus. Pardiateihon ma dua sifat na ipatuduh Jahowa pakon Jesus, janah sonaha kopala kaluarga boi patuduhkon sifat sisonai hubani istri pakon niombahni.

9. Sonaha Jahowa patuduhkon toruh ni uhur?

⁹ Toruh ni uhur. Pentar tumang do Jahowa ai. Hassi pe sonai, ra do Ia manangar  pandapot ni juakjuak-Ni. (1 Mus. 18:23, 24, 32) Sanggah dong malekat na mambere pandapot, ijalo Ia do ai. (1 Raj. 22:19-22) Hassi pe sempurna Ia, lang ongga ipindo Ia aha na lang tarbahen hita. Tapi iurupi do hita ase boi marhasil. (Ps. 113:6, 7) Sasintongni bani Bibel ihatahon do anggo Jahowa ai “pangurupi”. (Ps. 27:9; Heb. 13:6) Ibotoh Raja Daud do homa ai. Bahat pe na boi ihorjahonsi, ganupan ai halani halayakon ni Jahowa do.​—2 Sam. 22:36.

10. Sonaha Jesus patuduhkon toruh ni uhur?

¹⁰ Pardiateihon ma siusihan na ibahen Jesus. Hassi pe Tuan ampa Guru ia, tapi iburihi ia do nahei ni susianni. Mase ma isuratkon Jahowa sarita ai ibagas Bibel? Tontu ase boi gabe siusihan do ai bani ganup halak, tarmasuk ma bani kopala kaluarga. Jesus mangkatahon, “Sitiruon do hubere bannima, ase ibahen hanima songon na hubahen in bennima.” (Joh. 13:12-17) Hassi pe banggal kuasa ni Jesus, tapi rosuhan do ia mangidangi marimbangkon iidangi.​—Mat. 20:28.

11. Sonaha kopala kaluarga boi patuduhkon toruh ni uhur songon na ibahen Jahowa pakon Jesus?

¹¹ Parlajaranni hubanta. Bahat do cara na boi ibahen kopala kaluarga laho patuduhkon toruh ni uhur. Umpamani, lang ipindo ia na lang tarhorjahon istri pakon niombahni. Sanggah lang sapanriahan kaluargani pakonsi, ra do ia manangar pandapot ni istrini pakon niombahni. Botou Marley na tading i Amerika Serikat mangkatahon, “Sipata, ra do lang sapanriahan ahu pakon suamiku. Tapi huahap do anggo ia mangkargai ahu halani ra ia manangar pandapotku, janah anget do ipingkiri ia ai paima mambahen haputusan.” Leganni ai, anggo toruh maruhur suami, tontu ra do ia mangkorjahon tugas-tugas i rumah. Tapi sipata ra do lang urah ai. Mase? Halani bahat halak mangkatahon horja ni naboru do ai. Ai do homa na ihatahon Botou Rachel. Nini do, “Anggo i iananku, sanggah dong suami na mangurupi istrini manussi piring atap paborsihkon rumah, mintor ihatahon halak ma ia ‘songon naboru’. Iahap sidea ma anggo suamini ai lang boi mangatur istrini.” Anggo sonai do homa pangahap ni halak i iananmu, dingat ma siusihan na ibahen Jesus. Iburihi ia do nahei ni susianni,  hassi pe sasintongni horja ni jabolon do ai. Jadi kopala kaluarga na bujur lang pitah mamingkiri dirini sandiri, tapi marusaha do ia mambahen ase martuah kaluargani. Sobali ai, sifat aha ope na porlu ipatuduh kopala kaluarga na bujur?

