1-3. (a) Mase holong uhur ni Jahowa bani si Salomo, anjaha pasu-pasu aha do na idapot si Salomo? (b) Sungkun-sungkun aha do na laho iulas hita bani artikel on?

SANGGAH poso ope si Salomo domma gabe raja Israel ia. Bani sada ari, marsahap ma Jahowa ibagas nipini. Nini do, “Pangindo ma, barang aha do sihol bereon-Ku bam.” Dob ai ibalosi si Salomo ma, “Danak ope ahu, seng hubotoh ope ruhut ni na i darat barang na ibagas huta pe. . . . Halani ai, bere Ham ma hu bani jabolon-Mu on uhur na pantas laho manggomgom bangsa-Mu in.” (1 Raj. 3:5-10) Taridah ma na martoruh ni uhur do si Salomo sanggah ipangindo ia “uhur na pantas”. Halani ai ma holong do uhur ni Jahowa bani si Salomo. (2 Sam. 12:24) Jadi ibalosi Jahowa ma pangindoanni ai, ibere ma hu bani “uhur na pentar anjaha na pantas”.​—1 Raj. 3:12.

² Bahat do pasu-pasu na idapot si Salomo sanggah ia manangihon Naibata. Umpamani, ibere do hasangapon laho pajongjongkon rumah panumbahan “bani goran ni Jahowa, Naibata ni Israel”. (1 Raj. 8:20) Dob ai gabe halak na tarsar ma ia halani hapentaran na ibere Jahowa hu bani. Anjaha aha na ihatahon si Salomo isuratkon do ai ibagas Bibel. Adong ma tolu buku na isuratkon ia, anjaha buku Podah ma sada.

³ Bani buku Podah adong do marratus hali isurat hata “uhur”. Umpamani bani Podah 4:23 ihatahon, “Tang siporlunan, jaga ma uhurmu.” Aha do artini “uhur” bani ayat on? Ibotoh hita ma balosni ai bani artikel on. Dob ai iulas hita homa dua sungkun-sungkun na legan ai ma: Aha do na ibahen Sibolis ase manlembang uhurta humbani Jahowa? Anjaha sonaha hita porlu manjaga uhurta? Maningon ibotoh hita do balosni ai ase boi setia hita bani Jahowa.

4-5. (a) Domu bani Psalmen 51:8, aha do artini hata “uhur”? (b) Mase boi ihatahon manjaga uhur usih songon manjaga angkulanta ase totap sehat?

⁴ Bani Podah 4:23, hata “uhur” gati do markaitan pakon aha na ponop atap na lang boi ididah. On mangartihon pingkiran, pangahap, ampa harosuhta. (Basa Psalmen 51:8) Marhitei ai ma taridah halak na sonaha do hita sasintongni.

⁵ Jadi manjaga pingkiran isarupahon do ai songon hita na manjaga angkulanta ase totap sehat. Na parlobei, ase totap sehat maningon ipangan hita do sipanganon na margizi janah taratur marolahraga. Sonai ma homa ase boi totap ijaga hita uhurta, maningon taratur ma hita mambasa Bibel, publikasi, janah patuduh ma homa haporsayaonta bani Jahowa. On boi ibahen hita marhitei mandalankon aha na dob iparlajari hita ampa mansaritahon pasal haporsayaonta. (Rom 10:8-10; Jak. 2:26) Na paduahon, ra do songon na sehat hita idahon hape domma adong na borit ibagas angkulanta. Sonai ma homa, ra do iagan hita domma toguh haporsayaonta halani sibuk hita ibagas pangidangion, hape domma adong na lepak na tubuh ibagas uhurta. (1 Kor. 10:12; Jak. 1:14, 15) Dingat ma marusaha do Sibolis pakahouhon pingkiranta. Sonaha carani pakahouhon hita? Anjaha sonaha hita manjaga uhurta?

