ARTIKEL PARLAJARAN 5
Mase Hita Roh hu Acara Pardingatan ampa Partumpuan?
‘Ambilankon nasiam ma parmatei ni Tuhan in, ronsi roh ia.’—1 KOR. 11:26.
DODING 18 Tarima Kasih Halani Tobusan
NA LAHO IULAS *
1-2. (a) Aha do na ipardiateihon Jahowa sanggah roh halak hu acara Pardingatan Hamatean ni Jesus? (Tonggor ma gambar ni sampul.) (b) Aha ma na laho iulas hita bani artikel on?
AHA ma na ipardiateihon Jahowa sanggah mangidah marjuta halak roh hu acara Pardingatan Hamatean ni Jesus? Ipardiateihon Ia do sada-sada na roh hujai. Umpamani, ididah Ia do sanina botou na totap roh hu acara ai tiap tahun. Dong homa na totap roh age pe sidea iparburu. Dong na sadokah on lang roh hu partumpuan, tapi roh do ia hu acara Pardingatan halani pangahapni ponting tumang do ai. Ipardiateihon Jahowa do homa dong na parlobei sahali roh hu acara ai halani sihol mambotoh aha na masa ijai.
2 Tontu malas do uhur ni Jahowa mangidah bahat halak na roh hu acara ai. (Luk. 22:19) Tapi sedo bilanganni na roh ai na sipontingan Bani. Na sipontingan ididah Jahowa mase ra sidea roh hu acara ai. Sasintongni, ipasirsir Jahowa do acara Pardingatan ai ampa partumpuan tiap minggu hubani halak na mangkaholongi-Si. Bani artikel on, iulas hita ma sungkun-sungkun na ponting on: Mase ra hita roh hu ganup partumpuan ai?
I sab dunia on, ialo-alo do marjuta halak na roh hu acara Pardingatan Hamatean ni Jesus (Tonggor paragrap 1-2)
HALANI MARTORUH NI UHUR
3-4. (a) Mase ra hita roh hu partumpuan? (b) Anggo roh hita hu partumpuan, on patuduhkon halak na sonaha do hita? (c) Domu bani 1 Korint 11:23-26, mase maningon roh hita hu acara Pardingatan?
3 Alasan na sipontingan hita roh hu partumpuan halani sihol manombah Jahowa. Sihol do homa hita iajari Jahowa i partumpuan. Sahalak na ginjang maruhur lang ra iajari. (3 Joh. 9) Tapi anggo hita, marosuh do hita iajari Jahowa marhitei organisasi-Ni.—Jes. 30:20; Joh. 6:45.
4 Sanggah roh hita hu partumpuan, ai patuduhkon anggo hita sahalak na toruh maruhur janah sihol iajari. Hita roh hu acara Pardingatan sedo pitah halani ibotoh hita ponting tumang do acara ai, tapi halani toruh maruhur hita mandalankon parentah ni Jesus on, “Bahen nasiam ma sonin, gabe pardingatan bangku!” (Basa 1 Korint 11:23-26.) Marhitei acara ai ibotoh hita ma sonaha banggal ni holong ni Jahowa hubanta. Anjaha lambin ipatoguh ma homa pangarapanta pasal ari simagira. Tapi ibotoh Jahowa do lang sungkup pitah sahali satahun hita ipatoguh. Halani ai, ipasirsir Jahowa ma partumpuan na ibahen tiap minggu janah isuruh do hita ase roh. Anggo toruh maruhur hita, tontu itangihon hita do ai. Ibere hita do panorangta laho mambahen persiapan janah roh hu partumpuan ai.
