1-2. (a) Mase bahat halak lang porsaya bani pamarentah? (b) Aha do na laho iulas hita bani artikel on?

 SONARI on, bahat do halak na lang porsaya bani pamarentah. Mase sonai? Halani bahat do pamarentah na manlinggomi halak na bayak tapi lang adil bani na miskin. Sosok ma ai songon na ihatahon bani Bibel, ‘Jolma manrajai hasomanni jolma gabe hasedaon bani dirini sandiri.’ (Par. 8:9) Leganni ai, bahat do homa sonari on pamimpin ugama na sambor parlahouni na mambahen piga-piga halak lang porsaya be bani Naibata. Jadi, sanggah dong parlajar Bibelta, ra do lang urah laho mangurupi sidea ase porsaya bani Jahowa ampa halak na ipilih Ia mambobahon organisasi-Ni.

² Tapi sedo pitah parlajar Bibelta na maningon porsaya bani Jahowa ampa organisasi-Ni. Hita pe, lang soal domma dokah hita gabe Saksi Jahowa, maningon porsaya do hita dalan ni Jahowa do na sidearan. Tapi sipata lang urah ase totap porsaya bani Jahowa. Bani artikel on iulas hita ma tolu situasi na manguji haporsayaonta: (1) sanggah hita mambasa sada sarita i bagas Bibel, (2) sanggah mandapot tugah-tugah ibagas organisasi-Ni, ampa (3) sanggah dong tantangan.

3. Sanggah hita mambasa Bibel, aha do sipata na mambahen hita lang porsaya bani Naibata?

 ³ Sanggah hita mambasa Bibel ra do sipata lang iarusi hita pasal pambahenan ni Naibata. Umpamani, bani buku 4 Musa ihatahon Jahowa do maningon ibunuh do halak Israel anggo dong na mambuat soban bani ari Sabat. Tapi bani buku dua Samuel ibasa hita isasap Jahowa do dousa ni Raja Daud na mambuat istrini halak ampa mamunuh. (4 Mus. 15:32, 35; 2 Sam. 12:9, 13) Ra do halani ai gabe sungkun-sungkun uhurta, ‘Mase ma ra Jahowa manasap dousa ni si Daud hape domma ibuat ia istri ni halak janah mamunuh homa? Tapi mase ma iuhum matei halak na mambuat soban bani ari Sabat hape lang banggal hasalahanni ai?’ Ase ibotoh hita balosni ai, dong tolu na porlu irimangi hita sanggah mambasa Bibel.

4. Sonaha 1 Musa 18:20, 21 ampa 5 Musa 10:17 boi patoguhkon haporsayaonta pasal panguhuman ni Jahowa?

⁴ Lang sai ipatorang ganup bani Bibel pasal sada sarita. Umpamani, ipatugah do bani Bibel manosal tumang do si Daud halani pambahenanni ai. (Ps. 51:4-6) Tapi sonaha do sifat ni dalahi na mambuat soban bani ari Sabat? Ai manosal do ia halani pambahenanni ai? Ai pitah sahali ai ope ia manlanggar titah ni Naibata atap domma gati? Ai ra do ia manangihon sipasingat? Lang ipatorang bani Bibel ganupan ai. Tapi porsaya do hita ‘pintor do ganup dalan ni Naibata’. (5 Mus. 32:4) Lang sarupa panguhuman ni Jahowa pakon panguhuman ni jolma. Anggo halak manguhumi gati halani manangar hata ni jolma, halani sididah bohi sidea. Tapi Jahowa lang sonai. Ibotoh Ia do ganup na masa. (Basa 1 Musa 18:20, 21; 5 Musa 10:17.) Anggo lambin itanda hita Naibata ampa aturan-Ni, lambin porsaya ma hita bani ganup haputusan-Ni. Jadi, age pe dong na lang iarusi hita pasal sada sarita na dong i Bibel, totap ma hita porsaya “pintor do Jahowa bani sagala dalan-Ni”.​—Ps. 145:17.

5. Halani hita lang sempurna, gabe sonaha do haputusan na ibahen hita? (Tonggor ma kotak “ Halani Lang Sempurna Gabe Lepak Pingkiranta”.)

