1. Aha do na dob ibahen juakjuak ni Naibata sonari on?

 BIBEL mangkatahon “roh humbani megah ni uhurni” do juakjuak ni Naibata mangidangi-Si, songon na ibahen Jesus. (Ps. 110:3) Sonai ma na ididah hita sonari on. Ganup do hita ra mambere panorangta age pe lang igaji. Anjaha ganup do hita ra mangurupi sanina botou na mamorluhon ampa patoguhkon uhur ni sidea. Leganni ai, bahat do homa panorang na igunahon sintua, laho mambahen persiapan partumpuan ampa kunjungan penggembalaan. Mase ganup hita ra mangkorjahon ai? Halani holong ni uhurta bani Jahowa ampa bani hasoman.​—Mat. 22:37-39.

2. Domu bani Rom 15:1-3, sitiruon aha do na ibahen Jesus?

² Sai tongtong do ipardiateihon Jesus haporluan ni halak na legan. (Basa Rom 15:1-3.) Halani ai marusaha ma hita maniru ia. Anggo sonai ibahen hita, iahapkon hita ma songon na ihatahon Jesus, “Martuahan do na mambere ase na manjalo.”​—Lah. 20:35.

3. Aha do na laho iulas hita bani artikel on?

³ Bani artikel on, iulas hita ma holi sonaha Jesus mangurupi halak na legan, janah sonaha hita boi maniru ia. Iulas hita homa aha do na boi mangurupi hita ase lambin marosuh mangurupi halak na legan.

4. Hunja ibotoh hita anggo Jesus ai parduli bani halak na legan?

⁴ Hassi pe loja totap do ra Jesus mangurupi halak na legan. Pardiateihon hita ma aha na ibahen ia i dolog dohor ni Kapernaum. Sanggah ai bahat tumang halak na roh manjumpahi Jesus. Hape bani borngin paima ai domma loja tumang Jesus. Janah saborngin manipat do ia martonggo. Tapi sanggah ididah Jesus halak na mabuei ai, mintor ipamalum ia ma na boritan. Anjaha lang pitah ai marambilan do homa Jesus bani sidea. Sonari itanda hita do ai Ambilan i atas Dolog.​—Luk. 6:12-20.

5. Sonaha kopala kaluarga boi maniru Jesus?

⁵ Sonaha kopala kaluarga boi maniru Jesus? Pardiateihon hita ma contoh on. Dong ma sada kopala kaluarga na loja tumang halani domma sadari bod marhorja. Hape bani sadari ai jadwal ni sidea do mambahen parlajaran Bibel kaluarga. Halani lojani songon na lang sanggup ia mambahen parlajaran ai. Tapi martonggo ma ia bani Jahowa ase ibere hagogohon. Ujungni saud ma ibahen sidea parlajaran Bibel kaluarga songon na somal ibahen sidea tiap minggu. Halani ibahen sidea sonai gabe boi ma ididah niombahni, mangidangi Jahowa do na sipontingan ibagas goluh ni sidea.

6. Patugah ma sada contoh, sonaha Jesus ra mambere panorangni laho mangurupi halak na legan.

⁶ Ra do Jesus mambere panorangni laho mangurupi halak na legan. Contohni, dobkonsi itangar Jesus domma ibunuh si Johannes Pandidi, pusok tumang ma uhurni. Bibel mangkatahon, “Dob ibogei Jesus [pasal parmatei ni si Johannes Pandidi], misir ma ia hunjai marparau hubani sada ianan na lungun, sahalaksi.” (Mat. 14:10-13) Halani lungun ni uhurni ai ma sihol Jesus sahalaksi. Tapi lang boi. Mase? Dob das Jesus bani ianan ai, domma buei halak na paimahonsi. Sanggah ididah Jesus halak na mabuei ai, mintor “maidop ma uhurni” halani ibotoh ia porlu tumang do sidea iurupi janah ipatoguh. Gabe “buei ma  ipodahkon [Jesus] bani sidea”.​—Mrk. 6:31-34; Luk. 9:10, 11.

7-8. Bere ma contoh sonaha sintua boi maniru Jesus.

