1-2. (a) Mase sederhana acara na ibahen Jesus laho mardingat hamateanni? (b) Paruhuran ni Jesus na ija do na laho iulas hita?

AI BOI do ipatorang nasiam aha na masa bani acara Pardingatan Hamatean ni Jesus? Halani ponting tumang do acara ai, tontu bahat do hita na boi mardingat aha na ibahen bani acara ai. Tapi ra do sungkun-sungkun hita, ‘Anggo ponting do ai, mase sederhana acara ai ibahen?’

² Sanggah Jesus i tanoh on, urah do iarusi pangajaranni janah sederhana. (Mat. 7:28, 29) Sonai ma homa na ibahen ia sanggah mambahen acara pardingatan * hamateanni. Ulas hita ma pasal ai ampa aha na ibahen pakon na ihatahon Jesus. Holi gabe ibotoh hita ma sonaha Jesus patuduhkon toruh ni uhur, habaranion, ampa holongni. Anjaha gabe ibotoh hita ma sonaha hita boi lambin dear mangusihi ia.

3. Domu bani Mateus 26:26-28, sonaha do mungkahni acara na ibahen Jesus laho mardingat hamateanni, janah aha do na igambarhon ruti pakon anggur?

³ Mungkahni, rap pakon 11 susianni na setia do Jesus sanggah mambahen acara laho mardingat hamateanni. Ibuat ia ma ruti na so niigaran atap na so marragi ampa anggur humbani pesta Paskah na baru salosei irayahon sidea. (Basa Mateus 26:26-28.) Ihatahon Jesus ma bani susianni anggo ruti pakon anggur ai manggambarhon angkulani na gokan dear ampa darohni na laho  bereonni laho mangkopkop sidea. Ra, lang tarsonggot susianni halani lang bahat na ipasirsir bani acara ai. Mase sonai?

4. Sonaha podah ni Jesus bani si Marta mangurupi hita mangarusi mase lang bahat na ipasirsir bani acara laho mardingat hamateanni?

⁴ Dingat hita ma aha na masa piga-piga bulan na salpu bani patolu-tahunkon pangidangion ni Jesus. Ijia, roh ma Jesus hu rumah ni huan-huanni, ai ma si Lasarus, si Marta, pakon si Maria. Sanggah Jesus mangajar, lang dihut si Marta manangar halani masibuktu pasirsirhon bahat sipanganon. Halani ai, dear ma ipasingat Jesus ase iarusi si Marta sedo ai na siporlunan. (Luk. 10:40-42) Jadi, sonai ma homa na ibahen Jesus sanggah mambahen acara laho mardingat hamateanni. Hunjon, aha ma na ibotoh hita pasal Jesus?

5. Humbani acara na ibahen Jesus, aha ma na ibotoh hita pasal paruhuranni, janah sonaha on sosok pakon na ihatahon bani Pilippi 2:5-8?

⁵ Humbani parsahap ampa parlahouni, taridah do anggo Jesus ai sahalak na martoruh ni uhur. Ipatuduh ia do ai ronsi hamateanni. (Mat. 11:29) Domma ibotoh Jesus na laho bereonni do dirini gabe tobusan bani buei halak. Anjaha ibotoh ia do homa papuhoon ni Jahowa do holi ia hu surga laho gabe raja. Hassi pe sonai, lang ipasangap Jesus dirini marhitei mambahen pesta na banggal laho mardingat hamateanni. Tapi, iparentahkon do susianni ase tiap tahun mambahen acara songon na ibahen ia. (Joh. 13:15; 1 Kor. 11:23-25) Ganupan on patuduhkon sedo halak na pajuntul-juntulhon diri Jesus. Tontu malas do uhurta mambotoh halak na toruh maruhur do na gabe Rajanta.​—Basa Pilippi 2:5-8.

6. Sanggah marsitaronon sonaha hita boi martoruh ni uhur songon Jesus?

⁶ Sonaha hita patuduhkon toruh ni uhur songon Jesus? Ulang ma mamingkirhon diri sandiri, tapi paruhurhon ma na porlu bani hasoman. (Pil. 2:3, 4) Dingat ma aha na ibahen Jesus bani borngin paima matei ia. Ibotoh ia do lang piga dokah nari itaron ia ma hamatean na marsik na mambahen susianni marpusok ni uhur. Hassi pe sonai, tong do iparuhurhon Jesus haporluan ni sidea. Jadi bani borngin ai ipodahi, iojur, anjaha ipatoguh do uhur ni susianni. (Joh. 14:25-31) Pontingan do bani Jesus  mansarihon sidea marimbangkon dirini sandiri. On ma na patuduhkon anggo Jesus ai toruh maruhur. Tontu sada siusihan na madear do on hubanta!

