1. Aha do pengaruhni bani sada garama dobkonsi manangar sada ambilan i kebaktian tahun 1935?

BANI tahun 1926, dong sada garama na ididi sanggah ia marumur 18 tahun. Lima marsanina do ia, tolu dalahi anjaha dua naboru. Siswa-Siswa Alkitab do namatorasni. Anggo sonari igoran do ai Saksi Jahowa. Iajarhon namatorasni do sidea ase mangidangi Jahowa anjaha maniru Jesus Kristus. Tiap tahun somal do dalahi ai mangankon ruti ampa minum anggur bani acara Pardingatan. Tapi bani tahun 1935, lang be marpangarapan hu surga ia dobkonsi manangar ambilan ni Sanina J. F. Rutherford na marjudul “Humpulan na Banggal” bani kebaktian i Washington, DC, AS. Aha do na ipatugah bani ambilan ai?

2. Hasintongan aha ma na ipatorang Sanina Rutherford bani ambilanni?

² Bani ambilan ai, ipatorang si Rutherford ma ise do sasintongni na ihatahon “humpulan na banggal”. Sadokah on, iagan Siswa-Siswa Alkitab do anggo “humpulan na banggal” na isurat bani Pangungkabon 7:9, ai ma halak na marpangarapan hu surga, anjaha lang toguh parhasomananni pakon Naibata. Tapi ipatorang si Rutherford ma humbani Bibel anggo humpulan na banggal ai sedo halak na laho hu surga. Halak na laho manggoluh i tanoh on do sidea. Sidea ma na isobut biribiri legan * na laho ipaluah humbani “hamarsikon banggal”, janah manggoluh sadokah  ni dokahni i tanoh on. (Pangk. 7:14) Domma ihatahon Jesus, “Adong ope biribiringku na legan, na so humbani harang on. Sidea pe dihut do arahkononku, anjaha tangihonon ni sidea do sorangku, gabe sada hulanan ma ai anjaha sada parmahan.” (Joh. 10:16) Jadi biribiri na legan on, ai ma Saksi-Saksi Jahowa na tongtong setia bani Jahowa janah marpangarapan manggoluh sadokah ni dokahni i Paradeiso. (Mat. 25:31-33, 46) Halani ai, ulas hita ma aha do pengaruhni hatorangan ai bani Saksi-Saksi Jahowa na legan, tarmasuk ma hubani garama na marumur 18 tahun ai.​—Ps. 97:11; Pod. 4:18.

3-4. Bani kebaktian tahun 1935, aha ma na iarusi bahat hasomanta, janah mase?

³ Bani kebaktian ai, gabe malas tumang ma uhur ni hadirin dobkonsi ihatahon siparambilan sonon, “Jongjong ma nasiam na marpangarapan manggoluh i tanoh on.” Humbani 20.000 halak na roh, dong satongah lobih na jongjong. Dob ai, ihatahon si Rutherford ma, “Tonggor ma! On ma humpulan na banggal ai!” Gabe marsurak ma sidea halani malas ni uhurni. Ibotoh sidea do lang ipilih Naibata sidea laho manggoluh hu surga, tapi i tanoh on do. Patarni, dong 840 halak na ididi, janah bahatan do sidea ai biribiri na legan.

⁴ Dobkonsi kebaktian ai, garama na marumur 18 tahun ai pakon hasoman na legan, lang be mangan ruti ampa minum anggur bani acara Pardingatan. Dong sada sanina na mangkatahon, “Dobkonsi tahun 1935, lang be dihut ahu mangan ruti ampa minum anggur bani acara Pardingatan. Hubotoh do lang ipilih Naibata ahu marhitei tonduy-Ni laho manggoluh hu surga. Tapi marpangarapan manggoluh i tanoh on do ahu janah mambahen tanoh on gabe Paradeiso. Taridah ma martoruh ni uhur do sanina ai, anjaha bahat do hasomanta na sarupa pangahapni pakonsi. (Rom 8:16, 17; 2 Kor. 1:21, 22) Dobkonsi ari ai, sai lambin bahat do halak na gabe humpulan na banggal, janah rap marhorja do sidea pakon halak na iminaki na manggoluh ope i tanoh on.

