1. Mase ganup kaluarga ni Naibata na i tanoh on boi marsada?

TONTU malas uhurta boi gabe kaluarga ni Naibata na marsada i sab tanoh on. Mase ganup juakjuak ni Naibata boi marsada? Sada alasanni ai ma halani ganup do hita unduk bani halak na itotapkon Jahowa gabe kopala. Sasintongni anggo iarusi hita sonaha Jahowa mangorganisasi juakjuak-Ni na i tanoh on, lambin urah ma holi hita marsada.

2. Sungkun-sungkun aha ma na laho iulas hita bani artikel on?

² Bani artikel on iulas hita ma holi ise do na ipilih Jahowa laho manjolom tanggung jawab i kuria. Dob ai, ibalosi hita ma sungkun-sungkun on: Aha do tugas ni botou ibagas kuria? Ai ganup do sanina gabe kopala bani botou? Ai sarupa do tanggung jawab ni kopala kaluarga pakon sintua i kuria? Na parlobei ulas hita ma aha do na ihatahon Bibel pasal botou i kuria.

3. Aha do na boi mangurupi hita ase lambin ihargai hita aha na ibahen botounta?

³ Tontu malas uhurta mangidah botou na ringgas mangurupi kaluargani marbarita ampa mangurupi hasoman na legan i kuria. Anjaha lambin ihargai hita ma holi sidea anggo ibotoh hita sonaha pangahap ni Jahowa pakon Jesus mangidah sidea. Dob ai, iulas hita ma holi aha do na ihatahon apostel Paulus pasal botou i kuria.

4. Hunja ibotoh hita harga tumang do ganup naboru bani Jahowa?

⁴ Humbani Bibel ibotoh hita arga tumang do bani Jahowa naboru, dos songon dalahi. Umpamani, bani abad na parlobei ibere Jahowa do tonduy-Ni lang pitah bani dalahi, tapi ibere  do homa bani naboru. Halani ai gabe boi ma sidea mambahen halongangan ampa marbahasa na legan. (Lah. 2:1-4, 15-18) Iminaki Jahowa do homa naboru pakon dalahi ase boi sidea rup mamarentah pakon Jesus i surga. (Gal. 3:26-29) Ibere do homa pangarapan hagoluhan sadokah ni dokahni i tanoh on hubani naboru pakon dalahi. (Pangk. 7:9, 10, 13-15) Anjaha naboru pakon dalahi boi do homa marbarita ampa mangajarhon hasintongan bani halak na legan. (Mat. 28:19, 20) Bani buku Lahoan ni Apostel, dong ipatugah pasal sada naboru na margoran si Priskilla. Ijai isaritahon rup pakon si Akilla suamini do ia mangurupi sada dalahi na margoran si Apollos mangarusi hasintongan.​—Lah. 18:24-26.

5. Domu bani Lukas 10:38, 39, 42, hunja ibotoh hita ihargai Jesus do homa naboru-naboru?

⁵ Ihargai Jesus do naboru. Bani masa ni Jesus, lang ihargai halak Parisei naboru. Lang ra sidea marsahap bani naboru i lobei ni buei halak. Janah lang ra homa sidea mangulas Hata ni Naibata pakon naboru. Tapi legan do anggo Jesus. Ra do ia mangulas pasal hata ni Naibata hubani naboru rap pakon susianni na legan. * (Basa Lukas 10:38, 39, 42.) Ipaturut ia do homa susianni naboru mangkasomanisi sanggah ia laho marbarita. (Luk. 8:1-3) Anjaha dobkonsi Jesus ipapuho, ipatuduh ia do dirini hubani naboru, janah isuruh do sidea manjumpahi susianni na legan laho patugahkon anggo ia domma ipapuho.​—Joh. 20:16-18.

6. Hunja ibotoh hita ihargai si Paulus do homa naboru-naboru?

⁶ Ipodahi si Paulus do si Timoteus ase ihargai ia naboru. Ihatahon si Paulus do bani si Timoteus ase ibahen ia “naboru na matua songon inang”, anjaha “naboru siposonan songon botou”. (1 Tim. 5:1, 2) Tongon, bahat do na ibahen si Paulus laho mangurupi si Timoteus ase toguh haporsayaonni. Tapi ibotoh si Paulus do homa inang ni si Timoteus ampa ompungni do na parlobei sahali mangajarhon “Surat na Pansing in” bani si Timoteus. (2 Tim. 1:5; 3:14, 15) Anjaha bani suratni hubani halak Rom, dong ipadas si Paulus tabini hubani piga-piga hasoman naboru. Ipuji ia do homa haringgason ni sidea ibagas pangidangion.​—Rom 16:1-4, 6, 12; Pil. 4:3.

