1-2. (a) Aha do gunani Jesaya 41:10 bani hasomanta si Yoshiko? (b) Bani ise do homa marguna tonah ni Jahowa ai?

IHATAHON dokter ma bani sada hasomanta naboru na margoran si Yoshiko anggo piga-piga bulan nari laho matei ma ia. Jadi sonaha ma pangahap ni si Yoshiko manangar ai? Mintor idingat ia ma ayat na iharosuhkon ia, ai ma Jesaya 41:10. (Basa.) Dob ai, ihatahon ia ma dear bani dokter ai lang mabiar ia halani ijolom Jahowa do tanganni. * Damei ma pingkiranni halani mardingat ayat ai janah lambin toguh do homa haporsayaonni bani Jahowa. Sonari on pe ayat ai boi mangapoh hita sanggah ibagas sitaronon. Ase boi iarusi hita, ulas hita ma lobei mase sonai ihatahon Jahowa bani si Jesaya.

² Sasintongni, isuruh Jahowa do si Jesaya manuratkon tonah-Ni ai laho mangapoh halak Jahudi na i habuangan Babel. Tapi lang pitah bani sidea tumang marguna tonah ai. Ronsi sonari pe marguna do homa ai banta. (Jes. 40:8; Rom 15:4) Tontu tarapoh do uhurta mambasa aha na ihatahon Naibata bani buku Jesaya, tarlobih ma halani hita manggoluh bani “ari hasunsahan”.​—2 Tim. 3:1.

3. (a) Janji aha do na dong bani Jesaya 41:10? (b) Mase janji ai boi gabe jaminan hubanta?

³ Bani artikel on, iulas hita ma tolu janji ni Jahowa na isurat bani Jesaya 41:10, na ipilih gabe ayat tahunan 2019. On ma tolu janji na boi patoguhkon uhurta: (1) Ihasomani Jahowa do hita, (2) Ia do Naibatanta, janah (3) Iurupi Ia do hita. Sada jaminan * humbani Jahowa  do ai na boi mangurupi hita. Songon si Yoshiko, hita pe marsitaronon do. Sunsah do homa hita halani bahat hajahaton na masa. Dong homa hasomanta na iparburu pamarentah halani haporsayaonni. Jadi ulas hita ma sonaha tolu janji ni Jahowa ai boi patoguhkon haporsayaonta.

4. (a) Aha do janji ni Naibata na parlobei? (Tonggor ma surat partoruh.) (b) Sonaha do pangahap ni Jahowa mangidah hita? (c) Dobkonsi mambotoh ai, sonaha ma pangahapmu?

⁴ Na parlobei marjanji do Jahowa, “Ulang ho mabiar, ai Ahu do hasomanmu.” * Ipatuduh Jahowa do ai marhitei tongtong mansarihon ampa mangkaholongi hita. Pardiateihon ma sonaha Jahowa patugahkon holong-Ni banta. Ia mangkatahon, “Harga do Huidah [hanima] anjaha na pinasangap, anjaha holong do uhur-Hu bam.” (Jes. 43:4) Jadi toguh do holong ni Jahowa bani juakjuak-Ni na setia. Lang dong na boi mambahen Ia manadingkon sidea. (Jes. 54:10) Halani mambotoh holong-Ni ai, gabe barani do hita. Ilinggomi Jahowa do homa hita songon Ia manlinggomi si Abram (si Abraham), hasoman-Ni ai. Nini Naibata do hu bani, “Ulang ho mabiar, ale Abram.”​—1 Mus. 15:1.

5-6. (a) Hunja do ibotoh hita anggo Jahowa sihol mangurupi hita sanggah marsitaronon? (b) Sonaha hita boi mangusihi si Yoshiko?

