1. Mase ganup hita porlu ipodahi?

 GANUP do hita porlu ipodahi. Somalni ra do hita mangindo podah hubani halak na ipasangap hita. Tapi sipata ra do adong sanina botou na mamodahi hita halani itonggor sidea hita mangkorjahon “sada panlanggaron”. (Gal. 6:1) Leganni ai, anggo ihorjahon hita dousa na banggal gabe ipinsang ma hita. Tapi lang soal sonaha carani hita ipodahi, dalankon hita ma ai halani ai boi mambahen martuah goluhta.​—Pod. 6:23.

2. Domu bani Podah 12:15, mase hita maningon ra manangihon podah?

² Songon na ihatahon ayat tema ni artikel on, iojur do hita ase “tangihon ma hata ni halak na pentar”. (Pod. 22:17) Mase sonai? Halani lang ibotoh hita ganup. Jadi porlu do hita iurupi na lobih marpangalaman marimbangkon hita. (Basa Podah 12:15.) Leganni ai, anggo ra hita manangihon podah, ai patuduhkon halak na toruh maruhur do hita. Ibotoh hita ma adong do hahuranganta janah ibotoh hita homa ase boi saud ai maningon dong do na mamodahi hita. Halani ai ma Raja Salomo mangkatahon, “Saud do ranggian [atap, rencana] anggo buei sipamodahi.”​—Pod. 15:22.

3. Marhitei aha do hita ipodahi?

³ Marmasam do carani hita ipodahi. Umpamani, sanggah hita mambasa janah manrimangi Bibel ampa publikasi, ra do mintor hona isini hu bagas uhurta. Gabe ibotoh hita ma dong na porlu iubah hita. (Heb. 4:12) Podah humbani organisasi do ai. Leganni ai, ra do homa dong sintua atap sanina na marpangalaman mamodahi hita. Boi ma ihatahon podah humbani hasoman do ai. Martarima kasih  tumang ma hita bani sidea halani holong ni sidea do ai ase ra sidea mamodahi hita. Janah dalankon hita ma podah ai.

4. Domu bani Parambilan 7:9, pingkiran aha do na maningon iambukon hita sanggah dong na mamodahi hita?

⁴ Ra do ganup hita lang urah manjalo podah. Mase? Halani hassi pe ibotoh hita bahat do hahuranganta, ra do sanggah dong na patugahkon ai banta lang marosuh hita. Gabe sogam ma uhurta mangidahsi. Janah pangahapta dong do alasanni mase sonai pambahenanta. (Basa Parambilan 7:9.) Leganni ai, ra do homa nini uhurta ia mangakatahon ai halani lang marosuh ia banta. Atap, ra do pangahapta lang sosok ia mangkatahon ai halani ia pe dong do hasalahanni. Jadi lang ra be hita manjalo podahni ai. Tapi ipindahi hita ma halak na boi mambere podah na iharosuhkon hita.

5. Aha do na laho iulas hita bani artikel on?

⁵ bani artikel on, iulas hita ma contoh na dong ibagas Bibel halak na ra manjalo podah ampa na lang ra. Janah iulas hita homa, aha do na mangurupi hita ase ra manjalo podah. Anjaha aha do gunani ai anggo ibahen hita sonai.

6. Sanggah manjalo podah, parlajaran aha ma na idapot hita humbani Raja Rehabeam?

⁶ Pardiateihon hita ma contoh Raja Rehabeam. Sanggah ia mamarentah halak Israel, roh ma rakyatni mangindo ase ipahampung ia horja na ibere si Salomo bapa ni ondi. Isungkun ia ma hubani tua-tua ni halak Israel pasal pangindoanni rakyat ai. Ihatahon sidea ma, maningon itangihon ia do pangindoan ni rakyat ai janah lamlam ma ia mambalosi. (1 Raj. 12:3-7) Dob ai laho ma si Rehabeam, manungkun piga-piga dalahi hasomanni. (2 Kron. 12:13) Hassi pe sidea domma marumur 40-an janah domma marpangalaman, tapi lang ibere sidea podah na dear. Janah ihatahon sidea, maningon itambahi do use horjani rakyat ai. (1 Raj. 12:8-11) Sasintongni boi do namin si Rehabeam martonggo bani Jahowa ase boi ia mambahen haputusan na dear. Tapi lang ibahen ia sonai. Itangihon ia do podahni hasomani nongkan ai. Ujungni, gabe sunsah ma si Rehabeam sonai homa halak Israel. Sonai ma homa hita, ra do lang urah pangahapta manjalo podah. Tapi anggo podah ai ibere domu bani hata ni Naibata maningon ijalo hita ma ai.