⁵ Halani hita jolma na lang sempurna, urah-urah do hita manguhumi halak.  Tongon sihol do hita mambahen na adil bani halak na legan, halani hita itompa songon rupa ni Naibata. (1 Mus. 1:26) Tapi sipata, totap do lang adil pambahenanta age pe nini uhurta domma ibotoh hita ganup na sasintongni. Umpamani, songon si Jona gabe sogam do uhurni sanggah maridop uhur Jahowa bani halak Ninive, halani nini uhurni si Jona jahat tumang do sidea ai. (Jon. 3:10–4:1) Tapi halani maridop ni uhur ni Jahowa, dong lobih 120.000 halak Ninive na ra mambahen hamubahon janah lang saud sidea iuhum. Jadi tangkas ma pambahenan ni Jahowa do na pintor. Cara berpikir ni si Jona do na porlu ipadear.

6. Mase lang maningon ipatorang Jahowa ganup haputusan-Ni banta?

⁶ Lang porlu ipatorang Jahowa ganup haputusan-Ni bani jolma. Tongon bani Bibel dong do juakjuak ni Naibata na manungkun Bani pasal haputusan-Ni. (1 Mus. 18:25; Jon. 4:2, 3) Janah sipata ra do homa ipatorang Ia alasan-Ni. (Jon. 4:10, 11) Tapi sasintongni lang maningon ipatorang Naibata ganup haputusan-Ni banta. Mase? Halani Ia do Sitompa hita. Jadi Ia do na sipentaran marimbangkon hita. Halani ai, lang porlu ipatugah Jahowa banta aha na laho bahenon-Ni janah mase sonai haputusan-Ni.​—Jes. 40:13, 14; 55:9.

7. Aha do sipata na mambahen hita sunsah unduk bani na mambobahon organisasi ni Jahowa, janah mase?

⁷ Tongon, porsaya hita pintor do ganup dalan ni Jahowa. Tapi ai porsaya do homa hita bani ganup sanina na ipilih Jahowa laho mambobahon organisasi-Ni? Ra do lang mintor porsaya hita bani sidea, halani pangahapta carani sidea sandiri do na ipakei sidea ai sedo cara ni Jahowa. Anggo sonai rimangi ma use sarita na dong i  paragrap 3. Songon kaluarga ni dalahi na iuhum matei halani mambuat soban ai, ra do dong kaluargani ai marpingkir, ‘Ai domma isungkun si Musa lobei Jahowa paima mambere uhuman matei ai?’ Legan ni ai, ra do adong hasoman ni si Uria na marpingkir, ‘Tontu halani raja do si Daud gabe lang iuhum matei ia.’ Tapi dingat hita ma Jahowa do na mamilih ganup sanina na mambobahon ibagas organisasi-Ni. Janah porsaya do Ia bani sidea. Jadi, anggo hita lang porsaya bani sidea artini hita pe lang porsaya bani Jahowa.

8. Sonaha halak Kristen sonari on mangihutkon aha na ibahen halak Kristen bani abad na parlobei? (Lahoan 16:4, 5)

⁸ Sonari on ipilih Jahowa do “juakjuak na bujur anjaha na maruhur” laho mambobahon organisasi-Ni. (Mat. 24:45) Sarupa do tugas ni sidea songon pangurus pusat bani abad na parlobei. Sonari on, juakjuak na bujur janah na maruhur mangorganisasi ampa mambere tugah-tugah hubani ganup kuria i sab dunia on. (Basa Lahoan 16:4, 5.) Dob ai sintua ma holi na padaskon ai bani ganup sanina botou i kuria. Jadi anggo porsaya hita bani Jahowa, tontu idalankon hita do ganup tugah-tugah na ibere organisasi-Ni ampa sintua.

9. Sanggah attigan do lang urah iahap hita mangihutkon aturan na ibahen sintua, janah mase?

⁹ Tapi sipata lang urah mangihutkon pangaturan na ibahen sintua. Umpamani, baru-baru on dong ibahen pangaturan ulang pasal pembagian daerah kuria-kuria  ampa wilayah. Na legan, dong do homa sintua na mangindo piga-piga parbarita ase pindah hu kuria na baru ase sarupa bahatni hadirin bani ganup kuria i daerah ai. Porini ham ipindo pindah hu kuria ai, tontu ra do lang urah pangahapmu halani lang sakuria be ham pakon hasoman atap kaluargamu. Janah ra do homa dong na marpingkir, lang dong ipatugah Jahowa bani sintua parbarita na ija do na maningon pindah. Tapi dingat hita ma, domma ipilih Jahowa sidea laho mambahen pangaturan i kuria janah porsaya do Jahowa bani sidea. Halani ai, hita pe maningon porsaya ma bani sidea. *