⁵ Sihol do Jahowa mangurupi hita sanggah marsitaronon. Ihatahon Ia do bani juakjuak-Ni, “Anggo ibontas ho bah, Ahu do hasomanmu, bani na mandipari bah banggal seng ayubkononni ho. Anggo mardalan ho hubagas apuy, seng anjai mosog ho, anjaha seng matutung ho bahenon ni gara ni apuy.” (Jes. 43:2) Aha do artini ai?

⁶ Lang marjanji Jahowa laho manalpuhon ganup hasunsahanta. Tapi marjanji do Ia seng paturuton-Ni parlajouan na songon “bah banggal” mangayubkon hita, atap pe hasunsahan na songon “gara ni apuy” mambahen maseda parhasomananta pakon-Si. Sai urupan-Ni do hita ase boi ‘ibontas’ hita ganup parlajouan ai. Sonaha bahenon-Ni? Iurupi do  hita laho manjaga parhasomananta hassi pe maningon matei hita. (Jes. 41:13) Sonai ma na iahapkon si Yoshiko. Boruni mangkatahon, “Malas uhurnami mangidah inang. Tangkas do ididah hanami sonaha Jahowa mangurupisi ase tongtong mangahapkon hadameion. Ronsi na laho matei pe ia, tongtong do ia patugahkon pasal Jahowa pakon janji-Ni bani perawat ampa pasien na legan.” Sonaha hita boi mangusihi si Yoshiko? Anggo porsaya hita bani janji ni Jahowa na mangkatahon “Ahu do hasomanmu”, gabe barani ma hita janah martahan hassi pe bahat hasunsahanta.

7-8. (a) Aha do janji ni Naibata na paduahon, janah aha do artini ai? (b) Mase ihatahon Jahowa bani halak Jahudi, “Ulang ho rusak”? (c) Aha do na ipatugah bani Jesaya 46:3, 4 na mambahen juakjuak ni Naibata lang be mabiar?

⁷ Pardiateihon ma janji ni Naibata na paduahon na isuratkon si Jesaya, “Ulang ho rusak, ai Ahu do Naibatamu.” Aha do artini hata “rusak” bani ayat ai? Hata aslini boi do igunahon bani sasada halak na lalab mangidah hu pudi halani mabiar dong holi halak na mambahen na jahat hu bani. Atap boi do homa hata ai igunahon bani sasada halak na holsohan halani ia dong ibagas situasi na marbahaya.

⁸ Mase ipatugah Jahowa bani halak Israel na i habuangan Babel ase ulang rusak? Halani Ia mambotoh mabiar do holi ganup halak na tading ijai. Mase mabiar sidea? Bani ujungni 70 tahun sidea i habuangan, laho roh ma tentara Madai pakon Persia na gogoh. Sidea ma na igunahon Jahowa laho paluahkon juakjuak-Ni hun Babel. (Jes. 41:2-4) Sanggah halak Babel pakon bangsa na legan mambotoh laho roh bangsa na gogoh ai, ipatoguh sidea ma samah sidea janah ihatahon, “Tenger ma uhurmu!” Dob ai ipauli sidea ma gana-gana halani iagan sidea ai do na boi manlinggomi sidea. (Jes. 41:5-7) Tapi anggo Jahowa, ipatoguh do juakjuak-Ni marhitei hata on, “Tapi ho, ale Israel, juakjuak-Ku ho [sedo songon bangsa na legan] . . . ulang ho rusak, ai Ahu do Naibatamu.” (Jes. 41:8-10) Pardiateihon ma ihatahon Jahowa, “Ahu do Naibatamu”. On patuduhkon seng ongga ihalupahon Jahowa juakjuak-Ni na setia. Tongtong do Ia gabe Naibata ni sidea, janah sidea pe tongtong do gabe juakjuak-Ni. Ia mangkatahon, “Ahu ma na mangombah . . . anjaha Ahu ma na paluahkon.” Tontu gabe toguh ma uhur ni halak Jahudi na i habuangan manangar ai.​—Basa Jesaya 46:3, 4.

9-10. Mase ulang mabiar hita? Saritahon ma sada contoh.