5. Sonaha pangahap ni Jahowa bani hasomanta na lang be mangan ruti ampa minum anggur bani acara Pardingatan?

⁵ Sonaha ma pangahap ni Jahowa mangidah hasomanta na lang be mangan ruti ampa minum anggur dobkonsi tahun 1935? Anjaha sonaha porini sonari dong hasomanta na mangan ruti ampa minum anggur, hape ujungni sadar ma ia sedo halak na iminaki ia? (1 Kor. 11:28) Dong piga-piga hasomanta na mangan ruti ampa minum anggur halani lang iarusi sidea pangarapanni. Tapi anggo ra sidea mangaku salah, mambahen hamubahon, janah setia mangidangi Jahowa, totap do ihira Jahowa sidea biribiri na legan. Hassi pe lang dihut sidea mangan ruti ampa minum anggur, tapi totap do sidea roh hu acara Pardingatan. Sihol do sidea patuduhkon tarima kasih bani Jahowa ampa Jesus.

6. Aha do na iparentahkon Jesus hubani malekat-malekat?

⁶ Halani domma lambin dohor hamarsikon banggal, dear do anggo iulas hita na ihatahon bani Pangungkabon bindu 7, pasal halak na iminaki ampa biribiri na  legan. Ijai ihatahon, iparentahkon Jesus do bani malekat-malekat ase ulang lobei ipalopas sidea logou na laho pasedahon tanoh on paima ibere materai bani ganup halak na iminaki. Maksudni, paima iputuskon Jahowa anggo halak na iminaki ai totap setia hu Bani. (Pangk. 7:1-4) Anggo totap setia sidea, ibahen ma sidea gabe raja ampa malim i surga. (Pangk. 20:6) Tontu tarpaima-ima do ganup na i surga laho mangidah na 144.000 ai manggoluh i surga.

7. Domu bani Pangungkabon 7:9, 10, ise do na itonggor si Johannes, janah aha do na ibahen sidea? (Tonggor ma gambar bani sampul.)

⁷ Dobkonsi itonggor si Johannes 144.000 ai ibahen gabe raja ampa malim, itonggor ia ma homa dong “humpulan na banggal” na maluah humbani Harmagedon. Daoh do bahatan bilanganni humpulan na paduahon on marimbangkon humpulan na parlobei ai. (Basa Pangungkabon 7:9, 10.) ‘Marhiou putih’ do sidea. Artini, ijaga sidea do dirini ase ‘ulang butak humbani dunia on’. Janah totap do setia sidea hubani Naibata ampa Jesus. (Jak. 1:27) Marsurak do sidea ibagas malas ni uhur halani Jahowa pakon Jesus domma paluahkon sidea. Dob ai, iboan sidea do homa bulung-bulung ni palem. On patuduhkon marmalas ni uhur do sidea halani domma ilantik Jahowa Jesus gabe Raja.​—Bandingkon Johannes 12:12, 13.

8. Domu bani Pangungkabon 7:11, 12, sonaha ma pangahap ni Jahowa, Jesus, malekat, ampa ganup halak na iminaki mangidah humpulan na banggal?

⁸ Basa Pangungkabon 7:11, 12. Dobkonsi ganup na i surga mangidah humpulan na banggal ai, aha ma na masa? Ididah si Johannes ma malas tumang uhur ni sidea, anjaha ipuji sidea ma Naibata. Marolob-olob do sidea sanggah mangidah humpulan na banggal ai ipaluah humbani hamarsikon banggal.

9. Domu bani Pangungkabon 7:13-15, aha do na ihorjahon humpulan na banggal ai ronsi sonari?

⁹ Basa Pangungkabon 7:13-15. Ididah si Johannes ma “domma iburihi [humpulan na banggal] hiou ni sidea anjaha ipaputih ibagas daroh ni Anak ni biribiri in”. On patuduhkon domma borsih panggora ni uhur ni sidea, janah malas do uhur ni Jahowa mangidah sidea. (Jes. 1:18) Domma mangondoskon diri sidea bani Naibata janah ididi. Porsaya do homa sidea bani tobusan ni Jesus, anjaha orot do parhasomanan ni sidea pakon Jahowa. (Joh. 3:36; 1 Ptr. 3:21) Halani ai ma sidea boi marugas hubani Naibata “arian pakon borngin”. Ronsi sonari pe, ipalobei sidea do Harajaon ni Naibata ibagas goluhni. Ringgas do sidea marbarita, anjaha mangurupi halak gabe susian ni Jesus.​—Mat. 6:33; 24:14; 28:19, 20.

