1-2. Domu bani Mateus 5:11, sonaha ma namin pangahapta sanggah iparburu?

MARJANJI do Jesus martuah do holi ganup susianni. Hassi pe sonai, ihatahon ia iparburu do holi sidea. (Mat. 10:22, 23; Luk. 6:20-23) Tontu malas uhurta boi gabe susian ni Jesus. Tapi sonaha pangahapta anggo hita ihasogamkon kaluarga, iparburu pamarentah, atap pe ipaksa hasoman i parhorjaan atap i sikolah hita mangkorjahon na salah? Ra do gabe holsohan hita sanggah mamingkirhon ai.

² Somalni, lang dong halak na marmalas ni uhur sanggah marsitaronon. Tapi Bibel mangkatahon maningon ai do na ibahen hita. Umpamani, bani suratni ihatahon si Jakobus do ase ulang mandolei hita sanggah dong parlajouan. Tapi maningon marusaha do hita ase boi totap marmalas ni uhur. (Jak. 1:2, 12) Jesus pe mangkatahon maningon marmalas ni uhur do hita sanggah iparburu. (Basa Mateus 5:11.) Sonaha hita boi totap marmalas ni uhur sanggah dong parlajouan? Ulas hita ma pasal ai humbani surat ni si Jakobus bani halak Kristen abad na parlobei. Tapi paima ai, ulas hita ma tantangan aha do na iahapkon sidea.

3. Aha ma na masa lang piga dokah dobkonsi si Jakobus gabe susian ni Jesus?

³ Lang piga dokah dobkonsi si Jakobus gabe susian ni Jesus, iparburu ma halak Kristen i Jerusalem. (Lah. 1:14; 5:17, 18) Anjaha sanggah si Stepanus ibunuh, maporus ma halak Kristen hun huta ai, janah “merap ma [sidea] hu nagori Judea ampa Samaria”. Dong do homa na laho hu Pulou Kiprus ampa hu Antiokia. (Lah. 7:58–8:1; 11:19) Tontu bahat do sitaronon ni sidea sanggah ai. Hassi pe sonai, totap do sidea mambaritahon ambilan na madear huja pe sidea laho. Anjaha lambin tambah ma  kuria i daerah Rom. (1 Ptr. 1:1) Tapi dobkonsi ai, dong use masalah na baru.

4. Parlajouan aha ope na iahapkon halak Kristen bani abad na parlobei?

⁴ Bahat do bagei ni parlajouan na iahapkon halak Kristen ijia. Umpamani hira-hira tahun 50 M, iparentahkon Kaisar Rom Klaudius ma halak Jahudi manadingkon Rom. Jadi tarpaksa ma itadingkon sidea rumahni janah laho hu ianan na legan. (Lah. 18:1-3) Hira-hira tahun 61 M, apostel Paulus manulis bahat do halak Kristen na ibahen gabe sitontonan, iapasi, imasukkon hu penjara, anjaha irampas artani. (Heb. 10:32-34) Leganni ai, dong do homa sidea na hahurangan ampa boritan.​—Rom 15:26; Pil. 2:25-27.

5. Sungkun-sungkun aha ma na laho iulas hita?

⁵ Sanggah si Jakobus manulis suratni hira-hira tahun 62 M, domma ibotoh ia bahat do parlajouan na iahapkon hasoman sahaporsayaonni. Halani ai, marhitei tonduy na pansing itogu-togu Jahowa ma ia laho manuratkon podah na boi mangurupi halak Kristen ase totap martahan janah marmalas ni uhur hassi pe bahat sitaronon. Eta ulas hita ma piga-piga podahni ai, anjaha balosi hita ma sungkun-sungkun on: Malas ni uhur halani aha do na itulis si Jakobus bani suratni? Aha do na boi mambahen magou malas ni uhur ai? Janah sonaha hapentaran, haporsayaon, ampa habaranion boi mambahen hita totap marmalas ni uhur hassi pe marsitaronon?