5. Mase halak na martoruh ni uhur ra manjalo ontangan ni Jahowa?
5 Tiap tahun, bahat do halak na martoruh ni uhur ra manjalo ontangan humbani Jahowa laho manangar pangajaran-Ni. (Jes. 50:4) Malas do uhur ni sidea roh hu acara Pardingatan. Dob ai, gabe roh ma use sidea hu partumpuan na ibahen tiap minggu. (Sak. 8:20-23) Malas do uhurta rap pakon sidea boi mandapot pangajarion humbani Jahowa, “pangurupi ampa sipaluah [banta]”. (Ps. 40:18) Lang dong na parohkon malas ni uhur na sibanggalan sobali manjalo pangajaran humbani Jahowa ampa Jesus Kristus, Anak na hinaholongan-Ni.—Mat. 17:5; 18:20; 28:20.
6. Mase sada dalahi na martoruh ni uhur gabe ra hu acara Pardingatan?
6 Tiap tahun, marusaha do hita mangontang buei halak ase roh hu acara Pardingatan Hamatean ni Jesus. Bahat do gunani na iahapkon halak na martoruh ni uhur halani ra manjalo ontangan ai. Pardiateihon hita ma sada contoh. Martahun-tahun na salpu, iontang hasomanta ma sada dalahi ase roh hu acara ai. Tapi nini dalahi ai lang boi ia roh. Hape bani borngin sanggah acara ai, tarsonggot ma hasomanta mangidah dalahi ai roh hu Balei Harajaon. Malas do uhur ni dalahi ai halani bahat hasomanta na mangalo-alosi ijai. Dob ai, roh ma use ia hu partumpuanta tiap minggu. Ibagas tahun ai pitah tolu hali dassa ia lang roh martumpu. Aha do na mambahen ia gabe roh martumpu? Tontu halani martoruh ni uhur do ia. Ai do homa na ihatahon hasomanta na mangontangsi. Sonari dalahi ai domma ididi. Tangkas ma Jahowa do na manogu dalahi ai hubagas organisasi-Ni.—2 Sam. 22:28; Joh. 6:44.
7. Sonaha partumpuan ampa pambasaan Bibel boi mangurupi hita ase martoruh ni uhur?
7 Anggo roh hita hu partumpuan anjaha mambasa Bibel, gabe iurupi ma hita ase martoruh ni uhur. Bani minggu-minggu paima Pardingatan, gati do i partumpuan mangulas pasal Jesus ampa toruh ni uhurni. Ipatuduh ia do toruh ni uhur marhitei mambere dirini gabe tobusan. Anjaha paima ari Pardingatan, iojur do hita ase mangihutkon pambasaan Bibel, na mangulas aha na masa paima Jesus matei ampa dobkonsi ia ipapuho. Ganupan ai mangurupi hita ase lambin mangkargai tobusan. Gabe tarojur ma hita maniru toruh ni uhur ni Jesus ampa mangkorjahon Luk. 22:41, 42.
harosuh ni Jahowa, hassi pe ibagas situasi na sunsah.—HALANI HABARANION
8. Sonaha Jesus patuduhkon habaranion?
8 Marusaha do homa hita mangusihi habaranion ni Jesus. Pingkirhon ma sonaha Jesus patuduhkon habaranion paima matei ia. Ibotoh ia do roh ma munsuhni laho mangapasi, manangkap, anjaha manguhum matei ia. (Mat. 20:17-19) Hassi pe sonai lang mabiar ia. Bani borngin ai sanggah ia i taman Getsemane rap pakon apostelni, ihatahon ia ma, “Jongjong ma hanima, laho ma hita! Tonggor ma, domma dohor na sihol mantahihon ahu.” (Mat. 26:36, 46) Jadi sanggah roh tentara mamboan sinjata laho manangkapsi, barani do ia mangkatahon ia do Jesus. Anjaha ipangindo ma bani sidea ase ipaturut susianni laho. (Joh. 18:3-8) Hunjon tangkas ma taridah barani tumang do Jesus ai! Sonari on pe, halak na iminaki ampa biribiri na legan marusaha do homa mangusihi habaranion ni Jesus. Sonaha carani?