10. Aha do na ihaporsayai humpulan na banggal, janah janji aha do na ipaima-ima sidea?

¹⁰ Porsaya do humpulan na banggal ai sai tongtong do isarihon Jahowa sidea, halani Naibata “na hundul bani paratas ai ma, paherbangkon lampolamponi i atas ni sidea”. Sai ipaima-ima sidea do saud janji ni Naibata na isurat bani Bibel. Ihatahon, “Apusan-Ni ma sagala iluh humbani mata ni sidea, seng dong be hamatean, age pusok ni uhur, age partangisan, age halojaon seng dong be.”​—Pangk. 21:3, 4.

11-12. (a) Domu bani Pangungkabon 7:16, 17, pasu-pasu aha do na laho ibere bani humpulan na banggal bani ari simagira? (b) Mase biribiri na legan roh hu acara Pardingatan hamatean ni Jesus?

¹¹ Basa Pangungkabon 7:16, 17. Tongon,  sonari on dong do piga-piga hasomanta na kelaparan halani lang sungkup duitni mamboli sipanganon, atap halani dong porang i nagorini. Dong homa na ipenjarahon halani haporsayaonni. Tapi, marmalas ni uhur do sidea halani ibotoh sidea do dobkonsi iripaskon dunia na jahat on, gabe bahat do holi sipanganon, janah tongtong do sidea iajari Jahowa. Anjaha sanggah iripaskon dunia on, ilinggomi do sidea. Dobkonsi ai, itogu-togu Jesus ma sidea hu “bah tubuh hagoluhan [na sadokah ni dokahni]”. Bayangkon ma sonaha dearni pangarapan ni sidea ai. Humbani marmiliar jolma na ongga manggoluh i tanoh on, sidea ma na lang ongga matei.​—Joh. 11:26.

¹² Halani pangarapan ai, martarima kasih do biribiri na legan hubani Jahowa ampa Jesus. Hassi pe sidea lang ipilih hu surga, tapi holong do homa uhur ni Jahowa hubani sidea. Tontu martarima kasih tumang do biribiri na legan ampa halak na iminaki hubani Jahowa pakon Jesus. Halani ai ma roh sidea hu acara Pardingatan hamatean ni Jesus.

13-14. Mase ganup hita maningon roh hu acara Pardingatan hamatean ni Jesus?

¹³ Sonari on, humbani 1.000 halak na roh hu acara Pardingatan, pitah 1 dassa na mangan ruti ampa minum anggur. On artini bahatan do sanina botou i kuria lang mangan ruti ampa minum anggur. Jadi bahatan do hadirin acara Pardingatan ai marpangarapan manggoluh i tanoh on. Anggo sonai, mase ma sidea roh hu acara Pardingatan hamatean ni Jesus? On boi ipados songon pesta parhajabuan. Bahat do hasoman ni na marjabu ai roh hu pesta ai halani holong do uhur ni sidea hubani na marhajabuan ai. Sihol do homa sidea mangurupi hasomanni na marjabu ai. Sonai homa ma biribiri na legan, roh hu acara Pardingatan halani holong do uhur ni sidea hubani Jesus pakon halak na iminaki. Sihol do homa biribiri na legan mangurupi sidea. Martarima kasih do homa biribiri na legan bani Jahowa pakon Jesus, halani marhitei tobusan, gabe boi  do sidea marpangarapan laho manggoluh sadokah ni dokahni i tanoh on.

¹⁴ Alasan na legan mase biribiri na legan roh hu acara Pardingatan, ai ma laho mandalankon parentah ni Jesus. Sanggah Jesus mamungkah acara ai pakon apostelni, nini do, “Bahen nasiam ma sonin, gabe pardingatan bangku.” (1 Kor. 11:23-26) Jadi anggo dong ope halak na iminaki i tanoh on, totap do biribiri na legan ai roh hu acara Pardingatan. Anjaha, iontang sidea do homa halak na legan ase dihut hu acara ai.