10. Domu bani Heber 13:17, mase maningon unduk hita bani pangaturan na ibahen sintua?

¹⁰ Mase ma maningon unduk hita bani pangaturan na ibahen sintua hassi pe sipata lang marosuh hita bani pangaturan ai? Halani anggo unduk hita bani pangaturan na ibahen sidea, gabe marsada ma kuria. (Ep. 4:2, 3) Anjaha gabe marmalas ni uhur ma hita ganup. (Basa Heber 13:17.) Na sipontingan anggo unduk hita bani sidea, artini porsaya do homa hita bani Jahowa.​—Lah. 20:28.

11. Aha do na boi mangurupi hita ase boi lambin urah unduk bani sintua?

¹¹ Ase lambin urah hita unduk bani sintua, dingat hita ma sasintongni martonggo do lobei ganup sintua paima sidea mambahen haputusan. Janah ipindahi sidea do prinsip ni Bibel ampa petunjuk na ibahen organisasi sanggah sidea laho mambahen haputusan. Sasintongni marosuh tumang do sidea mambahen malas uhur ni Naibata janah mambere na sidearan bani sanina botou. Ibotoh sidea do homa martanggungjawab do sidea i lobei ni Naibata. (1 Ptr. 5:2, 3) Dingat hita ma: Sonari, tarbagi-bagi do dunia on halani suku, politik, ampa ugama. Tapi anggo Saksi Jahowa marsada do ganup. On boi saud tontu halani itogu-togu Jahowa do organisasi-Ni.

12. Sanggah sintua mamareksa halak na mangkorjahon dousa na banggal i kuria, aha do na maningon ipastihon sidea?

¹² Ibere Jahowa do tanggung jawab bani sintua laho manjaga ase kuria totap borsih. Jadi anggo dong i kuria na mangkorjahon dousa na banggal, maningon ipareksa sintua ma ai. Tujuanni ase ibotoh sidea ai tongon-tongon do ia manosali pambahenanni ai atap lang. Ra do adong na mangkatahon manosal do ia. Tapi ai magigi do ia bani pambahenanni na jahat ai? Ai taridah do anggo ia tongon-tongon manosali dousani ai? Anggo halani marhasoman pakon halak na lang dear parlahouni do ase ihorjahon ia dousa ai, ra do ia lang be marhasoman pakon sidea? Jadi sanggah sintua mamareksa na marsalah ai martonggo do sidea bani Jahowa, ipareksa sidea do aha na sasintongni na tarjadi. Anjaha ipindahi sidea do homa prinsip ni Bibel na mardomu pakon parsoalanni ai. Dob ai marusaha do homa sintua manonggor ai tongon-tongon do ia manosal atap lang. Dobkonsi ibahen sintua ganupan ai, ra do gabe iputuskon sidea ma halak ai lang pala ipecat. Tapi dong do homa na maningon ipecat hun kuria.​—1 Kor. 5:11-13.

13. Sonaha do ra pangahapta anggo dong kaluarga atap pe hasomanta na ipecat?

¹³ Anggo na ipecat ai sedo kaluarga atap hasomanta, urah do hita setuju bani  haputusan ai. Tapi sonaha anggo na ipecat ai hasomanta atap pe kaluarganta? Ra do gabe lang setuju hita bani haputusan ai. Ra do gabe hita marpingkir, ‘Ai tongon-tongon do domma ipareksa sintua ganupan na sasintongni? Ai sosok do haputusan ni sidea ai pakon harosuh ni Jahowa?’ Anggo sonai situasini, aha ma na mangurupi hita ase urah unduk bani haputusan na ibahen sintua?

14. Sanggah dong kaluarga atap hasomanta na ipecat, aha ma na boi ibahen hita ase urah hita manjalo haputusan ai?

¹⁴ Dingat hita ma humbani Jahowa do pangaturan pemecatan ai, janah marguna do ai bani halak na i kuria sonai homa bani na mardousa ai. Anggo na marsalah ai lang ipecat, ra do gabe ipengaruhi ia ma na legan ase dihut homa mangkorjahon na salah. (Gal. 5:9) Atap ra do lang sadar ia domma banggal tumang dousani. Janah pangahapni lang dong parubahan na maningon ibahen ia. (Par. 8:11) Jadi, dingat hita ma sanggah sintua mambahen haputusan laho mamecat sasada halak, sasintongni domma serius ipingkirhon sidea haputusan ai. Anjaha dos do sidea ai songon panguhum bani panorang ni halak Israel ‘na manguhum i lambung’ ni Jahowa.​—2 Kron. 19:6, 7.

