1. Sonaha ma pangahapta halani mambotoh holong tumang do Naibata hubanta?

SI JOHANNES mangkatahon, “Naibata ai ma haholongon.” (1 Joh. 4:8) Hunjai gabe ibotoh hita ma, Naibata do bah tubuh hagoluhan. Tapi sedo pitah ai, Ia do homa harohanni holong. Holong tumang do uhur ni Jahowa hubanta. Halani ai, gabe martuah anjaha damei ma pangahapta.

2. Domu bani Mateus 22:37-40, dua titah na ija do na sibanggalan, janah mase lang urah iahap hita mandalankon bagian na paduahon?

² Dong dua titah na sibanggalan, na parlobei ai ma mangkaholongi Naibata. Anjaha na paduahon ai ma mangkaholongi jolma. Maningon idalankon halak Kristen do titah ai. (Basa Mateus 22:37-40.) Ra do urah iahap hita mandalankon bagian na parlobei ai, halani domma ibotoh hita dear tumang do paruhuran ni Naibata janah bujur tumang do Ia hubanta. Tapi, ra do lang urah iahap hita mandalankon bagian na paduahon. Mase? Halani lang dong sanina botou na sempurna. Sipata ra do borit uhurta halani parsahap ampa pambahenan ni sidea. Ibotoh Jahowa do homa ai. Halani ai, itogu-togu Ia ma apostel Johannes ampa piga-piga dalahi na manuratkon Bibel, laho patorangkon mase porlu hita marsihaholongan janah sonaha carani.​—1 Joh. 3:11, 12.

3. Aha do na iojur si Johannes bani halak Kristen?

³ Ibagas suratni marulak-ulak do ihatahon si Johannes ase halak Kristen patuduhkon holong. Sasintongni si Johannes do na gatinan manuratkon pasal “holong” marimbangkon tolu panurat Injil na legan. Sanggah ia manuratkon Injil ampa tolu suratni, domma marumur hira-hira  saratus tahun ia. Humbani suratni ibotoh hita ma anggo halak Kristen maningon tongtong patuduhkon holong. (1 Joh. 4:10, 11) Tapi mungkahni dokah do ase iarusi ia pasal holong ai.

4. Ai tongtong do si Johannes patuduhkon holong? Patorang.

⁴ Sanggah poso ope si Johannes, lang sai iarusi ia sonaha patuduhkon holong. Umpamani, sanggah ia, apostel na legan, pakon Jesus ibagas pardalanan hu Jerusalem, montas ma sidea hun Samaria. Tapi, lang ijalo halak Samaria sidea marborngin ijai. Jadi aha ma na ibahen si Johannes? Ipindo ia ma ase ipaturun sidea apuy hun langit laho mamboiskon sinhuta ai. (Luk. 9:52-56) Dong homa contoh na legan na patuduhkon anggo ia lang mangkaholongi hasomanni. Ra do ia pakon si Jakobus saninani ai na manuruh inangni manjumpahi Jesus, laho mangindo ase ibere sidea hundul i siamun ampa sambilou ni Jesus bani Harajaonni. Gabe manggila ma apostel na legan dob mambogei pasal ai. (Mat. 20:20, 21, 24) Hassi pe sonai, totap do holong uhur ni Jesus mangidah si Johannes.​—Joh. 21:7.

5. Aha ma na laho iulas hita bani artikel on?

⁵ Bani artikel on holi iulas hita ma sonaha hita boi mangusihi si Johannes, janah aha do na isuratkon ia pasal holong. Dob ai, iulas hita homa sonaha hita patuduhkon holong bani sanina botou. Anjaha iulas hita homa sonaha kopala kaluarga patuduhkon holong hubani kaluargani.