6. Domu bani Lukas 6:22, 23, mase halak Kristen boi totap marmalas ni uhur age pe dong parlajouan?

⁶ Ra do nini uhur ni halak anggo sehat sidea, bahat duitni, atap pe martuah kaluargani,  gabe boi ma sidea marmalas ni uhur. Tapi sedo malas ni uhur sisonai na imaksud si Jakobus. Malas ni uhur na imaksud ia bani suratni ai ma buah ni tonduy. (Gal. 5:22) Halak Kristen boi marmalas ni uhur halani mambotoh domma ibahen ia malas uhur ni Jahowa, janah domma itiru ia Jesus Kristus. (Basa Lukas 6:22, 23; Kol. 1:10, 11) Malas ni uhurta ai boi ibandingkon songon apuy bani lampu semprong. Apuy bani lampu ai boi totap gara halani dong semprong na manjaga humbani logou. Sonai ma homa hita. Boi do hita totap marmalas ni uhur hassi pe lang dong duit, atap pe borit-boritan hita. Hassi pe dong kaluarga na manrisai atap pe masogam hubanta, totap do hita marmalas ni uhur. Sasintongni, lambin gogoh munsuh manlawan hita, lambin banggal ma malas ni uhurta. Jadi ganup parlajouan na iahapkon hita halani haporsayaonta, sasintongni ai patuduhkon anggo hita tongon-tongon susian ni Jesus. (Mat. 10:22; 24:9; Joh. 15:20) Halani ai ma ase ihatahon si Jakobus, “Nasiam sanina, hira nasiam ma in malas ni uhur tumang, anggo madabuh nasiam hubagas bagei ni parlajouan.”​—Jak. 1:2.

7-8. Mase haporsayaonta boi lambin toguh sanggah hita ilajou?

⁷ Ipatugah si Jakobus use alasan na legan mase halak Kristen ra manaron parlajouan. Nini do, “Na mangkorhon hasabaron do parlajouan na hubani haporsayaon nasiam.” (Jak. 1:3) Parlajouan ai boi ipausih songon apuy na igunahon laho manoppa podang humbani bosi. Sanggah itutung podang ai janah imasukkon hubagas bah, gabe lambin gogoh ma bosi ni podang ai. Sonai homa hita, anggo ra hita manaron parlajouan, gabe lambin toguh ma haporsayaonta. Halani ai nini si Jakobus use, “Hasabaron ai mangkorhon horja na gokan dear, ase gabe gokan dear nasiam, seng dong sihataon anjaha seng marhahurangan.” (Jak. 1:4) Sanggah ibotoh hita parlajouan ai boi mambahen haporsayaonta lambin toguh, gabe marmalas ni uhur ma hita manaron parlajouan ai.

⁸ Bani suratni ipatugah si Jakobus do homa aha na boi mambahen hita lang be marmalas ni uhur. Aha ma ai? Janah sonaha ase hita boi totap marmalas ni uhur?

9. Mase porlu hapentaran ai?

⁹ Na mambahen lang be marmalas ni uhur: Sanggah lang ibotoh aha na laho bahenon. Sanggah dong parsoalan, tontu ipindo hita do ase iurupi Jahowa hita mambahen haputusan na pamalaskon uhur-Ni, marguna bani sanina botou, janah mangurupi hita totap setia. (Jer. 10:23) Porlu do homa hapentaran ai ase ibotoh hita aha na laho sibahenon ampa na laho ihatahon hubani halak na manlawan hita. Tapi  gabe mandolei do hita anggo lang ibotoh aha na maningon ibahen. On ma na boi mambahen hita lang be marmalas ni uhur.

10. Ase boi mandapot hauhuron, aha ma na maningon ibahen hita domu bani Jakobus 1:5?

¹⁰ Na porlu ibahen ase totap marmalas ni uhur: Pindo ma hapentaran hubani Jahowa. Ase boi hita totap marmalas ni uhur manaron parlajouan, maningon martonggo do hita mangindo hapentaran bani Jahowa ase boi mambahen haputusan na madear. (Basa Jakobus 1:5.) Tapi sonaha porini lang mintor ibalosi Jahowa tonggonta ai? Si Jakobus mangkatahon maningon totap do “ipindo” hita hauhuron atap hapentaran hubani Naibata. Seng manggila Ia hubanta anggo inunuti hita martonggo. Tapi ‘layak do Ia mambere’ hapentaran hubanta ase boi hita manaron parlajouan. (Ps. 25:12, 13) Ibotoh Ia do sitarononta, iarusi Ia do homa pangahapta, janah sihol do uhur-Ni laho mangurupi hita. Anggo irimangi hita ganupan ai, gabe marmalas ni uhur ma hita. Sonaha Jahowa mambere hapentaran hubanta?