7. Parlajaran aha do na boi idapot hita humbani si Usia?

⁷ Raja Usia lang ra manjalo podah. Domma iatur Jahowa, pitah malim dassa na boi mangidangi i rumah ni Jahowa janah manutung dahupa. Tapi masuk ma si Usia hu rumah ni Jahowa laho mangkorjahon ai. Dob ai ihatahon malim ma hubani, “Ham Usia! Seng patut ham manutung dahupa bani Jahowa, tapi pitah malim, anak ni si Aron do.” Sonaha ma pangahap ni si Usia manangar ai? Mintor “manggila ma si Usia”. Sasintongni anggo martoruh ni uhur si Usia janah ra mintor kaluar hun rumah ni Naibata ai, tontu ra do Jahowa ma maafkon ia. Tapi lang ra ia manangihon podah ai. Halani pangahapni, raja do ia janah bebas do ia mangkorjahon ganup harosuhni. Halani ai gabe hona “gadamon ma Raja Usia das hubani parmateini”. (2 Kron. 26:16-21) Jadi humbani pangalamanni si Usia dapot hita ma parlajaran, lang soal aha pe hak istimewanta anggo adong halak na mambere podah hu banta maningon ijalo hita ma ai ase marosuh Jahowa mangidah hita.

8. Sonaha pangahap ni si Job sanggah ia ipodahi?

⁸ Ibagas Bibel dong do homa contoh halak na dear, na ra manjalo podah. Halani ai gabe ipasu-pasu Jahowa ma sidea. Umpamani, si Job. Hassi pe holong uhurni bani Jahowa, tapi ongga do ia mangkatahon na lepak sanggah marsitaronon ia. Ai ma na mambahen Jahowa ampa si Elihu mambere podah hu bani. Sonaha ma pangahap ni si Job halani ai? Martoruh ni uhur do ia manjalo podah ai. Ihatahon ia ma, “Halani ai do ase husahapkon na so huarusi . . . jora ma ahu, anjaha husolsoli do diringku hundul ibagas orbuk ampa abuan.” Jadi ipasu-pasu Jahowa ma si Job halani ra ia martoruh ni uhur manjalo podah.—Job 42:3-6, 12-17.

9. Sonaha do pangahap ni si Musa sanggah ia ipinsang Jahowa, janah aha ma parlajaranni hubanta?

⁹ Si Musa, sahalak contoh na dear na ra manjalo pinsang-pinsang. Bani sada panorang, ongga do ia manggila tumang janah lang ra pasangapkon goran ni Jahowa. Halani ai, lang ibere Jahowa be ia masuk hu Tanoh Parpadanan. (4 Mus. 20:1-13) Sanggah ielek-elek ia ase Jahowa mangubah haputusan-Ni ai, ihatahon Jahowa ma hu bani, “Ulang be nunuti hatamu Bangku pasal hata on.” (5 Mus. 3:23-27) Ai gabe manggila do si Musa halani ai? Lang. Ra do ia manjalo pinsang-pinsang ai, halani ai totap do ibere Jahowa ia mamimpin halak Israel. (5 Mus. 4:1) Jadi tiru hita ma si Job ampa si Musa sanggah hita ipodahi. Songon si Job, ra do ia mangubah cara berpikirni. Anjaha si Musa, totap do ia mangidangi Jahowa hassi pe ujungni lang boi ia dihut masuk hu Tanoh Parpadanan.

10. (a) Domu bani Podah 4:10-13, aha do gunani anggo ra hita manjalo podah? (b) Sonaha do pangahapni piga-piga hasomanta sanggah sidea ipodahi?

¹⁰ Bahat do gunani anggo itiru hita contoh na ibahen si Job ampa si Musa. (Basa Podah 4:10-13.) Bahat do sanina botou domma mandalankon ai. Umpamani, si Imanuel na tading i Kongo mangkatahon, “Sanggah ididah piga-piga hasoman na toguh ahu domma mangkorjahon na lang dear na boi pasedahon parhasomananku pakon Jahowa ipodahi sidea ma ahu. Halani ai lang be ahu mangkorjahon aha na mambahen borit uhur ni Jahowa.” * Sada perintis hu Kanada na margoran si Mega mangkatahon, “Sanggah ipodahi, sipata lang marosuh hita manangar ai. Tapi anggo ra hita manjalo podah ai, marguna do ai banta.” Anjaha sada sanina hun Kroasia na margoran si Marko mangkatahon, “Hassi pe sonari lang dong be hak istimewaku, tapi anggo hurimangi podah na ibere ai hubangku ai boi mangurupi ahu ase totap toguh.”

11. Aha do na ihatahon Sanina Karl Klein pasal manjalo podah?

¹¹ Dong homa contoh na dear humbani Sanina Karl Klein, sahalak pangurus pusat. Ibagas pangalamanni ia mancaritahon, ongga do ia mandapot pinsang-pinsang humbani Sanina Joseph F. Rutherford. Sasintongni sidea marhasoman orot. Mungkahni borit do uhurni Sanina Klein. Ia mangkatahon,“Patarni ihatahon Sanina Rutherford bangku, ‘Horas Karl!’ Dear do namin hubalosi, tapi borit ope uhurhu hubani. Ihatahon ia ma use, ‘Hati-hati ho Karl, ulang paturut sibolis mansiding ho.’ Jadi hubalosi ma ‘Lang mahua.’ Tapi ibotoh ia do borit ope  uhurhu mangidahsi. Janah ihatahon ia use, ‘Dear ma anggo sonai, tapi hati-hati ma ho. Ulang paturut Sibolis mansiding ho.’ Tongon do na ihatahon ni ai, anggo manggila hita sanggah ipodahi gabe boi do hita hona siding ni Siboli.” * (Ep. 4:25-27) Ra do Sanina Klein manjalo podah ni Sanina Rutherford. Janah ujungni boi do use sidea marhasoman orot.