6. Aha do na patuduhkon anggo Jahowa mangkaholongi hita?

⁶ Ra do nini uhurta anggo holong hita bani na legan tontu dear ma parsahapta hubani sidea. Tapi lang sungkup pitah ai! Maningon taridah do homa holong ai marhitei pambahenanta. (Bandingkon Jakobus 2:17, 26.) Umpamani, holong do uhur ni Jahowa mangidah hita. (1 Joh. 4:19) Anjaha ipatugah Ia do ai marhitei Bibel. (Ps. 25:10; Rom 8:38, 39) Tapi lang pitah ai. Taridah do homa holong-Ni ai marhitei pambahenan-Ni. Si Johannes mangkatahon, “Hunjon do gabe talar holong ni uhur ni Naibata banta, ai ma humbani na dob sinuruh-Ni Anak-Ni na sasada in hu dunia on, ase manggoluh hita marhiteihonsi.” (1 Joh. 4:9) Ipaturut Jahowa do anak-Ni manaron hamateian laho mangkopkop hita. (Joh. 3:16) Hunjon tangkas ma tongon do ihaholongi Jahowa hita.

7. Sonaha Jesus mambuktihon anggo ia mangkaholongi hita?

 ⁷ Ihatahon Jesus do bani susianni anggo ia mangkaholongi sidea. (Joh. 13:1; 15:15) Tapi lang pitah sahap ai, ipatuduh ia do ai marhitei pambahenanni. Halani ai ma ase ihatahon sonon, “Seng dong holong sibanggalan, anggo iberehon sada halak hosahni mangkopkop hasomanni.” (Joh. 15:13) Jadi aha ma na maningon bahenonta anggo irimangi hita pambahenan ni Jahowa ampa Jesus hubanta?

8. Domu bani 1 Johannes 3:18, aha ma na maningon ibahen hita?

⁸ Anggo holong do uhurta bani Jahowa pakon Jesus, tontu idalankon hita do parentah ni sidea. (Joh. 14:15; 1 Joh. 5:3) Iparentahkon Jesus do ase marsihaholongan hita. (Joh. 13:34, 35) Tapi ulang ma pitah hata dassa ai. Patuduh ma anggo hita mangkaholongi sanina botou marhitei pambahenanta. (Basa 1 Johannes 3:18.) Sonaha carani hita mangkorjahon ai?

9. Halani holong, aha do na ibahen si Johannes?

⁹ Halak na bayak do si Johannes janah dong do usaha penangkapan ikan ni kaluargani. Sasintongni boi do itoruskon ia usaha ni bapani ai. Tapi, lang ipilih ia ai. Rosuhan do ia mangajarhon hasintongan pasal Jahowa ampa Jesus Kristus bani halak na legan. Halani ai pilihanni, gabe iparburu janah ipenjarahon do ia. Umpamani, dob matua ia, ibuang do ia hu pulou Patmos bani ujungni abad na parlobei. (Lah. 3:1; 4:1-3; 5:18; Pangk. 1:9) Hassi pe sonai, totap do ipingkiri ia halak na legan. Ijai isurat ia ma panonggoran na dapotsi janah ikirim ma ai hu kuria-kuria, ase ibotoh sanina botou aha na laho “masa”. (Pangk. 1:1) Leganni ai, dob ibebaskon ia hun Pulou Patmos, isuratkon ia do Injil na mansaritahon pasal pangidangion ni Jesus. Itulis ia do homa tolu surat laho mangojur ampa patoguhkon uhur ni sanina botou. Sonaha hita boi maniru holong na ipatuduh si Johannes ai?

10. Sonaha hita patuduhkon anggo hita mangkaholongi halak na legan?

¹⁰ Marhitei haputusanta taridah ma anggo hita mangkaholongi halak na legan. Tapi sihol do dunia on ase hita mangunahon panorangta laho mangindahi na porlu bani dirinta sandiri, mangindahi habayakon, atap pe gabe halak na tarsar. Hassi pe sonai bahat do sanina botou i sab dunia on, na manggunahon panorangni laho mangambilankon barita na madear janah mangurupi halak ase lambin orot bani Jahowa. Anjaha bahat do homa sidea na mangidangi ibagas dinas sepenuh waktu.

