1-2. Parlajaran aha do na idapot sada sanina pasal mambere podah?

 PIGA-PIGA tahun na salpu dong ma sintua na mambahen kunjungan penggembalaan hubani sada botou halani gati ia lang martumpu. Jadi mintor ibasahon sidea ma ayat-ayat na patugahkon mase ponting tumang roh martumpu. Dobkonsi mulak sidea nini uhurni domma dear na ibahen sidea ai. Hape lang sonai pangahap ni botou ai. Nini ma sonon, “Lang ibotoh sidea sitarononku sadokah on.” Jadi pangahap ni botou ai hurang sosok do podah ni sidea ai.

² Dob ai isaritahon sintua ai ma, “Sanggah ai pangahapku botou ai do na salah. Tapi dobkonsi hurimang, gabe sadar ma ahu marimbangkon hubasahon ayat dearan ma namin husungkun lobei, ‘Aha do masalahni sadokah on? Ai dong do na porlu huurupi?’” Jadi humbani pangalaman ai dapot ia ma sada parlajaran na ponting tumang. Sonari ia lambin bujur janah marusaha mangarusi pangahap ni sanina botou sanggah mambahen penggembalaan.

3. Ise do i kuria na boi mamodahi?

 ³ Sintua do na lobih martanggung jawab mamodahi sanina  botou. Tapi sipata, dong do panorang hita pe boi mamodahi na legan. Umpamani, ra do adong hasoman na porlu ipodahi. (Ps. 141:5; Pod. 25:12) Songon na ipatugah bani Titus 2:3-5, dong botou na matua mamodahi ‘botou na poso ope’. Leganni ai, namatoras pe maningon do homa mamodahi niombahni. Jadi hassi pe artikel on ibahen bani sintua, tapi ganup do hita boi marlajar sonaha cara na dear mambere podah ase na manangar podah ai boi tarojur janah ‘mambahen malas uhurni’.​—Pod. 27:9.

4. Aha do na laho iulas hita bani artikel on?

⁴ Bani artikel on, dong ompat sungkun-sungkun na porlu iulas hita. (1) Aha ma namin na mangojur hita mambere podah? (2) Ai maningon ipodahi do ia? (3) Ise do na sosokan mambere podah ai? (4) Sonaha do cara na sidearan mambere podah?

5. Aha do na mangojur sintua mambere podah, janah mase? (1 Korint 13:4, 7)

⁵ Sanggah ididah sintua dong hasoman i kuria mangkorjahon na lepak, ibere sidea ma podah bani. (Gal. 6:1) Tapi paima sintua mambere podah, dear do anggo irimangi sidea aha na ihatahon Apostel Paulus. Nini do, “Na sabar do haholongon in anjaha na basar. . . . Bani haganup do ia tahan, haganup do ihaporsayai, haganup do iarapkon, sabar do ia manaron haganup.” (Basa 1 Korint 13:4, 7.) Anggo irimangi sintua ayat ai, holong ma namin na mangojur sidea mambere podah. Gabe dear ma holi cara ni sidea sanggah mamodahi. Ai ma na mambahen lambin urah sanina botou manjalo podah ai.​—Rom 12:10.

6. Sitiruon aha do na ibahen si Paulus sanggah mamodahi?

⁶ Ganup sintua boi do maniru si Paulus. Sanggah ididah ia dong halak i Tessalonika na porlu ipodahi, mintor ibere ia do podah ai. Tapi paima ai, ipuji si Paulus do sidea halani toguh haporsayaon ampa holongni, janah totap sidea setia bani Naibata. Ibotoh ia do homa bahat do sidea na ianiaya halani haporsayaonni. (1 Tes. 1:3; 2 Tes. 1:4) Janah isaritahon si Paulus do homa hubani kuria na legan pasal na madear ai. (1 Tes. 1:8, 9) Tontu malas do uhurni halak Tessalonika manangar pujian ai. Halani ipuji si Paulus sidea, taridah ma holong do uhurni mangidah sidea. Ai ma na mambahen dear cara ni si Paulus mamodahi sidea.​—1 Tes. 4:1, 3-5, 11; 2 Tes. 3:11, 12.

7. Mase dong halak na lang ra manjalo podah?

⁷ Anggo lang dear carani podah ai ibere, sonaha ma holi ujungni? Dong sada sintua na mangkatahon, “Dong halak na lang ra manjalo podah sedo halani salah podah ai. Tapi ra do halani lang dear carani podah ai ibere.” Hunjai ibotoh hita ma, ase lambin urah halak manjalo podah maningon halani holong ma namin hita mamodahi sedo halani marborit ni uhur.

