1. Halani holong uhur ni si Daud bani Jahowa, aha do na ibahen ia?

IHATAHON Raja Daud do, “Banggal do Jahowa, anjaha sipujian tongon.” (Ps. 145:3) Jadi holong do uhur ni si Daud bani Jahowa. Halani ai tarojur ma uhurni laho mamuji Jahowa “i tongah-tongah ni kuria in”. (Ps. 22:23; 40:6) Sonari pe holong do uhurta bani Jahowa, halani ai ra do sarupa pangahapta songon si Daud. Ia mangkatahon, “Pinuji ma Ham alo Jahowa, Naibata ni Israel, Bapanami humbani sadokah ni dokahni ronsi sadokah ni dokahni.”​—1 Kron. 29:10-13.

2. (a) Sonaha carani hita mamuji Jahowa? (b) Mase dong piga-piga sanina botou na lang ra mambere komentar, anjaha aha do na laho iulas hita?

² Sonari on sada cara hita mamuji Jahowa marhitei mambere komentar i partumpuan. Tapi, dong do piga-piga sanina botou mabiar mambere komentar hape sihol do uhurni. Jadi aha ma na boi ibahen hita ase ulang mabiar? Sonaha do carani ase lambin dear hita mambere komentar? Paima ibalosi hita sungkun-sungkun ai, ulas hita ma lobei adong ompat alasan na ponting mase hita porlu mambere komentar.

3-5. (a) Domu bani Heber 13:15, mase hita porlu mambere komentar? (b) Ai maningon sarupa do ganup komentarta? Patorang ma.

³ Sada hasangapon do banta laho mambere pujian bani Jahowa. (Ps. 119:108) Komentarta i partumpuan isarupahon do songon “galangan puji-pujian”, anjaha pitah hita sandiri do na boi mambere ai. (Basa Heber 13:15.) Tapi lang ipaksa Jahowa ase sarupa galangan atap pe komentarta pakon sanina botou na legan.

⁴ Ibotoh Jahowa do sonaha situasinta ganup, anjaha arga do bani Jahowa ganup galangan na ibere hita. Pingkirhon  hita ma lobei galangan na ipangindo Jahowa hubani halak Israel na hinan. Adong do sidea na boi mambere biribiri atap pe hambing. Tapi, halak na masombuh boi do mambere “dua [dingis] barang dua anak ni asas”. Porini pe lang tarbahen sidea ai, boi do homa ibere “saparsapuluh efa itak na lumat”. (3 Mus. 5:7, 11) Hassi pe “itak na lumat” ai urah hargani, tapi ai do itak na sidearan janah arga do ai bani Jahowa.

⁵ Sonai do homa pangahap ni Jahowa hubanta sonari on. Lang ipaksa Jahowa ase maningon pandei hita marsahap songon si Apollos atap pe si Paulus. (Lah. 18:24; 26:28) Tapi sihol do Jahowa ase hita mambere komentar domu bani na boi tarbahen hita. Songon naboru na mabalu sapari pitah dua rimis do na boi ibere ia, tapi ai do sidearan na tarberesi. Halani ai, arga tumang do sibere-bereni ai bani Jahowa.​—Luk. 21:1-4.

6. (a) Domu bani Heber 10:24, 25, aha do gunani komentar ni hasoman hubanta? (b) Sonaha hita patuduhkon anggo hita mangkargai komentar ni sidea?

⁶ Komentarta boi patoguhkon na legan. (Basa Heber 10:24, 25.) Tontu malas do uhurta sanggah manangar komentar ni sanina botou i partumpuan. Ra, itangar hita dong dakdanak na mambere komentar na dear atap pe dong sanina botou na patugahkon pangalamanni sanggah mananda hasintongan. Gabe malas uhurta sanggah dong sanina botou na “marhinsah ni uhur” mambere komentar, hassi pe halak na parmaila ia atap pe baru ope ia marlajar bahasanta. (1 Tes. 2:2) Tontu ihargai hita do komentar ni sidea ai. Sonaha carani? Dobkonsi salosei martumpu boi do ihatahon hita tarima kasih bani sidea. Atap cara na leganni, hita pe boi do dihut mambere komentar. Marhitei komentarta sanina botou na legan pe boi gabe toguh uhurni.​—Rom 1:11, 12.