11. Aha ope na porlu ibahen hita laho mandapot hapentaran?

¹¹ Ibere Jahowa do hapentaran marhitei Bibel. (Pod. 2:6) Jadi ase boi mandapot hapentaran, maningon iparlajari hita do Bibel ampa publikasi na ipasirsir organisasi. Tapi lang sungkup pitah ai. Maningon idalankon hita do homa parentah ni Naibata. Si Jakobus manulis, “Gabe sihorjahon hata in ma nasiam, ulang panangi-nangi tumang.” (Jak. 1:22) Anggo ra hita mandalankon podah ni Bibel, gabe lambin damei ma hita, lamlam, anjaha gok idop ni uhur. (Jak. 3:17) Sifat-sifat on ma na boi mangurupi hita totap marmalas ni uhur sanggah dong parlajouan.

12. Mase maningon iparlajari hita isi ni Bibel?

¹² Usih songon sormin do Hata ni Naibata ai. Gabe iurupi do hita laho mambotoh aha na  porlu ipadear anjaha sonaha carani. (Jak. 1:23-25) Umpamani, dobkonsi iparlajari hita Bibel, ra do gabe ibotoh hita anggo hita porlu manrajai diri. Marhitei pangurupion ni Jahowa, gabe ibotoh hita ma sonaha ase hita totap lamlam sanggah dong parsoalan atap dong halak na mambahen hita manggila. Anggo lamlam hita sanggah dong parsoalan, gabe torang ma hita marpingkir. Janah boi ma hita mambahen haputusan na dear. (Jak. 3:13) Tangkas ma, ponting tumang do ibotoh hita isi ni Bibel!

13. Mase porlu hita marlajar humbani siusihan na dong bani Bibel?

¹³ Sipata, ra do dobkonsi marsitaronon hita halani hasalahanta, baru ma sadar hita. Tapi, lang dear cara marlajar sisonai. Dearan do hita marlajar humbani pangalaman ni halak na legan. Halani ai, iojur si Jakobus ma hita ase marlajar humbani siusihan na dong ibagas Bibel, songon si Abraham, si Rahab, si Job, pakon si Elias. (Jak. 2:21-26; 5:10, 11, 17, 18) Setia do sidea bani Jahowa janah totap marmalas ni uhur ibagas sitarononni. Hunjon tangkas ma, marhitei pangurupion ni Jahowa hita pe boi mangkorjahon na sarupa.

14-15. Mase lang boi lalab ipaturut hita bungbang uhurta?

¹⁴ Na mambahen lang be marmalas ni uhur: Lalab mardua uhur. Sipata, ra do adong ajaran ni Bibel na lang urah iarusi hita. Atap, ra do pangahapta lalab lang ibalosi Jahowa tonggonta. Halani ai, ra do gabe mardua uhur hita. Anggo ipaturut hita sonai, ra do gabe galek haporsayaonta, janah lang be orot parhasomananta pakon Jahowa. (Jak. 1:7, 8) Ujungni, lang be ipaima-ima hita saud janji ni Naibata bani ari simagira.

¹⁵ Ipausih si Paulus do pangarapanta songon sauh atap jangkar. (Heb. 6:19) Sanggah dong haba-haba, idabuh do jangkar hubagas laut ase ulang iboan logou kapal ai atap tombom bani batu karang. Tapi, lang marguna jangkar ai anggo tasikon ranteini. Sonai ma homa hita, anggo lalab bungbang uhurta gabe galek ma holi haporsayaonta. Jadi sanggah dong parsoalan, lang be porsaya hita boi do ipasaud Jahowa janji-Ni. Si Jakobus mangkatahon halak na bungbang uhur “usih do ai hubani gilumbang ni laut, na [iombus] anjaha nionjar ni logou”. (Jak. 1:6) Sunsah do halak sisonai marmalas ni uhur!