8. Aha do na porlu irimangi sahalak sintua paima mambere podah?

⁸ Sintua ulang ma mintor podas-podas mamodahi halak. Paima mambere podah, dear do anggo irimangi sidea sungkun-sungkun on, ‘Ai tongon-tongon  do ia porlu ipodahi? Ai dong do prinsip ni Bibel na ilanggar ia atap pitah pangahapku tumang do ai?’ Jadi sahalak sintua maningon do maruhur janah ulang “hertep marsahap”. (Pod. 29:20) Anggo ragu sahalak sintua porlu do sasada halak ipodahi atap lang, boi ma isungkun ia sintua na legan atap dong do prinsip ni Bibel na mangulas pasal ai.​—2 Tim. 3:16, 17.

9. Aha do na boi iparlajari sintua hunbani si Paulus sanggah sidea sihol mambere podah pasal parpakeian? (1 Timoteus 2:9, 10)

⁹ Pardiateihon ma sada contoh on. Ididah sahalak sintua ma songon na hurang sosok do pakeian ni sada botou. Tapi paima ipodahi ia botou ai dear do lobei irimangi ia, ‘Ai tongon-tongon do pakeian ni botou ai lang sosok pakon prinsip ni Bibel atap pitah pangahap ni sandiri do ai?’ Boi do homa iulas ia pakon sintua na legan pasal ai. Anjaha dear do homa iulas sidea prinsip na ihatahon si Paulus pasal sonaha namin pakeian ni halak Kristen. (Basa 1 Timoteus 2:9, 10.) Bani ayat ai lang dong ibahen si Paulus daftar na boi ipakei ampa na lang. Tapi ihatahon ia do anggo halak Kristen maningon sopan do parpakeianni janah lang mambahen butak goran ni Naibata. Jadi paima mambere podah, porlu do ipingkirhon sintua sosok do parpakeian ni hasoman ai atap domma manlanggar prinsip ni Bibel.

10. Aha do na porlu idingat hita anggo lang sarupa pilihan ni hasoman pakon pilihanta?

¹⁰ Anggo lang sarupa pilihan na ibahen hasoman pakon pilihanta sedo artini pilihanni ai salah. Halani ai, lang boi ipaksahon hita harosuhta bani halak na legan.​—Rom 14:10.

11-12. Sungkun-sungkun aha do na porlu irimangi sintua paima mambere podah, janah mase?

¹¹ Anggo dong sasada halak na porlu ipodahi, ise ma na sosokan mambere podah? Anggo na laho ipodahi ai botou na dob marhajabuan atap pe dakdanak, dear do lobei isahapkon sintua ai bani suami ni botou ai atap bani namatoras ni dakdanak ai. Ra do iahap suamini atap namatorasni ai, dearan do ia na mamodahi. * Atap anggo sintua do na mamodahi, ra do ia pe sihol dihut ijai. Anjaha, songon na dob iulas hita bani  paragrap 3, sipata sosokan do botou na matua na mamodahi sada botou na maposo.

¹² Dong homa na porlu ipingkiri sahalak sintua paima ia mamodahi. Porlu do irimangi ia, ‘Ai ahu do na sosokan mambere podah ai bani atap dong  sintua na legan?’ Umpamani, dong ma sada hasoman na gati maretek ni uhur janah pangahapni lang maharga ia. Anggo boi, sintua na ongga mangahapkon sisonai ma na mambere podah hu bani. Mase? Halani lambin urah ma sintua ai mangarusi pangahapni hasoman ai janah lambin urah ma homa ia manjalo podah ai. Tapi na sipontingan ganup do sintua martanggung jawab mambere podah hassi pe lang dong pangalaman ni sidea na sarupa pakon sanina botou ai.

13-14. Mase sintua porlu lobei manangihon paima mambere podah?

¹³ Sirsir ma manangihon. Paima sahalak sintua mambere podah, dear do anggo irimangi ia sungkun-sungkun on, ‘Aha do na hubotoh pasal ia? Sonaha do situasini sonari on? Ai dong do masalahni na lang hubotoh? Podah aha do na sosok na maningon hubere hu bani?’