7. Aha do gunani hubanta anggo hita mambere komentar?

⁷ Dong do gunani anggo hita mambere komentar. (Jes. 48:17) Na parlobei, halani sihol hita mambere komentar, tontu lambin dear ma hita mambahen persiapan. Sanggah hita mambahen persiapan lambin iarusi hita ma Hata ni Naibata anjaha lambin tarojur ma hita mandalankon aha na dob iparlajari. Na  paduahon, lambin sodap ma pangahapta halani lang pitah sipsip hita, tapi dihut do homa hita mambere komentar. Na patoluhon, halani marusaha hita mambere komentar, gabe dokah ma idingat hita komentarta ai.

8-9. (a) Domu bani Maleaki 3:16, sonaha do pangahap ni Jahowa manangar komentarta? (b) Tapi, mase sai adong ope na lang ra mambere komentar?

⁸ Malas do uhur ni Jahowa anggo ipatuduh hita haporsayaonta. Pos ma uhurta itangihon Jahowa do komentarta, janah ihargai Ia do aha pe na dob ibahen hita ase boi mambere komentar. (Basa Maleaki 3:16.) Anjaha pasu-pasuon-Ni do hita anggo ibahen hita malas uhur-Ni.​—Mal. 3:10.

⁹ Jadi domma tangkas iarusi hita mase hita porlu mambere komentar. Tapi sai adong do tong na mabiar mambere komentar. Anggo sonai pangahapmu, ulang pala nasiam maretek ni uhur. Sonari ulas hita ma piga-piga prinsip ni Bibel, contoh-contoh na boi itiru, ampa podah na boi mangurupi hita ase lambin dear mambere komentar.

10. (a) Aha do na mambahen hita mabiar mambere komentar? (b) Sasintongni anggo mabiar hita aha do artini ai?

¹⁰ Ai ongga do mabiar tumang nasiam sanggah mambere komentar? Sasintongni lang pitah nasiam na ongga sonai. Bahat do homa hasomanta na legan na sonai pangahapni. Tapi, ase lambin barani hita maningon ibotoh hita lobei aha do sadokah on na mambahen hita mabiar. Ra, mabiar nasiam naha anggo lupa atap salah holi komentarmu. Ra homa, mabiar nasiam anggo komentarmu lang songon dearni komentar ni halak na legan. Anggo sonai do, halak na martoruh ni uhur do ham halani pangahapmu lobihan do hasomanta na legan marimbangkon dirimu sandiri. Janah marosuh do Jahowa mangidah ai. (Ps. 138:6; Pil. 2:3) Tapi sihol do homa uhur-Ni ase ipuji hita Ia janah patoguhkon  halak na legan. (1 Tes. 5:11) Holong do uhur-Ni bani nasiam janah sihol do Ia mangurupi nasiam ase lambin barani.

11. Podah ni Bibel na ija do na boi mangurupi hita?

¹¹ Pingkirhon hita ma podah ni Bibel na mangkatahon ganupan jolma ongga do lepak ibagas parsahap. (Jak. 3:2) Anjaha lang adong ipangindo Jahowa hubanta atap pe sanina botou na legan ase dear torus parsahapta. (Ps. 103:12-14) Dob ai idingat hita homa songon sada keluarga do hita ganupan, anjaha holong do hasomanta na legan hubanta. (Mrk. 10:29, 30; Joh. 13:35) Jadi porini pe salah komentarta iarusi sidea do ai.

12-13. Aha do na boi iparlajari hita humbani si Nehemia pakon si Jona?