7. Sungkun-sungkun aha do na laho iulas hita?

⁷ Tangkas ma domma iulas hita lang ongga ihatahon bani Bibel harganan do dalahi marimbangkon naboru. Sasintongni maharga tumang do ganup botou i kuria. Bahat do sidea na gabe siusihan na boi mangurupi kuria totap marsada. Tapi, dong ope sungkun-sungkun na legan. Umpamani: Mase ma iparentahkon Jahowa naboru mamakei tudung? Halani dalahi do na ilantik gabe sintua atap siparugas i kuria, ai gabe kopala do homa sidea bani ganup naboru i kuria?

8. Domu bani Epesus 5:23, ai ganup do dalahi gabe kopala bani ganup naboru i kuria? Patorang.

⁸ Ai ganup do dalahi gabe kopala bani ganup naboru i kuria? Lang. Jesus do na gabe kopala i kuria. (Basa Epesus 5:23.) Ibagas kaluarga, suami do na itotapkon gabe kopala bani istrini. Age pe dong anakni na domma ididi, lang boi anakni ai gabe kopala bani inangni. (Ep. 6:1, 2) Anjaha hassi pe sintua na mambobahon i kuria, tapi sedo gabe kopala sidea hubani ganup sanina botou i kuria. (1 Tes. 5:12; Heb. 13:17) Anggo  dong anak boru na lang be tading pakon namatorasni, maningon totap do ipasangap ia namatorasni. Janah maningon unduk do sidea bani pangaturan na ibahen sintua. Tapi Jesus do na gabe kopala bani anak boru ai, dos songon kopala ni haganup dalahi.

9. Mase sipata botou maningon mamakei tudung?

⁹ Bani dalahi do ibere Jahowa tanggung jawab laho mangajari i kuria, sedo bani naboru. (1 Tim. 2:12) Anjaha, Jesus do na itotapkon Jahowa gabe kopala bani dalahi. Mase ibahen Jahowa pangaturan ai? Ase haganup mardalan dear ampa taratur ibagas organisasi-Ni. Tapi, sipata halani situasi dong naboru na maningon mangkorjahon tugas na somal ihorjahon dalahi. Sanggah sonai situasini, iparentahkon Jahowa do hubani botou ase sidea mamakei tudung. * (1 Kor. 11:4-7) Sedo halani lang maharga sidea gabe isuruh mamakei tudung. Tapi sihol do Jahowa ase sidea patuduhkon hormat janah mangkargai sanina na domma itotapkon Jahowa gabe kopala. Sonari, ulas hita ma sungkun-sungkun na legan: Ai sarupa do tanggung jawab ni kopala kaluarga pakon sintua?

10. Aha do ra na mambahen sahalak sintua gabe sihol uhurni mambahen aturan i kuria?

¹⁰ Halani holong uhur ni ganup sintua bani Jesus, gabe holong do homa uhur ni sidea hubani “biribiri” ni Naibata. (Joh. 21:15-17) Halani ai, ra do adong sintua na mangahap dirini domma songon kopala kaluarga i kuria ai. Ra do nini uhurni anggo kopala kaluarga maningon do mambahen aturan ibagas kaluargani laho manlinggomi sidea. Halani ai, ra do ia  marpingkir anggo ia pe maningon mambahen aturan ibagas kuria laho manlinggomi sanina botou. Dong do homa sanina botou na mangindo ase sintua na mambahen haputusan bani sidea. Tapi, ai sarupa do tanggung jawab ni kopala kaluarga pakon sintua?

11. Aha do na sarupa bani tanggung jawab ni sintua i kuria pakon kopala kaluarga?

¹¹ Humbani hata ni si Paulus, ibotoh hita ma dong na sarupa bani tanggung jawab ni sintua i kuria pakon tanggung jawab ni kopala kaluarga. (1 Tim. 3:4, 5) Umpamani, iparentahkon Jahowa do ase anggota kaluarga maningon unduk bani kopala kaluarga. (Kol. 3:20) Anjaha sanina botou pe maningon unduk hubani sintua i kuria. Leganni ai, sihol do Jahowa ase kopala kaluarga mangurupi kaluargani totap dohor hu Bani. Maningon parduli do homa ia bani kaluargani janah mambere aha na ihaporluhon sidea. Maningon sonai ma homa na ibahen sintua i kuria. Maningon iurupi ia do sanina botou ase totap dohor bani Jahowa. Maningon parduli do sidea bani sanina botou janah mangurupi ise pe na mamorluhon. (Jak. 2:15-17) Anjaha, iparentahkon Jahowa do bani kopala kaluarga pakon sintua i kuria ase sidea mangihutkon aturan-Ni, janah lang boi mangkorjahon ‘lobih humbani na tarsurat’ ibagas Bibel.​—1 Kor. 4:6.