⁹ Bahat do halak na holsohan halani lambin parah do situasi ni dunia on. Anjaha dihut do homa hita marsitaronon halani ai. Tapi ulang pala mabiar hita. Ihatahon Jahowa do, “Ai Ahu do Naibatamu.” Mase ai boi mambahen hita lang mabiar?

¹⁰ Pardiateihon ma contoh on: Sanggah ibagas pesawat si Jim pakon si Ben, dong gangguan cuaca. Halani doras ni logou songon na idugur ma pesawat ai. Tapi dong ma sada sora na mamakei mik mangkatahon, “Dong otik gangguan. Pagomos nasiam ma sabuk pengaman.” Gabe mabiar ma si Jim manangar ai. Tapi dob ai ihatahon pilot ma, “Tugah-tugah humbani pilot do on. Ulang mabiar nasiam.” Ninuhur si Jim ma, “Naha bahenon lang mabiar domma sonon situasini?”  Tapi ididah ia otik pe lang mabiar si Ben. Jadi isungkun si Jim ma, “Mase lang mabiar ho ambia?” Tarsirom ma si Ben janah nini ma, “Hutanda do pilotni. Bapangku do in! Anggo itanda ho bapangku, janah ibotoh ho sonaha jagoni ia mamboan pesawat, pasti ho pe lang mabiar.”

11. Aha ma na boi iparlajari hita humbani dua penumpang i pesawat ai?

¹¹ Aha ma na boi iparlajari hita humbani contoh ai? Songon si Ben, lang mabiar hita halani domma itanda hita Jahowa, Bapanta in. Tongon bani panorang parpudi on, bahat do parsoalanta janah ra do ai songon haba-haba. Tapi pos ma uhurta sai urupan ni Jahowa do hita ase totap martahan. (Jes. 35:4) Anggo porsaya hita bani Jahowa, gabe damei ma pangahapta hassi pe holsohan ganup halak i dunia on. (Jes. 30:15) Anjaha tiru hita homa si Ben. Patugah ma bani na legan mase hita porsaya bani Jahowa. Dob ai porsaya ma holi sidea sai urupan ni Jahowa do sidea sanggah dong sitarononni.

12. (a) Aha do janji ni Naibata na patoluhon? (b) Aha do na iarusi hita sanggah manangar hata “tangan” ni Jahowa?

¹² Pardiateihon hita ma janji na patoluhon na isurat si Jesaya, “Hupargogohi pe ho, tongon Huurupi pe ho.” Domma ipatorang si Jesaya sonaha Jahowa mampargogohi juakjuak-Ni sanggah ia mangkatahon, “Tuhan Jahowa, roh ibagas hagogohon, anjaha tangan-Ni sandiri do na mandalankon kuasa Bani.” (Jes. 40:10) Gati do igunahon ibagas Bibel hata “tangan” laho patuduhkon hagogohan na lang tarsibar. Jadi sanggah ihatahon ‘tangan ni Jahowa na  mandalankon kuasa’, iarusi hita ma anggo Jahowa ai Raja na marhagogohon. Hagogohon-Ni ai do na igunahon Ia laho manlinggomi juakjuak-Ni hinan. Janah ronsi sonari pe totap do igunahon Ia hagogohan-Ni ai laho manjaga halak na porsaya hu Bani.​—5 Mus. 1:30, 31; Jes. 43:10.

13. (a) Bani situasi na sonaha do hita porlu ipargogohi Jahowa? (b) Janji aha do na ibere Jahowa laho patoguhkon uhurta?

¹³ Jahowa mangkatahon, “Hupargogohi pe ho.” Ipasaud Jahowa do janji-Ni ai tarlobih sanggah iparburu munsuh hita. Bani piga-piga ianan, marusaha do munsuhta manlarang horja parambilanonta. Hassi pe sonai ulang ma mabiar hita. Dong do jaminan humbani Naibata laho patoguhkon uhurta. Ia marjanji, “Sinjata na tinopa mangimbang ho, seng anjai mangasi.” (Jes. 54:17) Humbani ayat on, ibotoh hita ma dong tolu na laho masa hubanta.

