BANI zaman ni halak Israel hinan, anggo dong halak na sihol marhajabuan, somalni maningon mambere mahar do paranak bani parboru. Boi do ai barang na maharga, pinahan, atap pe duit. Tapi sipata dong do homa songon na ibahen si Jakob. Maningon marhorja pitu tahun do ia bani calon simatuani ase boi marhajabuan pakon si Rahel. (1 Mus. 29:17, 18, 20) Jadi aha ma tujuanni mahar ai?

Sahalak pakar ni Alkitab na margoran si Carol Meyers mangkatahon, “Mahar ai ibere gabe gantih rugi bani parboru. Halani somalni ibagas kaluarga naboru do na marhorja i rumah, sonai homa i juma.” Leganni ai, mahar ibere ase paranak pakon parboru lambin kompak. Jadi sanggah adong na sunsah boi ma sidea marsiurupan. Atap mahar ai boi do gabe sada tanda lang be bapani na martanggung jawab bani naboru ai tapi domma suamini.

Jadi mahar ai sedo artini gabe ijual naboru. Buku Ancient Israel​—Its Life and Institutions (Hagoluhan ampa Adat ni halak Israel Hinan) mangkatahon, “Tongon maningon ibere paranak do duit atap na leganni gabe mahar bani parboru. Tapi songon gantih rugi do ai bani parboru sedo gabe boli atap tuhor ni naboru ai.”

Bani piga-piga nagori, adong do homa adat laho mambere mahar bani parboru. Jadi anggo dong halak Kristen na mangindo mahar bani paranak, maningon masuk akal ma na ipindo sidea. (Pil. 4:5; 1 Kor. 10:32, 33) Anggo sonai ibahen, ai patuduhkon lang “paruhur duit” atap pe tamak sidea. (2 Tim. 3:2) Anggo bahattu mahar na ipindo, ra do gabe dokah ase saud sidea marhajabuan, halani maningon marhorja ma lobei calon suamini ai laho patumpuhon duit. Leganni ai, anggo calon suamini ai perintis gabe soh ma holi ai merintis laho marhorja tiap ari ase sungkup duitni manggalar mahar.

Tapi bani nagori na legan, dong do homa hukum na mangkatahon paranak maningon mambere mahar bani parboru. Maningon idalankon halak Kristen do homa hukum ai. Mase? Bibel mangkatahon, “Unduk ma ganup halak bani pamarentah na markuasa.” Jadi, maningon unduk do hita bani hukum ni pamarentah anggo ai lang marlawan pakon hukum ni Naibata.​—Rom 13:1; Lah. 5:29.