1. Anggo sada naboru sihol marhajabuan, sungkun-sungkun aha ma na porlu ipingkiri ia?

JESUS KRISTUS do kopala ni ganup halak Kristen. Janah kopala na sempurna do ia. Tapi sanggah marhajabuan sada naboru, suamini ma na gabe kopalani, hape lang sempurna suamini ai. Tontu lang urah on bani naboru. Halani ai, paima marhajabuan sada naboru, porlu do ipingkiri ia sungkun-sungkun on: ‘Ai aha do na patuduhkon anggo botou on boi gabe kopala kaluarga na bujur? Ai mangidangi Jahowa do na sipontingan ibagas goluhni? Porini lang, ai aha do na mambahen pos uhurhu anggo ia holi boi mangurupi ahu lambin dohor bani Jahowa?’ Tontu lang sungkup pitah ai. Naboru-naboru pe porlu do homa ipareksa dirini. Umpamani sungkun ma dirimu: ‘Ai adong do sifatku na madear na boi mangurupi ahu gabe istri na bujur? Ai sabar do ahu anjaha sirsir mangurupi halak? Ai orot do parhasomananku pakon Jahowa?’ (Par. 4:9, 12) Anggo ipingkiri naboru lobei sungkun-sungkun ai paima marhajabuan ia, on ma holi na mangurupi ia ase martuah parhajabuanni.

2. Aha do na laho iulas hita bani artikel on?

² Dong marjuta botounta na ra unduk bani suamini. Sada siusihan na madear do ai. Janah patut do sidea ipuji halani ai! Tontu malas uhurta boi rap mangidangi pakon naboru-naboru sisonai. Bani artikel on holi iulas hita ma tolu sungkun-sungkun on: (1) Aha do na mambahen lang urah naboru unduk bani suamini? (2) Mase ra naboru unduk bani suamini? (3) Sonaha suami pakon istrini boi maniru Jesus, si Abigail, pakon si Maria inang ni Jesus?

3. Mase sai adong masalah ibagas parhajabuan?

³ Sibere-bere na maharga humbani Jahowa do parhajabuan ai. Tapi jolma na mardousa do ganup hita. (1 Joh. 1:8) Halani ai ma ihatahon ibagas Bibel sai adong do masalah ibagas parhajabuan. Ipados do ai songon ‘hasunsahan bani daging’. (1 Kor. 7:28) Ulas hita ma piga-piga tantangan na iahapkon istri.

4. Mase sipata lang urah istri unduk bani suamini?

⁴ Bani piga-piga ianan gati do iajarhon anggo unduk istri bani suamini, ra do gabe uhur-uhurni suami hubani istrini. Si Marisol na tading i Amerika Serikat mangkatahon, “Gati do ihatahon ijon ulang ra talu naboru humbani dalahi. Hubotoh do domma itotapkon Jahowa suami do na gabe kopala kaluarga, janah maningon unduk do istri bani suamini. Tapi sipata lang urah ahu mandalankon ai halani bahat halak mangkatahon lang maningon unduk istri hubani suamini.”

5. Bani piga-piga ianan, sonaha ma pambahenan ni dalahi hubani naboru?

⁵ Tapi, dong do homa suami na marpingkir toruhan do naboru marimbangkon dalahi. Botou Ivon na tading i Amerika Selatan mangkatahon, “Anggo ijon, dalahi do lobei mangan, baru pe naboru. Humbani dakdanak pe domma iajari naboru marmasak ampa paborsihkon rumah. Tapi anggo dalahi, iidangi inangni ampa botouni do. Songon raja do sidea i rumah.” Botou Yingling na tading i Asia, mangkatahon, “Bani iananku dong sada umpasa na mangkatahon anggo naboru lang pala ipasikolahkon halani i dapur do holi horja ni sidea. Anjaha lang boi homa sidea mambere pandapot hubani suamini.” Gabe sunsah do istri anggo sonai pambahenan ni suamini. On patuduhkon lang itiru suami Jesus. Tontu lang marosuh Jahowa mangidah halak na sisonai.​—Ep. 5:28, 29; 1 Ptr. 3:7.