6. Aha do na iharosuhkon Sibolis, anjaha sonaha carani?

⁶ Sibolis lang ra mandalankon aturan ni Jahowa halani pitah mamingkirhon dirini sandiri. Marosuh do Sibolis ase itiru hita ia. Tapi, lang boi ipaksa Sibolis ase hita mangihutkon harosuhni ai. Halani ai ibahen ia ma cara na legan. Umpamani, bahat do sonari halak na songon Sibolis parlahouni. (1 Joh. 5:19) Anjaha marosuh do Sibolis ase marsaor hita pakon sidea, hassi pe domma ibotoh hita anggo marsaor pakon sidea gabe “magou” ma biak na madear. (1 Kor. 15:33) Sonai ma na masa bani raja Salomo. Ibuat ia ma bahat naboru  na lang sisombah Jahowa gabe istrini. Ujungni, ibahen ganup istrini ai ma gabe ‘taruyun uhurni’, atap pe mandaoh humbani Jahowa.​—1 Raj. 11:3.

7. Aha do na ibahen Sibolis laho pakahouhon pingkiranta, anjaha mase hita maningon jaga?

⁷ Sonari on igunahon Sibolis do sitontonan marhitei TV atap pe bioskop na laho pakahouhon pingkiranta. Ibotoh Sibolis do anggo lambin dokah itonton hita ai, boi do gabe songon Sibolis pingkiran, pangahap, ampa pambahenanta. Tapi, legan do Jesus pakon Sibolis. Anggo Jesus ibahen ia do sarita atap pe limbaga laho mangajari susianni. Umpamani, sarita pasal halak Samaria na maridop ni uhur pakon anak na magou. (Mat. 13:34; Luk. 10:29-37; 15:11-32) Tapi, anggo Sibolis igunahon ia do dunia on laho mambahen sitontonan na boi pakahouhon pingkiranta. Tongon lang ganupan sitontonan ai sambor isini, tapi totap ma hita maningon jaga. Jadi sanggah mamilih sitontonan, rimangi ma on, ‘Ai boi do gabe tubuh hisap-hisap ni daging ibagas diringku anggo hutonton acara on?’ (Gal. 5:19-21; Ep. 2:1-3) Aha do na maningon hubahen porini adong sitontonan na mangajarhon pingkiran ni Sibolis? Maningon podas ma itulak hita ai. Dingat ma songon panahit na boi dalit do sitontonan ai!

8. Sonaha do namatoras mangurupi niombahni ase ulang mangihutkon pingkiran ni Sibolis?

⁸ Maningon martanggungjawab do namatoras laho mangajari niombahni ase ulang mangihutkon pingkiran ni Sibolis. Tontu sihol do nasiam ase niombahmu sehat. Halani ai ijaga ham do rumahmu ase totap borsih janah mangambukkon haganup na boi mambahen sidea boritan. Sonai ma homa, maningon ilinggomi ham do niombahmu ase ulang mangihutkon pingkiran ni Sibolis. Umpamani, sanggah sidea manonton, margame, atap pe marinternet, maningon iurupi nasiam  do sidea ase mangarusi ija do na dear atap na lang. Dingat ma, ibere Jahowa do bani nasiam tanggungjawab laho mangurupi niombahmu ase totap dohor hubani Jahowa. (Pod. 1:8; Ep. 6:1, 4) Halani ai, ulang ma mabiar mambahen aturan domu bani prinsip ni Bibel. Patugah ma na ija do na boi itonton ampa na lang, anjaha patorang ma alasanni. (Mat. 5:37) Dobkonsi banggal sidea, maningon torus ma latih nasiam ase iarusi sidea aha do na iharosuhkon Jahowa. (Heb. 5:14) Anjaha dingat ma homa, maningon gabe siusihan do nasiam bani sidea.​—5 Mus. 6:6, 7; Rom 2:21.