12. Sanggah hita ipodahi, maningon sonaha ma pangahapta? (Psalmen 141:5)

¹² Aha do na boi mangurupi hita ase urah manjalo podah? Maningon do hita toruh maruhur. Jadi anggo hita toruh maruhur, ra do hita mangaku dong do hahuranganta. Janah gati do homa mambahen na salah. Songon na domma iulas hita nongkan ai, si Job pe porlu do mambahen parubahan ibagas pingkiranni. Halani ai ipasu-pasu Jahowa ma ia. Halani toruh maruhur si Job ra do ia manjalo podah humbani si Elihu. Hassi pe posonan do si Elihu marimbangkonsi. (Job 32:6, 7) Anggo hita toruh maruhur, ra do hita manjalo podah humbani halak hassi pe posonan atap pangahapta lang sosok podah ai banta. Sahalak sintua hun Kanada mangkatahon, “Ase boi hita mambahen hamajuan, porlu do hita ipodahi.” Ganupan hita sihol do adong sifat-sifat na madear ibagas dirinta. Atap ase lambin pandei hita ibagas pangidangion. Halani ai porlu do hita manjalo podah.​—Basa Psalmen 141:5.

13. Maningon sonaha do pangahapta bani podah?

¹³ Halani holong ni Jahowa do ase ibere Ia podah. Sihol do Jahowa mambere na sidearan hu banta. (Pod. 4:20-22) Halani ai, sanggah ibere Ia podah marhitei Bibel, publikasi, atap marhitei sanina botou na toguh haporsayaonni, maningon iahapkon hita ma halani holong ni Jahowa do ai. Anjaha songon na ihatahon Heber 12:9, 10, “marguna banta do” ai.

14. Aha do na maningon idingat hita sanggah hita ipodahi?

¹⁴ Dingat ma gunani sedo carani podah ai ipadas. Ra do pangahapta hurang sosok do carani hita ipodahi. Tontu, sasintongni domma ipingkirhon ia lobei sonaha carani dear mambere podah ase boi urah hita manjalo podah ai. * (Gal. 6:1) Anggo sonai pangahapta sanggah ipodahi rimangi ma sungkun-sungkun on, ‘Hassi pe huahap hurang dear carani mamodahi atap hubotoh hasalahanni, tapi  aha do gunani podahni ai bangku?’ Tontu dearan do anggo na ipingkirhon hita gunani podah ai sedo carani podah ai ipadas.—Pod. 15:31.

15. Mase hita maningon mangindahi podah?

¹⁵ Bibel mangojur hita ase mangindahi podah. Podah 13:10 mangkatahon, “Hapentaran do jumpah bani halak na ra manangihon podah.” Halani ai pindo hita ma podah bani halak na toguh haporsayaonni ase boi hita mambahen haputusan na dear atap mambahen hamajuan.

16. Bani situasi na sonaha ma hita porlu mangindo podah?

¹⁶ Bani situasi na sonaha ma hita porlu mangindo podah? Pardiateihon ma situasi on, (1) Iarahkon sada botou ma sada botou na lobih marpangalaman ase dihut hu parlajaran Bibelni. Dob ai ipindo ia ma podah hunbani botou ai sonaha cara ase lambin dear mangajarhon Bibel. (2) Sada anak boru mangindo podah hunbani botou na lobih marpangalaman sanggah ia sihol mamboli baju. (3) Sada sanina na palobei sahali mandapot tugas marambilan, mangindo hunbani sanina na lobih marpangalaman laho manonggor ia latihan marambilan. Janah mangindo podah sonaha carani ase lambin dear marambilan. Anjaha sanina na dob gati marambilan pe, boi do homa mangindo podah hunbani sanina na lobih marpangalaman sonaha carani ase lambin dear marambilan.

17. Sonaha carani ase boi mandapot guna sanggah hita ipodahi?

¹⁷ Ganupan hita ra do i pudian ni ari mandapot podah hasoman atap pe humbani organisasi. Halani ai dingat ma na iulas bani artikel on. Totap ma martoruh ni uhur, pingkirhon ma aha gunani, sedo carani podah ai ipadas. Anjaha mintor dalankon ma podah ai. Tongon ganupan hita lang dong na pentar humbani tubuh. Tapi anggo ‘itangihon hita podah, anjaha ra manjalo sipaingat’, Naibata marjanji “lambin pentarni” ma hita.​—Pod. 19:20.