11. Sonaha hasomanta patuduhkon holong bani Jahowa ampa sanina botou na legan?

¹¹ Bahat do hasomanta na maningon marhorja sadari bod ase boi mansarihon kaluargani. Hassi pe sonai, marusaha do sidea mangurupi horja i organisasi. Umpamani, dong na mangurupi sanggah dong bencana alam, dong na dihut pajongjongkon Balei Harajaon, janah dong homa na mambere sumbangan laho mangurupi horja parambilanon i sab dunia on. Ganupan ai ihorjahon sidea halani mangkaholongi Naibata ampa sanina botou. Ipatuduh sidea do homa holongni bani sanina botou marhitei roh hu partumpuan ampa mambere komentar. Age pe loja, marusaha do sidea roh hu partumpuan. Hassi pe dong na mabiar, tapi  marusaha do sidea mambere komentar. Anjaha hassi pe dong bei do masalahta tapi marusaha do hita laho patoguhkon sanina botou i partumpuan. (Heb. 10:24, 25) Tontu malas tumang do uhurta mangidah haringgason ni ganup hasomanta ai.

12. Aha ope na ibahen si Johannes laho patuduhkon holongni bani sanina botou?

¹² Ipatuduh si Johannes do homa holongni hubani sanina botou marhitei mamuji sidea. Umpamani, marhitei suratni ipuji ia do horja na dear ampa haporsayaon na ipatuduh sidea. Tapi lang pitah ai. Anggo adong sidea na mardousa, dear do ipodahi anjaha ipasingat ia sidea. (1 Joh. 1:8–2:1, 13, 14) Sonai ma homa na ibahen hita. Anggo adong na dear na ihorjahon sanina botou, porlu do homa sidea ipuji. Tapi anggo adong na lepak pambahenanni, maningon barani do hita pasingatkon sidea, tapi dear ma carani. Songon na ihatahon bani Bibel, maningon ipamarot hita ma hasomanta. Artini maningon ra do hita samah hita marsipodahan.​—Pod. 27:17.

13. Aha ma na lang boi ibahen hita?

¹³ Tapi, dong do na lang boi ihorjahon hita laho patuduhkon holongta bani sanina botou. Umpamani, ulang ma urahtu borit uhurta dob manangar aha na ihatahon hasoman. Pardiateihon ma aha na masa sanggah Jesus i tanoh on. Ihatahon ia do bani susianni ase boi sidea mandapot hagoluhan na sadokah ni dokahni maningon ipangan sidea do dagingni janah iinum darohni. (Joh. 6:53-57) Halani ai, bahat do susianni na tarsonggot janah manadingkon ia. Tapi dong do na totap mangihutkonsi, tarmasuk ma si Johannes. Sasintongni tarsonggot do homa sidea manangar aha na ihatahon Jesus, janah lang homa iarusi sidea aha do maksudni. Hassi pe sonai, pos do uhur ni sidea lang dong na lepak na ihatahon Jesus ai. Porsaya do sidea hasintongan do ganup na ihatahon Jesus. Halani ai, lang borit uhur ni sidea bani Jesus. (Joh. 60:60, 66-69) Sonai ma homa na ibahen hita, ulang ma urahtu borit uhurta manangar aha na ihatahon hasoman. Anggo lang iarusi hita maksudni, sungkun ma bani sidea, ase boi ipatorang sidea hubanta.​—Pod. 18:13; Par. 7:9.

14. Mase lang boi hita mardomdom hubani sanina botounta?

¹⁴ Iojur si Johannes do homa hita ase  ulang mardomdom hubani sanina botou. Anggo lang idalankon hita podahni ai, gabe igunahon Sibolis ma hita laho mamosah kuria. (1 Joh. 2:11; 3:15) Ai do na masa bani ujungni abad na parlobei. Marusaha do Sibolis mambahen ase sanina botou lang be marsihaholongan. Ujungni gabe marposah ma sidea. Sanggah ai, itulis si Johannes do bani suratni dong piga-piga dalahi na mangusihi Sibolis laho mambahen parposahan i kuria. Umpamani si Diotrepes, lang hormat ia bani sintua kaliling na isuruh pangurus pusat hu kuria-kuria. (3 Joh. 9, 10) Marusaha do homa ia pakaluarhon ise pe na ra manjalo halak na lang iharosuhkon ia. Jahat tumang do pambahenanni ai! Sonari on pe, marusaha do homa Sibolis mambahen ase lang marsada hita. Halani ai ulang ma ra hita marsogam ni uhur bani hasomanta.