12-13. Domu bani Rom 7:2, aha do bedani tanggung jawab ni kopala kaluarga pakon sintua?

 ¹² Tapi, dong do homa bedani tanggung jawab ni sintua i kuria pakon kopala kaluarga. Umpamani, sintua do na ibere Jahowa tanggung jawab laho manguhumi ibagas kuria. Jadi, maningon ipadarat sintua do halak na mambahen dousa janah lang ra mambahen hamubahon.​—1 Kor. 5:11-13.

¹³ Tapi, dong do tanggung jawab na ibere Jahowa hubani kopala kaluarga, janah lang ibere tanggung jawab ai bani sintua. Umpamani, kopala kaluarga do na marhak mambahen aturan bani kaluargani, anjaha maningon unduk do kaluargani bani pangaturan ai. (Basa Rom 7:2.) Contohni, boi do ibahen kopala kaluarga aturan jam piga anakni maningon das i rumah. Anjaha boi do ipinsang ia anakni porini lang idalankon aturan ai. (Ep. 6:1) Tapi paima ibahen kopala kaluarga aturan i rumahni, dear do anggo manriah lobei ia pakon istrini halani domma “sada daging” sidea. *—Mat. 19:6.

14. (a) Domu bani Markus 10:45, mase Jesus na ipilih Jahowa gabe kopala i kuria? (b) Aha do tanggung jawab ni Pangurus Pusat? (Tonggor ma kotak “ Tanggung Jawab ni Pangurus Pusat”.)

¹⁴ Domma ibere Jahowa Anak-Ni, ai ma Jesus, laho manobus ganup jolma. (Basa Markus 10:45; Lah. 20:28; 1 Kor. 15:21, 22) Halani ai ma ase ipilih Jahowa Jesus gabe kopala i kuria. Jadi, marhak do Jesus mambahen aturan hubanta ganupan. Janah maningon unduk do hita bani aturan ai. (Gal. 6:2) Tapi,  lang pitah mambere aturan Jesus. Ihaholongi anjaha isarihon ia do homa hita.​—Ep. 5:29.

15-16. Aha do na boi iparlajari nasiam humbani si Marley pakon si Benjamin?

¹⁵ Hasomanta naboru boi unduk hubani Jesus marhitei mangihutkon aturan na ibahen suamini ampa sintua i kuria. Pardiateihon ma na ihatahon hasomanta naboru na margoran si Marley, na tading i Amerika Serikat. Nini do, “Marusaha do ahu gabe istri na bujur anjaha gabe sitiruon na madear ibagas kuria. Sipata ra do lang urah bangku unduk bani pangaturan na ibahen suamiku ampa pangaturan na ibahen i kuria. Tapi, bujur tumang do suamiku ampa sintua i kuria hubangku. Ihargai anjaha ipuji sidea do pambahenanku. On ma na mangurupi ahu lambin urah unduk bani pangaturan na ibahen sidea.” Tontu bahat do hasomanta naboru na sarupa pangahapni pakon Botou Marley ai.

¹⁶ Hasomanta dalahi pe boi unduk bani kopala ni kuria marhitei mamuji anjaha mangkargai aha na ibahen hasomanta naboru. Hasomanta dalahi na margoran si Benjamin, na tading i Inggris, mangkatahon, “Sasintongni bahat do na boi huparlajari humbani botou i kuria. Umpamani, gabe toguh do haporsayaonku anggo hutangar komentar ni sidea i partumpuan. Marlajar do homa ahu humbani sidea sonaha carani mamungkah parsahapan sanggah marbarita, ampa sonaha carani ase lambin dear mangajarhon Bibel. Patut do sidea ai ipuji anjaha ihargai.”

17. Aha ma hasilni anggo unduk hita bani pangaturan na ibahen halak na mambobahon ibagas organisasi ni Jahowa?

¹⁷ Anggo haganup hita, age naboru, dalahi, kopala kaluarga, atap pe sintua, unduk bani halak na mambobahon ibagas organisasi ni Jahowa, gabe adong ma hadameion ibagas kuria. Anjaha na sipontingan, parohkon hasangapon do ai hubani Naibata Jahowa.​—Ps. 150:6.