¹² Ase hita lambin barani rimangi hita ma contoh humbani Bibel. Umpamani, si Nehemia na gabe parugas i rumah ni raja. Pusok do uhurni sanggah itangar domma irumbakkon tembok ampa horbangan ni Jerusalem. (Neh. 1:1-4) Sanggah ididah raja songon na pusok bohini, isungkun raja ma mase sonai pangahapni. Tontu, mabiar tumang ma si Nehemia manangar sungkun-sungkun ai. Tapi mintor martonggo ma ia, paima mambalosi raja. Ujungni, bahat ma ibahen raja laho mangurupi halak Israel. (Neh. 2:1-8) Contoh na legan ai ma si Jona. Isuruh Jahowa ma ia ase marbarita hu Ninive. Halani mabiar tumang mintor maporus ma ia hu kota na legan. (Jon. 1:1-3) Tapi iurupi Jahowa ma ia ase barani marbarita hu Ninive. Ujung ni, bahat do halak ijai na ra manangihon barita ni si Jona. (Jon. 3:5-10) Jadi, aha ma na boi iparlajari hita humbani sidea? Humbani si Nehemia hita marlajar, ase martonggo ma lobei paima mambere komentar. Anjaha humbani si Jona ibotoh hita ma sai iurupi Jahowa do hita ase barani mangidangi-Si. Pangahapmu, ija do na sunsahan mambere komentar i partumpuan do atap marbarita bani halak Ninive?

¹³ Jadi ulas hita ma piga-piga podah na boi mangurupi hita ase lambin dear mambere komentar.

14. Mase hita porlu mambahen persiapan na dear, janah sadihari do hita boi mambahen ai?

¹⁴ Mambahen persiapan na dear. Anggo dear hita mambahen persiapan lambin barani ma hita mambere komentar. (Pod. 21:5) Tontu lang sarupa panorang na ibahen hita laho mambahen persiapan. Umpamani, si Eloise, hasomanta naboru na dob mabalu, anjaha marumur hira-hira 80 tahun. Somal do ia mambahen persiapan Ambilan na Madear piga-piga ari paima martumpu. Nini do, “Lambin barani do ahu mambere komentar anggo domma dokah hubahen persiapan.” Dong homa si Joy, na tiap ari marhorja. Ibahen ia do persiapan  Ambilan na Madear sadari paima martumpu. Nini do, “Lambin dokah hudingat bahan ai anggo baru ope hupersiapkon.” Leganni ai dong si Junior, sada sintua pakon perintis. Nini do homa, “Rahanan do ahu mambahen persiapan otik-otik tiap ari marimbangkon hupersiapkon ganup bahanni ibagas na sadari.”

15. Sonaha do cara na dear laho mambahen persiapan?

¹⁵ Sonaha do cara na dear laho mambahen persiapan? Paima mambahen persiapan martonggo ma lobei mangindo tonduy na pansing ase iurupi. (Luk. 11:13; 1 Joh. 5:14) Dob ai pareksa ma lobei judul, subjudul, gambar, pakon kotak ase iarusi nasiam garis besarni artikel na laho iulas ai. Dob ai basa ma paragrapni janah anggo boi pareksa ma ganup ayatni. Anjaha rimangi ma hatorangan na ija do na sihol ikomentari ham i paragrap ai. Lambin dear nasiam mambahen persiapan lambin bahat do gunani ai bani nasiam. Anjaha lambin barani ma nasiam mambere komentar.​—2 Kor. 9:6.