12. Sonaha Jahowa pakon Jesus patuduhkon holong hubanta?

¹² Holong. Taridah do holong ni Jahowa humbani haganup pambahenan-Ni. (1 Joh. 4:7, 8) Umpamani, ibere Ia do tugah-tugah marhitei Bibel ampa organisasi-Ni ase boi hita totap marhasoman pakon-Si. Hunjai gabe ibotoh hita ma holong tumang do uhur-Ni hubanta. Leganni ai, ‘unjah do Ia mamberehon banta sihamalaskononta’. (1 Tim. 6:17) Sanggah dong hasalahanta, ipodahi do hita. Hassi pe sonai, totap do holong uhur-Ni mangidah hita. Halani holong, ipasirsir Ia do tobusan hubanta. Sonai homa Jesus, halani holongni ibere do goluhni laho mangkopkop hita. (Joh. 3:16; 15:13) Jadi, lang adong na boi mambahen sirang holong ni uhur ni Jahowa pakon Jesus hubani halak na totap setia.​—Joh. 13:1; Rom 8:35, 38, 39.

13. Mase kopala kaluarga maningon mangkaholongi kaluargani? (Tonggor ma kotak “ Sonaha ase Dalahi na Baru Marhajabuan Ihargai Istrini?”)

¹³ Parlajaranni hubanta. Maningon ipatuduh kopala kaluarga do homa holongni marhitei pambahenanni. Mase maningon sonai? Apostel Johannes mangkatahon, “Anggo seng ihaholongi hasomanni [atap kaluargani] na nididahni, Naibata na so nididahni pe, seng boi haholonganni.” (1 Joh. 4:11, 20) Anggo kopala kaluarga mangkaholongi kaluargani, tontu itiru ia do Jahowa pakon Jesus. Iurupi ia do kaluargani ase boi lambin orot hubani Jahowa. Marusaha do homa ia pasonangkon kaluargani, janah isarihon ia do haporluan ni sidea. (1 Tim. 5:8) Iajari anjaha ipodahi ia do niombahni. Marusaha do ia mambahen haputusan na parohkon hasangapon hubani Jahowa, janah mambahen kaluargani marmalas ni uhur. Sonari, ulas  hita ma sonaha kopala kaluarga boi maniru Jahowa pakon Jesus sanggah ia mandalankon ai.

14. Sonaha kopala kaluarga mangurupi kaluargani ase lambin dohor hubani Jahowa?

¹⁴ Iurupi ia do kaluargani ase lambin dohor hubani Jahowa. Itiru Jesus do Bapani. Isarihon ia do susianni janah iurupi do sidea ase lambin toguh haporsayaonni. (Mat. 5:3, 6; Mrk. 6:34) Sonai ma homa na porlu ibahen kopala kaluarga. Maningon iurupi ia do kaluargani ase boi lambin dohor bani Jahowa. (5 Mus. 6:6-9) Sonaha carani? Maningon rap ma ia pakon kaluargani mambasa ampa mamparlajari Bibel, martumpu, marbarita, janah marusaha ase boi totap marhasoman pakon Jahowa.

15. Sonaha kopala kaluarga mambahen sonang kaluargani?

¹⁵ Ipasonang do uhur ni kaluargani. Ipatugah Jahowa do i lobei ni halak na legan anggo Ia mangkaholongi Jesus. (Mat. 3:17) Jesus pe ipatuduh do holongni hubani susianni marhitei sahap ampa pambahenanni. Sonai homa susianni, ipatugah do holong uhur ni sidea hu bani. (Joh. 15:9, 12, 13; 21:16) Sonai ma homa na porlu ibahen kopala kaluarga. Maningon ipatuduh ia do holongni hubani istri pakon niombahni marhitei pambahenanni. Umpamani, rap ma ia marlajar Bibel pakon sidea. Ipatugah ia do bani kaluargani anggo ia mangkaholongi sidea. Anjaha dear do homa anggo ipuji ia kaluargani i lobei ni halak.​—Pod. 31:28, 29.