15. Mase maningon unduk hita bani tugah-tugah na ibere Jahowa humbani sonari?

¹⁵ Humbani sonari, maningon ipatoguh hita do haporsayaonta bani Jahowa. Mase sonai? Halani domma lambin dohor ujungni dunia on. Sadokah hamarsikon banggal ijalo hita do holi tugah-tugah humbani halak na ipilih Jahowa laho mambobahon organisasi-Ni. Tapi ra do holi pangahapta songon na lang masuk akal tugah-tugah ai. Ra do adong na marpingkir, ‘Ai tongon do tugah-tugah ai humbani Jahowa? Atap pingkiran ni sidea sandiri do na iihutkon sidea?’ Anggo sonai situasini, ai totap do hita porsaya bani Jahowa? Anggo humbani sonari hita unduk bani ganup tugah-tugah na ibere sintua, lambin urah ma holi hita unduk bani tugah-tugah na ibere sadokah hamarsikon banggal.​—Luk. 16:10.

16. Aha do na manguji haporsayaonta pasal panguhuman ni Jahowa bani ari na laho roh?

¹⁶ Tongon sonari on, sai mangarap ase kaluarganta na lang Saksi ra mangidangi Jahowa paima roh ujung ni dunia on. Halani bani Harmagedon holi iripaskon Jesus ma ganup halak na lang ra unduk bani Naibata. (Mat. 25:31-33; 2 Tes. 1: 7-9) Sanggah ai, Jahowa do na manontuhon ise na selamat atap na lang. (Mat. 25:34, 41, 46) Anggo sonai situasini, ai totap do ham porsaya adil do panguhuman ni Naibata ai? Ase boi hita totap porsaya bani Jahowa, maningon ipatoguh hita ma haporsayaonta humbani sonari.

17. Pasu-pasu aha do na idapot hita dobkonsi iripaskon Jahowa dunia na jahat on?

¹⁷ Bayangkon hita ma bahat tumang do holi pasu-pasu na idapot hita bani dunia na baru. Lang dong be ugama palsu, janah lang marsitaronon be hita halani bisnis na tamak ampa sistem politik. Dob ai lang dong be homa na matua, na boritan. Janah ipapuho ma holi halak na hinaholonganta na dob marujung goluh. Anjaha igari do homa Sibolis ampa malekat-malekatni sadokah saribu tahun. Gabe damei ma holi i sab tanoh on. (Pangk. 20:2, 3) Tontu malas tumang uhurta halani totap hita porsaya bani Jahowa.

18. Parlajaran aha do na boi idapot hita humbani contoh ni halak Israel na isurat bani 4 Musa 11:4-6 pakon 21:5?

¹⁸ Holi i dunia baru pe, ra do adong na manguji haporsayaonta. Umpamani, songon halak Israel. Dobkonsi kaluar sidea hun Masir, ihatahon sidea ma siholan sidea bani sipanganon na dong i Masir. Janah gabe magigi do sidea bani manna na ibere Jahowa. (Basa 4 Musa 11:4-6; 21:5.) Hita pe ra do homa gabe sonai pangahapta. Halani dobkonsi hamarsikon banggal, tontu bahat tumang do na laho sihorjahononta laho padearhon tanoh on ase gabe paradeiso. Ra do lang urah mangkorjahon ganupan ai. Ai gabe marungut-ungut do hita halani ai? Anggo humbani sonari hita totap martarima kasih hubani ganup sibere-bere ni Jahowa, holi lang marungut-ungut hita ijai.

19. Parlajaran na ponting aha do na idapot nasiam humbani artikel on?

¹⁹ Jadi sai tongtong ma hita porsaya pintor do ganup dalan ni Jahowa. Porsaya ma homa hita bani ganup sanina na ipilih Jahowa laho mambobahon organisasi-Ni. Anjaha sai tongtong ma dingat hita hata ni Jahowa na mangkatahon, ‘Margogoh do hanima marhitei na soh pakon marhatengeran.’​—Jes. 30:15.