9. Aha do cara na legan ibahen Sibolis laho pakahouhon hita, janah aha do bahaya ni ai?

⁹ Sonari on ibahen Sibolis do halak i dunia on laho mangajarhon hapentaran ni dunia on sedo aturan ni Jahowa. (Kol. 2:8) Umpamani, bahat do halak i dunia on na mangkatahon habayakon ai do na sipontingan bani goluhni. Ra do adong sidea na marpingkir sonai gabe bayak, tapi na legan lang. Tapi lepak do pamingkirion sisonai. Mase? Halani pongkut sidea mansari duit, ujungni gabe boritan ma sidea, lang martuah rumah tanggani, janah mandaoh humbani Jahowa. (1 Tim. 6:10) Tapi malas do uhurta halani iurupi Naibata do hita ase ulang holongan bani duit.​—Par. 7:12; Luk. 12:15.

10-11. (a) Aha do na maningon bahenonta laho manjaga uhurta? (b)  Sapari, aha do horjani siparjaga, anjaha mase panggora ni uhur isarupahon songon siparjaga?

¹⁰ Ase boi manjaga uhurta, maningon ibotoh hita ma aha do na mambahen kahou uhurta, janah mintor podas ma manlinggomi uhurta. Bani Podah 4:23, hata “jaga” isarupahon do songon horja ni siparjaga bani masa ni Raja Salomo. Siparjaga ai maningon jongjong i atas ni tembok, janah maningon ipatugah sidea do anggo adong bahaya. Jadi humbani sarita ai, ibotoh hita ma aha na maningon bahenonta ase ulang ipakahou Sibolis uhurta.

¹¹ Sapari rup marhorja do siparjaga pakon sijaga horbangan laho manlinggomi kota. (2 Sam. 18:24-26) Maningon ipastihon sidea do ase tartutup horbangan ai sanggah roh munsuh. (Neh. 7:1-3) Panggora ni uhurta na dob ilatih prinsip ni Bibel * boi isarupahon songon siparjaga ai. Jadi panggora ni uhur ai boi do pasingatkon hita sanggah marusaha Sibolis pakahouhon pingkiran, harosuh, ampa pangahapta. Halani ai maningon itangihon hita ma sipasingat humbani panggora ni uhurta, janah “itutup” hita ma uhurta, artini padaoh hita ma bahaya ai.

12-13. Parlajouan aha do na dong sanggah i sikolah atap pe i parhorjaan, tapi aha ma na maningon ibahen hita?

¹² Pardiateihon ma sonaha hita boi manjaga uhurta. Domma iajarhon Jahowa ase ulang isobut hita “parriah-riahon ampa bagei ni habutakon”. (Ep. 5:3) Tapi sonaha anggo adong hasomanta i sikkolah atap pe i parhorjaan na marbuali pasal seks? Domma ibotoh hita maningon itulak hita do “uhur na so daulat ampa hisap-hisap dunia on”. (Tit. 2:12) Anjaha ra do homa songon na targanggu  panggora ni uhurta manangar hata ni sidea ai. (Rom 2:15) Tapi aha do na maningon ibahen hita? Ra do tarpingkir hita laho manangar atap pe manorih gambar na ididah sidea ai. Tapi ijon ma panorangni maningon itutup hita uhurta humbani bahaya ai, marhitei manggantih parbualan atap pe laho hunjai.

¹³ Tontu maningon barani do hita ase ulang mangihutkon pingkiran atap pe parlahou ni hasomanta na lepak. Anggo ibahen hita sonai, pos ma uhurta itonggor Jahowa do ai janah bereon-Ni ma hagogohon pakon hapentaran ase boi itulak hita pingkiran ni Sibolis. (2 Kron. 16:9; Jes. 40:29; Jak. 1:5) Leganni ai, aha ope na boi ibahen hita laho manjaga uhurta?

14-15. (a) Hubani aha do porlu ibuka hita uhurta, anjaha sonaha carani? (b) Domu bani Podah 4:20-22, sonaha carani ase lambin bagas pangarusionta sanggah mambasa Bibel? (Tonggor homa kotak “ Na Porlu Irimangi”.)

¹⁴ Ase boi ijaga hita uhurta lang sungkup pitah manulak na masambor, tapi maningon ibuka hita ma uhurta atap ijalo hita ma aha na dear. Pingkirhon ma use pasal sijaga horbangan ai. Maningon itutup sidea do horbangan ai porini roh munsuh. Tapi adong do panorangni maningon ibuka sidea horbangan ai anggo adong na roh mamboan sipanganon atap pe mambere pangurupion. Porini lang ongga ibuka sidea horbangan ai, boi ma gabe matei pangisi ni kota ai halani loheian. Sonai ma homa, maningon totap ma ibuka hita uhurta laho marlajar pasal pingkiran ni Naibata.