15. Aha do na maningon idingat kopala kaluarga?

¹⁵ Sada cara kopala kaluarga boi patuduhkon holongni hubani kaluarga marhitei pasirsirhon haporluan ni sidea. (1 Tim. 5:8) Tapi lang sungkup pitah ai! Maningon iurupi ia do homa kaluargani ase lambin orot bani Jahowa. (Mat. 5:3) Pardiateihon ma siusihan na ibahen Jesus. Songon na ipatugah si Johannes bani Injil, sanggah Jesus igantung bani sada hayu totap do ipingkirhon ia kaluargani. Sanggah ai, ididah Jesus ma si Johannes jongjong i dohor ni si Maria inangni ai. Hassi pe marsik tumang sitarononni, ipindo ia do bani si Johannes ase mansarihon inangni. (Joh. 19:26, 27) Sasintongni dong do anggi ni Jesus ampa botouni na boi mansarihon si Maria. Tapi ondi ai, sada pe sidea lape dong na gabe susianni. Halani ai sihol do Jesus ase ulang pitah haporluanni inangni ai dassa na isarihon. Tapi ase iurupi do homa ia totap mangidangi Jahowa.

16. Aha deba tanggung jawab ni si Johannes?

¹⁶ Sasintongni borat do tanggung jawab ni si Johannes. Ijia dihut do homa ia mambobahon horja parambilanon. Anjaha ra do homa domma marhajabuan ia. Jadi maningon isarihon ia do kaluargani janah mangurupi sidea totap dohor bani Jahowa. (1 Kor. 9:5) Aha ma na boi iparlajari kopala kaluarga humbani si Johannes?

17. Mase ponting tumang kopala kaluarga mangurupi kaluargani ase totap dohor bani Jahowa?

 ¹⁷ Ra, bahat do homa tanggung jawabni kopala kaluarga sonari on. Umpamani, maningon ringgas do sidea i parhorjaan janah dear parlahouni ase ipasangap goran ni Jahowa. (Ep. 6:5, 6; Tit. 2:9, 10) Janah ra do homa dong tanggung jawabni i kuria. Umpamani, maningon ipardiateihon janah ipatoguh ia do sanina botou na legan. Maningon siusihan do homa ia sanggah marbarita. Hassi pe sonai ponting tumang do ase ia totap mansarihon istri ampa anakni, anjaha mangurupi sidea ase totap dohor bani Jahowa. Tontu martarima kasih tumang do kaluargani ai hu bani.​—Ep. 5:28, 29; 6:4.

18. Aha ma na ihaporsayai si Johannes?

¹⁸ Bahat do pasu-pasu na iahapkon si Johannes ibagas goluhni. Tongon sai adong do sitaronon na roh hu bani, janah boi do ai mambahen galek haporsayaonni. Hassi pe sonai marusaha do ia mandalankon ganup parentah ni Jesus, tarmasuk mangkaholongi sanina botou. Hasilni porsaya do ia holong do uhur ni Jahowa ampa Jesus hu bani. Anjaha iurupi sidea do ia ase totap martahan ibagas sitarononni. (Joh. 14:15-17; 15:10; 1 Joh. 4:16) Age pe domma marusaha Sibolis ase ia lang mandalankon parentah ni Naibata, tapi lang ra si Johannes. Totap do ihaholongi ia sanina botou. Anjaha taridah do ai humbani parsahap ampa pambahenanni.

19. Domu bani 1 Johannes 4:7, parentah aha do na ibere bani halak Kristen, janah mase?

¹⁹ Humbani na hinan ronsi sonari bahat do halak i dunia on na lang marsihaholongan. (1 Joh. 3:1, 10) Anjaha marusaha do homa Sibolis ase hita mangihutkon halak i dunia on. Tapi lang tarbahensi ai anggo lang ra hita. Halani ai marusaha ma hita mangkaholongi sanina botounta. Patuduh ma holong ai marhitei parsahap ampa pambahenanta. Anggo ibahen hita sonai, gabe kaluarga ni Jahowa ma hita anjaha marmalas ni uhur ma hita.​—Basa 1 Johannes 4:7.