7. Sonaha Jesus patuduhkon habaranion?

⁷ Lang piga dokah dobkonsi salosei Acara Borngin Pardingatan ai, ipatuduh Jesus do habaranion. Sonaha carani? Idalankon Jesus do harosuh ni Bapani hassi pe ibotoh ia songon parjahat do holi parmateini. (Mat. 26:65, 66; Luk. 22:41, 42) Totap do Jesus setia ase ipasangap goran ni Naibata janah mambuktihon Jahowa do na talup mamarentah. On ma na gabe dalan ase halak na mambahen hamubahon boi mandapot hagoluhan sadokah ni dokahni. Anjaha iurupi do homa susianni ase totap setia bani ari na laho roh.

8. (a) Aha do na ipatugah Jesus bani apostelni? (b) Martahun-tahun dobkonsi matei ia, sonaha do susianni mangusihi habaranionni?

⁸ Ipatuduh Jesus do habaranion marhitei mansarihon na porlu bani apostelni, sedo pitah mamingkirhon holsoh ni uhurni. Dob laho si Judas ipungkah Jesus ma acara Borngin Pardingatan ai. Marhitei acara ai, ibotoh susianni na iminaki ma aha do gunani daroh ni Jesus, anjaha aha do gunani dihut bani padan na baru ai. (1 Kor. 10:16, 17) Iurupi Jesus do sidea ase totap setia janah boi mamarentah rap pakonsi i surga. Halani ai ipatugah ia do aha na iharosuhkon ia pakon Bapani. (Joh. 15:12-15) Ipatugah Jesus do homa hasunsahan na laho masa bani sidea. Dob ai, iparentahkon do homa ase apostelni tongtong maniru ia anjaha iojur do ase sidea ‘martenger ni uhur’. (Joh. 16:1-4a, 33) Martahun-tahun dobkonsi ai tongtong  do sidea maniru Jesus. Isarihon sidea do hasomanni janah ipatuduh do habaranion. Ra do sidea marsiurupan hassi pe halani ai gabe manaron hasunsahan sidea.​—Heb. 10:33, 34.

9. Sonaha hita maniru habaranion ni Jesus?

⁹ Sonari pe, itiru hita do homa habaranion ni Jesus. Umpamani maningon barani do hita mangurupi sanina botou na iparburu halani haporsayaonni. Sipata dong do sidea na ipenjarahon. Halani ai, tongtong ma hita manonggohon sidea anjaha mangapiti sidea sanggah i pangadilan. (Pil. 1:14; Heb. 13:19) Cara na legan hita patuduhkon habaranion marhitei marbarita ibagas ‘hinsah ni uhur’. (Lah. 14:3) Songon Jesus, totap ma baritahon ambilan na madear pasal Harajaon hassi pe hita iparburu atap ihasogamkon halak. Tapi sipata ra do gabe mabiar hita. Anggo sonai, aha ma na maningon ibahen hita?

10. Piga-piga minggu paima Pardingatan, aha ma na porlu bahenonta, janah mase?

¹⁰ Ase lambin barani, rimangi ma pangarapan na ibere hubanta marhitei tobusan. (Joh. 3:16; Ep. 1:7) Jadi piga-piga minggu paima ari pardingatan, pingkirhon ma aha na porlu bahenonta ase lambin mangkargai tobusan. Ihutkon ma pambasaan Bibel bani minggu Pardingatan, anjaha rimangi ma aha na masa paima matei Jesus. Hasilni, sanggah roh hita hu acara ai, lambin iarusi hita ma aha do artini ruti pakon anggur na igunahon ijai. Anggo ihargai hita aha na dob ibahen Jahowa pakon Jesus bani manisia, lambin toguh ma pangarapanta bani ari simagira. On ma na mangurupi hita ase totap barani janah martahan ronsi roh ujungni.​—Heb. 12:3.

11-12. Aha ma na domma iparlajari hita?

¹¹ Domma bahat na iparlajari hita humbani Acara Borngin Pardingatan ai. Lang  pitah pasal tobusan na ibotoh hita, tapi iparlajari hita do homa pasal paruhuran ni Jesus, songon toruh ni uhur ampa habaranionni. Tontu martarima kasih do hita halani tongtong ipatuduh Jesus paruhuran na jenges in. Anjaha ia do na gabe Sintua ni Malim laho mangapiti hita. (Heb. 7:24, 25) Sonaha hita mangkargai pambahenan ni Jesus ai? Totap ma bahen hita acara Pardingatan ai songon na dob iparentahkon Jesus. (Luk. 22:19, 20) Acara na sipontingan on ibahen tiap tanggal 14 Nisan.

¹² Humbani Acara Borngin Pardingatan ai, dong ope paruhuran ni Jesus na boi ibotoh hita. Janah ai do na mambahen ia ra matei mangkopkop hita. Tangkas do taridah paruhuranni ai sanggah ia i tanoh on. Aha ma ai?

13. Sonaha Johannes 15:9 pakon 1 Johannes 4:8-10 patorangkon banggal ni holong ni Jahowa pakon Jesus, anjaha bani ise do marguna ai?