Habaranion ni nasiam roh hu partumpuan boi patoguhkon halak na legan (Tonggor ma paragrap 9) *
9. (a) Mase maningon barani hita ase boi roh hu partumpuan? (b) Anggo barani hita, aha do gunani ai bani hasomanta na ipenjarahon?
9 Porlu do habaranion ase boi roh hita hu partumpuan hassi pe bahat tantanganta. Dong do hasomanta na totap martumpu hassi pe sidea marpusok ni uhur, maretek ni uhur, atap pe boritan. Dong homa na ihasogamkon kaluarga atap pe pamarentah. Anggo hita patuduhkon habaranion, marguna do ai bani hasomanta na ipenjarahon halani haporsayaonni. (Heb. 13:3) Anggo itangar sidea totap do hita mangidangi Jahowa hassi pe ibagas hasunsahan, sidea pe lambin toguh, barani, janah totap setia. Sonai do homa na iahapkon apostel Paulus. Sanggah ia ipenjarahon i Rom, malas do uhurni manangar anggo sanina botou totap setia mangidangi Jahowa. (Pil. 1:3-5, 12-14) Ra, dobkonsi ia bebas hun penjara, itongos ia ma surat hubani halak Heber. Ibagas suratni ai iojur do ase sidea ‘totap marholong ni uhur bani sanina’ janah lang manadingkon partumpuan.—Heb. 10:24, 25; 13:1.
10-11. (a) Ise ma na porlu iontang hita hu acara Pardingatan? (b) Domu bani Epesus 1:7, aha do alasanni hita mangontang sidea?
10 Ipatuduh hita do homa habaranion marhitei mangontang kaluarga, hasoman sahorja, pakon simbalogta ase roh hu acara Pardingatan. Mase ra hita mangontang sidea? Halani mangkargai aha na dob ibahen Jahowa pakon Jesus, gabe tarojur ma hita mangontang sidea. Sihol do hita ase sidea pe mandapot guna humbani ‘idop ni uhur’ ni Jahowa na mambere tobusan hubanta.—Basa Epesus 1:7; Pangk. 22:17.
11 Anggo martumpu hita, ai patuduhkon halak na barani do hita. Tapi dong ope biak na legan na maningon ipatuduh
hita. Anjaha domma ibere Jahowa pakon Anak-Ni siusihan pasal ai.HALANI HOLONG
12. (a) Sonaha acara partumpuan boi mambahen holongta bani Jahowa pakon Jesus lambin banggal? (b) Domu bani 2 Korint 5:14, 15, aha do na porlu bahenonta laho maniru Jesus?
12 Halani holong bani Jahowa pakon Jesus do na mambahen hita ra martumpu. Aha na iparlajari hita i partumpuan, boi mambahen lambin banggal holongta bani sidea. Bani partumpuan gati do iulas pasal aha na dob ibahen sidea hubanta. (Rom 5:8) Janah bani acara Pardingatan, idingat hita ma sonaha banggal ni holong ni sidea hubanta, age bani halak na lape mangarusi arti ni tobusan ai. Halani mangkargai ganupan ai, gabe tarojur ma hita mangusihi Jesus ibagas ganup pambahenanta. (Basa 2 Korint 5:14, 15.) Dob ai, gabe tarojur do homa hita laho mamuji Jahowa na dob mambere tobusan. Sada caranta laho mamuji Ia i partumpuan ai ma marhitei mambere komentar humbani borsih ni uhur.
13. Sonaha hita boi patuduhkon holong bani Jahowa pakon Jesus? Bere ma contoh.
13 Ipatuduh hita do holongta bani Jahowa pakon Jesus marhitei mangkorjahon aha pe laho pamalaskon uhur ni sidea. Marusaha do hita ase boi totap martumpu atap sonaha pe situasinta. Umpamani, piga-piga kuria mambahen partumpuan dobkonsi mulak halak hun parhorjaan. Ra loja ope pangahapta sanggah ai. Dong homa partumpuan na ibahen bani ujung minggu. Hape bahat do halak sihol marsaran bani panorang ai. Ai ipardiateihon Jahowa do anggo hita martumpu age pe loja pangahapta? Tontu ipardiateihon Ia do ai! Pos ma uhurta ididah janah ihargai Jahowa do aha pe na ibahen hita ase boi martumpu.—Mrk. 12:41-44.
