Ahu tubuh tahun 1941, janah sedo halak na bayak kaluarganami. Hanami tading i Paris, Prancis. Marosuh tumang do ahu marlajar. Tapi sanggah marumur 10 tahun hona panahit TBC ma ahu, halani ai soh ma ahu sikolah. Dokter mangkatahon ahu lang boi malojatu. Sadokah piga-piga bulan hupakei ma panorangku laho mambasa kamus ampa manangar radio na mangulas pasal pengetahuan na ibahen Universitas Paris. Dobkonsi ihatahon dokter domma ahu sehat, sikolah ma ahu use. Malas tumang do uhurhu halani ai. Huhatahon ma ibagas uhurhu, ‘Jago tumang do hape dokter on tene.’ Mulai hunjai marcita-cita ma ahu gabe dokter, ase boi pamalumkon halak na boritan. Anggo isungkun bapa ahu aha do cita-citamu, totap do hubalosi, “Jadi dokter.”

Marugama Katolik do kaluarganami. Tapi lang bahat na hubotoh pasal Naibata. Halani ai bahat do sungkun-sungkunku na lang boi hubalosi. Dobkonsi kuliah ahu i kedokteran lambin porsaya ma ahu tongon-tongon do adong Sitompa.

Parlobei sahali ahu meneliti sel bunga tulip mamakei mikroskop. Longang do ahu sanggah mangidah sonaha reaksi ni sel ai bani suhu panas ampa na borgoh. Huteliti do homa reaksini sitoplasma (sada zat na dong bani sel ai). Boi do ai lambin etek anggo hona garam janah lambin banggal anggo hona bah na borsih. Ai ma na mambahen sel-sel ai martahan sonaha pe situasini. Humbani penelitian ai lambin porsaya ma ahu adong do Sitompa ai.

 Bani tahun paduahon ahu kuliah, lambin porsaya ma ahu adong do Sitompa ai sanggah hu parlajari pasal angkula ni jolma. Sanggah ai ahu meneliti rancangan tangan. Ase boi bergerak jari-jarinta, adong do kerja sama antara otot, urat, ampa jaringan pengikat bani tangan. Umpamani, urat na dong i pergelangan tangan terhubung hu jari-jarita. Halani adong jaringan na mangikat tulang ni ruas jari-jari, gabe boi ma jari-jarinta lurus ampa manggolom. Anggo lang dong kerja sama ganupan ai gabe hurleh ma tanganta. Ai ma na mambuktihon adong do Sitompa na pentar tumang.

Lambin longang do uhurhu bani Sitompa sanggah huparlajari sonaha bayi na baru tubuh bernafas. Sanggah i kandungan ope bayi ai, ia mandapot oksigen humbani inangni marhitei tali pusar. Halani ai, alveoli (kantong-kantong udara na etek tumang) na ibagas paru-paruni kosong ope janah lape marfungsi. Tapi piga-piga minggu paima tubuh, marisi cairan ma alveoli ai na isobut surfaktan. Cairan si ma na mambahen kantong ai totap marfungsi sanggah ia itubuhkon. Jadi sanggah tubuh ia janah parlobei sahali ia bernafas, tartutup ma lubang jantung ni bayi ai janah mulai ma mardalan darah hu paru-paruni. Anjaha mintor masuk ma oksigen hu kantong-kantong na ibagas paru-paru ai. Jadi boi ma bayi ai bernafas sendiri. Ai ma na mambahen longang tumang uhurhu.

Halani sihol ahu mambotoh lambin bahat pasal Naibata, hubasa ma Bibel. Longang tumang do uhurhu sanggah mambasa hukum pasal kebersihan na ibere Naibata bani halak Israel. Iparentahkon do bani sidea dob salosei mambuang kotoran, maningon ikubur sidea do ai. Maningon taratur do homa sidea maridi. Anjaha anggo dong na hona panahit na manular maningon ikarantina do ia. Mantap tumang do hukum ai, halani baru ope ibotoh jolma ai hira-hira 150 tahun na salpu. Hape ai domma ipatugah Naibata hira-hira 3.000 tahun na dob salpu. Leganni ai bani buku 3 Musa dong homa hukum ni Naibata pasal berhubungan seks. Anggo idalankon halak Israel hukum ai gabe sehat ma sidea. (3 Mus. 12:1-6; 15:16-24) Jadi, sasintongni ganup hukum ni Naibata bahen hadearan do ai bani bangsa Israel. Anggo idalankon sidea ai, ipasu-pasu ma sidea. Gabe porsaya ma ahu Hata ni Naibata do na tarsurat ibagas Bibel. Tapi sanggah ai lape hubotoh goran ni Naibata.

Sanggah kuliah, pajumpah ma ahu pakon si Lydie. Janah marhajabuan ma hanami bani tahun 1965. Tapi kuliah ope ahu sanggah ai. Bani tahun 1971, domma dong tolu niombahnami. Dob ai dong homa tolu nari, jadi onom ma ganupan niombahnami. Sai tongtong do iurupi si Lydie ahu i parhorjaan atap pe i rumah.