16. Aha ope na porlu ibahen kopala kaluarga, janah aha ma na maningon idingat ia?

¹⁶ Isarihon ia do haporluan ni kaluargani. Isarihon Jahowa do haporluan ni halak Israel hassi pe lang unduk sidea hu Bani. (5 Mus. 2:7; 29:5) Sonari pe, isarihon Jahowa do homa haporluanta siganup ari. (Mat. 6:31-33; 7:11) Sonai homa Jesus, ibere do susianni mangan. (Mat. 14:17-20) Ipamalum ia do homa anggo adong halak na boritan. (Mat. 4:24) Kopala kaluarga pe maningon isarihon do homa haporluan ni kaluargani ase malas uhur ni Jahowa. Tapi, maningon pandei do homa ia mangatur panorangni. Ulang halani lalab mansari duit gabe lang adong panorangni laho mangurupi kaluargani ase dohor bani Jahowa.

17. Sanggah mamodahi ampa mangajari, siusihan aha ma na ibahen Jahowa pakon Jesus?

¹⁷ Sirsir mamodahi ampa mangajari. Ase lambin dear goluhta, iajari anjaha ipodahi Jahowa do hita. (Heb. 12:7-9) Sonai ma homa na ibahen Jesus. (Joh. 15:14, 15) Lang kasar ia sanggah mamodahi susianni. (Mat. 20:24-28) Iarusi ia do anggo sidea lang sempurna janah gati lepak.​—Mat. 26:41.

18. Aha ope na porlu idingat kopala kaluarga?

 ¹⁸ Songon na ibahen Jahowa pakon Jesus, maningon idingat kopala kaluarga do homa anggo istri pakon niombahni ai lang sempurna. Halani ai, “ulang ma kasar” dompak sidea. (Kol. 3:19) Tapi, maningon ‘lamlam’ do ia sanggah laho patorsa-torsahon sidea, songon na ihatahon bani Galatia 6:1. Maningon idingat ia ma anggo ia pe lang sempurna. Songon na ibahen Jesus, maningon ipatuduh ia do homa siusihan na madear sanggah mangajari kaluargani.​—1 Ptr. 2:21.

19-20. Sonaha kopala kaluarga maniru Jahowa pakon Jesus paima ia mambahen haputusan?

¹⁹ Pindahi ma na porlu bani halak sanggah mambahen haputusan. Sanggah Jahowa mambahen haputusan, ipingkirhon Ia do aha na marguna hubanta. Umpamani, itompa Ia do manisia ase boi sidea marmalas ni uhur. Leganni ai, lang adong na mamaksa Jahowa mambere Anak-Ni hubanta. Tapi ihorjahon Ia do ai halani sihol uhur-Ni manobus hita. Sonai do homa na ibahen Jesus. Ipingkirhon ia do homa haporluan ni halak. (Rom 15:3) Umpamani, lang saud ia marsaran ase boi mangajari halak na mabuei.​—Mrk. 6:31-34.

²⁰ Ibotoh kopala kaluarga do lang urah mambahen haputusan na madear. Hassi pe sonai, lang uhur-uhurni sanggah ia laho mambahen haputusan. Ipindahi ia do podah ni Jahowa paima ia mambahen haputusan. * (Pod. 2:6, 7) Hunjai taridah ma sedo pitah dirini na ipingkiri, tapi ipingkirhon ia do homa na porlu bani kaluargani.​—Pil. 2:4.

21. Aha ma na laho iulas hita bani artikel na mangihut?

²¹ Jadi, ibere Jahowa do tanggung jawab na banggal hubani kopala kaluarga. Sihol do uhur-Ni ase dear sidea mandalankon tugasni. Anggo marusaha suami mangihutkon siusihan na ibahen Jahowa pakon Jesus, boi ma ia gabe kopala kaluarga na bujur. Anjaha anggo idalankon istri homa tugasni, gabe martuah ma parhajabuan ni sidea. Tapi, aha do na porlu ibahen istri laho mangurupi suamini ase boi gabe kopala kaluarga na bujur? Janah sipata, mase lang urah mandalankon ai? Bani artikel na mangihut iulas hita ma balos ni sungkun-sungkun ai.