15. Sonaha hita boi mamuji Naibata ampa Jesus bani acara Pardingatan?

¹⁵ Bani acara Pardingatan, ijai do homa hita mamuji Naibata pakon Jesus marhitei doding ampa tonggo. Judul ni ambilan na laho ipadas bani tahun on, ai ma “Argai ma Aha na Domma Ibahen Kristus Hubanta!” Marhitei ambilan ai, lambin martarima kasih do hita hubani Jahowa ampa Jesus. Sanggah ruti ampa anggur iedarhon, gabe idingat hita ma angkula ampa daroh ni Jesus. Idingat hita ma use domma ibere Jahowa Anakni gabe tobusan laho mangkopkop hita. (Mat. 20:28) Halani ai, anggo holong uhurta hubani Jahowa pakon Jesus, tontu sihol do uhurta ase roh hu acara Pardingatan ai.

16. Aha ma na sarupa bani halak na iminaki pakon biribiri na legan?

¹⁶ Sasintongni maharga do bani Jahowa ganup halak na iminaki pakon biribiri na legan. Anak-Ni do na ibere Ia laho manobus sidea. Jadi, pitah pangarapan ni sidea dassa na lang sarupa. Tapi, lang soal sidea ai halak na iminaki atap pe biribiri na legan, maningon totap do setia sidea hubani Jahowa pakon Jesus. (Ps. 31:24) Anjaha ganup do sidea manjalo tonduy na pansing domu bani haporluanni bei.

17. Aha do na ipaima-ima halak na iminaki na dong ope i tanoh on?

¹⁷ Sedo humbani tubuh halak na iminaki mandapot pangarapan hu surga. Tapi Naibata do na mambere pangarapan ai ibagas uhur ni sidea. Jadi ipingkirhon sidea ma pangarapan ai, itonggohon, anjaha gabe malas do uhur ni sidea manjalo ai. Lang boi ibayangkon sidea sonaha do holi rupa ni sidea dobkonsi naik hu surga. (Pil. 3:20, 21; 1 Joh. 3:2) Hassi pe sonai, sai tarpaima-ima do sidea boi mangidah Jahowa, Jesus, malekat-malekat, ampa halak na iminaki na dob manggoluh i surga. Janah boi ma holi sidea rap mamarentah pakon Jesus.

18. Aha do na ipaima-ima biribiri na legan?

 ¹⁸ Mangarap do homa biribiri na legan boi manggoluh sadokah ni dokahni i tanoh on. Sasintongni, ai do harosuhni ganup jolma. (Par. 3:11) Ipaima-ima sidea do boi mambahen tanoh on gabe paradeiso. Sihol do sidea pajongjongkon rumahni sandiri, marjuma sandiri, marniombah, anjaha sehat ganup niombahni. (Jes. 65:21-23) Sihol do homa sidea mardalani huja pe sihol uhurni. Umpamani mangidah marmasam dolog, harangan, laut, ampa mamparlajari ganup tompaon ni Jahowa. Tapi na sipontingan, sihol tumang do sidea ase lambin orot parhasomananni pakon Jahowa.

19. Sanggah acara Pardingatan, aha ma na boi ibahen hita, janah attigan ma acara ai ibahen bani tahun on?

¹⁹ Tangkas ma, dear tumang do pangarapan na ibere Jahowa hubani ganup juakjuak-Ni. (Jer. 29:11) Halani ai, bani acara Pardingatan hamatean ni Jesus, ganup hita boi mamuji Naibata ampa Jesus na dob mambere pangarapan hagoluhan na sadokah ni dokahni. Tontu, acara Pardingatan on ma acara na sipontingan hubani halak Kristen. Bani tahun on, acara ai ibahen ari Sabtu tanggal 27 Maret 2021, dobkonsi sundut mata ni ari. Tongon, bahat do holi sanina botou na roh hu acara ai. Tapi dong na lang boi roh halani dong tantanganni. Umpamani, halani ipenjarahon ra do sahalaksi na mambahen acara ai i penjara. Hassi pe sonai, pos ma uhurta ipardiateihon Jahowa do hita. Dong homa Jesus, malekat-malekat, ampa halak na iminaki na mangidah hun surga sanggah hita mambahen acara ai. Jadi, andohar ma hita boi mambahen acara ai lang soal hita i kuria, i kalompok, atap pe sahalakta.