14. Mase ulang pala tarsonggot hita porini iparburu munsuh hita?

¹⁴ Na parlobei, domma ibotoh hita idomdomi halak do holi hita halani mangihutkon Kristus. (Mat. 10:22) Domma ipatugah Jesus anggo susianni iparburu do holi bani panorang parpudi. (Mat. 24:9; Joh. 15:20) Na paduahon, domma ipatugah si Jesaya lang pitah mardomdom sidea, tapi igunahon do homa marbagei sinjata laho mangimbang hita. Umpamani ipasambor-sambor anjaha iarsik-arsik sidea do hita. (Mat. 5:11) Ra ipaturut Jahowa do masa ganupan ai hubanta. (Ep. 6:12; Pangk. 12:17) Tapi ulang ma mabiar hita halani ai. Mase?

15-16. (a) Aha do use na maningon idingat hita, anjaha sonaha Jesaya 25:4, 5 patorangkon ai? (b) Domu bani Jesaya 41:11, 12 aha do na laho masa bani munsuhta?

¹⁵ Domma ihatahon Jahowa “sinjata” aha pe na ipakei halak laho manlawan hita, “seng anjai mangasi” ai. On ma na  patoluhon na porlu idingat hita. Songon dingding na boi manlinggomi hita humbani haba-haba na mambahen hasedaon, sonai do Jahowa manlinggomi hita humbani ‘ondam-ondam ni halak sipangodoh-odoh’. (Basa Jesaya 25:4, 5.) Lang dong age aha pe na boi ibahen munsuh laho manaluhon hita.​—Jes. 65:17.

¹⁶ Ipatoguh Jahowa do haporsayaonta marhitei patugahkon aha na laho masa bani “halak na marah” hubanta. (Basa Jesaya 41:11, 12.) Lang soal sonaha gogohni sidea marusaha mangimbang hita, totap do sarupa hasilni: “Masab anjaha magou” do holi ganup munsuh ni Naibata.

17-18. (a) Aha do na boi ibahen hita ase lambin toguh haporsayaonta bani Jahowa? Patugah ma sada contoh. (b) Aha do gunani anggo iparimbagaskon hita ayat tahunan 2019?

¹⁷ Lambin toguh ma haporsayaonta bani Jahowa anggo lambin itanda hita Ia. Pitah sada do cara laho mananda Naibata ai ma marhitei tongtong mambasa Bibel anjaha marimbagaskon isini. Buei do parlajaran na isurat bani Bibel na gabe bukti sonaha Jahowa manlinggomi juakjuak-Ni sapari. Ganupan ai mambahen hita porsaya na isarihon Jahowa do homa juakjuak-Ni sonari.

¹⁸ Pardiateihon ma hata na igunahon si Jesaya laho patuduhkon sonaha Jahowa manlinggomi juakjuak-Ni. Isarupahon ia do Jahowa songon parmahan janah juakjuak-Ni songon biribiri. Pasal Jahowa ihatahon si Jesaya do, “Marhitei tangan-Ni ipatumpu sidea; iusung do anak ni biribiri ibagas abingan-Ni.” (Jes. 40:11) Anggo boi iahapkon hita tangan ni Jahowa mangabing hita, gabe sonang anjaha damei ma pangahapta. Jadi laho mangurupi hita ase boi totap damei hassi pe dong parsoalan, ipilih juakjuak na bujur anjaha na maruhur ma Jesaya 41:10 gabe ayat tahunan 2019: Ulang ho holsohan, ai Ahu do Naibatamu. Anggo iparimbagaskon hita ayat ai, gabe toguh ma hita hassi pe bahat sitaronon na laho masa bani ari simagira.