16. Aplikasi aha do na boi mangurupi hita mambahen persiapan anjaha sonaha carani?

¹⁶ Anggo boi gunahon ma aplikasi bani bahasa na iarusi nasiam. Sonari on, domma dong aplikasi JW Library^® na ibahen organisasi ni Jahowa. Anjaha boi do igunahon hita ai sanggah mambahen persiapan. Download ma publikasi na laho iulas i partumpuan. Jadi, antigan atap ija pe boi do hita mambahen persiapan. Anjaha dong homa rokaman publikasi ai na boi itangar hita. Adong do hasomanta na mamakei aplikasi ai laho mambahen persiapan sanggah marsaran i parhorjaan, i sikolah, atap pe sanggah i pardalanan. Legan ni ai adong homa aplikasi Watchtower Library pakon PERPUSTAKAAN ONLINE Ambilan na Madear na boi mangurupi hita mambahen riset sanggah persiapan.

17. (a) Mase dear anggo ipasirsir hita piga-piga komentarta? (b) Aha do na boi iparlajari hita humbani video Menjadi Sahabat Yehuwa—Persiapkan Komentarmu?

¹⁷ Anggo boi bahen ma piga-piga komentar sanggah persiapan. Mase? Sipata anggo pitah sahali hita martuduh, lang mintor ituduh hita halani bahat homa sanina botou na legan na martuduh. Leganni ai, sipata pemandu lang mambere bahat na markomentar bani piga-piga paragrap ase partumpuan ai salosei topat waktu. Halani ai ulang pala maretek ni uhur anggo lang mintor ituduh nasiam. Tapi anggo domma bahat komentar na domma ipasirsir hita janah gatih hita martuduh, tontu ra ma hita ibere markomentar. Nasiam pe boi martuduh laho mambasa ayat. Tapi anggo boi bere ma komentar mamakei hatamu sandiri. *

18. Mase dear anggo ibere hita komentar na pondok?

 ¹⁸ Bere ma komentar na pondok. Somalni anggo pondok komentarta, ai do na boi mangojur janah patoguhkon hasomanta na legan. Halani ai, marusaha ma hita mambere komentar na pondok, anggo boi dokahni 30 detik atap pe hurang. (Pod. 10:19; 15:23) Porini nasiam domma dokah ididi, bahen ma siusihan laho mambere komentar na pondok. Halani anggo maganjangtu komentarmu ra do gabe maila hasoman na legan mambere komentar, halani nini uhur ni sidea komentar na ganjang ai do na dear. Tapi anggo pondok komentarta, lambin bahat ma sanina botou na boi mambere komentar. On porlu tumang ibahen sanggah hita parlobei sahali mambalosi paragrap. Ulang ipatorang ham ganup na adong ibagas paragrap ai. Anggo domma ibalosi sungkun-sungkun ni paragrap ai, boi ma ibere ham komentar tambahan.​—Tonggor ma kotak “ Na Boi Ikomentari Hita”.

19. Ase boi mambere komentar, sonaha do pemandu boi mangurupi hita anjaha aha na maningon ibahen hita?

¹⁹ Patugah ma bani pemandu, paragrap piga na sihol ikomentari ham. Anggo sonai sihol bahenonmu, patugah ma ai paima ipungkah acara partumpuan. Holi anggo domma salosei ibasa paragrap na laho ikomentari ham, mintor podas janah ginjang ma martuduh ase boi ididah pemandu.

20. Mase acara partumpuan ai isarupahon songon acara mangan-mangan i sada rumah?

²⁰ Dos do acara partumpuan ai songon acara mangan-mangan i rumah ni hasoman. Porini ham iontang sanina atap botou hu rumahni, janah ipatugah ase iboan ham sipanganon age pe otik, aha do na laho bahenonmu? Ra do haru pangahapmu. Hassi pe sonai, marusaha do ham mamboan sipanganon hujai. Sonari, Jahowa do na mangontang hita hu partumpuan. Anjaha domma bahat sipanganon atap pe pangajarion na ipasirsir Ia. (Ps. 23:5; Mat. 24:45) Hassi pe sonai ipindo Ia do ase hita mamboan sibere-bere, ai ma mambere komentar i partumpuan. Tontu malas do uhur-Ni anggo marusaha hita mambere komentar na dear.