16. Aha do na porlu ibahen hita ase ulang lalab mardua uhur?

¹⁶ Na porlu ibahen ase totap marmalas ni uhur: Patoguh ma haporsayaonmu. Ulang ma lalab bungbang uhurta. Bani panorang ni nabi Elias, gabe bungbang do juakjuak ni Naibata. Halani ai nini si Elias ma bani sidea, “Sadia dokah nari sai mengkat-engkat nasiam angkup bei? Anggo Jahowa do Naibata, Ia ma irikkon nasiam; tapi anggo baal do, ia ma irikkon nasiam.” (1 Raj. 18:21) Sonai ma homa na porlu ibahen hita sonari on. Porlu do ipareksa hita bukti-bukti na patuduhkon Jahowa do Naibata na sintong, Hata-Ni do na dong ibagas Bibel, janah Saksi Jahowa do juakjuak-Ni. (1 Tes. 5:21) Anggo ibahen hita sonai, gabe ipatoguh ma haporsayaonta. Tapi anggo pangahapta porlu do hita iurupi sintua laho patoguhkon haporsayaonta, ulang malang manungkun bani sidea. Maningon marusaha do hita ase boi totap marmalas ni uhur mangidangi Jahowa!

17. Aha do na masa anggo mandolei hita?

¹⁷ Na mambahen lang be marmalas ni uhur: Sanggah mandolei. Bibel mangkatahon, “Anggo [“mandolei”, Terjemahan Dunia Baru] ho bani panorang hasosakan, ai ma tandani na hurang do gogohmu.” (Pod. 24:10) Tongon do ai, anggo mandolei ham, gabe lang be iahapkon ham malas ni uhur.

18. Aha do artini martahan sanggah dong parlajouan?

 ¹⁸ Na porlu ibahen ase totap marmalas ni uhur: Pindo ma habaranion hubani Jahowa ase boi martahan. Porlu do habaranion ase boi hita martahan sanggah dong parlajouan. (Jak. 5:11) Hata “hasabaron” na igunahon si Jakobus mangartihon sasahalak na totap jongjong bani iananni. Ra do gabe idingat hita sahalak tentara na barani manlawan munsuhni. Sanggah roh munsuhni, lang lintun ia.

19. Aha ma na boi iparlajari hita humbani si Paulus?

¹⁹ Humbani si Paulus boi do hita marlajar sonaha patuduhkon habaranion ampa hasabaron. Sipata, galek do ia. Tapi boi do ia totap martahan halani marpangunsandeian hubani Jahowa, janah ipindo ia do hagogohon hun Bani. (2 Kor. 12:8-10; Pil. 4:13) Sonai homa hita, boi do hita totap martahan anggo martoruh ni uhur hita mangindo hagogohon hubani Jahowa.​—Jak. 4:10.

20-21. Aha do na mambahen pos uhurta?

²⁰ Pos ma uhurta sedo panguhuman humbani Naibata sanggah dong parlajouan na roh hubanta. Si Jakobus mangkatahon, “Ulang ma adong na mangkatahon sanggah na tarlajou ia, ‘Na tarlajou do ahu humbani Naibata!’ Ai seng boi hona lajou Naibata laho mangkorjahon na jahat, anjaha Ia sandiri seng adong na ilajou.” (Jak. 1:13) Anggo porsaya hita bani ayat ai, lambin dohor ma hita hubani Jahowa, Bapa na parholong in.​—Jak. 4:8.

²¹ “Seng ra mubah” Jahowa. (Jak. 1:17) Bani abad na parlobei, iurupi Ia do halak Kristen ase totap martahan sanggah dong parlajouan. Sonari pe, ra do homa Ia mangurupi hita. Halani ai, tongtong ma martonggo bani Jahowa mangindo hapentaran, haporsayaon, ampa habaranion. Tontu ibalosi Ia do tonggonta. Gabe iurupi ma holi hita totap martahan janah marmalas ni uhur hassi pe dong parlajouan!