6. Aha do na porlu ibahen istri ase lambin dohor ia bani Jahowa?

⁶ Songon na dob iulas hita bani artikel na salpu, iparentahkon Jahowa do bani kopala kaluarga mangurupi kaluargani ase lambin orot hubani Jahowa janah mansarihon haporluan ni sidea. (1 Tim. 5:8) Tapi, maningon ipasirsir istri do homa panorang laho mambasa Bibel, manrimangi isini, ampa martonggo. Ra do lang urah on halani bahat tumang na porlu ihorjahon istri. Halani ai ra do nini uhur ni sidea lang dong be panorang ampa gogohni laho marlajar Bibel. Hassi pe sonai, maningon marusaha do sidea mangkorjahon ai. Mase? Halani Jahowa sihol ase ganup halak orot parhasomananni pakon-Si.​—Lah. 17:27.

7. Aha do na boi mangurupi istri ase hormat janah unduk hubani suamini?

⁷ Tongon, ra do lang urah bani istri hormat janah unduk hubani suamini halani lang sempurna sidea. Hassi pe sonai, lambin urah do istri mandalankon tugasni anggo iarusi ia mase iparentahkon Jahowa bani Bibel anggo istri maningon hormat janah unduk hubani suamini.

8. Domu bani Epesus 5:22-24, mase ra istri unduk hubani suamini?

⁸ Bahat do botounta na ra unduk bani suamini halani ai do na iparentahkon Jahowa hubani sidea. (Basa Epesus 5:22-24.) Pos do uhur ni sidea halani holong do ase iparentahkon Jahowa sidea mangkorjahon ai. Anjaha ibotoh sidea do anggo ra sidea mandalankon ai, gabe martuah ma goluhni.​—5 Mus. 6:24; 1 Joh. 5:3.

9. Aha do hasilni anggo ra istri unduk bani suamini?

 ⁹ Iojur dunia on do ase naboru lang pala mangihutkon aturan ni Jahowa. Ihatahon sidea do anggo ra istri unduk bani suamini, gabe iatur-atur ma holi sidea. Tapi halak na lang mananda Jahowa do na mangkatahon sonai. Pingkirhon ma, ai mungkin do ibere Jahowa parentah na mambahen sunsah boru hasianni? Anggo ra istri mandalankon parentah ni Jahowa janah unduk hubani suamini, marguna do ai bani dirini, suamini, pakon niombahni. Gabe damei ma kaluargani.​—Ps. 119:165.

10. Parlajaran aha ma na dapot hita humbani si Carol?

¹⁰ Dingat ma, Jahowa do na manotapkon suami gabe kopala kaluarga. Jadi anggo ra istri unduk bani suamini, on patuduhkon hormat anjaha holong do uhurni bani Jahowa. Si Carol na tading i Amerika Selatan mangkatahon, “Lang dong suami na lang ongga mambahen hasalahan. Tapi, anggo mintor manggila ahu sanggah lepak ia, on patuduhkon lang maharga bangku parhasomananku pakon Jahowa. Halani ai, marusaha do ahu unduk bani suamiku ase malas uhur ni Jahowa.”

11. Aha do na mangurupi si Aneese ase ra manalpuhon hasalahan ni suamini, janah aha ma parlajaranni hubanta?

¹¹ Ra do lang urah bani istri hormat anjaha unduk hubani suami anggo lang parduli suami sonaha pangahap ni istrini. Pardiateihon ma aha na ibahen Botou Aneese sanggah sonai suamini. Ia mangkatahon, “Marusaha do ahu ase lang borit uhurhu. Hudingat do ahu pe ra do homa mambahen hasalahan janah ra do Jahowa manasap hasalahanku. Halani ai, marusaha do ahu manasap hasalahan ni suamiku. Anggo sonai hubahen, gabe damei ma pangahapku.” (Ps. 86:5) Jadi anggo ra istri manasap hasalahan ni suamini, lambin urah ma istri unduk bani suamini.

12. Contoh aha do na dong bani Bibel?

¹² Dong na marpangahap halak na galek do halak na ra unduk bani na legan. Tapi lang tongon ai. Bani Bibel bahat do contoh na patuduhkon sedo halak na galek anggo ra unduk bani na legan. Pardiateihon hita ma siusihan humbani Jesus, si Abigail, pakon si Maria.