¹⁵ Ibagas Bibel bahat do ipatugah pasal sonaha pangahap ampa pingkiran ni Jahowa. Jadi anggo ibasa hita Bibel, lambin urah ma hita mangusihi pangahap, pingkiran, pakon pambahenan ni Jahowa. Tapi, sonaha carani ase lambin bagas pangarusionta sanggah mambasa Bibel? Maningon martonggo ma hita. Sada hasomanta naboru mangkatahon, “Martonggo do lobei ahu paima mambasa Bibel. Ai ma na mangurupi ahu mandapot parlajaran na maharga ibagas Bibel.” (Ps. 119:18) Leganni ai, maningon irimangi hita ma aha na ibasa hita. Jadi anggo hita martonggo, mambasa, ampa manrimangi isi ni Bibel, lambin hona ma ai ‘ibagas uhurta’. Anjaha lambin iharosuhkon hita ma pingkiran ni Jahowa.​—Basa Podah 4:20-22; Ps. 119:97.

16. Aha do gunani manonton JW Broadcasting?

¹⁶ Cara na legan hita boi mangusihi pingkiran ni Naibata ai ma marhitei manonton JW Broadcasting^®. Songon pangalaman ni sapasang suami istri na mangkatahon, “Pangahapnami, songon na hubannami do podah ni acara ai ibahen. Tarlobih sanggah pusok uhurnami atap pe lungunan, lambin toguh do uhurnami dobkonsi manonton acara ai. Gatih do homa hanami manangar doding na dong bani JW Broadcasting. Umpamani, sanggah mardahan, paborsihkon rumah, atap pe sanggah marsaran.” Hunjon tangkas ma ibotoh hita anggo manonton JW Broadcasting boi do mangurupi hita laho manjaga uhurta. Anjaha lambin boi ma iusihi hita pingkiran ni Jahowa sedo pingkiran ni Sibolis.

17-18. (a) Domu bani 1 Raja-Raja 8:61, anggo ihorjahon hita harosuh ni Jahowa, on patuduhkon halak na sonaha do hita? (b) Aha do na iparlajari hita humbani Raja Hiskia? (c) Domu bani tonggo ni si Daud na isurat bani Psalmen 139:23, 24, aha do na boi itonggohon hita?

¹⁷ Anggo iahapkon hita gunani mangkorjahon  harosuh ni Jahowa gabe lambin toguh ma haporsayaonta. (Jak. 1:2, 3) Megah ma uhur ni Naibata mangidah hita halani ibahen hita malas uhur-Ni, janah lambin marosuh ma hita mangkorjahon harosuh ni uhur-Ni. (Pod. 27:11) Sanggah dong parlajouan ulang ma hita gabe halak simolei-olei atap na mardua uhur. (Ps. 119:113) Tapi maningon totap ma hita mangidangi Jahowa humbani gok ni uhurta. Ipatuduh hita ma ai marhitei tongtong mandalankon parentah-Ni ampa mangkorjahon harosuh ni uhur-Ni.​—Basa 1 Raja-Raja 8:61.

¹⁸ Halani mardousa, gati do hita lepak. Songon Raja Hiskia na hinan, ongga do homa mambahen na lepak. Tapi mubah do ia anjaha totap do ia mangidangi Jahowa “ibagas bulat ni uhur”. (Jes. 38:3-6; 2 Kron. 29:1, 2; 32:25, 26) Halani ai marusaha ma hita ase ulang mangihutkon pingkiran ni Sibolis. Pindo ma bani Jahowa ase ibere hubanta “uhur na pantas”. (1 Raj. 3:9; basa Psalmen 139:23, 24.) Jadi anggo totap ijaga hita uhurta, ai do na mangurupi hita ase totap mangidangi Jahowa.