⁷ Sonaha sintua boi maniru Jesus? Martarima kasih tumang do hita halani ibere sintua do panorangni laho mangurupi sanina botou. Bahat do na ihorjahon sidea na lang ibotoh sanina botou i kuria. Umpamani, songon na ibahen anggota Panitia Penghubung Rumah Sakit, sipata dong do sanina botou na porlu iurupi bani tongah borngin. Age pe sonai, sirsir do sidea mangurupi halani holong uhur ni sidea hubani sanina botou. Pasti buei do homa pengorbanan na ibahen kaluarga ni sintua ai.

⁸ Dong do homa sintua na mangurupi pajongjongkon Balei Harajaon ampa na mangurupi na hona bencana. Tontu bahat do panorang na igunahon sintua laho mangajar, mangurupi, ampa patoguhkon sanina botou. Halani ai dear do hita martarima kasih bani sidea sonai homa bani kaluargani. Anjaha ipasu-pasu Jahowa do aha na ihorjahon sidea ai. Hassi pe sonai, porlu do homa sintua seimbang. Age pe bahat na maningon ibahen sidea laho mangurupi sanina botou, tapi maningon isarihon sidea do homa haporluan ni kaluargani.

9. Domu bani Pilippi 2:4, 5, aha do na porlu ibahen halak Kristen?

⁹ Basa Pilippi 2:4, 5. Ganup do hita porlu maniru Jesus, lang pitah sintua. Bibel mangkatahon ibahen Jesus do  dirini songon “jabolon”. (Pil. 2:7) Anggo sahalak jabolon marusaha do ia mambahen malas uhur ni tuanni. Sonai do homa hita, jabolon do hita bani Jahowa ampa sanina botou. Halani ai, marusaha do hita mambahen malas uhur ni sidea. Sonari ulas hita ma piga-piga cara sonaha ase hita sirsir mangurupi hasomanta.

10. Sungkun-sungkun aha do na porlu irimangi hita?

¹⁰ Porlu mamareksa diri sandiri. Rimangi ma sungkun-sungkun on, ‘Ai totap do ahu sirsir mangurupi halak na legan? Umpamani, porini ahu isuruh laho mangurupi sanina botou na dob matua na tading i panti jompo atap pe mangalop atap manaruhkon botou na dob matua laho hu partumpu, ai ra do ahu mangkorjahon ai? Anggo adong jadwal paborsihkon Balei Harajaon atap balei kebaktian, ai sirsir do ahu mangurupi?’ Dingat ma, sanggah hita mangondoskon diri bani Jahowa, marjanji do hita laho mambere ganup na dong banta laho mangidangi-Si. Jadi, marosuh do Jahowa anggo igunahon hita panorang ampa na dong banta laho mangurupi sanina botounta. Anggo ibahen hita sonai malas ma uhur-Ni. Tapi anggo pangahapmu hurang sirsir ope ham, aha ma na boi bahenonmu?

11. Anggo hurang semangat ham mangurupi na legan, mase ham porlu martonggo?

¹¹ Martonggo ma bani Jahowa. Ra do pangahapmu hurang semangat do ham mangurupi halak na legan. Anggo sonai patugah ma ai bani Jahowa. Pindo ma Bani ase ibere bamu “sura-sura” laho mangurupi halak na legan janah boi ham “pasaudkon ai”.​—Pil. 2:13.

12. Aha do na porlu ibahen sanina na maposo na dob ididi?

¹² Sonai ma homa bani sanina na maposo na dob ididi, boi do irimangi nasiam ase mambere lambin bahat panorang laho mangurupi sanina botou. Bani piga-piga nagori, bahatan do sintua marimbangkon siparugas, janah bahatan do siparugas ai domma matua. Leganni ai, lambin bahat do ihaporluhon sanina na maposo laho mangurupi ibagas kuria, halani lambin tambah do Saksi Jahowa. Anggo ra nasiam mangurupi gabe malas ma uhurmu. Mase sonai? Halani domma ibahen ham Jahowa marmalas ni uhur sonai homa sanina botou.

13-14. Sonaha carani hita boi mangurupi sanina botounta? (Tonggor ma gambar sampul.)