Dobkonsi tolu tahun ahu marhorja i rumah sakit, mambuha klinik ma ahu. Dob ai roh ma dua pasien, songon na husaritahon nongkan ai. Sanggah ahu manulis  resep obat bani sidea, ihatahon istrini ma bangku, “Dokter, ulang bahen ham obat na dong kandungan darahni da.” Tarsonggot ma ahu. Janah husungkun, “Mase?” Ihatahon ia ma, “Saksi Jahowa do hanami.” Lape ongga hutangar pasal Saksi Jahowa ampa haporsayaonni. Jadi ipatuduh sidea ma humbani Bibel mase ia lang ra manjalo darah. (Lah. 15:28, 29) Dob ai ipatorang sidea ma pasal Harajaon ni Naibata bangku. Janah ihatahon sidea anggo domma roh Harajaon ai lang dong be na boritan ampa na matei. (Pangk. 21:3, 4) Jadi huhatahon ma bani sidea, “Aha na ihatahon hanima ai, ai ma angan-anganku humbani na etek-etek nari. Halani ai ma ahu marcita-cita gabe dokter ase boi pamalumkon na boritan.” Malas tumang uhurhu na marsarita ai janah dong sada satongah jam hanami mangulas pasal Bibel. Dobkonsi ai, lang marosuh be ahu hu Katolik. Anjaha na mambahen lambin malas uhurhu halani hubotoh ma Jahowa do hape goran ni Sitompa na pentar tumang.

Dobkonsi ai pajumpah ma ahu pakon sidea tolu hali nari i klinikku. Janah tiap jumpah hanami dong sajam lobih hanami mangulas isi ni Bibel. Dob ai huontang ma sidea hu rumah ase lambin bahat na iulas hanami pasal Bibel. Dihut do homa si Lydie marlajar Bibel. Tapi sanggah ipatuduh sidea humbani Bibel salah do ajaran ni Katolik, lang marosuh ia. Huontang ma pastor hu rumah, berdebat ma hanami ronsi tongah borngin. Hunjai porsaya ma si Lydie pitah Saksi Jahowa do ugama na mangajarhon na sintong. Lambin dokah lambin bagas ma holongnami bani Naibata. Anjaha bani tahun 1974, ididi ma hanami.

Halani domma ibotoh hanami harosuh ni Naibata, ibahen hanami ma mangidangi Jahowa do na sipontingan ibagas goluhnami. Iajarhon hanami do homa bani niombahnami ase mangihutkon prinsip ni Bibel, mangkaholongi Naibata, ampa halak na legan. Ai ma na mambahen kaluarganami martuah.—Mat. 22:37-39.

Sapanriahan do ahu pakon si Lydie mambahen aturan i rumah. Iihutkon hanami do prinsip na iajarhon Jesus, “Sonon ma hatanima, Eak, anggo eak, lang, anggo lang.” Janah ibotoh ganup niombahnami do ai.  (Mat. 5:37) Umpamani, sanggah borungku marumur 17 tahun, iarahkon hasomanni ma ia mardalani. Tapi lang ibere si Lydie. Ihatahon hasomanni ma, “Anggo lang ibere mamakmu, sungkun ma bapamu.” Tapi ihatahon borungku ai ma, “Lang pala, sarupa do sidea.” Jadi boi ma ididah ganupan niombahnami marusaha do hanami mandalankon prinsip ni Bibel. Janah malas tumang do uhurhu halani sonari domma bahat kaluarganami na gabe Saksi Jahowa.

Age pe marosuh tumang ahu halani mambotoh hasintongan, tapi totap do ahu marosuh manggunahon aha na dob huparlajari sanggah kuliah laho mangurupi sanina botou na legan. Jadi mangurupi ma ahu i Betel Paris, sonai homa i Betel i Louviers. Domma hira-hira 50 tahun ahu mangurupi ijai. Bahat tumang do hasomanku ijai. Janah umur ni sidea hira-hira 90-an. Ongga do ahu pajumpah pakon sada sanina na mangidangi i Betel, hape hira-hira 20 tahun na salpu ahu do na mangurupi inangni sanggah manubuhkon ia.

Lambin dokah lambin banggal ma holongku bani Naibata. Janah huidah do sai tongtong do itogu-togu Jahowa juakjuak-Ni marhitei organisasi-Ni. Umpamani bani tahun 1980-an, ibahen Pangurus Pusat ma pangaturan i Amerika Serikat na mangurupi sanina-sanina laho patorangkon haputusan ni Saksi Jahowa pasal darah hubani dokter-dokter.

Bani tahun 1988, ibahen Pangurus Pusat ma sada departemen i Betel na isobut Layanan Informasi Rumah Sakit. Depertemen ai mangawasi Panitia Penghubung Rumah Sakit (PPRS). Mungkahni PPRS pitah i Amerika Serikat ope adong. Jadi sidea ma na mangurupi Saksi laho manorihi dokter na ra mambere pengobatan tanpa darah. Dobkonsi ai ibahen ma homa PPRS i cabang-cabang i sab dunia on, tarmasuk ma i Prancis. Megah tumang do uhurhu halani parduli tumang do organisasi bani sanina botou na boritan.

Hinan marosuh tumang do ahu gabe dokter. Tapi sonari dong do na sipontingan marimbangkon horja ai, ai ma mangurupi halak ase lambin dohor bani Naibata na mambere hagoluhan banta. Dobkonsi pensiun, gabe perintis biasa ma ahu pakon si Lydie. Marusaha do hanami mangurupi buei halak laho mambotoh hasintongan.

Ronsi sonari totap ope ahu manambari na boritan. Tapi hubotoh do lang dong dokter na boi pamalumkon ganup naborit janah totap ope dong na matei. Jadi sai torus do hupaima i dunia na baru lang dong be holi na boritan atap pe na matei. Anjaha ijai sihol do ahu marlajar lambin bahat pasal rancangan tubuh ni jolma na hebat tumang. Pos uhurhu saud do holi ganup angan-anganku sanggah dakdanak ai.