¹⁴ Leganni ai, dong do homa prinsip na porlu idingat sintua paima mambere podah. Songon na ihatahon bani Jakobus 1:19, “Ganup halak, ringgas ma ia manangi-nangi, asok marsahap anjaha lambat marringis.” Tapi ra do nini uhur ni sintua domma ibotoh sidea ganup pasal halak na laho ipodahi ai. Hassi pe sonai porlu do homa idingat sidea prinsip na isurat bani Podah 18:13. Ijai ihatahon, “Halak na mintor marsampang, hape lape torang ibogei, haotoon do ai bani anjaha habadoron.” Jadi paima sidea mambere podah, dear do isungkun sidea lobei sanina atap botou ai janah dear ma tangihon saritani. Dingat hita homa parlajaran na iulas bani awal artikel on. Sasintongni lang salah podah na ibere sintua ai. Tapi paima ia mambere podah isungkun ma namin botou ai, “Aha do masalahni sadokah on?” “Dong do na porlu huurupi?” Anggo marusaha sintua mangarusi situasini sanina botou, lambin urah ma sintua patoguhkon uhur ni sidea.

15. Sonaha sintua boi mangihutkon prinsip na dong bani Podah 27:23?

¹⁵ Dear ma mananda sanina botou. Lang sungkup anggo sintua pitah mambere podah hubani sanina botou. Tapi maningon boi ma iahapkon sanina botou parduli anjaha sihol do sintua mangurupi sidea. (Basa Podah 27:23.) Halani ai marusaha ma sintua ase boi dohor bani ganup sanina botou.

16. Aha do na boi mangurupi sintua ase boi sidea dear mamodahi?

¹⁶ Sintua porlu do homa mambere panorangni laho marsahapi pakon sanina botou lang pitah sanggah mamodahi tumang. Sanggah marbuali sidea boi ma isungkun sintua sonaha do situasi ni sidea atap aha do tantanganni. Sahalak  sintua mangkatahon, “Anggo gati sintua marbuali pakon sanina botou lambin dohor ma sidea. Jadi sanggah sintua sihol mamodahi sidea lambin urah ma ia mambere podah ai.” Janah sidea pe lambin urah ma manjalo podah ai.

17. Sanggah attigan do sintua porlu sabar janah bujur?

¹⁷ Totap ma sabar janah bujur. Ponting tumang do sintua totap sabar janah bujur halani ra do adong sanina botou na lang mintor manjalo podah ni sidea. Sanggah sonai situasini, ulang ma mintor borit uhur ni sidea. Porlu do sintua maniru Jesus. Bibel mangkatahon, “Seng ponggolhononni arung-arung na dob marosak, anjaha seng intopkononni sumbu na dob mirlop-irlop.” (Mat. 12:20) Halani ai dear ma itonggohon sintua halak na lang ra manjalo podah ai ase iarusi ia mase ia porlu ipodahi janah ra mandalankon podah ai. Sipata porlu do panorang bani sasada halak laho mangarusi podah na ibere bani sidea. Anggo totap sabar janah bujur sintua, ra do ujungni gabe ra sidea mandalankon podah ai. Tarlobih ma halani podah ai ibuat humbani Bibel.

18. (a) Aha do na porlu idingat sintua sanggah mamodahi? (b) Songon na iulas bani kotak, aha do na porlu irimangi namatoras?

¹⁸ Marlajar humbani hasalahan. Halani hita jolma na lang sempurna, ra do lang tarbahen hita ganup na iulas bani artikel on. (Jak. 3:2) Tapi boi do hita marlajar humbani hasalahanta. Anggo iahapkon sanina botou holong do sintua bani sidea, lambin urah ma sidea manalpuhon hasalahan ni sintua sanggah sidea mambere podah.​—Tonggor homa kotak “ Sipasingat bani Namatoras”.

19. Aha do na boi ibahen sintua ase podah ni sidea boi mambahen malas uhur ni sanina botou?

¹⁹ Tongon lang sai urah mambere podah halani sintua lang sempurna sonai  homa sidea na ipodahi ai. Age pe sonai dong do parlajaran na boi dapot hita humbani artikel on. Halani holong do ase ibere sintua podah. Janah ipingkiri sidea do homa ai porlu do sahalak sanina atap botou ipodahi, anjaha ise do na sosokan mambere podah. Paima sidea mambere podah, isungkun do lobei sanina atap botou ai janah dear tangihon saritani ase boi iarusi sintua sonaha situasini. Marusaha do homa sintua ase boi lambin dohor bani sanina botou. Dingat ma tujuan ni sintua sedo pitah mamodahi tumang. Tapi ase podah ai boi “mambahen malas uhur” ni sanina botou.​—Pod. 27:9.