14. Sonaha Jesus patuduhkon holong na lang mamontingkon diri?
14 Ipatuduh Jesus do holongni marhitei palobeihon haporluan ni halak na legan. Ra do ia mambere hagoluhanni laho mangkopkop susianni. Tapi lang pitah ai. Ipingkirhon ia do homa haporluan ni sidea. Umpamani, sanggah loja anjaha pusok uhurni, totap do iojur anjaha ipatoguh ia susianni. (Luk. 22:39-46) Totap do ipingkirhon ia aha na boi ibere ia bani sidea, sedo mamingkirhon aha na boi ibere sidea hu bani. (Mat. 20:28) Anggo sonai do homa holongta bani Jahowa ampa sanina botou, tontu marusaha do hita ase boi roh hu acara Pardingatan Hamatean ni Jesus ampa hu ganup partumpuan.
15. Ise do na sipontingan na porlu iurupi hita?
15 Ganup hita domma gabe sanina halani manombah Jahowa. Anjaha malas do uhurta mangontang halak na legan ase boi homa gabe sanina botounta. Tapi sipontingan, hita sihol mangurupi “hasomanta sahaporsayaon” na domma dokah lang martumpu atap pe lang marbarita. (Gal. 6:10) Hita patuduhkon holong marhitei mangojur sidea ase roh hu partumpuan tarlobih hu acara Pardingatan. Songon malas ni uhur ni Jahowa pakon Jesus do pangahapta anggo adong halak sisonai na ringgas use manombah Jahowa, Bapa ampa Parmahanta na parholong in.—Mat. 18:14.
16. (a) Sonaha hita boi marsiojuran, anjaha aha ma gunani hita roh hu partumpuan? (b) Mase sonari panorang na sosok laho mardingat hata ni Jesus na isurat bani Johannes 3:16?
16 Bani piga-piga minggu on, sihol do hita mangontang buei halak ase roh hu acara Pardingatan, na ibahen bani ari Jumat bod ni ari, tanggal 19 April 2019. (Tonggor ma kotak “ Ai Ra do Nasiam Mangontang Sidea?”) Andohar ma ganupan hita tongtong marsiojuran marhitei roh bani ganup partumpuan na dob ipasirsir Jahowa. Dohor mando ajal ni dunia on. Halani ai, totap ma hita roh hu partumpuan. Ai do na mangurupi hita ase totap martoruh ni uhur, barani, janah parholong. (1 Tes. 5:8-11) Humbani gok ni uhurta, hargai hita ma pambahenan ni Jahowa pakon Anak-Ni na mangkaholongi hita!—Basa Johannes 3:16.
DODING 126 Puho, Toguh, janah Margogoh!
^ par. 5 Pardingatan Hamatean ni Jesus ibahen bani ari Jumat bod ni ari, tanggal 19 April 2019. Ai ma acara na sipontingan ibagas tahun on. Aha do na mangojur hita roh hu acara ai? Tontu halani sihol pamalaskon uhur ni Jahowa. Bani artikel on, iulas hita ma aha do na mambahen hita roh hu acara Pardingatan ampa hu partumpuan tiap minggu.
^ par. 52 HATORANGAN GAMBAR: Sada hasomanta dalahi na ipenjarahon halani haporsayaonni. Tarojur do ia dob manjalo surat humbani kaluargani. Gabe ibotoh ia ma anggo kaluargani lang manlupahon ia. Malas do homa uhurni mambotoh anggo sidea totap setia mangidangi Jahowa, hassi pe dong masalah politik i ianan ni sidea.