¹³ Holong tumang do Jahowa hubanta, janah iusihi Jesus do ai marhitei pambahenanni. (Basa Johannes 15:9; 1 Johannes 4:8-10.) Na siporlunan, ra do ia mambere hagoluhanni laho mangkopkop hita. Lang soal hita halak na iminaki atap pe ‘biri-biri na legan’, marguna do holong na ipatuduh Jahowa pakon Jesus hubanta marhitei tobusan. (Joh. 10:16; 1 Joh. 2:2) Pingkirhon ma homa lambang na igunahon bani acara Pardingatan ai. Hunjai taridah ma holong do Jesus bani susianni janah parduli bani sidea. Mase boi ihatahon hita sonai?

14. Sonaha Jesus patuduhkon holong bani susianni?

¹⁴ Ipatuduh Jesus do holongni bani susianni na iminaki marhitei mambahen acara Pardingatan ai sederhana ase urah idalankon. Iparentahkon do ase ibahen sidea acara sisonai tiap tahun. Tapi sonaha anggo sidea i penjara atap pe ibagas situasi na sunsah, ai boi do idalankon sidea parentah ni Jesus ai? Boi do!​—Pangk. 2:10.

15-16. Sonaha sanina botounta boi mambahen acara Pardingatan ibagas situasi na sunsah?

¹⁵ Humbani abad na parlobei ronsi sonari, marusaha do halak Kristen mambahen Acara Borngin Pardingatan mangihutkon cara na ibahen Jesus. Totap do ai ibahen sidea hassi pe ibagas situasi na sunsah. Pardiateihon ma contoh on. Sanggah si Harold King ipenjarahon i Cina, ipingkirhon ia do sonaha ase boi mambahen acara Pardingatan ai. Sipsip ma ia pasirsirhon lambang Pardingatan humbani sipanganon na dong bani. Pangkei do homa ia mangetong ari laho mambotoh sadihari do panorang Pardingatan ai. Jadi sanggah jumpah panorangni, sahalaksi ma ibagas penjara mandoding, martonggo, janah padaskon ambilan.

¹⁶ Pardiateihon ma contoh na legan na ibahen sakalompok hasomanta naboru i kamp konsentrasi sanggah Porang Dunia II. Halani sederhana do lambang na igunahon, gabe boi ma sidea sipsip mambahen acara Pardingatan hassi pe ra do halani ai iuhum matei sidea. Sidea mansaritahon, “Jongjong ma hanami manginggoti sada meja na etek na martaplak na bontar. Ibahen hanami ma i atasni ruti pakon anggur. Ibahen hanami ma lilin i atas meja, halani anggo ipagoluh hanami lampu gabe tarbotoh ma holi na ibahen hanami. . . . Humbani gok ni uhurnami iulakkon hanami  ma janjinami ondi ai, laho papansingkon goran ni Naibata humbani tuk ni gogohnami.” Tangkas ma toguh tumang do haporsayaon ni sidea ai! Tontu halani holong ni Jesus do ase ibahen sederhana acara ai! Gabe boi ma hita mambahen acara Pardingatan hassi pe ibagas situasi na sunsah.

17. Sungkun-sungkun aha ma na porlu irimangi hita?

¹⁷ Halani dohor mando ari Pardingatan ai, dear ma anggo irimangi hita sungkun-sungkun on: ‘Sonaha do ahu boi maniru holong ni Jesus? Ai ra do ahu palobeihon haporluan ni sanina botou marimbangkon haporluanku sandiri? Ai huarapkon do sanina botou mangkorjahon lobih humbani na tarbahen sidea, atap boi do huarusi hahurangan ni sidea?’ Andohar ma tongtong itiru hita Jesus janah ipatuduh hita uhur na “sapangahapan”.​—1 Ptr. 3:8.

18-19. (a) Aha do holi na tongtong idingat juakjuak ni Jahowa? (b) Aha do na sihol bahenonmu?

¹⁸ Tongkin nari, lang porlu be hita mambahen Pardingatan Hamatean ni Jesus. Sanggah “roh” Jesus bani panorang hamarsikon banggal, ipatumpu ia ma halak ‘na dob ipilih’ hu surga. Dobkonsi ai, lang be ibahen hita acara Pardingatan.​—1 Kor. 11:26; Mat. 24:31.

¹⁹ Hassi pe holi lang be ibahen acara Pardingatan ai, pos do uhurta idingat juakjuak ni Jahowa do acara na manggambarhon toruh ni uhur, habaranion, ampa holong na sibanggalan na ongga ipatuduh sasada halak. Bani panorang ai, ise pe na ongga dihut bani acara ai, tontu malas do uhurni mansaritahon pasal ai bani halak na legan, ase sidea pe mandapot guna. Tapi humbani sonari pe boi do hita mandapot guna humbani acara ai anggo itiru hita toruh ni uhur, habaranion, ampa holong ni Jesus. Anggo ra hita mandalankon ai, pos ma uhurta sai ipasu-pasu Jahowa do hita.​—2 Ptr. 1:10, 11.