¹³ Pardiateihon ma na porlu bani halak na legan. Marhitei suratni ipodahi Apostel Paulus do halak Kristen sonon, “Mambahen na madear ampa na marsibere-bere, ulang ma halupahon nasiam ai, ai galangan na sonai do iharosuhkon Naibata.” (Heb. 13:16) Sosok tumang do podah ai bani sidea. Mase? Halani lang piga dokah dobkonsi ijalo sidea surat ai, maningon “maporus ma halak na i Judea hu dolog”. (Mat. 24:16) Maningon itadingkon sidea do rumahni, kaluargani, horjani, janah pindah hu ianan na baru. Dob das sidea i ianan na baru porlu tumang ma sidea marsiurupan. Anggo domma somal sidea mangkorjahon podah ni si Paulus ai, tontu lambin urah ma sidea marsiurupan i ianan na baru ai.

¹⁴ Ra do lang ipatugah sanina botou banta aha na ihaporluhon sidea. Umpamani, dong ma sada sanina na marpusok ni uhur halani marujung goluh  istrini. Ra do porlu itaruhkon hita sipanganon bani, mangalop atap manaruhkon ia hu sada ianan, atap mangurupisi paborsihkon rumah. Tongon, ra do lang ipatugah ia banta aha na porlu bani. Tapi anggo mintor podas hita mangurupi age pe lang ipindo, tontu malas tumang ma uhurni. Ulang ma iahap hita halani lang dong ipindo ia pangurupion hubanta, artini lang porlu ia iurupi. Rimangi hita ma, ‘Anggo ahu ibagas situasi ai, aha do hira-hira na huhaporluhon?’

15. Aha do na porlu ibahen hita ase lang malang halak mangindo pangurupion banta?

¹⁵ Basar janah ringgas ma mangurupi. Tontu dong do na itanda ham sanina botou na ringgas mangurupi. Pasti lang malang uhurta mangindo pangurupion bani sidea, janah sihol do homa hita maniru sidea. Sonai ma na iahapkon si Alan, sada sintua na marumur 40-an. Ia mangkatahon, “Sihol tumang do ahu maniru Jesus. Age pe sibuk tumang ia, tapi lang malang halak mangindo pangurupion hu bani. Boi do iahapkon sidea parduli tumang do Jesus ai. Ahu pe marusaha ma ahu ase basar janah parduli bani sanina botou ase ulang malang uhur ni sidea mangindo pangurupion hun bangku.”

16. Domu bani Psalmen 119:59, 60, aha do na boi mangurupi hita ase lambin urah maniru Jesus?

¹⁶ Sipata ongga do hita mambahen na lepak janah lang maniru Jesus. Tapi ulang ma maretek ni uhur halani ai. (Jak. 3:2) Songon halak na marlajar melukis, tontu lang mintor boi ibahen ia ganup songon na ibahen guruni. Sipata dong do homa na lepak ibahen ia. Tapi anggo ra ia torus marlajar janah maniru guruni lambin pandei ma ia melukis.  Sonai ma homa hita, anggo marusaha hita mandalankon aha na dob iparlajari janah ra mambahen parubahan, lambin urah ma hita maniru Jesus.​—Basa Psalmen 119:59, 60.

17-18. Anggo ringgas hita mangurupi halak songon na ibahen Jesus, aha ma hasilni?

¹⁷ Anggo ringgas hita mangurupi, na legan pe gabe tarojur ma homa mambahen sisonai. Songon na ihatahon sada sintua na margoran si Tim, “Sonari on lambin bahat do na maposo na gabe siparugas i kuria halani ididah sidea bahat do sanina botou na ringgas marsiurupan. Jadi sihol ma sidea maniru sanina botou ai. Ai ma na mangojur sidea gabe ringgas mangurupi horja i kuria ampa sintua.”

¹⁸ Anggo halak i dunia on, pitah mamingkirhon dirini sandiri dassa. Tapi lang sonai hita. Sihol do hita maniru Jesus na parduli janah sirsir mangurupi halak na legan. Tongon lang boi pas tumang ibahen hita songon na ibahen Jesus. Tapi totap ma hita marusaha ‘mangirikkon bokas ni naheini’. (1 Ptr. 2:21) Anggo ibahen hita sonai, gabe malas ma uhur ni Jahowa mangidah hita. Anjaha hita pe malas do homa uhurta halani ai.