13. Mase ra Jesus unduk hubani Jahowa? Patorang.

 ¹³ Unduk do Jesus hubani Jahowa. Tapi sedo halani lang pentar ia. Sanggah mangajari ia, mintor urah do iarusi halak pangajaranni. On patuduhkon pentar tumang do Jesus ai. (Joh. 7:45, 46) Ibotoh Jahowa do homa ai. Halani ai, iarahkon Ia do Jesus mangurupi sanggah Ia manompa sagala na dong i surga ampa na i tanoh on. (Pod. 8:30; Heb. 1:2-4) Dobkonsi ipapuho Jesus, iondoskon Jahowa do hu bani “sagala kuasa na i nagori atas ampa na i tanoh on”. (Mat. 28:18) Jadi, hassi pe pentar tumang Jesus, totap do ia marpangunsandeian bani Jahowa. Mase? Halani holong uhurni hubani Bapani.​—Joh. 14:31.

14. Aha do na boi iparlajari suami humbani (a) siusihan na ipatuduh Jahowa? (b) na isurat bani Podah 31?

¹⁴ Na boi iparlajari suami. Sedo halani lang maharga naboru ase isuruh Jahowa sidea unduk bani suamini. Buktini, dong do naboru-naboru na ipilih Jahowa rap mamarentah pakon Jesus i surga. (Gal. 3:26-29) Sanggah iondoskon Jahowa kuasa bani Jesus, on patuduhkon porsaya do Ia bani Anak-Ni. Sonai ma homa na boi ibahen suami bani istrini. Boi do homa ibere suami piga-piga tanggung jawab bani istrini. Umpamani, songon na ihatahon Bibel, ibere do istri mangawasi halak na marhorja i rumahni. Boi do homa ia martiga-tiga. (Basa Podah 31:15, 16, 18.) Janah ra do suamini manangar pandapotni. (Basa Podah 31:11, 26, 27.) Anggo bujur janah holong suami hubani istrini, tontu lambin urah ma istrini unduk hu bani.

15. Aha do na boi iparlajari istri humbani Jesus?

¹⁵ Na boi iparlajari istri. Hassi pe domma bahat na ihorjahon Jesus, tapi totap do ia unduk bani Jahowa. Sedo halani ai gabe iahap ia lang maharga ia bani Jahowa. (1 Kor. 15:28; Pil. 2:5, 6) Sonai ma homa na ibahen istri bani suamini. Maningon ra do ia mangurupi suamini, lang pitah halani holongni bani suamini. Tapi na sipontingan halani holong uhurni hubani Jahowa.

16. Domu bani 1 Samuel 25:3, 23-28, masalah aha do na roh bani rumah tangga ni si Abigail? (Tonggor ma gambar sampul.)

¹⁶ Si Nabal do goranni suami ni si Abigail. Halak na egois, gijang maruhur, janah holit do ia. Hassi pe sonai, lang itadingkon si Abigail suamini ai. Boi do namin ipaturut ia si Daud mamunuh suamini. Tapi lang ibahen ia sonai. Marusaha do ia manlinggomi si Nabal ampa haganup dalahi na i rumahni. Tontu halani barani do ase ra ia manjumpahi si Daud pakon 400 tentarani ase ulang ibunuh sidea. Mangaku salah do ia, hape suamini do na jahat. (Basa 1 Samuel 25:3, 23-28.) Ujungni, gabe ibotoh si Daud ma Jahowa do na marsuruh si Abigail laho manlanglangi ia marutang hosah.

17. Aha do na boi iparlajari suami humbani si Daud?

¹⁷ Na boi iparlajari suami. Halak na pentar do si Abigail, janah ra do si Daud manangar hatani. Hasilni, gabe lang saud ia marutang daroh. Suami pe maningon ra do manangar pandapot ni istrini, tarlobih sanggah laho mambahen haputusan na ponting. Anggo sonai ibahen ia, gabe iurupi ma suami mambahen haputusan na dear.

18. Aha ma na boi iparlajari istri humbani si Abigail?

¹⁸ Na boi iparlajari istri. Hassi pe suamini lang manombah Jahowa, atap lang be orot parhasomananni pakon Jahowa, tapi anggo ra istri unduk bani Jahowa janah mangkaholongi-Si, bahat do gunani ai bani kaluargani. Tontu lang marusaha ia sirang humbani suamini anggo alasanni lang sosok pakon Bibel. Tapi marusaha do ia totap unduk bani  suamini, ase ra holi suamini manombah Jahowa. (1 Ptr. 3:1, 2) Porini pe totap do lang ra suamini manombah Jahowa, malas do uhur ni Jahowa anggo idalankon istri parentah-Ni ase unduk hubani suami.

19. Sanggah attigan do lang boi istri unduk bani suamini?

¹⁹ Tapi anggo ipindo suami istrini mangkorjahon na lang sosok pakon prinsip ni Bibel, ulang ma ra ia. Umpamani, isuruh suamini ma ia marladung, manangko, atap mangkorjahon aha pe na lang iharosuhkon Jahowa. Maningon balosan bani Jahowa do ganup halak Kristen, tarmasuk istri. Jadi, anggo isuruh ia mangkorjahon na lang sosok pakon prinsip ni Bibel, maningon dear ma ipatorang ia hubani suamini mase lang ra ia mangkorjahon ai.​—Lah. 5:29.

20. Hunja ibotoh hita orot do parhasomanan ni si Maria pakon Naibata?

²⁰ Orot tumang do parhasomanan ni si Maria pakon Jahowa. Bahat do idingat ia na itulis ibagas kitab-kitab Ibrani. Umpamani, sanggah pajumpah ia pakon si Elisabet, inang si Johannes Pandidi, dong lobih 20 ayat na ipatugah si Maria humbani kitab-kitab ai. (Luk. 1:46-55) Anjaha pingkirhon ma on: Sasintongni domma martunangan si Maria pakon si Josep. Tapi si Maria do na parlobei sahali ijumpahi malekat laho patugahkon itubuhkon si Maria do holi Anak ni Naibata. (Luk. 1:26-33) Domma ibotoh Jahowa sonaha paruhuran ni si Maria. Janah pos do uhur-Ni isarihon anjaha ihaholongi si Maria do holi Anak-Ni. Janah sadokah goluhni sai tongtong do si Maria dohor bani Jahowa, hassi pe domma matei Jesus janah naik hu surga.​—Lah. 1:14.

21. Aha do na boi iparlajari suami humbani si Maria?

²¹ Na boi iparlajari suami. Tontu malas do uhur ni suami anggo bahat na ibotoh istrini pasal Bibel. Lang gabe maretek ni uhur ia halani ai. Ibotoh suamini do anggo bahat prinsip ni Bibel na ibotoh istrini ai, gabe boi ma ia dihut mangurupi ibagas kaluarga. Tapi, hassi pe pandeinan istrini marimbangkon ia, tanggung jawabni do mangurupi kaluargani laho manombah Jahowa. Umpamani, maningon  suami do na mambobahon parlajaran Bibel ibagas kaluarga.​—Ep. 6:4.

22. Aha do na boi iparlajari istri humbani Maria?

²² Na boi iparlajari istri. Hassi pe maningon unduk istri hubani suami, tapi maningon marusaha do ia paorotkon parhasomanan-Ni pakon Jahowa. (Gal. 6:5) Halani ai, maningon ibere ia ma panorang laho marlajar Bibel ampa manrimangi isini. Anggo sonai ibahen ia, lambin banggal ma holongni hubani Jahowa, janah lambin urah ma ia unduk hubani suamini.

23. Anggo ra istri unduk hubani suamini, aha ma gunani ai bani dirini sandiri, kaluargani, ampa hubani kuria?

²³ Halani mangkaholongi Jahowa, ai do na mambahen istri ra unduk bani suamini. Hasilni, gabe marmalas ni uhur ma sidea, lang songon halak na lang mangihutkon pangaturan ni Jahowa. Gabe sitiruon do istri sisonai hubani ganup na maposo i kuria. Anjaha gabe adong ma hadameion ibagas kaluarga ni sidea, sonai homa ibagas kuria. (Tit. 2:3-5) Sonari on, naboru do na bahatan gabe sisombah Jahowa. (Ps. 68:11) Tapi ganupan hita, naboru atap pe dalahi, dong bei do na boi ibahen hita laho mangurupi kuria ase totap marsada. Bani artikel na mangihut iulas hita ma sonaha hita boi mandalankon ai.